1, 2. (a) Ninji pidapangiza Yahova kwa ife? (b) Ndi pikiro ipi inagumanika pa Izaiya 46:10, 11 na 55:11?

PA LEMBA ya Genesi 1:1 tisagumana mafala awa: ‘Pakutoma Mulungu acita kudzulu na dziko yapantsi.’ Ife basi ene tisaona pinthu pyakucepa kakamwe pidacita Mulungu ninga ceza na mphambvu yakukwewera pinthu pantsi. (Koelete 3:11) Mbwenye Yahova apangiza cifuniro cace kwa anthu na dziko yapantsi. Mulungu acita anthu mwakulandana na iye, pontho akhafuna kuti akhale mwakutsandzaya pa dziko yapantsi. (Genesi 1:26) Iwo mbadakhala anace, pontho iye mbadakhala Baba.

² Kapitulu yacitatu ya Genesi, tisapfundza kuti cifuniro ca Yahova capingizwa. (Genesi 3:1-7) Mbwenye nkhabepo nkandzo wakuti Yahova anacimwana kuumalisa. Nkhabepo munthu anakwanisa kupingiza pidapikira iye. (Izaiya 46:10, 11; 55:11) Tisanyindira mwakukwana kuti cifuniro cakutoma ca Yahova cinadzakwarisikadi pa ndzidzi wakuthema!

3. (a) Ndi undimomwene upi wakufunika toera kubvesesa Bhibhlya? (b) Thangwi yanji tisafunika kudinga pipfundziso pyenepi? (c) Ndi mibvundzo ipi inafuna ife kudinga?

 ³ Mwakukhonda penula, ife tisadziwa kuti ndi cipi cifuniro ca Mulungu kwa anthu na dziko yapantsi, pontho basa ya Yezu mu cifuniro ceneci. Unoyu ndi undimomwene wakufunika kakamwe udatoma ife kupfundza m’Bhibhlya. Natenepa tisafunika kuphedza anango kudziwa pipfundziso pyenepi pyakufunika kakamwe. Pinadinga ife mu nsolo uno, pinatikulumiza toera kucemera anthu azinji kuti adzagumanike pa Cikumbuso ca kufa kwa Kristu. (Luka 22:19, 20) Angabwera pa Cikumbuso, anadzapfundza pizinji pya cifuniro ca Mulungu. Natenepa mbidzati kufika ntsiku ya Cikumbuso, uno ndi ndzidzi toera kunyerezera mibvundzo yakufunika kakamwe yakuti tinakwanisa kuiphatisira toera kukulisa cifuno ca anyakupfundza athu a Bhibhlya na anango anafuna kudzagumanika. Ndi cipi cifuniro ca Mulungu kwa anthu na dziko yapantsi? Ninji cidadodomeka? Pontho thangwi yanji ntsembe ya ciomboli ca Yezu yafungula njira toera cifuniro ca Mulungu cikwanirisike?

4. Kodi pyakucitwa ‘pisabvekesa tani mbiri ya Mulungu’?

⁴ Yahova ndi Nciti wakudzumatirisa kakamwe. Pyonsene pidacita iye ndi pyakufunika kakamwe. (Genesi 1:31; Yeremiya 10:12) Kodi tisapfundzanji kubulukira mu pinthu pyakubalika pidacita Yahova? Tisapfundza kuti pyonsene pidacita Yahova, kutomera ping’ono mpaka pikulu, ndi pyakuphindulisa. Kusiyapo pyenepi, musapibva tani munganyerezera pya selula yakudzumatirisa ya munthu, mungaona khombwani, peno mungaona kubira kwa dzuwa? Tisadzumatirwa na pinthu pyenepi thangwi Yahova aticita na luso yakudzindikira pinthu pyakubalika kakamwe.—Lerini Masalmo 19:1; 104:24.

5. Kodi Yahova acitanji toera pinthu pyonsene pidacita iye piphate basa mwadidi?

⁵ Yahova akhazikisa madire mwa pyonsene pidacita iye mwacidikhodikho. Iye acita mitemo yacibaliro na mitemo ya makhaliro. Iye acita mitemo ineyi toera pyakucitwa pyonsene piphate basa mwadidi, pontho pabodzi. (Masalmo 19:7-9) Cinthu consene ciri pa mbuto pace na maphatiro aco basa. Mwacitsandzo, ntemo wa mphambvu yakukwewera pinthu pantsi isacitisa mphepo kukhala cifupi na dziko yapantsi mbitsogolera bara. Mbidasoweka mphambvu ineyi, dziko yapantsi nee mbidakhala na cinthu ca umaso. Midida idakhazikisa Yahova mu pinthu pidacita iye, isacitisa kuti pyonsene piphate basa munjira yadidi. Pyenepi pisapangiza kuti iye ali na cifuniro kwa anthu na dziko yapantsi. Mu utumiki, ife tinakwanisa kuphedza anango toera kudziwa Nciti wa pinthu pyenepi pyakudzumatirisa.—Apokalipse 4:11.

