1, 2. (a) Kodi banja yatoma tani? (b) Kodi mamuna na nkazi wakutoma adzindikiranji thangwi ya banja? (Onani cithundzithundzi cakutoma.)

ANTHU onsene acitwa na cifuno cakumanga banja. Mphapo banja yatoma tani, pontho yacitwa na cifuniro cipi? Kudziwa pyenepi kunatiphedza toera kukhala na maonero akulinganira thangwi ya banja na kukhala akutsandzaya. Mulungu acita mamuna wakutoma Adhamu mbamphemba toera kupasa madzina pinyama. Adhamu aona kuti pinyama pyonsene pikhali mamuna na nkazi, ‘mbwenye munthu nee akhali na ndzace wakumphedza.’ Natenepa, Mulungu agonesa citulo Adhamu, mbabulusa mbabvu yace mbacita nayo nkazi. Yahova apasa Adhamu nkazi, mbakhala nkazace. (Lerini Genesi 2:20-24.) Pyenepi pisapangiza kuti banja ndi muoni udatipasa Yahova.

² Mudapita pyaka pizinji, Yezu abwerezera mafala adalonga Yahova m’munda wa Edheni: ‘Mamuna anadzasiya babace na mace mbaphatana na nkazace, pontho uwiri wawo anadzakhala manungo mabodzi ene.’ (Mateo 19:4, 5) Nakuti Mulungu aphatisira mbabvu ya Adhamu mbacita nayo nkazi wakutoma, anyakumanga banja asafunika kudzindikira kuti iwo ndi  manungo mabodzi ene. Yahova cipo akhafuna kuti anyakumanga banja akhondane peno mamuna kukhala na akazi akupiringana m’bodzi.

3. Kodi cifuniro cikulu ca banja cikhali cipi?

³ Adhamu akhali wakutsandzaya kakamwe na nkazace, wakuti mukupita kwa ndzidzi ampasa dzina ya Eva. Iye akhali mphedzi wace. Ninga mamuna na nkazi, Adhamu na Eva mbadakhala akutsandzaya. (Genesi 2:18) Cifuniro cikulu ca banja cikhali kudzadza dziko yapantsi. (Genesi 1:28) Ana acimuna na acikazi mbadafuna anyakubalawo, mbwenye mukupita kwa ndzidzi mbadamanga banja mbabuluka panyumba ya anyakubalawo toera kukhala na mabanja awo ene. Anthu mbadadzadza dziko yonsene yapantsi mbaicitisa kukhala paradhizu.

4. Ninji pidacitikira banja yakutoma?

⁴ Pidakhonda Adhamu na Eva kubvera Yahova, banja yakutoma yafudzika. “Nyoka yakale,” Sathani Dyabo, anyengeza Eva mukumpanga kuti angadya nsapo wa ‘muti wakudziwa pyadidi na pyakuipa’ mbadakhala na cidziwiso cakupambulika. Sathani alonga kuti angadya nsapo unoyu, mbapidamphedza toera kudziwa pyadidi na pyakuipa. Eva nee apangiza cilemedzo kuna Adhamu ninga nsolo wa banja pidasankhula iye kudya nsapo mbadzati kucedza na mamunace. Pontho, Adhamu nee abvera Mulungu mudatawira iye kudya nsapo udapaswa iye na nkazace.​—Apokalipse 12:9; Genesi 2:9, 16, 17; 3:1-6.

5. Tinapfundzanji kubulukira ku ntawiro wa Adhamu na Eva kuna Yahova?

⁵ Pidaabvundzisa Yahova, Adhamu apasa mulando nkazace. Iye alonga: ‘Nkazi adandipasa imwe, andipasa nsapo, ine mbandiudya.’ Buluka penepo, Eva apasambo mulando nyoka, mbalonga kuti ndiyo idan’nyengeza. (Genesi 3:12, 13) Adhamu na Eva apereka mathangwi akukhonda bveka thangwi yakukhonda bvera kwawo, natenepa, Yahova atonga anyakupanduka anewa. Pidacita iwo ndi cenjezo kwa ife! Toera banja ipembere, amuna na akazi asafunika kubvera Yahova na kucita mabasa anaphembwa iwo.

