PIKHALI ine na pyaka 12 pyakubalwa, ndadzindikira kuti ndikhali na cinthu cakufunika kakamwe toera kupasa anango. Pa nsonkhano wa Gawo, m’bale unango andibvundzisa khala ndisafuna kumwaza mphangwa. Ndalonga kuti ndisafuna, maseze cipo ndamwaza kale mphangwa. Taenda ku cisa, mbandipasa mabukhu mangasi analonga pya Umambo wa Mulungu. Buluka penepo iye andipanga: “Iwe longa na anthu a khundu iyi ya nseu, ine ndinalongambo na anthu a khundu inango.” Ine ndikhagopa, mbwenye ndatoma kumwaza mphangwa nyumba na nyumba. Ndadzumatirwa pidadzindikira ine kuti ndagawira mabukhu onsene. Mwandimomwene, anthu azinji akhafuna mabukhu akhagawira ine.

Ndabalwa mu caka 1923 mu nzinda wa Chatham, Kent, ku Inglatera. Pakumala kwa Nkhondo Yakutoma Ya Dziko Yonsene Yapantsi, anthu akhadikhira kuti dziko mbidakhala mbuto yadidi kakamwe. Mbwenye pyenepi nee pyacitika. Natenepa anthu azinji atsukwala, kuphatanizambo anyakubalanga. Anyakubalanga atsukwaliswambo na atsogoleri a Gereja ya Batista akuti akhafuna kukhala na pidzo mu gereja. Pikhali ine na pyaka 9, mai wanga atoma kusonkhana na Mboni za Yahova. Kweneko, mulongo unango akhaphatisira Bhibhlya na bukhu A Harpa de Deus toera kupfundzisa anapiana. Ine ndikhakomerwa na pikhapfundza ine.

Ninga mphale, ndikhakomerwa kupanga anthu pya cidikhiro ca Mafala a Mulungu. Kazinji kene ndikhamwaza mphangwa ndekhene nyumba na nyumba. Mbwenye pikhamwaza ine mphangwa na anango ndikhapfundza pizinji kakamwe. Mwacitsandzo, ntsiku inango ine na m’bale wakugwesera tikhaenda ku cisa cinango toera kumwaza mphangwa. Pidapita ntsogoleri unango wauphemberi ine ndalonga: “Mbuzi iyo iri kuenda.” M’bale alimirisa njinga yace mbandiphemba toera kukhala pamuti pabodzi na iye. Iye alonga: “Mbani adakupasa mphambvu toera kutonga kuti mbuzi mbani? Tende tikomerwe basi ene na kupanga anthu mphangwa zadidi mbatisiya kuti Yahova atonge ekhene.” Mu ntsiku zenezi, ndadzindikira kuti kuphedza anango kusatsandzayisa.​—Mateo 25:31-33; Machitiro 20:35.

Toera kutsandzaya na kuphedza anango, m’bale unango wakugwesera andipanga kuti midzidzi inango tisafunika kupirira. Nkazace nee akhakomerwa na Mboni za Yahova. Ntsiku inango iye andicemera toera kuenda kadya kunyumba kwace. Nkazace akhadaipirwa kakamwe thangwi mamunace akhadaenda kamwaza mphangwa, natenepa atoma kutiponyera masamba a xaya. M’mbuto mwakuipirwa na nkazace, mwakukhurudzika iye akwata masamba a xaya mbaaikha  pontho mukhali iwo. Mukupita kwa ndzidzi, kupirira kwace kwacitisa nkazace kubatizwa ninga m’bodzi wa Mboni za Yahova.

Mu nthanda ya Nyendzi ya caka 1939, pikhali ine na pyaka 16, dziko ya Britanya yatoma kumenya nkhondo na dziko ya Alemanya. Mu nthanda ya Murope ya caka 1940, ine na mai wanga tabatizwa ku Dover. Mu nthanda ya Khoni ya caka ceneci, ndaona anyankhondo azinji m’miotokala mbakapita dhuzi na panyumba yathu. Iwo apulumuka pa Nkhondo ya Dunquerque, pontho akhali akutsukwala na akusowa cidikhiro. Ndikhafuna kakamwe kuamwazira mphangwa zinalonga pya Umambo wa Mulungu na kuapanga cidikhiro cantsogolo. Pidapita nthanda zingasi, Alemanya atoma kuponya mabhomba mu Inglatera. Ntsiku zonsene namasiku, ndeka za nkhondo za Alemanya zikhapita mu cisa cathu. Tikhagopa pikhabva ife dungu ya mabhomba mbakagwiswa. Mangwana mwace na macibese, tikhaona nyumba zakufudzwa mbuto zonsene. Pyenepi pyandiphedza kudzindikira kuti Umambo ukhali cidikhiro canga cibodzi basi cantsogolo.