6, 7. Ndi ipi mwa miyoni mingasi idapereka Yahova kuna Adhamu na Eva?

⁶ Yahova akhali na cifuniro cakuti anthu akhale pa dziko yapantsi kwenda na kwenda. (Genesi 1:28; Masalmo 37:29) Iye ndi nyakupasa mwakudzala manja, pontho apasa Adhamu na Eva miyoni mizinji yadidi kakamwe. (Lerini Tyago 1:17.) Yahova aapasa ufulu wakusankhula, luso yakunyerezera, kufuna na kutsandzaya na axamwali. Nciti alonga na Adhamu mbampfundzisa  kuti anacita tani pinthu pyadidi. Pontho Adhamu apfundza kuti anatsalakana tani umaso wace, pinyama na dziko yapantsi. (Genesi 2:15-17, 19, 20) Yahova apasa Adhamu na Eva luso ya kulawira cakudya, kuphata cinthu, kuona, kubva na kubva kununkhira kwa pinthu pyadidi pidaacitira iye. Munjira ineyi, iwo mbadakwanisa kutsandzaya na umaso m’paraizu. Adhamu na Eva akhali na mabasa mazinji akufunika toera kucita. Pontho mbadapitiriza kupfundza na kudzindikira pinthu pipswa kwenda na kwenda.

⁷ Cikhali cipi cifuniro cinango ca Mulungu? Yahova apasa Adhamu na Eva luso yakukhala na ana aungwiro. Anawo mbadakhalambo na ana, mpaka kudzadza dziko yonsene. Yahova akhafuna kuti anyakubala afune anawo, ninga pikhafuna iye anace akutoma aungwiro, Adhamu na Eva. Iye apasa anthu dziko yapantsi na pinthu pyonsene pyadidi pinagumanika mwenemo. Dziko ineyi mbidakhala mudzi wawo, kwenda na kwenda.—Masalmo 115:16.

8. Thangwi yanji Yahova apasa Adhamu na Eva ntemo unagumanika pa Genesi 2:16, 17?

⁸ Pinthu nee pyacitika ninga mukhafunira Yahova. Ninji pidacitika? Yahova apasa Adhamu na Eva ntemo wakukhonda nentsa wakuti iwo mbadauona ninga madire a ufulu wawo wakusankhula. Iye alonga: ‘Dya misapo yonsene ya m’munda muno. Mbwenye, leka kudya nsapo wa muti wakudziwisa pyadidi na pyakuipa, thangwi ntsiku inadzaudya iwe, unadzafa.’ (Genesi 2:16, 17) Ntemo unoyu nee ukhali wakunentsa kwa iwo toera kuubvesesa. Pontho nee ukhali wakunentsa toera kuubvera, thangwi m’munda mukhali na misapo inango yakukoma kakamwe.

9, 10. (a) Kodi Sathani apambizira tani Yahova? (b) Kodi Adhamu na Eva asankhula kucitanji? (Onani cithundzithundzi cakutoma.)

⁹ Sathani Dyabo aphatisira nyoka toera kunyengeza Eva toera akhonde bvera Babawo, Yahova. (Lerini Genesi 3:1-5; Apokalipse 12:9) Sathani alonga uthambi kuti ana a Mulungu akhadakhondeswa kudya ‘misapo ya miti yonsene ya m’munda.’ Pikhali ninga akulonga: ‘Musafuna kulonga kuti nee munakwanisa kucita pinafuna imwe?’ Buluka penepo, iye alonga kuna Eva: ‘Mwandimomwene nee munadzafa.’ Unoyu ukhali uthambi. Sathani anyengezambo Eva kuti nee akhafunika kubvera Mulungu. Sathani alonga: ‘Mulungu asadziwa kuti, ntsiku inadzadya imwe, maso anu anadzafunguka.’ Sathani akhalonga kuti Yahova nee akhafuna toera adye nsapo thangwi pyenepi mbapidaacitisa kukhala na cidziwiso cakupambulika. Pakumalisa, iye acita pikiro iyi yauthambi: ‘Munadzakhala sawasawa na Mulungu, mbamudziwa pyadidi na pyakuipa.’