6. Munafokotoza tani lemba ya Genesi 3:15?

⁶ Mwakukhonda tsalakana pidacita Sathani mu Edheni, Yahova acitisa kuti anthu akhale na cidikhiro ca ntsogolo. Cidikhiro ceneci cisagumanika mu profesiya yakutoma ya Bhibhlya. (Lerini Genesi 3:15.) Profesiya ineyi yalonga kuti Sathani mbadafudzwa na “dzindza” ya “nkazi.” Aanju akulungama anatumikira Yahova kudzulu ali na uxamwali wakuwanga na iye. Iwo ndi ninga nkazi wa Yahova. Iye mbadatumiza m’bodzi mwa aanju anewa toera ‘kufudza’ Sathani. Dzindza ineyi mbidacitisa anthu akubvera kugumana pontho udidi udaluza banja yakutoma. Anthu akubvera mbadakhala na mwai wakukhala pa dziko yapantsi  kwenda na kwenda, ninga pikhafuna Yahova pakutoma.​—Jwau 3:16.

7. (a) Ninji pinacitika m’mabanja thangwi yakupanduka kwa Adhamu na Eva? (b) Ninji pinalonga Bhibhlya thangwi ya amuna na akazi?

⁷ Kukhonda bvera kwa Adhamu na Eva kwakhuya mwakuipa banja yawo pabodzi na mabanja anango onsene. Mwacitsandzo, Eva na akazi anango onsene mbadabva kupha kakamwe pakubala. Akazi mbadafuna kakamwe ufuni na citsalakano ca amunawo, mbwenye amuna mbadatonga akazawo, midzidzi inango mbadaatsalakana mwakuipa ninga pinaona ife lero. (Genesi 3:16) Yahova asafuna kuti amuna akhale atsogoleri aufuni pa banja pawo, pontho asafuna kuti akazi abvere amunawo. (Aefesi 5:33) Mamuna na nkazi angaphata basa pabodzi, anakwanisa kumalisa nyatwa zizinji m’banja yawo.

8. Ninji pidacitika na mabanja kutomera mu ntsiku za Adhamu mpaka mu ntsiku za Nowa?

⁸ Adhamu na Eva mbadzati kufa, iwo akhali na ana acikazi na acimuna. (Genesi 5:4) Mwanawo wakutoma, Kaini amanga banja na nkazi wakuti akhali wacibale wace. Lameki wakuti ndi wa dzindza ya Kaini ndi munthu wakutoma analongwa m’Bhibhlya wakuti akhali na akazi awiri. (Genesi 4:17, 19) Kutomera mu ntsiku za Adhamu mpaka mu ntsiku za Nowa pakhali na anthu akucepa kakamwe akuti akhatumikira Yahova. Anthu anango akukhulupirika akhali Abheli, Enoki, Nowa na banjace. Thangwi ya ntsiku za Nowa, Bhibhlya isalonga: ‘Ana a Mulungu aona kuti akazi akhali akubalika, mbasankhula ale adafuna iwo toera akhale akazawo.’ Mbwenye pyenepi nee pikhali pyacibaliro, natenepa, aanju anewa na akazawo abala ana aukali akuti akhali amphambvu kakamwe akhacemerwa Anefili. Mu ndzidzi unoyu, ‘kuipisa kwa anthu pantsi pano kukhali kukulu’ pontho ‘manyerezero onsene a anthu akhali akucita pinthu pyakuipa ndzidzi onsene.’​—Genesi 6:1-5.