Mu caka 1941, ndapita mu utumiki wa ndzidzi onsene. Anewa akhali matomero a umaso wakutsandzayisa kakamwe. Ine ndikhaphata basa ku mbuto yakubvekera kakamwe inacitwa maxitima a m’madzi ku Chatham mbandipfudza kucita maxitima. Ineyi ikhali basa yakuti anthu azinji akhaifuna thangwi ikhabweresa maphindu adidi kakamwe. Mbwenye atumiki a Yahova akhadziwa kale kuti Akristu nee asafunika kumenya nkhondo. Mu caka 1941, tabvesesambo kuti nee tikhafunika kuphedzera kusasanywa kwa pida pya nkhondo. (Jwau 18:36) Nakuti mbuto ikhaphata ine pakhacitwa mabote akufamba pantsi pa madzi, ndadzindikira kuti ukhali ndzidzi toera kusiya basa ineyi mbinditoma utumiki wa ndzidzi onsene. Ndatoma kutumikira mu nzinda wakubalika wa Cirencester ku Inglatera.

Pikhali ine na pyaka 18 pyakubalwa, ndaikhwa nkaidi mu nthanda zipfemba thangwi yakukhonda kukhala nyankhondo. Pidafungwa nsuwo wa kaidi ndagopa kakamwe thangwi ndikhali ndekhene. Mbwenye mwakukhonda dembuka, anyakuonera kaidi na anyakaidi anango andibvundzisa kuti thangwi yanji ndiri mwenemu, natenepa ndakomerwa na kuafokotozera cikhulupiro canga.

Pidabuluswa ine nkaidi, ndatoma kumwaza mphangwa na Leonard Smith * m’mizinda yakusiyana-siyana ya dziko ya Kent. Toera kuponya mabhomba ku Londres, ndeka zikhapita na dziko ineyi. Kutomera mu caka 1944, mabhomba akupiringana cikwi aponywa mu dziko ya Kent. Mabhomba anewa akhacemerwa mabhomba akumburuka. Tingabva kuti motor walimira kulira, tikhadziwa kuti pakupita masegundu mangasi bhomba mbidagwa mbisweka. Anthu onsene akhagopa. Pa ndzidzi unoyu, tikhapfundzisa Bhibhlya  anthu axanu a banja ibodzi ene. Midzidzi inango tikhacita pfundziro pantsi pa meza ya utale idacitwa toera kutitsidzikiza nyumba ingaponyerwa bhomba. Mukupita kwa ndzidzi, anthu onsene a banja ineyi abatizwa.

Pakumala kwa nkhondo, ndatumikira ninga mpainiya mu pyaka piwiri kubangwe kwa Irlanda. Ife tikhaenda nyumba na nyumba mbatilonga kuti ndife amisionaryo mbatiphemba mbuto yakukhala. Tikhagawira marevista mu nseu. Mbwenye Irlanda ikhali dziko yakusiyana kakamwe na Inglatera. Anthu azinji akhanyerezera kuti anthu nee mbadatitambira mwadidi thangwi ikhali dziko yakudzala na anthu auphemberi wa Katolika. Pidayesera mamuna unango kutimenya, ndaenda kasuma kuna mpolixa, natenepa iye alonga: “Mphapo iwe ukhadikhiranji?” Tadzumatirwa kakamwe thangwi anthu azinji akhaphedzera mapadre. Ale akhafuna kutambira mabukhu athu mbadaluza mabasa awo. Ife takakamizwa toera tibuluke panyumba ikhakhala ife.

