1, 2. Kodi apostolo panango akhanyerezeranji pidaenda Yezu kudzulu?

ANYAKUPFUNDZA a Yezu akhali pa Phiri ya Mulivera mbakayang’ana mpfundzisi na xamwali wawo Yezu, mu ndzidzi ukhaenda iye kudzulu mbaphimbirwa na khole. (Machitiro 1:9, 10) Cifupi na pyaka piwiri, Yezu aapfundzisa, aawangisa na kuatsogolera. Mbwenye cincino iye aenda. Kodi iwo mbadacitanji?

² Mbadzati kuenda kudzulu, Yezu apanga anyakupfundzace: ‘Munadzakhala amboni anga ku Yerusalemu, ku Yudeya konsene, ku Samariya na ku nkhomo kwa madziko onsene.’ (Machitiro 1:8) Kodi iwo mbadakwanisa tani kucita basa ineyi? Yezu akhadapikira kuti nzimu wakucena wa Mulungu mbudaaphedza. (Machitiro 1:5) Mphapo mbani akhafuna kuatsogolera na kukhunganya basa yakumwaza mphangwa pa dziko yonsene yapantsi? Apostolo akhadziwa kuti Yahova akhadaphatisira amuna toera kutsogolera Aisraeli. Mbwenye panango akhabvundzika khala mu ndzidzi wawo Yahova mbadasankhula ntsogoleri mupswa.

3. (a) Ndi cisankhulo cipi cakufunika kakamwe cidacita apostolo akukhulupirika pidaenda Yezu kudzulu? (b) Ndi mibvundzo ipi inafuna ife kutawira mu nsolo uno?

 ³ Pidamala kwene Yezu kuenda kudzulu, anyakupfundzace adinga Malemba, aphemba ciphedzo ca Mulungu, pontho asankhula Matiya toera kupitira mbuto Yuda Iskariyoti ninga m’bodzi wa apostolo 12. (Machitiro 1:15-26) Thangwi yanji cisankhulo ceneci cikhali cakufunika kakamwe kwa iwo na kwa Yahova? Anyakupfundza adzindikira kuti akhafunika kukhala apostolo 12. * (Onani cidzindikiro capantsi.) Yezu akhadasankhula apostolo mbaapfundzisa basa yakufunika kakamwe ya atumiki a Mulungu. Basa ineyi ikhali ipi, pontho Yahova na Yezu aakhunganya tani? Ndi masasanyiro api akulandana akhali na iwo akuti tiri naombo lero? Pontho ‘tinakumbukira tani ale anatitsogolera,’ makamaka ‘m’bandazi wakukhulupirika na wandzeru’?—Ahebere 13:7; Mateo 24:45.

4. Ndi basa ipi ikhali na apostolo pabodzi na akulu a mpingo anango mu Yerusalemu?

⁴ Apostolo atoma kutsogolera mu mpingo Wacikristu pa Pentekoste mu caka 33. Bhibhlya isalonga kuti ‘Pedhru alamuka pabodzi na Khumi na M’bodzi’ mbapfundzisa mwinji ukulu undimomwene wakupulumusa umaso. (Machitiro 2:14, 15) Anthu azinji a mwinji unoyu adzakhala Akristu. Buluka penepo, Akristu anewa apswa ‘apitiriza kuphatisira pipfundziso pya apostolo.’ (Machitiro 2:42) Apostolo akhali na basa yakutsalakana kobiri ya mpingo. (Machitiro 4:34, 35) Pontho iwo akhapfundzisa mbumba ya Mulungu na kucita phembero thangwi ya iwo, mukulonga: ‘Ife tinadzacita maphembero, mbatipfundzisa pya Mulungu.’ (Machitiro 6:4) Iwo atumiza Akristu akukola mwauzimu toera kamwaza mphangwa m’pisa pipswa. (Machitiro 8:14, 15) Mukupita kwa ndzidzi, akulu a mpingo anango akudzodzwa acitambo khundu ya apostolo mukutsogolera mu mpingo. Ninga mathubo akutonga, iwo akhapereka pitsogolero ku mipingo yonsene.—Machitiro 15:2.

5, 6. (a) Kodi nzimu wakucena waphedza tani mathubo akutonga? (Onani cithundzithundzi cakutoma.) (b) Aanju aphedza tani mathubo akutonga? (c) Mafala a Mulungu atsogolera tani mathubo akutonga?

