1. Abhrahamu apfundziswanji na Yahova?

 ABHRAHAMU cipo mbadaduwala pidampanga Yahova kubulukira mwa anju kuti iye mbadafudza mizinda ya Sodhoma na Gomora. Abhrahamu adzudzumika mbabvundza Yahova: “Kodi munafudzadi anthu akulungama pabodzi pene na akuipa? . . . Kodi Ntongi wa dziko yonsene nee anadzacita pinthu mwakulungama?” Mwakupirira Yahova apfundzisa xamwali wace Abhrahamu cinthu cakuti mpaka lero cisatibalangaza, pontho cisatipfundzisa cinthu cakufunika kakamwe: Mulungu cipo anafudza anthu akulungama.—Gen. 18:23-33.

2. Tisadziwa tani kuti ndzidzi onsene Yahova asatonga anthu mwaulungami na mwantsisi?

² Thangwi yanji tiri na cinyindiro cakuti Yahova angatonga anthu ndzidzi onsene iye asacita pyenepi mwakulungama na mwantsisi? Thangwi ‘Yahova asaona mitima’ ya anthu. (1 Sam. 16:7) Mwandimomwene, iye asadziwa “mitima ya anthu onsene.” (1 Ama. 8:39; 1 Kro. 28:9) Pyenepi ndi pyakudzumatirisa. Ife nee tinakwanisa kubvesesa njira inatonga Yahova anthu. Na thangwi ineyi, mpostolo Paulu atsogolerwa na nzimu wakucena toera kulemba tenepa thangwi ya Yahova: “Mbani anakwanisa kubvesesa kutonga kwace!”—Aroma 11:33.

3-4. Ndi mibvundzo ipi yakuti panango tinaicitika, pontho tinaonanji mu nsolo uno? (Juw. 5:28, 29)

³ Ngakhale tenepo, midzidzi inango panango tinacitika mibvundzo ibodzi ene ninga idacita Abhrahamu. Panango tinabvundzika kuti: ‘Kodi anthu adafudzwa m’mizinda ya Sodhoma na Gomora ali na cidikhiro? Kodi anango mwa anthu anewa anadzalamuswambo muli akufa pakulamuswa kwa ‘anthu akukhonda kulungama’?’—Mabasa 24:15.

⁴ Tendeni tione pinadziwa ife thangwi ya kulamuswa kwa anthu muli akufa. Pa nsonkhano wa caka ca 2023, ife tatambira kubvesesa kupswa thangwi ya ‘kulamuswa muli akufa toera kukhala  m’maso’ na ‘kulamuswa muli akufa toera kutongwa.’ a (Lerini Juwau 5:28, 29.) Kubvesesa kweneku kupswa kwaticitisa kucita macinjo anango. Mu nsolo uno na unatowera tinaona macinjo anewa. Thangwi yakutonga mwakulungama kwa Yahova, pakutoma tinaona pinthu pyakuti nee tisapidziwa, buluka penepo tinaona pinthu pinadziwa ife.

PINTHU PYAKUTI NEE TISAPIDZIWA

5. Kale mabukhu athu akhalonganji thangwi ya ale adafudzwa m’mizinda ya Sodhoma na Gomora?

⁵ Kale mabukhu athu akhafokotoza pinthu pikhafuna kucitikira anthu anatongwa na Yahova ninga akukhonda kulungama. Ife tikhalonga kuti anthu adafudzwa ninga ale adafudzwa m’mizinda ya Sodhoma na Gomora nee mbadalamuswa muli akufa. Mbwenye pakumala kupfundza pyenepi mwadidi na kucita phembero, taona kuti nee tinakwanisa kulonga pyenepi na cinyindiro. Thangwi yanji?

6. Perekani pitsandzo pya anthu akukhonda kulungama adatongwa na Yahova. Ndi pinthu pipi pyakuti nee tisapidziwa thangwi ya iwo?

