NSOLO WA PFUNDZIRO 23
NYIMBO 28 Mbani Anakhala Xamwali wa Yahova?
Yahova Asaticemera Toera Tikhale Alendo Ace
‘Nsasa wanga unadzakhala pakati pawo, pontho ine ndinadzakhala Mulungu wawo.’—EZEK. 37:27.
PINAFUNA IFE KUPFUNDZA
Nsolo uno unatiphedza kubvesesa kuti pisabvekanji kukhala mulendo pa nyumba ya Yahova, pontho iye asatitsalakana tani ninga alendo pa nyumba pace.
1-2. Ndi ncemerero upi unapereka Yahova kuna atumiki ace akukhulupirika?
MUNTHU angakubvundzani kuti Yahova mbani, munantawira tani? Panango imwe munalonga kuti iye ndi ‘Pai wanga, Mulungu wanga na Xamwali wanga.’ Pontho pana pidzo pinango peno mafala anango akuti munakwanisa kuaphatisira toera kulonga thangwi ya Yahova. Kodi imwe mwanyerezera kale kuti ndimwe mulendo wa Yahova?
2 Pikhalonga iye thangwi ya uxamwali na Yahova, Mambo Dhavidhi alandanisa Yahova na nyakutambira alendo, pontho alambiri ace ninga alendo. Dhavidhi abvundza: “Yahova, mbani anafuna khala mulendo panyumba panu? Mbani anafuna kukhala paphiri yanu yakucena?” (Mas. 15:1) Vesi ineyi yapangiza kuti ife tinakwanisa kukhala alendo panyumba ya Yahova, peno tinakwanisa kukhala axamwali ace. Unoyu ndi ncemerero wadidi kakamwe unapereka Yahova kuna ife.
YAHOVA ASAFUNA KUTI TIKHALE ALENDO ACE
3. Mbani akhali mulendo wakutoma wa Yahova, pontho uxamwali wawo ukhali tani?
3 Mbadzati kutoma kucita pinthu pyonsene, Yahova akhali ekhene. Buluka penepo, iye acita Mwanace wakutoma. Pyenepi pikhali ninga Yahova, ndi nyakutambira alendo, wakuti acemera mulendo wace wakutoma panyumba pace, pontho iye akomerwa kakamwe thangwi yakucita pyenepi. Bhibhlya isalonga kuti Yahova “akhakomerwa kakamwe” na Mwanace, pontho Mwanace ‘ndzidzi onsene akhatsandzaya pamaso pace.’—Mis. 8:30.
4. Ndi api anango adacemera Yahova toera akhale alendo ace?
4 Buluka penepo, Yahova acita aanju akuti adzakhalambo alendo ace. Aanju asacemerwa ‘ana a Mulungu,’ pontho Bhibhlya isalonga kuti iwo ndi akutsandzaya kakamwe thangwi yakukhala pabodzi na Yahova. (Yobe 38:7; Dhan. 7:10) Mu pyaka pizinji, alendo a Mulungu basi ene akhali Yezu na aanju. Mbwenye mukupita kwa ndzidzi, iye athimizira nyumba yace toera anthu pa dziko yapantsi akhalembo alendo ace. Anango mwa alendo anewa akhali Enoki, Nowa, Abhrahamu na Yobe. Bhibhlya isalonga kuti iwo akhali axamwali a Mulungu peno akhafamba na “Mulungu wandimomwene.”—Gen. 5:24; 6:9; Yobe 29:4; Iza. 41:8.
5. Tisapfundzanji na profesiya inagumanika pa Ezekiyeli 37:26, 27?
5 Kutomera kale kakamwe, Yahova akupitiriza kucemera axamwali ace toera akhale alendo ace. (Lerini Ezekiyeli 37:26, 27.) Mwacitsandzo, profesiya ya Ezekiyeli isatipfundzisa kuti Mulungu asafuna kakamwe kuti alambiri ace akhale na uxamwali wakuwanga na iye. Iye asapikira kucita “cibverano ca ntendere” na iwo. Profesiya ineyi isalonga pya ndzidzi wakuti ale ali na cidikhiro cakuenda kudzulu na ale ali na cidikhiro cakukhala pa dziko yapantsi, anadzakhala pabodzi n’nyumba yace yakuphipirisa ninga “nkumbi ubodzi.” (Juw. 10:16) Profesiya ineyi ikukwanirisika lero!