⁵ Akristu a mu ndzidzi wa apostolo akhadziwa kuti Yahova akhatsogolera mathubo akutonga kubulukira mwa Yezu. Kodi iwo akhadziwa tani pyenepi? Cakutoma, nzimu wakucena waphedza mathubo akutonga. (Jwau 16:13) Akristu onsene akudzodzwa atambira nzimu wakucena, mbwenye nzimu wakucena waphedza makamaka apostolo na akulu a mpingo mu Yerusalemu toera akwanirise basa yawo ninga ayang’aniri.  Mwacitsandzo, mu caka 49, nzimu wakucena watsogolera mathubo akutonga toera kucita cisankhulo thangwi ya kusidzwa. Abale na alongo m’mipingo abvera cisankhulo ceneci. Ninga maphindu, iwo ‘akhawangiswa mu cikhulupiro mbathimizirika ntsiku na ntsiku.’ (Machitiro 16:4, 5) Mu tsamba idatumizwa ku mipingo inalonga thangwi ya kusidzwa, tisaona kuti mathubo akutonga akhali na nzimu wakucena wa Mulungu, pontho akhapangiza makhaliro ninga ufuni na cikhulupiro.—Machitiro 15:11, 25-29; Agalata 5:22, 23.

⁶ Caciwiri, aanju aphedza mathubo akutonga. Mwacitsandzo, anju unango apanga Kornelyo toera kasaka mpostolo Pedhru. Pidamala Pedhru kumwazira mphangwa Kornelyo na acibale ace, iwo atambira nzimu wakucena, maseze nee akhali amuna akusidzwa. Natenepa, Kornelyo akhala Nkristu wakutoma mwa Ajentiyu akukhonda kusidzwa. Pidabva apostolo na abale anango mphangwa zenezi, aphedzera cifuno ca Mulungu mbatambira Ajentiyu akukhonda kusidzwa mu mpingo Wacikristu. (Machitiro 11:13-18) Mwa pyenepi, tinakwanisa kuona kuti aanju akhaphedzera mwakukwana basa yakumwaza mphangwa ikhatsogolera mathubo akutonga. (Machitiro 5:19, 20) Cacitatu, Mafala a Mulungu akhatsogolera mathubo akutonga. Amuna anewa akhaphatisira Malemba toera kuaphedza pakucita pisankhulo pyakufunika thangwi ya pikhulupiro Pyacikristu na kutsogolera mipingo.—Machitiro 1:20-22; 15:15-20.

7. Thangwi yanji tisalonga kuti Yezu akhatsogolera Akristu akutoma?

⁷ Maseze mathubo akutonga akhali na cidzo mu mpingo, iwo akhadziwa kuti Ntsogoleri wawo akhali Yezu Kristu. Tisadziwa tani pyenepi? Mpostolo Paulu alonga kuti ndi Kristu akhasankhula ‘anango ninga apostolo.’ Iye alongambo kuti Kristu akhali “nsolo,” peno Ntsogoleri wa mpingo. (Aefesi 4:11, 15) Pontho m’mbuto mwakupasika okha dzina pakumala kukhala apostolo, ‘anyakupfundza atoma kuthulwa Akristu mukutsogolerwa na nzimu wa Mulungu.’ (Machitiro 11:26) Paulu akhadziwa kuti mphyakufunika kutowezera pipfundziso pyakubulukira m’Bhibhlya pya apostolo na pya amuna anango akhatsogolera. Ngakhale tenepo, Paulu alonga: ‘Mbwenye ndisafuna mudziwe kuti nsolo wa mamuna onsene ndi Kristu.’ Mafala anewa asaphatambo basa kwa mathubo akutonga. Buluka penepo Paulu athimiza: ‘Nsolo wa Kristu ndi Mulungu.’ (1 Akorinto 11:2, 3) Mwapakweca, Yahova akhadasankhula Mwanace, Kristu Yezu toera kutsogolera mpingo.

8, 9. Ndi basa ipi ikhali na M’bale Russell?