⁶ Pali na pinthu pizinji pyakuti tisafunika kupinyerezera, pontho pali na mphangwa zizinji za m’Bhibhlya zinalonga thangwi ya njira idatonga Yahova anthu akukhonda kulungama. Mwacitsandzo, Yahova afudza anthu onsene pa Madzi Makulu kusiyapo Nowa na banja yace. Pontho aphatisira Aizraeli toera kufudza madzindza manomwe a anthu akhali mu Dziko Yakupikirwa. Kusiyapo pyenepi, iye aphatisira anju m’bodzi toera kupha anyankhondo a Asirya akukwana 185.000 pa ntsiku ibodzi namasiku. (Gen. 7:23; Dheu. 7:1-3; Iza. 37:36, 37) Bvundzikani: ‘Kodi tinakwanisa kulonga na cinyindiro kuti Yahova afudza anthu anewa kwenda na kwenda, pontho nee ali na cidikhiro cakulamuswa muli akufa? Kodi Bhibhlya isalonga mphangwa zonsene zinafuna ife toera tilonge pyenepi na cinyindiro?’ Nkhabe. Thangwi yanji?

7. Ndi pinthu pipi pyakuti nee tisapidziwa thangwi ya anthu adafudzwa pa Madzi Makulu na anthu akakhala mu dziko ya Kanani? (Onani iri pa tsamba yakutoma.)

⁷ Mu pitsandzo pidamala ife kuona, nee tisadziwa kuti Yahova atonga tani munthu m’bodzi na m’bodzi, pontho nee tisadziwa khala anthu adaphiwa akhala na mwai wakupfundza pya Yahova mbatcunyuka. Mphangwa za m’Bhibhlya zinalonga pya ndzidzi wa Madzi Makulu zisalonga kuti Nowa “akhamwaza mphangwa za ulungami.” (2 Ped. 2:5) Mbwenye Bhibhlya nee isalonga kuti pikhamanga Nowa arka, iye akhamwazambo mphangwa kuna anthu a mu ndzidzi unoyu. Ife tinakwanisambo kulonga pibodzi pyene thangwi ya anthu akhacita pinthu pyakuipa akakhala mu dziko ya Kanani. Ife nee tisadziwa khala onsene akhala na mwai wakupfundza pya Yahova mbatcunyuka madawo awo.

8. Ndi pinthu pipi pyakuti nee tisapidziwa thangwi ya anthu akakhala m’mizinda ya Sodhoma na Gomora?

⁸ Ndiye tanimbo pya anthu a ku Sodhoma na Gomora? Loti akhali wakulungama, pontho akhali pabodzi na anthu anewa mu nzinda wa Sodhoma. Kodi Loti akwanisa kumwazira mphangwa m’bodzi na m’bodzi wa anthu a mizinda ineyi? Nkhabe. Mwakukhonda penula, anthu anewa akhacita pinthu pyakuipa. Kodi iwo akhadziwa kusiyanisa cinthu cadidi na cakuipa? Pisaoneka kuti nkhabe. Kumbukani kuti amuna a mu nzinda unoyu akhafuna kupita m’mabonde na alendo adabwera panyumba ya Loti. Bhibhlya isalonga kuti nsoka unoyu wa amuna ukhaphataniza “kutomera aphale mpaka akulu.” (Gen. 19:4; 2 Ped. 2:7) Mphapo tinakwanisa kulonga kuti Mulungu wathu wantsisi, Yahova nee analamusa anthu anewa muli akufa? Nkhabe. Yahova akhadapanga Abhrahamu kuti mu nzinda unoyu nee mukhali na anthu khumi akulungama.  (Gen. 18:32) Natenepa anthu anewa akhali akukhonda kulungama, pontho akhali akuthema toera kufudzwa na Yahova. Mphapo tinakwanisa kulonga na cinyindiro consene kuti nee m’bodzi wa anthu anewa anadzalamuswa muli akufa ‘pakulamuswa kwa anthu akukhonda kulungama’? Nkhabe!

