NSOLO WA PFUNDZIRO 23
Pitirizani Kugasa “Lirimi ya Moto wa Yah”
“Ufuni ndi ninga malirimi a moto wakugaka, lirimi ya moto wa Yah.”—NYIM. 8:6.
NYIMBO 131 ‘Pidamanga Mulungu’
PINAFUNA IFE KUPFUNDZA a
1. Bhibhlya isalonganji thangwi ya ufuni wandimomwene?
UFUNI ndi ‘malirimi a moto wakugaka, lirimi ya moto wa Yah. Madzi mazinji nkhabe kwanisa kuthimisa ufuni, pontho ufuni nkhabe kulobzweka na mphambvu ya madzi a mikulo.’ b (Nyim. 8:6, 7) Mafala anewa asalonga pya ufuni wandimomwene munjira yadidi kakamwe, pontho asapangiza kuti anyakumanga banja anakwanisa kupangiza ufuni unoyu kuna unango na ndzace.
2. Anyakumanga banja asafunika kucitanji toera ufuni wawo ukhonde kuthowa?
2 Pisaphemba kuwangisira toera mamuna na nkazi wakumanga banja apitirize kufunana mu umaso wawo onsene. Mwacitsandzo, toera moto upitirize kugaka ife tisafunika kupitiriza kuikha nkhuni. Tingakhonda cita pyenepi, mukupita kwa ndzidzi moto unoyu unathima. Munjira ibodzi ene, ufuni wa anyakumanga banja unapitiriza kukhala wakuwanga khala iwo asawangisira kufunana. Midzidzi inango, ufuni wawo unakwanisa kuthowa makamaka khala iwo asathimbana na nyatwa yakusowa kobiri, nyatwa za ungumi peno pinentso pakukuza ana. Natenepa khala ndimwe nyakumanga banja, munakwanisa tani kupitiriza kugasa “lirimi ya moto wa Yah” m’banja mwanu? Mu nsolo uno, tinaona njira zitatu zinafuna kuphedza anyakumanga banja toera kuwangisa ufuni wawo kuna ndzawo wa m’banja mbakhala na banja yakutsandzaya. c
PITIRIZANI KUWANGISA UXAMWALI WANU NA YAHOVA
Ninga Zuze na Mariya, anyakumanga banja asafunika kuwangisa uxamwali wawo na Yahova (Onani ndima 3)
3. Kukhala na uxamwali wakuwanga na Yahova kunaphedza tani anyakumanga banja toera apitirize kufunana? (Ekleziaste 4:12) (Onanimbo foto.)
3 Toera kupitiriza kugasa “lirimi ya moto wa Yah” anyakumanga banja asafunika kuwangisira kakamwe toera kuwangisa uxamwali wawo na Yahova. Kucita pyenepi kunaphedza tani banja yawo? Anyakumanga banja angalemedza uxamwali wawo na Yahova, iwo anafuna kuphatisira uphungu wace, pontho pyenepi pinaaphedza toera kucalira na kukunda pinentso pyakuti panango pinafewesa ufuni wawo. (Lerini Ekleziaste 4:12.) Anthu akukola mwauzimu asawangisirambo toera kutowezera Yahova na kupangiza makhaliro ace ninga kukoma ntima, kupirira na kulekerera. (Aef. 4:32–5:1) Anyakumanga banja angapangiza makhaliro anewa, pinakhala pyakukhonda nentsa toera kuwangisa ufuni wawo. Mulongo anacemerwa Lena, wakuti ali pa banja mu pyaka pyakupiringana 25 alonga: “Ndi pyakukhonda nentsa kufuna na kulemedza munthu wakukola mwauzimu.”
4. Thangwi yanji Yahova asankhula Zuze na Mariya toera akhale anyakubala a Mesiya?
4 Onani citsandzo cibodzi ca m’Bhibhlya. Pikhafuna Yahova kusankhula mamuna na nkazi toera akhale anyakubala a Mesiya, Iye asankhula Zuze na Mariya m’mbuto mwakusankhula anthu anango a dzindza ya Dhavidhi. Thangwi yanji? Thangwi Zuze na Mariya akhali na uxamwali wakuwanga na Yahova, pontho Yahova akhadziwa kuti iwo mbadamuikha pa mbuto yakutoma m’banja mwawo. Anyakumanga banja, munapfundzanji na citsandzo ca Zuze na Mariya?