Mwakukhonda dembuka tadzindikira kuti tingafika mu cisa cinango mphyadidi kumwaza mphangwa ku mbuto inakhonda ife kudziwiwa na padre. Natenepa tikhafunika kuenda kamwaza mphangwa kutali kakamwe na panyumba pakakhala ife. Buluka penepo, tikhamwaza mphangwa cifupi na panyumba pathu. Ku Kilkenny, tikhapfundza Bhibhlya na mphale unango katatu pasumana maseze anthu akhatitsalakana mwakuipa. Nakuti ndikhakomerwa kakamwe kupfundzisa pya Bhibhlya, ndanyerezera kutumikira ninga misionaryo. Natenepa ndaphemba toera kuenda ku Xikola ya Bhibhlya ya Gileade.

Pakumala kupfundza mu nthanda zixanu ku Nova York, ine na anyakupfundza atatu taphembwa toera kutumikira ku ntsuwa zing’ono za bara ya Karibe. Mu nthanda ya Bingu ya caka 1948, tabuluka mu nzinda wa Nova York na bote ing’ono ya mametru 18 ikhacemerwa Sibia. Ndadzumatirwa kakamwe thangwi cipo ndakwira kale bote. M’bodzi wa ife anacemerwa Gust Maki, akhali nyakufambisa bote waluso kakamwe. Iye atipfundzisa maluso mangasi, ninga kulamusa na kukotamisa mavela, kufamba m’madzi mukuphatisira bhusula na kuthimbana na mphepo pakufamba m’madzi. Mwaluso, Gust afambisa bote yathu mu ntsiku 30, maseze tathimbana na mphepo ikulu mu ntsiku zenezi mpaka kufika ku Bahamas.

Pakumala kumwaza mphangwa mu nthanda zingasi mu ntsuwa zing’ono ku Bahamas, taenda ku ntsuwa za Sotavento na Barlavento. Ntsuwa zenezi zikhali na makilometru akukwana 800 buluka ku ntsuwa za Virgens na Trinidad. Mu pyaka pixanu, tikhamwaza mphangwa mu ntsuwa zakutali zakuti nee mukhali na Mboni za Yahova. Midzidzi inango, tikhamala masumana mangasi nee kukwanisa kutumiza peno kutambira mphangwa. Mbwenye tikhali akutsandzaya kakamwe thangwi yakumwaza mphangwa za Yahova ‘mu ntsuwa.’​—Yeremiya 31:10.

Pikhalimira ife pa ntsuwa, anthu akhadzumatirwa mbabwera ku bara toera kudziwa kuti ndife ani. Anango cipo akhadaona kale bote peno munthu wa nzungu. Iwo akhali anthu auxamwali akuti akhadziwa mwadidi Bhibhlya. Midzidzi inango akhatipasa nyama za m’madzi, abhakati na mandui. Maseze bote yathu nee ikhali na mbuto yakukwana, ife tikhakwanisa kuphika, kugona na kufula nguwo zathu.

Ife tikhasiya bote mbatienda kacedza na anthu ntsiku yamumphu, mbatiapanga kuti kunadzacitwa nkhani yakubuluswa m’Bhibhlya. Buluka penepo, cakumaulo tikhaliza cingalingali ca bote. Pikhali pyakutsandzayisa kakamwe kuona anthu mbakafika! Nyale zawo zikhaoneka ninga nyenyezi zikubira. Midzidzi inango, akhabwera anthu azinji, mbacita mibvundzo mpaka tcititciti. Iwo akhafuna kakamwe kuimba, natenepa  talemba makopya mangasi a nyimbo za Umambo mbatiapasa. Unai wathu nee tikhakwanisa kuimba mwadidi, mbwenye tikhacita pyonsene pinakwanisa ife. Buluka penepo, anthu akhaimba pabodzi na ife, mafala awo akhabveka mwadidi kakamwe. Mwandimomwene, ineyi ikhali midzidzi yakutsandzayisa kakamwe!

Pakumala kucitisa pfundziro ya Bhibhlya, anyakupfundza anango akhaenda na ife panyumba inatowera toera kugumanika pontho pa pfundziro ya Bhibhlya. Pakumala masumana mangasi, tikhaenda ku mbuto zinango. Mbwenye tikhaphemba anthu adapfundza pizinji toera apfundzisembo andzawo, mpaka kubwerera kwathu. Tikhakomerwa kakamwe kuona kuti iwo akhacita pyenepi na ntima onsene.