9. Ndi pinthu pipi pyakuti nee tisapidziwa thangwi ya Salomoni?

⁹ Bhibhlya isalongambo pya anthu akulungama akuti adzakhala akukhonda kulungama. M’bodzi wa iwo ndi Mambo Salomoni. Iye akhadziwa mwadidi Yahova, pontho akhadziwa kuti akhafunika kulambirwa tani, na thangwi ineyi Yahova ampasa nkhombo zizinji. Mbwenye mukupita kwa ndzidzi, Salomoni atoma kulambira alungu authambi. Yahova aipirwa na madawo anewa, pontho pidacita Salomoni pyabweresa nyatwa kuna Aizraeli mu pyaka pizinji. Ndimomwene kuti Bhibhlya isalonga kuti pidafa Salomoni aikhwa mu nthumbi zidaikhwa amuna anango akukhulupirika ninga Mambo Dhavidhi. (1 Ama. 11:5-9, 43; 2 Ama. 23:13) Kodi mafala anewa asabveka kuti Salomoni anadzalamuswa muli akufa? Bhibhlya nee isalonga. Anango panango asanyerezera kuti Salomoni anadzalamuswa muli akufa thangwi Bhibhlya isalonga kuti ‘munthu adafa alekererwa madawo ace.’ (Aroma 6:7) Unoyu ndi undimomwene, mbwenye nee pisabveka kuti anthu onsene adafa anadzalamuswa muli akufa. Munthu nee ali na ufulu wakulamuswa muli akufa basi ene thangwi afa. Kulamuswa muli akufa ndi muoni wa Mulungu wathu waufuni, Yahova. Iye asapasa muoni unoyu anthu anafuna iye kuti antumikire kwenda na kwenda. (Yobe 14:13, 14; Juw. 6:44) Kodi Salomoni anadzakhala na mwai wakulamuswa muli akufa? Anadziwa pyenepi ndi Yahova basi, tayu ife. Mbwenye pinadziwa ife ndi pyakuti Yahova ndzidzi onsene asacita pinthu mwakulungama.

PINTHU PINADZIWA IFE

10. Ndi mabvero api asakhala na Yahova angafuna kutonga munthu toera kufudzwa? (Ezekiyeli 33:11) (Onanimbo foto.)

¹⁰ Lerini Ezekiyeli 33:11. Yahova alonga mabvero anakhala na iye angafuna kutonga munthu toera kufudzwa. Mpostolo Pedhru atsogolerwa toera kulonga mafala mabodzi ene adalonga mprofeta Ezekiyeli kuti: “Yahova . . . nkhabe funa kuti munthu afudzwe.” (2 Ped. 3:9) Mafala anewa asatibalangaza kakamwe. Ife tisadziwa kuti Yahova cipo anafudza munthu angakhonda kukhala na mathangwi adidi toera kucita pyenepi. Pontho ndzidzi onsene asabvera ntsisi khala ndi pyakufunika.

11. Ndi anthu api akuti nee anadzalamuswa muli akufa, pontho tisadziwa tani pyenepi?

¹¹ Ninji pinadziwa ife thangwi ya anthu akuti nee anadzalamuswa muli akufa? Bhibhlya isalonga pitsandzo pyakucepa. b Mwacitsandzo, Yezu alonga kuti Yuda Iskariyoti nee mbadalamuswa muli akufa. (Marko 14:21; onanimbo Juwau 17:12 na nota de estudo.) Yuda akhadziwa kuti akhadawira Yahova na Mwanace, Yezu. (Onani Marko 3:29 na notas de estudo.) Yezu alongambo kuti atsogoleri a mauphemberi nee akhali na cidikhiro cakulamuswa muli akufa. (Mat. 23:33; onani Juwau 19:11 na nota de estudo “o homem”.) Kusiyapo pyenepi, mpostolo Paulu alonga kuti anthu akupanduka akukhonda tcunyuka nee mbadalamuswa muli akufa.—Aheb. 6:4-8; 10:29.

12. Ninji pinadziwa ife thangwi ya ntsisi za Yahova? Perekani pitsandzo.

¹² Ninji pinadziwa ife thangwi ya ntsisi za Yahova? Kodi iye apangiza tani kuti ‘nkhabe funa kuti anthu afudzwe’? Onani kuti Yahova abvera tani ntsisi anthu anango adacita madawo makulu. Mwacitsandzo, Mambo Dhavidhi acita upombo,  pontho apha munthu. Mbwenye thangwi ya kutcunyuka, Yahova ambvera ntsisi mbamulekerera. (2 Sam. 12:1-13) Mambo Manase acita pinthu pyakuipa pizinji mu umaso wace. Ngakhale tenepo, Yahova aona kuti Manase akhadatcunyuka na ntima onsene, na thangwi ineyi, iye amulekerera. (2 Kro. 33:9-16) Pitsandzo pyenepi pisapangiza kuti Yahova ndzidzi onsene asabvera ntsisi anthu, angakhala na mathangwi adidi toera kucita pyenepi. Pontho iye analamusa muli akufa anthu adatcunyuka, maseze acita madawo makulu.

13. (a) Thangwi yanji Yahova abvera ntsisi anthu a ku Ninive? (b) Yezu alonganji thangwi ya anthu a ku Ninive?