⁸ Kutomera mu caka 1870, Charles Taze Russell na andzace anango atoma kulambira Mulungu mwakubverana na pinalonga Bhibhlya mbaphedzambo anango toera kucita pibodzi pyene. Pyenepi pikhaphataniza kuphedza anthu akhalonga pilongero pyakusiyana-siyana. Natenepa, Sociedade de Tratados da Torre de Vigia de Sião yakhazikiswa mu caka 1884, pontho M’bale Russell adzakhala prezidenti. * (Onani cidzindikiro capantsi.) Iye akhapfundza Bhibhlya mwacidikhodikho, pontho nee akhagopa kupanga anango kuti pipfundziso pyauphemberi ninga Utatu na kukhonda kufa kwa moyo nee pisagumanika m’Bhibhlya. Iye abvesesa kuti  Kristu mbadabwera mwakukhonda kuoneka, pontho ‘kumala kwa midzidzi ya ajentiyu’ mbakudacitika mu caka 1914. (Luka 21:24) M’bale Russell aphatisira ndzidzi wace, mphambvu na kobiri yace toera kupfundzisa anango undimomwene unoyu. Pisaoneka pakweca kuti Yahova na Yezu aphatisira M’bale Russell toera kutsogolera basa mu ndzidzi unoyu wakufunika kakamwe.

⁹ M’bale Russell nee akhafuna kutsalakanwa mwakupambulika na anthu. Mu caka 1896, M’bale Russell alemba kuti iye pabodzi na abale anango nee akhafuna cilemedzo ca anthu. Iwo nee akhafuna kupaswa pidzo, peno kuti nsoka unango udziwike na dzina yawo. Buluka penepo iye alonga: “Iyi nee ndi basa ya munthu.”

10. (a) Kodi Yezu akhazikisa lini ‘m’bandazi wakukhulupirika na wandzeru’? (b) Pyapangizika tani pakweca kuti Mathubo Akutonga akhali akusiyana na Sociedade Torre de Vigia?

¹⁰ Mu caka 1919, pakupita pyaka pitatu pakumala kulowa kwa M’bale Russell, Yezu akhazikisa ‘m’bandazi wakukhulupirika na wandzeru.’ Thangwi yanji? Toera kupasa atowereri ace “cakudya pa ndzidzi wakuthema.” (Mateo 24:45) Ngakhale nkati mwa pyaka pyenepi, nsoka unoyu ung’ono wa abale akudzodzwa ku ofesi ikulu ku Nova York, ukhapereka cakudya cauzimu kwa atowereri a Yezu. Fala yakuti “mathubo akutonga” yatoma kugumanika m’mabukhu athu pakumala kwa caka 1940. Mu ndzidzi unoyu, mathubo akutonga akhaphata basa pabodzi na Asso- ciação Torre de Vigia de Bíblias e Tratados. Mbwenye mu caka 1971, pyapangizika pakweca kuti Mathubo Akutonga akhali akusiyana na Sociedade Torre de Vigia, yakuti ikhali na basa yakutawirisa. Buluka penepo, abale akudzodzwa mbadakwanisa kucita khundu ya Mathubo Akutonga mwakukhonda kutsogolerwa na Sociedade. Cincino, abale a maluso akukwana a “mabira anango” asaphata basa ninga atsogoleri a Sociedade na misoka inatsalakana miseru ya atumiki a Mulungu. Ninga maphindu, Mathubo Akutonga asakwanisa kuikha manyerezero pa basa yakupereka cipfundziso ca Bhibhlya na citsogolero. (Jwau 10:16; Machitiro 6:4) A Sentinela 15 de Julho de 2013 yafokotoza kuti ‘m’bandazi wakukhulupirika na wandzeru’ ndi nsoka ung’ono wa abale akudzodzwa wakuti usacita khundu ya Mathubo Akutonga.

11. Kodi Mathubo Akutonga asacita tani pisankhulo?

¹¹ Mathubo Akutonga asacita pisankhulo pyakufunika angasonkhana ninga nsoka masumana onsene. Misonkhano ineyi isaaphedza toera kucedza mwadidi na kukhala akuphatana. (Misangani 20:18) Nkhabepo m’bale wa Mathubo Akutonga wakuti ndi wakufunika kakamwe kupiringana anango, natenepa pyaka pyonsene iwo asacinjana toera kutsogolera misonkhano ineyi. (1 Pedro 5:1) Pyenepi pisacitikambo kuna makomiti matanthatu a Mathubo Akutonga. Nkhabepo m’bale m’bodzi wa Mathubo Akutonga asapibva ninga ntsogoleri wa abale  ace. Onsene ndi anyabasa apanyumba na asatambira cakudya cauzimu ca m’bandazi wakukhulupirika mbatowezera citsogolero cawo.