5. Amuna akumanga banja anapfundzanji na citsandzo ca Zuze?
5 Zuze akhaphatisira pitsogolero pya Yahova, pontho pyenepi pyam’phedza toera kukhala mamuna wadidi. M’maulendo matatu, iye atambira pitsogolero pya Mulungu thangwi ya banja yace. M’maulendo anewa, iye abvera na ntima onsene, maseze pikhali pyakunentsa toera kucita pyenepi. (Mat. 1:20, 24; 2:13-15, 19-21) Thangwi yakubvera pitsogolero pya Yahova, Zuze atsidzikiza Mariya, am’phedza mbantsalakana. Mwandimomwene pinthu pidacita Zuze pyacitisa Mariya kumulemedza na kunfuna kakamwe. Amuna akumanga banja, imwe munakwanisa kutowezera citsandzo ca Zuze mukusaka uphungu wa m’Bhibhlya toera kutsalakana banja yanu. d Mungaphatisira uphungu unoyu maseze pikhale pyakunentsa, munapangiza kuti musafuna nkazanu, pontho munakhala na banja yakutsandzaya. Mulongo Vanuatu, wakuti ali m’banja mu pyaka pyakupiringana 20 alonga: “Mamunanga angasaka pitsogolero pya Yahova mbapiphatisira, ine ndisamulemedza kakamwe. Ndisapibva kuti ndiri wakutsidzikizika, pontho ndisanyindira pisankhulo pyace.”
6. Akazi akumanga banja anapfundzanji na citsandzo ca Mariya?
6 Mariya akhali na uxamwali wakuwanga na Yahova; iye nee akhanyindira basi ene pikhacita Zuze toera akhale na cikhulupiro cakuwanga. Iye akhadziwa mwadidi Malemba. Kusiyapo pyenepi, iye akhasaka ndzidzi toera kunyerezera mwadidi pikhapfundza iye. (Luka 2:19, 51) Mwakukhonda penula, uxamwali ukhali na Mariya na Yahova wancitisa kukhala nkazi wadidi. Lero, akazi azinji akumanga banja asawangisira toera kucita pinthu ninga pidacita Mariya. Mwacitsandzo, mulongo anacemerwa Emiko alonga: “Mbandidzati kumanga banja, ine ndikhacita pinthu toera kuwangisa uxamwali wanga na Yahova. Mbwenye pidamala ine kumanga banja, mamunanga akhacita phembero na kutsogolera kulambira kwa banja. Natenepa ndadzindikira kuti ndatoma kunyindira basi ene iye toera kundicitira pinthu pyenepi. Ine ndaona kuti ndikhafunika kuwangisa uxamwali wanga na Yahova ndekhene. Natenepa cincino ndisasaka ndzidzi toera kucita phembero kuna Yahova, kuleri Bhibhlya na kunyerezera mwadidi pinapfundza ine.” (Agal. 6:5) Akazi akumanga banja, mungapitiriza kuwangisa uxamwali wanu na Yahova, amunanu anakhala na mathangwi adidi toera kukusimbani na kukufunani.—Mis. 31:30.
7. Anyakumanga banja anapfundzanji na citsandzo ca Zuze na Mariya thangwi yakulambira Yahova pabodzi?
7 Zuze na Mariya akhacitambo pinthu pabodzi toera kuwangisa uxamwali wawo na Yahova. Iwo akhadziwa kufunika kwa kuwangisa uxamwali wawo na Yahova ninga banja. (Luka 2:22-24, 41; 4:16) Panango pikhali pyakunentsa kuna iwo toera kucita pyenepi, makamaka mu ndzidzi ukhali iwo na ana azinji, mbwenye iwo akwanisa. Mwakukhonda penula, Zuze na Mariya ndi citsandzo cadidi kuna anyakumanga banja lero. Khala imwe muli na ana ninga Zuze na Mariya, panango pinakhala pyakunentsa kuna imwe toera kugumanika pa misonkhano peno kucita kulambira kwa banja masumana onsene. Panango pinakhalambo pyakunentsa kuna imwe toera kugumana ndzidzi wakupfundza peno kucita phembero pabodzi na ndzanu wa m’banja. Mbwenye kumbukani kuti mungalambira Yahova pabodzi, imwe munakhala na uxamwali wakuwanga na iye na ndzanu wa m’banja. Natenepa ikhani pinthu pyenepi pa mbuto yakutoma.
8. Banja inathimbana na nyatwa inacitanji toera ikwanise kucita kulambira kwa banja?
8 Mphapo ndiye tani khala mukuthimbana na nyatwa m’banja mwanu? Panango munanyerezera kuti kucita kulambira kwa banja pabodzi nee kunaphedza. Khala ndi tenepo, tomani na kupfundza pinthu pyakucepa na pyakutsandzayisa, pinthu pyakuti uwiri wanu musafuna kupicedza. Kucita pinthu pyenepi kunakuphedzani toera kuwangisa uxamwali wanu, pontho kunakuphedzani toera kukhala na cifuno cakulambira Yahova pabodzi ninga banja.
