1, 2. (a) Kodi lemba ya Izaiya 60:22 ikukwanirisika tani mu ntsiku zino zakumalisa? (b) Ninji pinafunika kakamwe lero mu gulu ya Yahova?

“UNG’ONO kakamwe unadzakhala cikwi, wakucepa unadzakhala dzindza yamphambvu.” (Izaiya 60:22, Tradução do Novo Mundo) Mafala anewa akukwanirisika mu ntsiku zino zakumalisa. Mu caka 2015, amwazi mphangwa akukwana 8.220.105 amwaza mphangwa za Umambo pa dziko yonsene. Mulungu alonga pya kuthimizirika kwa atumiki ace: “Ine Yahova ndinadzapicimbizisa pa ndzidzi wace.” Nakuti ndzidzi uli kupita, tiri na basa izinji kakamwe toera kucita. Kodi tisacita pyonsene pinakwanisa ife toera kumwaza mphangwa zadidi? Abale na alongo azinji asatumikira ninga apainiya akuphedza na a ndzidzi onsene. Anango acinja mbaenda mbuto zinango toera kuphedzera basa yakumwaza mphangwa, pontho anango asaphedzera basa yakumanga Nyumba za Umambo.

² Pyaka pyonsene, mipingo ipswa cifupi na 2.000 isakhazikiswa. Mipingo ineyi isafunika akulu a mpingo na atumiki akutumikira. Toera pyenepi pikwanisike, caka cibodzi na cibodzi, pikwi pya atumiki akutumikira asafunika kukhala akulu a mpingo,  pontho pikwi pya abale anango asafunika kukhala atumiki akutumikira. Mwandimomwene, pyenepi pisapangiza kuti abale, pabodzi na alongo ali na ‘pizinji toera kucita m’basa ya Mbuya.’​—1 Akorinto 15:58.

3, 4. Kodi kuthambaruka mwauzimu kusabvekanji kwa imwe?

³ Lerini 1 Timoti 3:1. Mpostolo Paulu awangisa abale toera ‘awangisire’ kuti akhale akumbizi auzimu. Munthu toera afike pana cinthu cakuti ciri kutali kakamwe na iye, asafunika kuwangisira kakamwe, panango asafunika kufuthula nkono wace toera kuciphata. Cincino nyerezerani m’bale anafuna kukhala ntumiki wakutumikira. Iye asadzindikira kuti asafunika kuwangisira toera kukulisa makhaliro ace Acikristu. Buluka penepo, angatoma kutumikira ninga ntumiki wakutumikira, iye asapitiriza kuwangisira kakamwe toera akhale nkulu wa mpingo.

⁴ Abale na alongo azinji asacita macinjo mu umaso wawo toera kucita pizinji m’basa ya Yahova. Mwacitsandzo, panango asafuna kukhala mpainiya, kutumikira ku Bheteli peno kuphedzera kumangwa kwa Nyumba za Umambo. Tendeni tione kuti Bhibhlya inatiphedza tani toera tipitirize kuthambaruka.

5. Kodi aphale na atsikana asaphatisira tani mphambvu zawo m’basa ya Yahova?

⁵ Aphale na atsikana anakwanisa kucita pizinji m’basa ya Yahova thangwi ali na mphambvu na ungumi wadidi. (Lerini Misangani 20:29.) Aphale na atsikana anango ku Bheteli, asaphedzera basa yakudhinda mabukhu. Anango azinji asamanga Nyumba za Umambo peno asaphedzera basa ya kuzisasanyira papswa. Anangombo asaphedzera pangaoneka cidengwa cacibaliro. Pontho aphale na atsikana azinji akuti ndi apainiya asapfundza cilongero cinango peno asacita ulendo toera kuenda kamwaza mphangwa zadidi ku mbuto inango.

6-8. (a) Kodi Aaron acinja tani maonero ace m’basa ya Mulungu? Pyenepi pyambweresera maphindu api? (b) Tinakwanisa tani ‘kuyesera toera kuona kuti Yahova ngwadidi’?

⁶ Nakuti tisafuna Yahova, tisafuna kucita pyonsene pinakwanisa ife toera kuntumikira mwakukwana. Ngakhale tenepo, panango ife tinapibva ninga m’bale unango anacemerwa Aaron. Iye akhafuna kutumikira Yahova mwakutsandzaya, mbwenye nee akhali wakutsandzaya. Maseze Aaron akhasonkhana na kuenda mu utumiki pikhali iye mphale, iye alonga: “Ine nee ndikhakomerwa na misonkhano.” Mphapo, ninji pidacita iye?