12. Ndi mibvundzo ipi inafuna ife kutawira mu ndima zinatowera?

¹² Mathubo Akutonga nee asapumirwa pontho nee ndi aungwiro. Iwo anakwanisa kudodoma pakufokotoza Bhibhlya peno pakutsogolera gulu. Mwacitsandzo, m’bukhu ya Índice das Publicações da Torre de Vigia muli na nsolo ung’ono wakuti “Explicação de nos- sas crenças,” wakuti uli na ndandanda ya macinjo a kubvesesa kwathu Bhibhlya kutomera caka 1870. Yezu nee atipanga kuti m’bandazi wace wakukhulupirika mbadabulusa cakudya cauzimu caungwiro. Mphapo tinatawira tani mbvundzo wa Yezu: ‘Mbani mwandimomwene m’bandazi wakukhulupirika na wandzeru?’ (Mateo 24:45) Ninji cinapangiza kuti Mathubo Akutonga ndi  m’bandazi wakukhulupirika? Tendeni tidinge pinthu pitatu pidaphedza mathubo akutonga mu ndzidzi wa apostolo.

13. Kodi nzimu wakucena waphedza tani Mathubo Akutonga?

¹³ Nzimu wakucena usaphedza Mathubo Akutonga. Nzimu wakucena waphedza Mathubo Akutonga kubvesesa undimomwene wa Bhibhlya wakuti kale nee akhaubvesesa. Mwacitsandzo, dingani ndandanda ya macinjo a kubvesesa kwathu udalongwa padzulu. Nkhabepo munthu mbadakwanisa kubvesesa na kufokotoza ekhene ‘pinthu pyenepi pyakubisalika pya Mulungu’! (Lerini 1 Akorinto 2:10.) Mathubo Akutonga asapibva ninga pidacita mpostolo Paulu, wakuti alemba: ‘Pinthu pyenepi pinalonga ife, nee ndi mafala akupfundziswa na udziwisi wa anthu, mbwenye akupfundziswa na nzimu.’ (1 Akorinto 2:13) Pakumala kwa pyaka pizinji pya cipfundziso caunthawatawa na citsogolero cakukhonda bveka mwadidi, mphapo thangwi yanji kuthimizirika kwa kubvesesa Bhibhlya kwatoma caka 1919? Thangwi ibodzi ndi yakuti Mulungu akuphedza na nzimu wace wakucena!

14. Mwakubverana na lemba ya Apokalipse 14:6, 7, kodi aanju asaphedza tani lero Mathubo Akutonga na atumiki a Mulungu?

¹⁴ Aanju asaphedza Mathubo Akutonga. Mathubo akutonga ali na basa ikulu yakutsogolera amwazi mphangwa akupiringana mamiliyau masere m’basa yakumwaza mphangwa ya pa dziko yonsene. Thangwi yanji basa ineyi isafamba mwadidi? Thangwi ibodzi ndi yakuti aanju asaphedzera. (Lerini Apokalipse 14:6, 7.) Kazinji kene, aanju asatsogolera amwazi mphangwa mbaenda kuna munthu adaphemba ciphedzo kuna Mulungu! * (Onani cidzindikiro capantsi.) Basa yakumwaza mphangwa na kupfundzisa isapitiriza kukula ngakhale mbuto zakuti basa ineyi isatcingwa. Pyenepi pisakwanisikambo basi ene na ciphedzo ca aanju.

15. Kodi Mathubo Akutonga asiyana tani na atsogoleri a Cikristu Caunthawatawa? Perekani citsandzo.

¹⁵ Mafala a Mulungu asatsogolera Mathubo Akutonga. (Lerini Jwau 17:17, Tradução do Novo Mundo.) Nyerezerani pidacitika mu caka 1973. Revista ya A Sentinela 1.° de Junho yabvundza khala “anthu akuti adzati siya nsambo wakufumali peno kutomali ndi akuthema kubatizwa.” Ntawiro wa mbvundzo unoyu wagumanika mukuphatisira midida ya Bhibhlya, pontho ntawiro ukhali wakuti nkhabe! A Sentinela yaphatisira malemba mazinji na kufokotoza kuti thangwi yanji munthu anakhonda siya kufumali peno kutomali akhafunika kubuluswa mu mpingo. (1 Akorinto 5:7; 2 Akorinto 7:1) Iyo yalonga kuti n’dida unoyu wakuwanga nee wabuluswa na anthu, mbwenye wabuluka “kwa Mulungu, wakuti asalonga mukuphatisira Mafalace akulembwa.” Nkhabepo gulu inango ya mauphemberi isanyindira mwakukwana Mafala a Mulungu, maseze kucita pyenepi panango pinakhala pyakunentsa kakamwe kuna anthu anango anacita khundu ya gulu ineyi. Bukhu inango ipswa yauphemberi ku Estados Unidos yalonga: “Atsogoleri Acikristu asasasanyira kazinji kene pipfundziso pyawo toera pinthu pizinji pinakhulupira iwo na maonero pikhale pyakutawirika kuna anthu awo na anango.” Mbwenye Mathubo Akutonga nkhabe kutsogolerwa na pinafuna anthu azinji. M’mbuto mwace, iwo  asatsogolerwa na Mafala a Mulungu. Pyenepi pisapangiza kuti mwandimomwene Yahova ndiye asatsogolera atumiki ace lero.