KHALANI NA NDZIDZI WAKUCEDZA PABODZI
9. Thangwi yanji anyakumanga banja asafunika kukhala na ndzidzi wakucedza pabodzi?
9 Anyakumanga banja anakwanisambo kupitiriza kufunana angakhala na ndzidzi wakucedza pabodzi. Kucita pyenepi kunakuphedzani toera mudziwe pinanyerezera ndzanu wa m’banja. (Gen. 2:24) Onani pidadzindikira Lilia na Ruslan pidamala iwo kumanga banja mu pyaka 15 nduli. Lilia alonga: “Ife tadzindikira kuti nee tikhali na ndzidzi uzinji wakucedza pabodzi ninga mukhanyerezera ife. Tikhali na pinthu pizinji toera kucita ninga kuphata basa, kucita mabasa a panyumba na kutsalakana anathu. Ife taona kuti tingakhonda kukhala na ndzidzi wakucedza pabodzi nee mbatidakwanisa kukhala na uxamwali wakuwanga unango na ndzace.”
10. Anyakumanga banja anaphatisira tani n’dida unagumanika pa Aefesi 5:15, 16?
10 Anyakumanga banja anacitanji toera akwanise kukhala na ndzidzi wakucedza pabodzi? Panango munafunika kusaka ndzidzi toera mukwanise kucedza. (Lerini Aefesi 5:15, 16.) M’bale wa ku Nigeria anacemerwa Uzondu alonga: “Ndingacita ndandanda ya mabasa anga, ndisaikhambo ndzidzi unafuna ine kucedza na nkazanga, pontho ndisaikha pyenepi pa mbuto yakutoma.” (Afil. 1:10) Onani kuti mulongo Anastasia, nkazi wa muyang’aniri wa cisa wa ku Moldova, asaphatisira tani mwadidi ndzidzi wace. Iye alonga: “Ine ndisawangisira kucita pinthu pyanga mu ndzidzi wakuti mamunanga ali kutsalakana mabasa anango. Natenepa, ife tisakwanisa kucedza mu ndzidzi unango.” Mphapo ndiye tani khala ndi pyakunentsa kuna imwe kukhala na ndzidzi wakucedza?
Ndi mabasa api akuti munakwanisa kuacita pabodzi ninga banja? (Onani ndima 11-12)
11. Ndi mabasa api akhacita Akila na Prisila pabodzi?
11 Anyakumanga banja anakwanisa kupfundza na citsandzo ca Akila na Prisila, banja yakuti ikhafuniwa na Akristu azinji a mu ndzidzi wa apostolo. (Aroma 16:3, 4) Bhibhlya nee isalonga pinthu pizinji thangwi ya banja yawo, mbwenye isapangiza kuti iwo aphata basa, amwaza mphangwa na kuphedza anango pabodzi. (Mabasa 18:2, 3, 24-26) Mwandimomwene, Bhibhlya ingalonga Akila na Prisila ndzidzi onsene iwo asalongwa pabodzi.
12. Anyakumanga banja anacitanji toera akhale na ndzidzi wakucedza pabodzi? (Onanimbo foto.)
12 Anyakumanga banja anatowezera tani citsandzo ca Akila na Prisila? Nyerezerani pinthu pizinji pyakuti imwe na ndzanu wa m’banja musafunika kupicita. Kodi imwe munakwanisa kucita pinthu pyenepi pabodzi m’mbuto mwakucita mwekha? Mwacitsandzo, Akila na Prisila akhamwaza mphangwa pabodzi. Kodi imwe musacita masasanyiro toera kucitambo pyenepi kazinji kene? Akila na Prisila akhaphatambo basa pabodzi. Panango imwe na ndzanu wa m’banja nee musaphata basa ibodzi ene, mbwenye munakwanisa kucita pabodzi mabasa a panyumba. (Ekle. 4:9) Mungaphedzana, imwe munapibva kuti mukuphata basa pabodzi, pontho munakhala na mwai wakucedza. Robert na Linda ali pabodzi ninga banja mu pyaka pyakupiringana 50. Robert alonga: “Mwandimomwene, ife nee tiri na ndzidzi uzinji toera kucita ubalangazi pabodzi. Mbwenye ndingatsuka maparato pabodzi na nkazanga, peno ndingatsalakana jardim, nkazanga mbabwera kudzandiphedza ndisakhala wakutsandzaya. Kucita pinthu pabodzi kusatiphedza toera kukhala akuphatana, pontho ufuni wathu usakhala wakuwanga.”