9. Ninji pidacita Yahova kuna anthu akuipa a mu ntsiku za Nowa? Tinapfundzanji thangwi ya pidacitika mu ntsiku zenezi?

⁹ Yahova alonga kuti mbadabweresa Cigumula pa dziko yapantsi toera kufudza anthu onsene akuipa. ‘Nowa, mpfundzisi wa ulungami,’ acenjeza anthu anewa pya Cigumula cikhafuna kudza. (2 Pedro 2:5) Mbwenye iwo nee abvera pidalonga Nowa, thangwi iwo akhadzudzumika kakamwe na umaso wawo, pabodzi na kumanga banja. Yezu alandanisa ntsiku zathu na ntsiku za Nowa. (Lerini Mateo 24:37-39.) Lero, anthu azinji nee asatawira mphangwa zinamwaza ife zinalonga pya Umambo wa Mulungu. Tisamwaza mphangwa zenezi, kumala mbakudzati kufika. Kodi tinapfundzanji thangwi ya pidacitika mu ntsiku za Nowa? Nee tisafunika kutawirisa pinthu ninga kumanga banja na kubala ana pikhale pyakufunika kakamwe mu umaso wathu, mbapiticitisa kuduwala ntsiku ya Yahova yakuti iri cifupi.

10. (a) Kodi anthu a misambo yakusiyanasiyana akhaona tani pya ulukwali? (b) Kodi Abhrahamu na Sara akhazikisa tani citsandzo cadidi m’banja mwawo?

¹⁰ Nowa akhali na nkazi m’bodzi, pontho m’bodzi na m’bodzi mwa anace atatu acimuna akhalimbo na nkazi m’bodzi. Mbwenye pidamala Cigumula, amuna azinji akhasemba akazi akupiringana m’bodzi. Kwa anthu azinji a misambo yakusiyanasiyana,  ulukwali ukhali wakutawirika, pontho ukhacitambo khundu ya misambo yauphemberi. Pidaenda Abhrahamu na Sara ku Kanani, iwo akhali pakati pa anthu aulukwali akuti nee akhalemedza masasanyiro a banja. Yahova afudza nzinda wa Sodhoma na Gomora thangwi anthu a mwenemu akhacita ulukwali kakamwe. Abhrahamu akhali wakusiyana na anthu anewa. Iye akhali nsolo wadidi wa banja, pontho Sara apangiza citsandzo cadidi ninga nkazi wakubvera. (Lerini 1 Pedro 3:3-6.) Abhrahamu acita masasanyiro toera mwanace Izaki amange banja na nkazi wakulambira Yahova. Izaki acitambo pibodzi pyene kuna mwanace, Yakobe, wakuti anace adzakhala makolo a madzindza 12 a Israele.

11. Kodi Mwambo wa Mose watsidzikiza tani Aisraele?

¹¹ Mukupita kwa ndzidzi, Yahova acita cibverano na dzindza ya Israele. Iye aapasa Mwambo wa Mose, wakuti ukhatsidzikiza amuna na akazi akumanga banja mu ulambiri wawo kwa Yahova. Mwacitsandzo, pakhali miyambo ikhalonga pya misambo ya mabanja, kuphatanizambo ya kupalakanya, pontho Aisraele nee akhatawiriswa kumanga banja na anthu akuti akhalambira alungu authambi. (Lerini Deuteronomyo 7:3, 4.) M’banja mungaoneka nyatwa, akulu a mpingo akhapereka ciphedzo. Pakhalimbo na miyambo inalonga pyakukhonda kukhulupirika m’banja, ntcanje na kukhonda kunyindirana m’banja. Kukhondana kukhatawiriswa, mbwenye mitemo ikhaphatisirwa toera kutsidzikiza onsene. Mwacitsandzo, mamuna mbadakhonda nkazace khala iye acita ‘cinthu cakukhonda thema.’ (Deuteronomyo 24:1) Bhibhlya nkhabe kufokotoza cinthu ceneci ‘cakukhonda thema,’ mbwenye mamuna nee mbadafunika kuphatisira madodo mang’ono ninga thangwi toera kukhonda nkazace.​—Levitiko 19:18.

12, 13. (a) Kodi amuna anango mu ntsiku za Malakiya akhatsalakana tani akazawo? (b) Ninji pinafuna kucitika khala Nkristu wakumanga banja acita upombo toera kumanga banja na munthu unango?