⁷ Aaron awangisira toera kuleri Bhibhlya mwakukhonda phonya, kukhunganyika misonkhano na kupereka matawiro pa misonkhano. Pontho, iye atoma kucita phembero mwakukhonda phonya. Pyenepi pyamphedza toera kuthambaruka mwauzimu. Iye adziwa kakamwe Yahova mbatoma kunfuna kakamwe. Ninga maphindu, Aaron akhala wakutsandzaya kakamwe. Iye atumikira ninga mpainiya, aphedza anango mu ndzidzi wa pidengwa pyacibaliro, pontho aenda kamwaza mphangwa ku dziko inango. Cincino, iye asatumikira ninga nkulu wa mpingo, pontho asatumikira ku Bheteli. Kodi asapibva tani thangwi ya pisankhulo pidacita iye? Aaron alonga: “Ine ‘ndayesera mbandiona kuti Yahova ngwadidi.’ Thangwi ya nkhombo zenezi, ndisapibva ninga ndiri na mangawa na iye, pyenepi pisandikulumiza toera kucita pizinji m’basa yace, pontho pisandibweresera nkhombo zizinji.”

 ⁸ Nyamasalmo alonga: ‘Yeserani muone kuti Yahova ngwadidi.’ Iye athimiza: ‘Ale anasaka Yahova nkhabe kusowa pinthu pyadidi.’ (Lerini Masalmo 34:8-10.) Inde, tingapasa Yahova pinthu pyathu pyadidi kakamwe, tisakhala akutsandzaya kakamwe thangwi tisadziwa kuti tikukomeresa ntima wace. Pontho iye anadzatitsalakana ninga mudatipikira iye.

9, 10. Thangwi yanji musafunika ‘kupitiriza kudikhira’?

⁹ Panango tisafuna kucita pizinji m’basa ya Yahova. Mbwenye ndiye tani khala tiri na pyaka pizinji mbatikadikhira kukhala na mwai wakutumikira m’mpingo peno kudikhira kuti makhaliro athu acinje? Tisafunika kukhala akupirira. (Mikeya 7:7) Ngakhale kuti panango Yahova asatawirisa makhaliro athu apitirize, tisafunika kunyindira kuti iye anapitiriza kutiphedza. Tinakwanisa kupfundza kubulukira mu citsandzo ca Abhrahamu. Yahova ampikira kuti mbadakhala na mwana, mbwenye akhafunika kudikhira mu pyaka pizinji mpaka kubalwa kwa Izaki. Mu ndzidzi unoyu, Abhrahamu apirira mbakhonda kuluza cikhulupiro cace kuna Yahova.​—Genesi 15:3, 4; 21:5; Ahebere 6:12-15.

¹⁰ Ndimomwene kuti pisanentsa kudikhira. (Misangani 13:12) Mbwenye tingapitiriza kunyerezera pya makhaliro athu na kutsukwala kwathu, tinafewa manungo. M’mbuto mwace, tinakwanisa kuphatisira ndzidzi unoyu toera kukulisa makhaliro anafunika toera kutsalakana miyai inango yakutumikira m’mpingo.

11. Ndi makhaliro api auzimu anafunika ife kukulisa? Thangwi yanji ndi akufunika?

¹¹ Kulisani makhaliro na maluso akufunika. Tingaleri Bhibhlya na kunyerezera mwacidikhodikho, tinakulisa udziwisi, kubvesesa, na cidziwiso. Makhaliro anewa ndi akufunika kakamwe kwa ale anatsogolera m’mpingo. (Misangani 1:1-4; Tito 1:7-9) Tingapfundza Bhibhlya, tinakwanisa kudzindikira njira inaonera Yahova pinthu pizinji. Buluka penepo, ntsiku zonsene tinakwanisa kuphatisira pidapfundza ife toera kucita pisankhulo pinakomeresa Yahova. Mwacitsandzo, tinadzadziwa njira yakutsalakana anango, kuphatisira kobiri, kusankhula ubalangazi na nguwo toera kubvala.