13. Anyakumanga banja asafunika kucitanji toera akhale akuphatana?
13 Kumbukani kuti basi ene kukhala pabodzi nee kunacitisa anyakumanga banja kukhala akuphatana. Mulongo wakumanga banja anakhala ku Brazil alonga: “Lero, nakuti pana pinthu pizinji pyakucita panango tinanyerezera kuti tisakhala pabodzi basi ene thangwi tisakhala n’nyumba ibodzi ene. Ine ndaona kuti ndisafunika kucita pizinji kupiringana basi ene kukhala pabodzi. Ndisafunikambo kubvesera mwadidi mamunanga angalonga.” Onani kuti Bruno na nkazace Tays asacitanji toera kubveserana mwadidi angalonga. Bruno alonga: “Mu ndzidzi unacedza ife, tisasiya mitokodzi yathu kutali mbaticedza mwakutsandzaya.”
14. Khala anyakumanga banja nee asakomerwa kucedza pabodzi, asafunika kucitanji?
14 Mphapo ndiye tani khala imwe na ndzanu wa m’banja nee musakomerwa kukhala pabodzi toera kucedza? Panango imwe musakomerwa na pinthu pyakusiyana peno musaipirwa na ndzanu wa m’banja. Mphapo munacitanji? Nyerezerani citsandzo ca moto cidalonga ife pakutoma. Moto nee usagaka kakamwe mu ndzidzi ubodzi ene unaphatiswa iwo. Iwo usafunika kuikhwa nkhuni zing’ono pakutoma, buluka penepo nkhuni zikulu. Munjira ibodzi ene, imwe munakwanisambo kutoma kukhala na ndzidzi wakucepa toera kucedza ntsiku zonsene. Pontho citani pinthu pyakuti uwiri wanu musakomerwa napyo, tayu pinthu pyakuti pinacitisa m’bodzi wa imwe kuipirwa. (Tiya. 3:18) Mungacita pyenepi, panango munatoma pontho kufunana kakamwe unango na ndzace.
TSALAKANANI NDZANU WA M’BANJA MWACILEMEDZO
15. Thangwi yanji cilemedzo ndi cakufunika toera anyakumanga banja apitirize kufunana?
15 Cilemedzo ndi cakufunika kakamwe m’banja. Cilemedzo ndi ninga muya wakuti usacitisa moto kupitiriza kugaka. Pangasoweka muya, moto unathima mwakucimbiza. Munjira ibodzi ene, pangasoweka cilemedzo kufunana kwa anthu awiri akumanga banja kunathowa mwakucimbiza. Munjira inango, anyakumanga banja anawangisira toera kulemedzana unango na ndzace asawangisirambo toera ufuni wawo upitirize kukhala wakuwanga. Ngakhale tenepo, kumbukani kuti nee musafunika basi ene kunyerezera kuti musalemedza ndzanu wa m’banja, mbwenye ndzanu wa m’banja asafunika kupibva kuti asalemedzwa. Penny na Aret ali pabodzi ninga banja mu pyaka pyakupiringana 25. Penny alonga: “Nakuti tisalemedzana unango na ndzace, ife tisafunana kakamwe panyumba pathu. Ife tisacedza mwakusudzuka thangwi tisalemedza maonero a unango na ndzace.” Mphapo musafunika kucitanji toera ndzanu wa m’banja apibve kuti mwandimomwene musamulemedza? Onani citsandzo ca Abhrahamu na Sara.
M’bale wakumanga banja asafunika kupangiza cilemedzo kuna nkazace mukubvesera mwadidi angalonga (Onani ndima 16)