¹³ Ife tisadziwambo kuti Yahova abvera ntsisi anthu a ku Ninive. M’bukhu ya Yona, iye alonga: “Ine ndaona pinthu pyakuipa pinacita anthu a mu nzinda unoyu.” Pidatcunyuka iwo madawo awo, Yahova aalekerera mwakukoma ntima. Yahova akhala wantsisi kakamwe kupiringana Yona. Yona aipirwa kakamwe, natenepa Yahova ankumbusa kuti anthu a ku Ninive nee akhadziwa ngakhale “kusiyanisa cinthu cadidi na cakuipa.” (Yona 1:1, 2; 3:10; 4:9-11) Mukupita kwa ndzidzi, Yezu aphatisira citsandzo ceneci toera kupfundzisa anthu thangwi ya ulungami wa Yahova na ntsisi zace. Yezu alonga kuti anthu a ku Ninive adatcunyuka ‘anadzalamuswa pa ntsiku yakutongwa.’—Mat. 12:41.

14. Ndi munjira ipi anthu a ku Ninive ‘anadzalamuswa muli akufa toera kutongwa’?

¹⁴ Ndi ‘ntsiku ipi yakutongwa’ inafuna ‘kudzalamuswa muli akufa’ anthu a ku Ninive? Yezu alonga kuti kunadzaoneka ‘kulamuswa muli akufa toera kutongwa.’ (Juw. 5:29) Iye akhalonga pya Utongi wace wa Pyaka Cikwi. Ndi mu ndzidzi unoyu unafuna kudzaoneka “kulamuswa muli akufa kwa anthu akulungama na akukhonda kulungama.” (Mabasa 24:15) Anthu akukhonda kulungama ‘anadzalamuswa toera kutongwa’ peno Yahova na Yezu anadzaona khala anthu anewa ali kubvera na kuphatisira pinapfundziswa iwo peno nkhabe. Munthu akakhala ku Ninive angadzalamuswa muli akufa, mbakhonda kulambira Yahova munjira yadidi, Yahova nee anantawirisa kuti apitirize kukhala m’maso. (Iza. 65:20) Mbwenye onsene anafuna kusankhula kulambira Yahova, anadzakhala na mwai wakukhala m’maso kwenda na kwenda!—Dhan. 12:2.

15. (a) Thangwi yanji nee tisafunika kulonga kuti anthu adafudzwa m’mizinda ya Sodhoma na Gomora nee anadzalamuswa muli akufa? (b) Tisabvesesa tani mafala anagumanika pa lemba ya Yuda 7? (Onani bokosi ya nsolo wakuti “ Kodi Yuda Akhafuna Kulonganji?”)

 ¹⁵ Pidalonga Yezu thangwi ya anthu a ku Sodhoma na Gomora, iye alonga kuti “ntsiku yakutongwa” mbidakhala yakukhonda nentsa kuna iwo kupiringana kuna anthu adankhonda mbakhonda kubvesera mphangwa zace. (Mat. 10:14, 15; 11:23, 24; Luka 10:12) Kodi Yezu akhafuna kulonganji? Anango panango ananyerezera kuti Yezu akhatekeresa pinthu. Mbwenye nee ndi pyenepi pikhacita iye. Kumbukani kuti mu ndzidzi udalonga Yezu kuti anthu a ku Ninive ‘mbadalamuuswa pa ntsiku yakutongwa,’ iye nee akhalonga mwakuphipirisa. Munjira ibodzi ene, pisaoneka kuti pikhalonga Yezu thangwi ya anthu a ku Sodhoma na Gomora pa “ntsiku yakutongwa” iye nee akhalongambo mwakuphipirisa. Pisaoneka kuti “ntsiku yakutongwa” ndi ibodzi ene kuna anthu a ku Ninive na anthu a ku Sodhoma na Gomora. Kusiyapo pyenepi, ndi pyakudzumatirisa kuona kuti Yezu alonga kuti ‘kulamuswa muli akufa toera kutongwa’ mbakudaphataniza ale “adacita pinthu pyakuipa.” (Juw. 5:29) Anthu a mizinda ya Sodhoma na Gomora acita madawo makulu, ninga adacita anthu a ku Ninive. Mbwenye anthu a ku Ninive akhala na mwai wakutcunyuka. Natenepa, panango anthu a ku Sodhoma na Gomora ali na cidikhiro cakulamuswa muli akufa. Anango mwa anthu anewa panango anadzalamuswa muli akufa, mbatikhala na mwai wa kuapfundzisa pya Yahova na Yezu.