Lero, zizinji mwa ntsuwa zenezi zadzala na anthu anaenda kaona mbuto zinango, mbwenye kale, zikhali mbuto zakusowa dzumbi, kukhali na micindu, ntsuwa za madzi akucena na magombe akubalika. Kazinji kene tikhabuluka pa ntsuwa kuenda ku ntsuwa inango. Ntsomba zinacemerwa Golfinho zikhasendzeka nkhundu-nkhundu mwathu, tikhakwanisa kubva dzumbi ya bote pikhafamba iyo m’madzi. Cedza ca mwezi cikhaoneka ninga nseu wakutsindirwa na prata kuenda kunkhomo ya kukhundu ikhaenda ife.

Mudapita nthanda zixanu mbatikamwaza mphangwa mu ntsuwa, taenda ku Porto Riko kacinja bote yathu toera kuphatisira bote ya motor. Kweneku ndadziwana na mulongo wakubalika anacemerwa Maxine Boyd, iye akhatumikira ninga misionaryo. Iye akhali waphinga m’basa yakumwaza mphangwa zadidi kubulukira mu utsikana wace. Mukupita kwa ndzidzi, iye aenda katumikira ku Republika Dominikana ninga misionaryo mpaka mu caka 1950 pidakakamizwa iye na utongi Wacikatolika toera kubuluka mu dziko ineyi. Nakuti ndikhaphata basa m’bote, ndatawiriswa toera kumala nthanda ibodzi basi ku Porto Riko. Buluka penepo, mbidaenda ku ntsuwa mbandimala pyaka pingasi nee kubwerera. Natenepa ndabvundzika, ‘Ronald, khala iwe usafuna ntsikana uyu, cita pinthu mwakucimbiza.’ Mudapita masumana matatu, ndamphemba toera kumanga naye banja, buluka penepo, pidapita masumana matanthatu, tamanga banja. Ine na Maxine tatumizwa toera kutumikira ninga amisionaryo ku Porto Riko, natenepa, cipo ndacita ulendo na bote ipswa.

Mu caka 1956, tatoma basa yakucedzera mipingo, ife tikhakomerwa kakamwe kucedzera abale. Azinji a iwo akhali atcerengi. Mwacitsandzo, mu cisa ca Potala Pastillo kukhali na mabanja mawiri a Mboni za Yahova akuti akhali na ana azinji, ine ndikhaalizira fulauta. Ndabvundzisa ntsikana wang’ono anacemerwa Hilda, khala iye asafuna kuenda na ife kamwaza mphangwa. Iye atawira: “Ndisafuna, mbwenye nee ndinakwanisa. Ine nkhabe ntsapato.” Tan’gulira ntsapato mbaenda na ife kamwaza mphangwa. Mudapita pyaka pizinji, mu caka 1972, taenda kaona Bheteli ya ku Brooklyn. Mulongo unango wakuti akhadamala kugumanika pa Xikola ya Gileade abwera pana ife. Mbadzati kuenda ku cisa cidatumizwa iye ku Ekuador atibvundza: “Musandikumbuka? Ndine ntsikana ule wa cisa ca Pastillo wakuti nee akhali na ntsapato.” Akhali Hilda! Tabulusa misozi thangwi yakukomerwa!

Mu caka 1960, tatoma kutumikira ku Filiali ya ku Porto Riko. Ikhali nyumba ing’ono ku Santurce, San Juan. Pakutoma, tatumikira na Lennart Johnson pabodzi na nkazace. Iwo akhali Mboni za Yahova zakutoma ku Republika Dominikana. Iwo afika ku Porto Riko mu caka 1957. Mukupita kwa ndzidzi, Maxine akhatumiza marevista kuna anthu adalembesa toera kutambira marevista mwakukhonda phonya. Masumana onsene iye akhatumiza marevista akupiringana cikwi. Iye akhakomerwa kakamwe na basa ineyi thangwi akhafuna kuti anthu onsene apfundze pya Yahova.

