Toera kukomeresa Yahova, tisafunika kukhala na cikhulupiro. Mbwenye Bhibhlya isalonga kuti “cikhulupiro nee ndi cinthu cakuti anthu onsene ali naco.” (2 Ates. 3:2) Pidalonga mpostolo Paulu mafala anewa, iye akhalonga “anthu akuipa na anyakuipa mitima,” pyenepi pisabveka, anthu akhantcinga. Mbwenye pidalonga iye thangwi ya cikhulupiro pisaphatambo basa kuna anthu anango. Anthu anango nee asakhulupira kuti ndi Mulungu adacita pinthu pyonsene. (Aroma 1:20) Anango asalonga kuti asakhulupira Mulungu. Mbwenye pyenepi nee ndi pyakukwana toera kukomeresa Yahova.

Ife tisafunika kukhulupira kuti Yahova alipo, pontho iye asapasa nkhombo ale anankhulupira na ntima onsene. (Aheb. 11:6) Cikhulupiro ndi nsapo wa nzimu wakucena. Pontho toera titambire nzimu wakucena, tisafunika kuuphemba Yahova. (Luka 11:9, 10, 13) Cinthu cinango cinafunika ife kucita toera titambire nzimu wakucena ndi kuleri Mafala a Mulungu. Tisafunikambo kunyerezera pinaleri ife na kuphatisira pidapfundza ife. Tingacita pyenepi, nzimu wakucena unatiphedza toera kukhala na cikhulupiro cinakomeresa Yahova.