¹² Mu ntsiku za mprofeta Malakiya, Ayuda azinji akhaphatisira mathangwi akusiyana-siyana toera kukhonda akazawo. Amuna anewa akhakhonda akazawo toera amange banja na atsikana, peno akazi akuti nee akhalambira Yahova. Mu ntsiku za Yezu, Ayuda akhapitiriza kukhonda akazawo na ‘mathangwi onsene.’ (Mateo 19:3) Yahova Mulungu akhaida kukhondana kweneku kwakukhonda bverana na mwambo.​—Lerini Malakiya 2:13-16.

¹³ Lero, kukhonda khulupirika m’banja nee ndi kwakutawirika pakati pa atumiki a Yahova, pontho nee pisacitika kazinji kene. Mbwenye nyerezerani kuti Nkristu wakumanga banja acita upombo mbakhonda nkazace peno mamunace toera kumanga banja na munthu unango. Munthu unoyu angakhonda tcinyuka, anabuluswa m’mpingo toera mpingo upitirize kukhala wakucena. (1 Akorinto 5:11-13) Munthu unoyu mbadafunika ‘kubala misapo inapangiza kutcunyuka kwace’ mbadzati kubwezereswa mu mpingo. (Luka 3:8; 2 Akorinto 2:5-10) Nkhabepo ndzidzi udakhazikiswa toera munthu abwezereswe mu mpingo. Panango panapita caka cibodzi peno pingasi toera nyakudawa apangize kutcunyuka kwandimomwene toera abwezereswe mu mpingo. Maseze munthu unoyu abwezereswe m’mpingo, iye anadzatawirira mulando wace ‘pamaso pa Mulungu.’ ​—Aroma 14:10-12; onani A Sentinela, 1.° de Fevereiro de 1980, tsamba 31-32.

14. Kodi Mwambo wa Mose ukhali na cifuniro cipi?

¹⁴ Israele akhali pantsi pa Mwambo wa Mose mu pyaka pyakupiringana 1.500. Mwambo unoyu waphedza atumiki a Mulungu munjira zizinji. Mwacitsandzo, ukhapasa anthu midida toera kuaphedza kutsalakana nyatwa za m’banja na kuatsogolera mpaka kufika kwa Mesiya. (Agalata 3:23, 24) Pidafa Yezu, Mwambo unoyu wamala, pontho Mulungu acita masasanyiro mapswa. (Ahebere 8:6) Mbwenye, pinthu pinango pikhatawiriswa na Mwambo wa Mose nee pikhatawiriswabve kuna Akristu.

15. (a) Ndi midida ipi isafunika kuphatisirwa m’mpingo Wacikristu thangwi ya yakumanga banja? (b) Ndi pinthu pipi pyakuti Nkristu asafunika kupidinga mu ndzidzi unanyerezera iye pya kukhondana?

¹⁵ Ntsiku inango, Afarisi abvundzisa Yezu thangwi ya banja. Yezu aatawira kuti Mulungu akhatawirisa Aisraele toera kukhondana pantsi pa Mwambo wa Mose, maseze iye nee akhafuna pyenepi pakutoma. (Mateo 19:6-8) Ntawiro wa Yezu wapangiza kuti masasanyiro adacita Yahova pakutoma thangwi ya banja mbadafunika kuphatisirwa na Akristu. (1 Timoti 3:2, 12) Ninga ‘manungo mabodzi ene,’ anyakumanga banja akhafunika kupitiriza kukhala pabodzi. Ufuni wawo kuna Mulungu na ufuni wawo kuna unango na ndzace mbudaacitisa kupitiriza kukhala akuphatana. Anyakumanga banja angakhondana na mathangwi anango kusiyapo upombo, uwiri wawo nee ali na ufulu wakumanga banja na munthu unango. (Mateo 19:9) Munthu anakwanisa kusankhula kulekerera mamuna peno nkazi adacita upombo, mbwenye angatcunyuka. Pyenepi ndipyo pidacita mprofeta Ozeya, iye alekerera nkazace wa upombo, Gomere, pontho Yahova alekerera Aisraele pidatcunyuka iwo. (Ozeya 3:1-5) Pontho, khala munthu asadziwa kuti mamuna peno nkazace acita upombo mbasankhula kupita naye m’mabonde, pyenepi pisapangiza kuti amulekerera. Nkhabepo thangwi ya m’Malemba toera kukhondana.