MULUNGU ASATITSALAKANA M’MBUTO ZONSENE
6. Munthu asafunika kucitanji toera akhale mulendo panyumba ya Yahova, pontho nyumba ineyi iri kupi?
6 Mu ndzidzi wakale, anthu akhaphatisira nsasa toera kupuma, pontho toera kutsidzikizika ku makhaliro akudambo. Mulendo angapitiswa mu nsasa, akakhala na cinyindiro cakuti mbadatsalakanwa mwadidi. Tingaperekeka kuna Yahova, tisakhala alendo pa nsasa wace peno panyumba yace yakuphipirisa. (Mas. 61:4) Ife tiri na pyonsene pinafuna ife toera tipitirize kukhala na uxamwali wakuwanga na Yahova, pontho tiri pabodzi na anango akuti ndi alendombo panyumba ya Yahova. Mwakukhonda tsalakana kunakhala ife, tonsene tinakwanisa kukhala alendo pa nyumba ya Yahova. Mwacitsandzo, panango imwe munaenda kaona nsonkhano wakupambulika ku dziko inango mbamudziwana na anango akuti ali akutsandzayambo thangwi yakukhala alendo a Mulungu. Nsasa wa Yahova usagumanika m’mbuto zonsene ziri na atumiki ace akubvera.—Apok. 21:3.
7. Thangwi yanji tinakwanisa kulonga kuti atumiki a Yahova adafa aciri kupitiriza ninga alendo panyumba pace? (Onanimbo foto.)
7 Ndiye tani pya atumiki akukhulupirika a Yahova adafa? Kodi iwo asapitiriza kukhala alendo panyumba ya Yahova? Inde! Thangwi yanji tisalonga tenepo? Thangwi m’manyerezero a Yahova, anthu anewa aciri m’maso. Yezu alonga: ‘Thangwi yakulamuswa kwa anthu muli akufa, Mose afokotoza pyenepi mudalemba iye mphangwa zinalonga pya thendere ya minga. Iye alonga kuti Yahova ndi Mulungu wa Abhrahamu, Mulungu wa Izaki na Mulungu wa Yakobe. Iye nee ndi Mulungu wa anthu akufa, mbwenye wa anthu ali m’maso, thangwi kwa iye, iwo onsene ali m’maso.’—Luka 20:37, 38.
Ngakhale atumiki akukhulupirika adafa anakwanisa kuoniwa ninga alendo panyumba ya Yahova (Onani ndima 7)
NKHOMBO NA PINAFUNIKA IFE KUCITA TOERA TIKHALE ALENDO A YAHOVA
8. Ndi nkhombo zipi zinakhala na alendo a Yahova?
8 Ninga nsasa wandimomwene wakuti usaphedza anthu toera kugumana mbuto yakupuma na yakutsidzikizika ku makhaliro akudambo, munjira ibodzi ene, nsasa wa Yahova usatsidzikiza alendo ace ku pinthu pyonsene pinafudza uxamwali wawo na iye, pontho usaapasa cidikhiro candimomwene thangwi ya ntsogolo. Tingawangisa uxamwali wathu na Yahova, Sathani nkhabe kwanisa kucita cinthu cakuti cinafudza uxamwali unoyu kwenda na kwenda. (Mas. 31:23; 1 Juw. 3:8) Mu dziko ipswa, Yahova anapitiriza kutsidzikiza axamwali ace akukhulupirika, tayu basi ku pinthu pyakuti pinafudza uxamwali wawo na iye, mbwenye anaatsidzikizambo toera akhonde kufa.—Apok. 21:4.