¹⁰ Adhamu na Eva akhafunika kusankhula pikhafuna iwo kucita. Kubvera Mulungu peno kubvera nyoka? Mwakutsukwalisa, iwo asankhula kukhonda bvera Mulungu. Iwo akhonda Yahova ninga Babawo mbacita khundu ya Sathani. Natenepa iwo akhala okha mbasowa citsidzikizo ca Yahova.—Genesi 3:6-13.

11. Thangwi yanji Yahova nee alekerera madawo a Adhamu na Eva?

¹¹ Pidakhonda kubvera Adhamu na Eva mwambo wa Mulungu, aluza mwai  wakukhala aungwiro. Pontho, adzakhala anyamalwa a Mulungu, thangwi iye asaida uipi. Iye ndi wakucena kakamwe wakuti nkhabe funa kuona pyakuipa. (Habakuki 1:13) Khala Yahova nee acita pinthu pakumala kudawa kwa Adhamu na Eva, tsogolo ya anthu onsene mbidakhala yakutsukwalisa. Aanju na anthu mbadabvundzika khala akhafunikadi kubvera mafalace peno nkhabe. Mbwenye Yahova ndi wakukhulupirika ku midida yace, iye nkhabe kuswa midida yace. (Masalmo 119:142) Maseze Adhamu na Eva akhali na ufulu wakusankhula, iwo nee mbadakwanisa kucalira nyatwa thangwi yakukhonda bvera Yahova. Mukupita kwa ndzidzi iwo afa mbabwerera ku mataka kudabuluka iwo.—Genesi 3:19.

12. Ninji pidacitikira ana a Adhamu?

¹² Pidadya Adhamu na Eva nsapo, Yahova nee atawirabve toera akhale pontho anace. Iye aathamangisa m’munda wa Edheni, mbaakhondesa kubwerera pontho. (Genesi 3:23, 24) Yahova aacitisa kuthabuka na nyatwa thangwi ya cisankhulo cawo. (Lerini Deuteronomyo 32:4, 5.) Natenepa, iwo acimwana kutowezera mwakukwana makhaliro a Yahova. Adhamu aluza tsogolo yace yakutsandzayisa pabodzi na anace. Iye athaphulisa anace kusowa ungwiro, madawo na kufa. (Aroma 5:12) Adhamu aluzisa anace mwai wakukhala maso kwenda na kwenda. Adhamu na Eva nee mbadakwanisa kubala mwana waungwiro, pontho anawo nee mbadakwanisambo kubala ana aungwiro. Ngakhale kuti Sathani acitisa Adhamu na Eva kukhonda bvera Mulungu, Dyabo ayeserambo kucitisa anthu onsene kukhonda bvera Mulungu.—Jwau 8:44.

13. Kodi Yahova asafunanji kuna anthu?

¹³ Yahova apitiriza kufuna anthu. Maseze Adhamu na Eva akhonda kumbvera, iye asapitiriza kufuna anthu toera akhale na uxamwali wadidi na iye. Pontho iye nee asafuna kuti m’bodzi wa iwo afe. (2 Pedro 3:9) Na thangwi ineyi, Mulungu acita masasanyiro mwakucimbiza toera anthu akwanise pontho kukhala na uxamwali na iye. Kodi iye mbadakwanisa tani kucita pyenepi mbakhonda kuswa midida yace? Tendeni tione.

14. (a) Mwakubverana na lemba ya Jwau 3:16, ndi masasanyiro api adacita Mulungu toera anthu akhale na umaso wa kwenda na kwenda? (b) Ndi mbvundzo upi unafuna kudinga ife na anthu?

¹⁴ Lerini Jwau 3:16. Anthu azinji anacemera ife toera kugumanika pa Cikumbuso asadziwa mwadidi vesi ineyi. Mphapo ntsembe ya Yezu isacitisa tani kukhala na cidikhiro ca umaso wa kwenda na kwenda? Ife tisakhala na mwai wakuphedza anthu toera kubvesesa ntawiro wa mbvundzo unoyu pakuacemera toera kugumanika pa Cikumbuso, angagumanika pa Cikumbuso na tingaacedzera pakumala kwa Cikumbuso. Iwo  anadzakhuiwa kakamwe angabvesesa mwadidi kuti ciomboli cisapangiza ufuni ukulu na udziwisi wa Yahova. Ndi ntsonga zipi zisafunika ife kuapanga thangwi ya ciomboli?