16. Kodi Yezu alonganji thangwi yakukhala nzice?

¹⁶ Yezu alonga kuti Akristu andimomwene asafunika kukhondana basi ene thangwi ya upombo. Buluka penepo, iye alonga pya ‘ale akuti ali na muoni’ wakukhala nzice. Yezu alonga: ‘Ule anakwanisa kucita pyenepi mbapicite.’ (Mateo 19:10-12) Azinji asasankhula kupitiriza kukhonda kumanga banja thangwi asafuna kutumikira Yahova mwakukhonda kudzudzumiswa, natenepa iwo asafunika kusimbwa!

17. Ninji pinafuna kuphedza Nkristu toera kuona khala asafuna kumanga banja peno nkhabe?

¹⁷ Ninji pinafuna kuphedza munthu toera kudziwa khala asafuna kumanga banja peno nkhabe? Munthu asafunika kuonesesa khala anakwanisa kukhala nzice peno nkhabe. Mpostolo Paulu alonga kuti mphyadidi kukhala nzice. Mbwenye iye alongambo: ‘Mphyadidi munthu akhale na nkazace, nkazimbo akhale na mamunace gopa kucita pya ulukwali.’ Paulu athimiza: ‘Anthu anasowa mphambvu yakutonga manungo awo, mphyadidi kumanga banja, thangwi kumanga banja nkhwadidi m’mbuto mwakuthabuka na cilepelepe.’ Natenepa, munthu anakwanisa kusankhula kumanga banja toera kucalira pifuno pyakuwanga pya kupita m’mabonde pyakuti pinancitisa kukhala na nsambo wakubalangazika na pyakumaso (masturbação) peno kugwa mu ulukwali.  Mbwenye aphale na atsikana asafunika kudingika khala ali na thunga toera kumanga banja. Paulu alonga: ‘Munthu angaona kuti akunentseka kukhala ekhene, pontho khala apiringana pa uphale peno pa utsikana, acite ninga munafunira iye, nee anadawa; mphyadidi kumanga banja.’ (1 Akorinto 7:2, 9, 36; 1 Timoti 4:1-3) Mu uphale peno mu utsikana, pifuno pyakupita m’mabonde pisakhala pyakuwanga kakamwe. Mbwenye munthu nee asafunika kumanga banja thangwi ya pyenepi. Panango iye nkhabe thunga yakukwana toera kuthimbana na nyatwa za m’banja.

18, 19. (a) Kodi banja Yacikristu isafunika kutomeswa tani? (b) Tinadzadinganji mu nsolo unatowera?

¹⁸ Banja Yacikristu isafunika kutomeswa na mamuna wakubatizwa pabodzi na nkazi wakubatizwa akuti asafuna Yahova na ntima wawo onsene. Iwo asafunika kufunana kakamwe unango na ndzace toera kupangiza kuti asafuna kukhala pabodzi kwenda na kwenda. Yahova anadzaapasa nkhombo thangwi yakubvera uphungu wakumanga banja ‘basi ene mwa Mbuya.’ (1 Akorinto 7:39) Banja yawo inadzapembera angapitiriza kubvera uphungu wa Bhibhlya.

¹⁹ Lero tikukhala mu “ntsiku zakumalisa,” pontho anthu azinji nee ali na makhaliro adidi akuti asacitisa banja kukhala yakutsandzaya. (2 Timoti 3:1-5) Mu nsolo unatowera, tinadzadinga midida yakufunika ya Bhibhlya yakuti inakwanisa kuphedza Akristu toera kukhala na banja yakupembera na yakutsandzaya mwakukhonda tsalakana nyatwa zinatamba iwo. Pyenepi pinadzaaphedza kupitiriza kufamba munjira ya umaso wakukhonda mala.​—Mateo 7:13, 14.