9. Yahova asadikhira kuti alendo ace acitenji?
9 Mwandimomwene, ndi mwai ukulu kakamwe kukhala mulendo pa nyumba ya Yahova na kukhala na uxamwali wakuwanga na iye wakuti unakhala kwenda na kwenda. Mphapo tisafunika kucitanji khala tisafuna kupitiriza kukhala alendo ace? Imwe mungacemerwa toera kuenda kunyumba ya munthu unango, musafunika kudziwa pinafuna mwanaciro nyumba toera kunkomeresa. Mwacitsandzo, panango mwanaciro nyumba anakuphembani toera mudule ntsapato mbamudzati kupita n’nyumba, pontho imwe musafunika kucita pyenepi. Munjira ibodzi ene, ife tisafunikambo kudziwa kuti Yahova asafuna kuti alendo ace acitenji pa nyumba pace. Kufuna kwathu Yahova kusatikulumiza kucita pyonsene pinakwanisa ife toera ‘kunkomeresa kakamwe.’ (Akol. 1:10) Yahova ndi Xamwali wathu, mbwenye tisafunikambo kukumbuka kuti iye ndi Mulungu wathu na Pai wathu, na thangwi ineyi, iye athema kulemedzwa. (Mas. 25:14) Kukumbuka pyenepi kunatiphedza toera tipitirize kulemedza kakamwe Yahova. Kumulemedza munjira ineyi, kunatiphedza toera kucalira makhaliro akuti anantsukwalisa. Mwakukhonda penula, ife tisafuna kufamba “mwakucepeseka na Mulungu” wathu.—Mik. 6:8.
YAHOVA ATSALAKANA AIZRAELI MWAKUSOWA TSANKHULO
10-11. Njira idatsalakana Yahova Aizraeli n’nthando ya Sinai isapangiza tani kuti iye ndi wakusowa tsankhulo?
10 Yahova asatsalakana alendo ace mwakusowa tsankhulo. (Aroma 2:11) Ife tinakwanisa kubvesesa mwadidi kusowa tsankhulo kwa Yahova tingaona njira idatsalakana iye Aizraeli n’nthando ya Sinai.
11 Pidamala iye kubulusa mbumba yace mu ubitcu ku Ejitu, Yahova akhazikisa anyantsembe toera atumikire pa tabhernakulo. Alevi apaswa basa yakutsalakana mabasa anango pa mbuto ineyi yakucena. Kodi ale akhatumikira pa tabhernakulo peno ale akuti misasa yawo ikhali dhuzi na tabhernakulo akhatsalakanwa munjira yakupambulika na Yahova? Nkhabe! Yahova nkhabe tsankhulo.
12. Njira idatsalakana Yahova Aizraeli n’nthando, yapangiza tani kuti kuna iye anthu onsene ndi sawasawa? (Eksodho 40:38) (Onanimbo foto.)
12 Muizraeli m’bodzi na m’bodzi mbadakwanisa kukhala xamwali wa Yahova mwakukhonda tsalakana khala asatumikira pa tabhernakulo peno nkhabe, peno khala nsasa wace uli dhuzi na tabhernakulo peno nkhabe. Mwacitsandzo, Yahova acitisa kuti mbumba yonsene ikwanise kuona khole na moto ukhali padzulu pa tabhernakulo. (Lerini Eksodho 40:38.) Mu ndzidzi ukhatoma kubuluka khole mbienda ku mbuto inango, ngakhale ale akhali kutali na tabhernakulo akhakwanisa kuiona. Natenepa, iwo akhakwanisa kupaka pinthu pyawo, kufudza misasa yawo mbaenda pabodzi na mbumba. (Num. 9:15-23) Kusiyapo pyenepi, onsene akhakwanisa kubva mwadidi kulira kwa matuluka mawiri akucitwa na parata akhadziwisa mbumba yonsene toera ithukuse misasa. (Num. 10:2) Pyenepi nee pisabveka kuti ale akakhala dhuzi na tabhernakulo mbadakhala na uxamwali wakuwanga na Yahova kupiringana ale akakhala kutali. M’mbuto mwace, mbumba ineyi yonsene yakuti ikhali yakuperekeka kuna Yahova mbidakwanisa kukhala alendo Ace, kutambira pitsogolero na kutsidzikizwa na Iye. Munjira ibodzi ene lero, Yahova asatifuna, asatitsalakana, pontho asatitsidzikiza mwakukhonda tsalakana kunakhala ife.