16. Ndi njira ipi ibodzi yakukumbukira Mathubo Akutonga?

¹⁶ Lerini Ahebere 13:7. Bhibhlya isalonga, ‘kumbukirani ale anatsogolera.’ Njira ibodzi yakuti tinakwanisa kucita pyenepi ndi kuphataniza Mathubo Akutonga m’maphembero athu. (Aefesi 6:18) Iwo ali na mabasa mazinji kakamwe, akuti asaphataniza kupereka cakudya cauzimu, kutsogolera basa yakumwaza mphangwa pa dziko yonsene yapantsi na kutsalakana pyakupereka pinacitwa na gulu. Mwandimomwene, tisafunika kuaphataniza m’maphembero athu mwakukhonda phonya!

17, 18. (a) Kodi tinatowezera tani citsogolero ca Mathubo Akutonga? (b) Basa yathu yakumwaza mphangwa isaphedza tani Mathubo Akutonga na Yezu?

¹⁷ Ife tinakwanisambo kukumbukira Mathubo Akutonga mukutowezera pipfundziso na citsogolero cawo. Mathubo Akutonga asatipasa citsogolero kubulukira m’mabukhu athu, misonkhano ya mpingo, ya cisa na ya gawo. Iwo asakhazikisa ayang’aniri a cisa, akuti asakhazikisambo akulu a mpingo. Mukutowezera mwadidi pitsogolero pinapaswa iwo, ayang’aniri a cisa na akulu a mpingo asapangiza kuti asakumbukira Mathubo Akutonga. Pontho ife tonsene tisapangiza cilemedzo kuna Ntsogoleri wathu, Yezu, mukubvera amuna anaphatisira iye lero.—Ahebere 13:17.

¹⁸ Njira inango yakuti tinakwanisa kukumbukira Mathubo Akutonga ndi kuwangisira kwathu m’basa yakumwaza mphangwa. Lemba ya Ahebere 13:7 isakulumiza Akristu toera kutowezera cikhulupiro ca ale anaatsogolera. Mathubo Akutonga asapangiza cikhulupiro cakuwanga mukumwaza mphangwa mwaphinga mbaendesa kutsogolo mphangwa zadidi. Kodi ife tisaphedza abale anewa m’basa ineyi yakufunika kakamwe? Khala tisacita pyenepi, tinadzakhala akutsandzaya tingabva Yezu mbalonga: ‘Pyonsene pidacitira imwe m’bodzi wa abale anga awa ang’ono, mwapicitira ine.’—Mateo 25:34-40.

19. Thangwi yanji muli wakutonga kubvera Ntsogoleri wathu, Yezu?

¹⁹ Pidabwerera Yezu kudzulu, iye nee asiya atowereri ace. (Mateo 28:19) Iye akhadziwa kuti nzimu wakucena, aanju na Mafala a Mulungu amphedza toera kutsogolera pikhali iye pa dziko yapantsi. Iye asapereka ciphedzo cibodzi cene kuna m’bandazi wakukhulupirika lero. Mathubo Akutonga asapitiriza ‘kutowera Mwanabira,’ Yezu, ‘konsene kunaenda iye.’ (Apokalipse 14:4) Natenepa, tingabvera citsogolero ca Mathubo Akutonga, tikubvera Ntsogoleri wathu, Yezu. Mwakukhonda dembuka, iye anadzatitsogolera ku umaso wakwenda na kwenda. (Apokalipse 7:14-17) Pontho nkhabepo ntsogoleri waunyama anakwanisa kucita pikiro ineyi!