Ndisakomerwa kutumikira pa Bheteli, thangwi pisandiphedza kuphatisira mphambvu zanga m’basa ya Yahova. Mbwenye kuphata basa pa Bheteli ndi kwakunentsa midzidzi inango. Mwacitsandzo, pa Nsonkhano wakutoma wa gawo wa dziko yonsene ku Porto Riko mu caka 1967, ndikhali na pinthu pizinji toera kukhunganya, natenepa ndikhadamala ndzeru. Nathan Knorr wakuti akhatsogolera basa ya Mboni za Yahova, acedzera Porto Riko. Iye anyerezera kuti nee ndikhacita masasanyiro a pyakufamba napyo toera kuphedza amisionaryo anacedzera dziko yathu. Mbwenye ine ndikhacita masasanyiro. Mukupita kwa ndzidzi, iye andipasa uphungu wakuwanga wakuti ndisafunika kukhunganyika mwadidi, pontho akhadikhira pizinji kwa ine. Ine nee ndalonga pizinji na iye, mbwenye ndaona kuti anditsalakana mwakuipa, mbandikhala wakuipirwa mu ndzidzi ungasi. Ngakhale tenepo, paulendo unango udaonana ife na M’bale Knorr, aticemera toera kuenda kacedza nkwartu yace, mbatiphikira cakudya.

Tikhaenda kazinji kene kaona acibale anga ku Inglatera. Pidatawira ine undimomwene pabodzi na Mama,  Baba nee atawira undimomwene. Mbwenye pikhaenda abale a ku Bheteli ku cisa ceneci, mama akhaaphemba toera kufikira panyumba pawo. Baba aona kuti akulu a mpingo anewa a ku Bheteli akhali akucepeseka, mwakusiyana na atsogoleri a mauphemberi adantsukwalisa mu pyaka pidapita. Mu caka 1962, iye abatizwa ninga m’bodzi wa Mboni za Yahova.

Nkazanga wakufunika alowa mu caka 2011. Ndisadikhira na cifuno cikulu kuti ndinadzamuona pontho angalamuswa muli akufa. Manyerezero anewa ndi akutsandzayisa kakamwe kwa ine! Mu pyaka 58 pidakhala ife pabodzi, taona numero ya Mboni za Yahova mbikathimizirika ku Porto Riko buluka pa 650 mpaka 26.000! Buluka penepo, mu caka 2013, Bheteli ya ku Porto Riko yaphatanizwa na Bheteli ya ku Estados Unidos, ine ndaphembwa toera kutumikira ku Wallkill, Nova York. Pakumala pyaka 60 ku ntsuwa, ndisaona ninga ndine wa ku Porto Riko ninga pinacita nyancidwe wang’ono wakuti camasiku asalira ko-kí, ko-kí. Ndikhali wakutsandzaya ku Porto Riko, mbwenye ukhadafika ndzidzi toera kucinja.

Mpaka lero ndisakomerwa kakamwe kutumikira pa Bheteli. Cincino ndiri na pyaka pyakupiringana 90 pyakubalwa, pontho basa yanga ndi kuwangisa abale na alongo a pa Bheteli. Kutomera pidafika ine pa Wallkill, ndacedzera abale na alongo akupiringana 600. Anango asabwera toera kucedza na ine thangwi ya nyatwa zawo peno za mabanja awo. Anango asaphemba pitsogolero pya umaso wa pa Bheteli. Pontho anango adamala kwene kumanga banja asaphemba uphungu toera kukhala na banja yakutsandzaya. Ndisaphedzambo ale adaphembwa toera kutumikira ninga apainiya. Ndisabvesera anthu onsene anacedza na ine, pontho pingakhala pyakuthema kazinji kene ndisaapanga: “‘Mulungu asafuna munthu anapasa mwakukomerwa.’ Natenepa tsandzayani m’basa yanu thangwi mukuphatira Yahova.”​—2 Akorinto 9:7.

Khala musafuna kukhala wakutsandzaya pa Bheteli peno mbuto inango, musafunika kudziwa kufunika kwa basa inacita imwe. Basa yonsene inacita ife pa Bheteli ndi yakucena. Iyo isaphedza “m’bandazi wakukhulupirika na wandzeru” toera kupereka cakudya cauzimu kuna abale na alongo pa dziko yonsene yapantsi. (Mateo 24:45, Tradução do Novo Mundo) Mwakukhonda tsalakana mbuto inatumikira ife, tiri na mwai wakusimba Yahova. Tendeni tikomerwe na kucita pinatiphemba iye thangwi ‘Mulungu asafuna munthu anapasa mwakukomerwa.’