12. Kodi abale na alongo anapangiza tani kukhala akunyindirika?

¹² Phatani mwadidi basa yonsene idapaswa imwe. Mu ndzidzi ukhasasanyira atumiki a Mulungu templo, Nehemiya akhafuna amuna toera kutsalakana mabasa mazinji. Iye asankhula ale akuti akhali na makhaliro adidi. Nehemiya akhadziwa kuti amuna anewa akhafuna Mulungu, pontho mbadaphata basa mwakuwanga, mwakukhonda tsalakana basa ikhafuna kupaswa iwo. (Nehemiya 7:2; 13:12, 13) Munjira ibodzi ene, lero Akristu akukhulupirika akuti asaphata basa mwakuwanga, pontho ali na makhaliro adidi, panango anapaswa mabasa mazinji. (1 Akorinto 4:2) Mwakukhonda tsalakana khala ndife m’bale peno mulongo, ndzidzi onsene tisafunika kucita pyonsene pinakwanisa ife m’mabasa  onsene anapaswa ife.​—Lerini 1 Timoti 5:25, NM.

13. Mungatsalakanwa mwakuipa munatowezera tani citsandzo ca Zuze?

¹³ Nyindirani Yahova. Munacitanji munthu angakutsalakanani mwakuipa? Panango munacedza naye, mbamumpanga mabvero anu. Mbwenye mungapitiriza kusaka mathangwi mbamupangiza kuti nee mwadawisa cinthu, panango pinatekeresa nyatwa yanu. Tisapfundza ntsonga yadidi kakamwe kubulukira mu citsandzo ca Zuze. Abale ace antsalakana mwakuipa. Anthu alonga uthambi thangwi ya iye, mbaikhwa nkaidi thangwi ya cinthu cidakhonda iye kucita. Mbwenye Zuze anyindira Yahova. Iye anyerezera pya mapikiro a Yahova, mbapitiriza kukhala wakukhulupirika. (Masalmo 105:19) M’midzidzi ineyi yakunentsa, iye akulisa makhaliro mazinji adidi akuti amphedza mukupita kwa ndzidzi pidapaswa iye basa yakufunika kakamwe. (Genesi 41:37-44; 45:4-8) Anthu angakutsalakanani mwakuipa, phembani udziwisi kwa Yahova. Iye anadzakuphedzani toera kupitiriza kukhala wakupfulika na kuatsalakana mwaufuni pa kulonga na iwo.​—Lerini 1 Pedro 5:10.

14, 15. (a) Thangwi yanji tisafunika ‘cita mphole-mphole’ na njira inaphatisira ife toera kumwaza mphangwa? (b) Ndi njira zipi zipswa zakumwaza mphangwa zakuti munakwanisa kuziyesera? (Onani cithundzithundzi cakutoma na bokosi yakuti “ Ndiye Tani Kuyesera Njira Zinango?”)

¹⁴ Paulu apanga Timoti toera apitirize kukulisa  maluso ace akufokotoza Malemba. Paulu alonga: ‘Cita mphole-mphole na iwe ene, pontho na mapfundzisiro ako.’ (1 Timoti 4:13, 16) Timoti akhamwaza kale mphangwa mu pyaka pizinji. Mphapo thangwi yanji akhafunika kukulisa maluso ace? Timoti akhadziwa kuti makhaliro a anthu asacinja. Iye akhafuna kuti anthu apitirize kumbvesera, natenepa, iye akhafunika kupitiriza kukulisa maluso ace na kucinja njira yakupfundzisa anthu. Tisafunika kucita pibodzi pyene lero pakumwaza mphangwa zadidi.

¹⁵ M’mbuto zinango, tingamwaza mphangwa nyumba na nyumba, kazinji kene nee tisagumana anthu. M’mbuto zinango, anthu asagumanika panyumba, mbwenye nkhabe kwanisika kufika panyumba pawo toera kuamwazira mphangwa. Khala pyenepi pisacitika mu cisa canu, kodi munakwanisa kuphatisira njira inango toera kugumana anthu?

16. Thangwi yanji kupereka umboni wapakweca ndi njira yadidi kakamwe toera kumwaza mphangwa?

¹⁶ Abale na alongo azinji asakomerwa na kupereka umboni wapakweca. Mwacitsandzo, iwo asaenda ku xitexi, ku mbuto zinadikhira anthu miotokala, m’misika na m’maparki toera kucedza na anthu. M’mwazi mphangwa panango anatomesa makani na munthu mu kulonga pya mphangwa zipswa zidabuluka mu tsamba ya mphangwa. M’mwazi mphangwa anakwanisa kulonga cinthu cadidi thangwi ya ana a munthu anacedza na iye peno kucita mbvundzo thangwi ya basa yace. Munthu angaoneka kuti akukomerwa na kucedza, m’mwazi mphangwa anakwanisa kulonga ntsonga ibodzi ya m’Bhibhlya, buluka penepo mbaphemba maonero ace. Kazinji kene anthu asafuna kudziwa pizinji thangwi ya Bhibhlya.