16. Thangwi yanji Yahova athema kusankhula anthu anafuna kudzalamuswa muli akufa? (Yeremiya 17:10)

¹⁶ Lerini Yeremiya 17:10. Lemba ineyi isatiphedza toera kubvesesa pinadziwa ife kuti Yahova ndzidzi onsene ‘asaona mwadidi piri muntima na pinanyerezera munthu muntima mwace.’ Mwakukhonda penula, Yahova angadzalamusa anthu muli akufa, iye anadzabwezera “m’bodzi na m’bodzi mwakubverana na pinacita iye.” Khala ndi pyakufunika, Yahova anadzatonga anthu, mbwenye anadzacita pyenepi mwantsisi. Natenepa nee tisafunika kulonga kuti munthu nee anadzalamuswa muli akufa, kusiyapo khala Bhibhlya yalonga pyenepi.

 “NTONGI WA DZIKO YONSENE” ANADZACITA “PINTHU MWAKULUNGAMA”

17. Ninji pinafuna kudzacitikira anthu adafa?

¹⁷ Kutomera mu ndzidzi udakhonda bvera Sathani pabodzi na Adhamu na Eva, anthu azinji kakamwe asafa. Kufa ndi “nyamalwa” wankulu kakamwe. (1 Akor. 15:26) Mphapo ninji pinafuna kucitika na anthu onsene? Nsoka ung’ono wa atowereri akukhulupirika a Kristu akukwana 144.000 anadzalamuswa muli akufa toera kukhala na umaso wakukhonda kufa kudzulu. (Apok. 14:1) Pontho anthu akulungama akuti ndi amuna na akazi azinji akuti akhafuna Yahova na akukhulupirika, anadzalamuswa muli akufa toera kukhala pa dziko yapantsi kwenda na kwenda, mbapitiriza kukhala akukhulupirika kuna Yahova mu Utongi wa Pyaka Cikwi wa Kristu na mu ndzidzi wa mayesero akumalisa. (Dhan. 12:13; Aheb. 12:1) Kusiyapo pyenepi, mu ndzidzi wa Utongi wa Pyaka Cikwi, “anthu akukhonda kulungama” kuphatanizambo ale akuti cipo atumikira Yahova, ngakhale ale “adacita pinthu pyakuipa” anadzakhala na mwai wakucinja mbakhala atumiki akukhulupirika a Yahova. (Luka 23:42, 43) Mbwenye anthu anango acita pinthu pyakuipa kakamwe, pontho asandukira Yahova. Yahova nee anadzalamusa muli akufa anthu anewa.—Luka 12:4, 5.

18-19. (a) Ndi cinyindiro cipi cakuti tinakwanisa kukhala naco thangwi ya kutonga kwa Yahova anthu adafa? (Izaiya 55:8, 9) (b) Ndi mibvundzo ipi inafuna ife kutawira mu nsolo unatowera?

¹⁸ Kodi tinakwanisa kukhala na cinyindiro cakuti Yahova angatonga anthu ndzidzi onsene asacita cisankhulo cadidi? Inde. Ninga pidalonga Abhrahamu, Yahova ndi “Ntongi wa dziko yonsene” waungwiro, waudziwisi na wantsisi. Iye apfundzisa Mwanace, pontho ampasa basa yakutonga anthu onsene. (Juw. 5:22) Yahova na Yezu asadziwa mabvero na pinanyerezera m’bodzi na m’bodzi pa dziko yapantsi. (Mat. 9:4) Natenepa iwo angatonga munthu, ndzidzi onsene asacita pinthu “mwakulungama.”

¹⁹ Lekani penula kuti ndzidzi onsene Yahova anacita pisankhulo pyadidi. Ife nee tisakwanisa kutonga anango, mbwenye Yahova asakwanisa. (Lerini Izaiya 55:8, 9.) Na thangwi ineyi, tisafunika kusiya pyonsene m’manja mwa Yahova na mwa Mwanace, Mambo wakuti asatowezera mwadidi kakamwe ulungami na ntsisi za Pai wace, Yahova. (Iza. 11:3, 4) Mphapo ndiye tani kutonga kunafuna kudzacita Mulungu mu ndzidzi wa nyatwa ikulu? Ndi pinthu pipi pyakuti nee tisapidziwa? Pontho ndi pinthu pipi pinadziwa ife? Nsolo unatowera unatawira mibvundzo ineyi.