Tabhernakulo ikhali pakati pa misasa ikhapangiza kuti Yahova ndi wakusowa tsankhulo (Onani ndima 12)
KUSOWA TSANKHULO KWA YAHOVA LERO
13. Yahova asapangiza tani lero kuti ndi wakusowa tsankhulo?
13 Lero, atumiki anango a Mulungu asakhala dhuzi na ofesi ikulu ya pa dziko yonsene yapantsi ya Mboni za Yahova peno dhuzi na Bheteli. Anango asatumikira m’mbuto zenezi. Ndi thangwi yace, azinji a iwo asakwanisa kuphedzera mabasa akusiyana-siyana anacitwa m’mbuto zenezi mbakhala pabodzi na ale anatsogolera mu gulu ya Yahova. Anangombo asatumikira ninga ayang’aniri a cisa peno asacita mabasa anango m’basa yakupambulika ya ndzidzi onsene. Mbwenye khala imwe nee musacita mabasa anewa, khalani na cinyindiro cakuti Yahova, wakuti ndi nyakutambira alendo, asafuna alendo ace onsene kuphatanizambo imwe, pontho iye anakupasani pyonsene pinafuna imwe. (1 Ped. 5:7) Mulungu asapasa m’bodzi na m’bodzi wa atumiki ace cakudya cauzimu, asaatsogolera mbaatsidzikiza.
14. Ndi citsandzo cipi cinango cinapangiza kuti Yahova ndi wakusowa tsankhulo?
14 Citsandzo cinango cinapangiza kuti Yahova ndi wakusowa tsankhulo ninga nyakutambira alendo wadidi ndi cakuti iye acita masasanyiro toera anthu pa dziko yonsene yapantsi akwanise kuleri Bhibhlya mu cilongero cawo. Pakutoma Bhibhlya ikhadalembwa mu pilongero pitatu: Cihebheri, Ciaramaki na Cigerego. Kodi pyenepi pisabveka kuti ale anakwanisa kuleri pilongero pyenepi pyakutoma pidalembwa Bhibhlya ali na uxamwali wakuwanga kakamwe na Yahova kupiringana ale akuti nkhabe kwanisa kuleri pilongero pyenepi? Nkhabe.—Mat. 11:25.
15. Ninji pinapangiza kuti Yahova ndi wakusowa tsankhulo? (Onanimbo foto.)
15 Toera tikhale axamwali a Yahova nee tisafunika kupfundza kakamwe peno kukhala na maluso akulonga pilongero. Yahova asapasa udziwisi wace anthu onsene pa dziko yapantsi, tayu basi ale adapfundza kakamwe. Bhibhlya yakuti ndi Mafala a Mulungu, yathumburuzwa mu pilongero pizinji kakamwe; munjira ineyi, anthu pa dziko yonsene yapantsi anakwanisa kupfundza thangwi ya iye mbadziwa pinafunika iwo kucita toera akhale axamwali ace.—2 Tim. 3:16, 17.
Kuthumburuzwa kwa Bhibhlya mu pilongero pizinji kusapangiza tani kuti Yahova ndi wakusowa tsankhulo? (Onani ndima 15)
PITIRIZANI KUKHALA XAMWALI WA YAHOVA
16. Mwakubverana na Mabasa 10:34, 35, tisafunika kucitanji toera tikhale akutawirika kuna Yahova?
16 Ndi mwai ukulu kakamwe kucemerwa na Yahova toera kukhala alendo panyumba pace. Iye ndi wakukoma ntima na waufuni, pontho asatambira mwadidi kakamwe alendo. Kusiyapo pyenepi, kuna iye anthu onsene ndi sawasawa. Iye asacemera onsene mwakukhonda tsalakana kunakhala iwo, njira idakuzwa iwo, makhaliro awo, dzindza yawo, dziko yawo, thunga yawo peno khala ndi akazi peno amuna. Mbwenye ale anapitiriza kubvera Yahova, ndiwo basi anafuna kukhala alendo ace.—Lerini Mabasa 10:34, 35.
17. Tinagumana kupi mphangwa zakuthimizirika zinalonga thangwi yakukhala alendo panyumba ya Yahova?
17 Ninga pidalembwa pa Masalmo 15:1, Dhavidhi acita mibvundzo iyi: “Yahova, mbani anafuna khala mulendo panyumba panu? Mbani anafuna kukhala paphiri yanu yakucena?” Buluka penepo, Yahova am’phatisira toera kutawira mibvundzo ineyi. Mu nsolo unatowera, tinaona pinthu pingasi pinafunika ife kucita toera tipitirize kukhala alendo panyumba ya Yahova.
NYIMBO 32 Khalani Kukhundu ya Yahova!