17, 18. (a) Munakwanisa tani kumalisa kugopa pa kupereka umboni wapakweca? (b) Kodi mafala akusimba adalonga Dhavidhi anakuphedzani tani mu utumiki?

¹⁷ Panango musanentseka kucedza na anthu mu nseu akuti nee musaadziwa. Eddie ndi mpainiya wa ndzidzi onsene anakhala ku Nova York, iye akhali na manyadzo toera kucedza na anthu mu nseu. Mbwenye mukupita kwa ndzidzi manyadzo ace amala. Iye alonga: “Nkati mwa kulambira kwathu kwa banja, ine na nkazanga tisafufudza na cifuno cakudziwa matawiro anafuna ife kupereka kuna apingizi pabodzi na maonero analonga anthu. Pontho tisaphembambo maonero a abale anango.” Lero, Eddie asakomerwa kakamwe na kupereka umboni wapakweca.

¹⁸ Tingakomerwa kakamwe na utumiki wathu na kukulisa maluso athu pakucedza na anthu thangwi ya mphangwa zadidi, kuthambaruka kwathu mwauzimu kunadzaoniwa na anango. (Lerini 1 Timoti 4:15.) Panango tinaphedza munthu toera kutumikira Yahova. Dhavidhi alonga: ‘Ndinadzasimba Yahova ndzidzi onsene; ndinadzansimba na mulomo wanga kwenda na kwenda; ndinadzanyindira Yahova; anthu adidi anadzabva mbasekera.’​—Masalmo 34:1, 2.

19. Thangwi yanji atumiki akukhulupirika a Yahova asakhala akutsandzaya maseze akhale m’makhaliro akunentsa?

¹⁹ Dhavidhi alongambo: ‘Yahova pinthu pyonsene pinakusimbani, atumiki anu akukhulupirika anadzakusimbani. Iwo anadzafokotoza mbiri ya umambo wanu, mbalonga pya mphambvu zanu toera onsene adziwe mphambvu zanu, na mbiri ikulu ya umambo  wanu.’ (Masalmo 145:10-12) Anthu onsene anafuna Yahova akuti ndi akukhulupirika kwa iye, asafuna kakamwe kulonga na anango thangwi ya iye. Mphapo ndiye tani khala thangwi ya utenda peno kugwesera musacimwana kucita pizinji m’basa yakumwaza mphangwa nyumba na nyumba? Kumbukani kuti musapasa mbiri Yahova ndzidzi onsene unalonga imwe pya iye kwa anthu akuti ali cifupi na imwe, ninga anyakutsalakana atenda peno adotoro. Khala muli nkaidi thangwi ya cikhulupiro canu, panango munakwanisa kupanga anango thangwi ya Yahova, pyenepi pisatsandzayisa kakamwe ntima wace. (Misangani 27:11) Iye asakomerwambo mungantumikira, maseze ndimwe basi anatumikira Yahova m’banja yanu. (1 Pedro 3:1-4) Ngakhale muli m’makhaliro akunentsa kakamwe, imwe munakwanisa kusimba Yahova, kuwangisa uxamwali wanu na iye na kuthambaruka mwauzimu.

20, 21. Mungapaswa mabasa mazinji mu gulu ya Yahova, munapangiza tani kukhala nkhombo kuna anango?

²⁰ Mungapitiriza kuthambaruka mwauzimu, mbamucita pyonsene pinakwanisa imwe toera kutumikira Yahova, iye anadzakupasani nkhombo. Panango mungacita macinjo mangasi mu ndandanda yanu peno m’makhaliro anu, munadzakhala na miyai mizinji toera kuphedza anthu kupfundza pya mapikiro adidi kakamwe a Mulungu. Panango munakwanisambo kuphedza kakamwe abale na alongo. Iwo anadzakufunani kakamwe angaona kuti musaphata basa kakamwe m’mpingo!

²¹ Mwakukhonda tsalakana khala tatoma kale kutumikira Yahova peno tatoma cincino, tonsene tinakwanisa kupitiriza kuthambaruka mwauzimu. Mu nsolo unatowera, tinadzadinga kuti tinaphedza tani anango toera kuthambaruka mwauzimu.