16. Amuna akumanga banja anapfundzanji na citsandzo ca Abhrahamu? (1 Pedhru 3:7) (Onanimbo foto.)
16 Abhrahamu akhatsalakana Sara mwacilemedzo. Iye akhalemedza maonero a Sara na mabvero ace. Ulendo unango Sara atsukwala mbapanga Abhrahamu mabvero ace, pontho ampasa mulando thangwi ya pinthu pikhantsukwalisa. Kodi Abhrahamu atawira mwakuipirwa? Nkhabe. Iye akhadziwa kuti Sara akhambvera, pontho akhaphedzera pisankhulo pyace. Abhrahamu abvesera nkazace, pontho ayesera kumalisa nkandzo ukhantsukwalisa. (Gen. 16:5, 6) Tisapfundzanji? Amuna akumanga banja, imwe muli na basa yakucitira pisankhulo banja yanu. (1 Akor. 11:3) Mbwenye toera kupangiza ufuni musafunika kubvesera maonero a nkazanu mbamudzati kucita cisankhulo, makamaka khala cisankhulo ceneci cisan’khuya. (1 Akor. 13:4, 5) Midzidzi inango, panango nkazanu anatsukwala, pontho anafuna kukupangani mabvero ace. Kodi imwe musalemedza mabvero ace mukubvesera mwadidi mu ndzidzi unalonga iye? (Lerini 1 Pedhru 3:7.) Angela na Dmitry ali pabodzi ninga banja cifupi na pyaka 30. Iye afokotoza kuti mamunace asapangiza tani kuti asamulemedza. Iye alonga: “Ndzidzi onsene Dmitry ali dzololo toera kundibvesera ndingatsukwala peno basi ene ndingafuna kucedza. Iye ndi wakupirira maseze ndilonge mwakukhonda khurudzika.”
17. Akazi akumanga banja anapfundzanji na citsandzo ca Sara? (1 Pedhru 3:5, 6)
17 Sara akhalemedza Abhrahamu mukuphedzera pisankhulo pyace. (Gen. 12:5) Ulendo unango, Abhrahamu akhafuna kupasa cakudya alendo akuti nee akhaadikhira. Natenepa, iye aphemba Sara toera asiye pikhacita iye kuti akhunganye mikate. (Gen. 18:6) Sara acita mwakucimbiza pinthu pidapangwa iye na Abhrahamu. Akazi akumanga banja, imwe munakwanisa kutowezera citsandzo ca Sara mukuphedzera pisankhulo pya amunanu. Mungacita pyenepi, ufuni wanu kuna unango na ndzace unakhala wakuwanga. (Lerini 1 Pedhru 3:5, 6.) Dmitry, adalongwa mu ndima idamala, afokotoza kuti nkazace asancitisa tani kupibva kuti asamulemedza. Iye alonga: “Ine ndisapereka takhuta kuna Angela thangwi yakuwangisira kwace toera kuphedzera pisankhulo pyanga, maseze maonero athu akhale akusiyana. Pinthu pingakhonda kufamba mwadidi, iye nee asandipasa mulando.” Mwandimomwene, ndi pyakukhonda nentsa kufuna munthu anatilemedza!
18. Anyakumanga banja anaphedzeka tani angawangisira toera ufuni wawo ukhonde kuthowa?
18 Lero, Sathani asafuna kumalisa ufuni unaoneka pakati pa mabanja Acikristu. Iye asadziwa kuti anyakumanga banja angakhonda kufunana, iwo nee anakhala na uxamwali wakuwanga na Yahova. Mbwenye ufuni wandimomwene nee usamala. Natenepa, citisani kuti ufuni wanu na ndzanu wa m’banja ukhale ninga ufuni unalongwa mu Nyimbo ya Salomoni. Khalani akutonga toera kuikha Yahova pa mbuto yakutoma m’banja mwanu, kukhala na ndzidzi wakucedza pabodzi na kulemedza mabvero a ndzanu wa m’banja na pinafuna iye. Mungacita pyenepi, banja yanu inapasa mbiri ule Adatomesa ufuni wandimomwene, Yahova, pontho ninga moto unagaka mwadidi, ufuni wanu unakhala wakuwanga mu umaso wanu onsene.
NYIMBO 132 Cincino Ndife Manungo Mabodzi
a Yahova apasa anthu muoni wakumanga banja, wakuti usacitisa mamuna na nkazi wakumanga banja kupangiza ufuni wakupambulika kuna unango na ndzace. Mbwenye midzidzi inango ufuni unoyu unakwanisa kuthowa. Khala ndimwe wakumanga banja, nsolo uno unakuphedzani toera kupitiriza kupangiza ufuni kuna ndzanu wa m’banja mbamukhala na banja yakutsandzaya.
b Ufuni wandimomwene wakuti nee usathowa na wakupirira usacemerwa, “lirimi ya moto wa Yah” thangwi ndi Yahova Adatomesa ufuni unoyu.
c Ngakhale kuti nkazanu peno mamunanu nee ndi Mboni wa Yahova, maonero anewa anakuphedzani toera kuwangisa ufuni wanu m’banja.—1 Akor. 7:12-14; 1 Ped. 3:1, 2.
d Mwacitsandzo, onani uphungu wakuphedza m’misolo yakuti “Ajuda para Família,” inagumanika mu jw.org na mu JW Library®.