15. Kodi Yezu akhadasiyana tani na Adhamu?

¹⁵ Yahova apereka munthu waungwiro toera kutifera ninga ciomboli. Munthu unoyu waungwiro akhafunika kukhala wakukhulupirika kwa Yahova. Iye akhafunikambo kupereka umaso wace thangwi ya anthu. (Aroma 5:17-19) Yahova abulusa kudzulu umaso wa Yezu, mwanace wakutoma, toera kubwera pa dziko yapantsi. (Jwau 1:14) Natenepa Yezu akhala munthu waungwiro ninga pikhali Adhamu. Mbwenye mwakusiyana na Adhamu, Yezu akhabvera midida ya Yahova ninga pikhadikhirwa kwa munthu waungwiro. Ngakhale pakuthimbana na mayesero, iye nee apswa mitemo ya Mulungu.

16. Thangwi yanji ciomboli ndi muoni wakufunika?

¹⁶ Nakuti afa ninga munthu waungwiro, Yezu anakwanisa kupulumusa anthu m’madawo na kufa. Iye acita pinthu ninga pikhafuna cita Adhamu. Yezu akhali munthu waungwiro, wakukhulupirika mwakukwana na wakubvera Mulungu. (1 Timoti 2:6) Iye atifera, pontho ntsembe yace isapasa amuna onsene, akazi onsene na ana onsene mwai wakukhala maso kwenda na kwenda. (Mateo 20:28) Ciomboli cisafungula njira toera cifuniro ca Mulungu cikwanirisike.—2 Akorinto 1:19, 20.

17. Ndi nkhombo zipi zinafuna kudzaoneka thangwi ya ciomboli?

¹⁷ Yahova asafuna kakamwe anthu, ndi thangwi yace alipa ntengo ukulu toera kutipulumusa:  umaso wa Mwanace wakufunika. (1 Pedro 1:19; 1 Jwau 4:9, 10) Na thangwi ineyi, Yezu akhala babathu adapitira mbuto Adhamu. (1 Akorinto 15:45) Yezu nee atipasa basi ene mwai wakukhala maso kwenda na kwenda, mbwenye atipasambo mwai wakucita pontho khundu ya banja ya Mulungu. Kubulukira mu ciomboli, anthu anadzakhala aungwiro, mbatawirwa pontho na Yahova toera kucita khundu ya banjace mbakhonda kupswa mitemo yace. Nyerezerani kutsandzaya kunafuna kudzaoneka, anthu onsene akukhulupirika kwa Yahova angadzakhala aungwiro! Anthu onsene kudzulu na pa dziko yapantsi anadzakhala akuphatana. Tonsene tinadzakhala ana a Mulungu.—Aroma 8:21.

18. Kodi Yahova anadzakhala lini ‘pinthu pyonsene kwa anthu onsene’?

¹⁸ Ngakhale kuti anyakubala athu akutoma akhonda Yahova, iye nee asiya kufuna anthu, pontho apereka ciomboli. Ngakhale ndife akusowa ungwiro, Sathani nkhabe kwanisa kutipingiza kukhala akukhulupirika kwa Yahova. Kubulukira mu ciomboli, Yahova anadzatiphedza toera kukhala akulungama mwakukwana. Nyerezerani kuti umaso unadzakhala tani anthu onsene ‘anaona Mwana na kunkhulupira’ mbakhala na umaso wa kwenda na kwenda. (Jwau 6:40) Babathu waufuni na waudziwisi anadzakwanirisa cifuniro cace na kuphedza anthu toera kukhala aungwiro. Buluka penepo, Yahova anadzakhala ‘pinthu pyonsene kwa anthu onsene.’—1 Akorinto 15:28.

19. (a) Kodi kupereka kwathu takhuta thangwi ya ciomboli kusatikulumiza toera kucitanji? (Onani bokosi “ Tendeni Tipitirize Kusaka Anthu Anapangiza Cifuno.”) (b) Tinadzadinganji mu nsolo unatowera?

¹⁹ Kupereka kwathu takhuta thangwi ya ciomboli kusafunika kutikulumiza toera kupanga anango pya muoni unoyu. Anthu asafunika kudziwa kuti kubulukira mu ciomboli, Yahova asapereka mwaufuni mwai wakukhala maso kwenda na kwenda kuna anthu onsene. Mbwenye ciomboli cisacitambo pinthu pinango. Cisamalisa nseru udasosa Sathani m’munda mwa Edheni. Mu nsolo unatowera, tinadzadinga kuti cisacita tani pyenepi.