1. Ndi kusiyana kupi kwa pinthu pyakufunika kwa ife na pinthu pinafuna ife?

NKHABE funika pinthu pizinji toera tikhale maso. Mwacitsandzo, tisafunika kukhala na cakudya, cakubvala na mbuto yakukhala. Mbwenye pinthu pinafuna ife nkhabe kumala. Pontho anthu azinji nkhabe kudzindikira kuti mwandimomwene pinthu pyenepi si pyakufunika tayu kwa iwo.

2. Ndi pinthu pipi pingasi pyakuti anthu asapifuna?

² Pinafuna munthu anakhala mu dziko yakutcerenga ndi pyakusiyana kakamwe na pinafuna munthu anakhala mu dziko yakupfuma. M’mbuto zinango pa dziko, anthu asafuna kukhala na ntokodzi wa m’manja, mota, peno taliyau. M’mbuto zinango, anthu asafuna kukhala na nguwo zizinji zakudhula, nyumba ikulu, peno motokala wakudhula kakamwe. Mbwenye mwakukhonda tsalakana kunakhala ife, panango tinatoma kufuna pinthu pizinji kakamwe pyakukhonda funika kwa ife, peno pyakuti nee tinakwanisa kupigula.

3. Kodi kufuna mpfuma ninji?

³ Kodi kufuna mpfuma ninji? Ndi maonero a munthu wakuti asafuna kakamwe kukhala na pinthu pyakumanungo kupiringana uxamwali wace na Yahova. Iye nkhabe kukomerwa kukhala na pinthu pyakucepa pyakufunika, mbwenye ndzidzi onsene asafuna kukhala na pizinji. Ngakhale ale akuti nkhabe kobiri izinji, peno anakhonda kugula pinthu pyakudhula, anakwanisambo kukhala na nzimu wakufuna pinthu pyampfuma. Iwo anakwanisa kusiya kuikha Umambo pa mbuto yakutoma mu umaso wawo.​—Ahebere 13:5.

4. Kodi Sathani asaphatisira tani ‘pinasirira maso’?

⁴ Sathani asafuna tikhulupire kuti toera kukhala akutsandzaya mu umaso, tisafunika kukhala na pinthu pizinji. Natenepa, iye asaphatisira dziko na ‘pinasirira maso’ toera tisirire pinthu pizinji. (1 Jwau 2:15-17; Genesi 3:6; Misangani 27:20) Ndzidzi onsene, ife tisabvesera peno kuona pidziwiso pyakuti pinatikulumiza toera kugula pinthu pipswa. Kodi mwagula kale cinthu thangwi basi ene mwatunduka naco mu loja peno thangwi mwaciona mbacikadziwiswa? Khala ndi tenepo, panango mukupita kwa ndzidzi mwadzindikira kuti nee mukhacifunadi. Tingapitiriza kugula pinthu pyakuti nee tisapifunadi, tisadzudzumisa umaso wathu. Pinthu pyenepi pinakwanisa kutipingiza kutumikira Yahova. Mwacitsandzo, panango nee tinakhala na ndzidzi wakukwana toera kupfundza Bhibhlya, kukhunganyika na kugumanika pa misonkhano, peno kukhonda kuenda mu utumiki mwakukhonda phonya. Kumbukani, mpostolo Jwau alemba: ‘Dziko na pifuno pyayo pikupita.’

5. Ninji pinafuna kucitika kuna ale anaphatisira mphambvu zawo toera kukhala na pinthu pizinji?

⁵ Sathani asafuna tiphatisire mphambvu zathu toera kuwina kobiri na pinthu pinango, m’mbuto mwakuphatisira mphambvu zenezi m’basa ya Yahova. (Mateo 6:24) Mbwenye tingadzudzumika na kusaka pinthu ndzidzi onsene, umaso wathu nee unakhala na cifuniro candimomwene. Tinakhala anthu akutsukwala peno kukhala na nyatwa zakusowa kobiri. Pyakutsukwalisa kakamwe, pyenepi pinatiluzisa cikhulupiro kuna Yahova na Umambo wace. (1 Timoti 6:9, 10; Apokalipse 3:17) Yezu alonga kuti ‘kufuna pinthu pinango pyonsene’ kusalandaniswa na minga zakuti zinakwanisa kupingiza mbeu mbazikhonda kukula na kubala misapo.​—Marko 4:14, 18, 19.

6. Kodi citsandzo ca Bharuki cisatipfundzisanji?

⁶ Onani citsandzo ca Bharuki, mulembi wa Yeremiya. Pidatoma iye ‘kusaka pinthu pikulu,’ Yahova ankumbusa kuti mwakukhonda dembuka Yerusalemu mbadafudzwa. Mbwenye Yahova apikira kuti mbadapulumusa umaso wa Bharuki. (Yeremiya 45:1-5) Yahova nee mbadapulumusa pinthu pikhali na anthu. (Yeremiya 20:5) Lero, tiri cifupi kakamwe na kufudzwa kwa dziko ya Sathani. Natenepa, uno nee ndi ndzidzi wakusaka pinthu pizinji kakamwe. Pontho nee tisafunika kudikhira kuti pakumala kwa nyatwa ikulu, tinapitiriza kukhala na pinthu piri na ife lero, maseze panango ndi pyantengo ukulu kwa ife.​—Misangani 11:4, Mateo 24:21, 22; Luka 12:15.

7. Ninji pinafuna ife kudinga mu ndima zinatowera, mphapo thangwi yanji?

 ⁷ Mphapo tinatsalakana tani umaso wathu na wa banja yathu mbatipitiriza kuikha pinthu pyakufunika kakamwe pa mbuto yakutoma? Tinacalira tani kufuna mpfuma? Ninji cinafuna kutiphedza toera tikhonde kudzudzumika kakamwe na kusaka pinthu pinafuna ife? Pa Nkhani yace ya Paphiri, Yezu apereka uphungu wadidi kakamwe thangwi ya pyenepi. (Mateo 6:19-21) Tendeni tileri na kudinga Mateo 6:25-34. Pyenepi pinadzatipasa cinyindiro cakuti tisafunika kupitiriza kusaka Umambo, tayu pinthu pinango.​—Luka 12:31.

8, 9. (a) Thangwi yanji nee tisafunika kudzudzumika kakamwe na pinthu pinafuna ife? (b) Kodi Yezu akhadziwanji thangwi ya anthu na pinafuna iwo?

⁸ Lerini Mateo 6:25. Yezu akhadziwa kuti anyakupfundzace akhadzudzumika kuti anadyanji, anamwanji, peno anabvalanji. Natenepa, pa Nkhani yace ya Paphiri, iye aapanga: ‘Lekani kudzudzumika thangwi ya umaso wanu.’ Yezu akhafuna kuaphedza toera abvesese kuti thangwi yanji nee akhafunika kudzudzumika na pinthu pyenepi. Iye akhadziwa kuti angadzudzumika kakamwe, maseze thangwi ya pinthu pyakufunika, mbadaduwala pinthu pyakufunika kakamwe mu umaso wawo. Yezu akhatsalakana kakamwe anyakupfundzace, natenepa aacenjeza kazinji kene pya ngozwi yakudzudzumika.​—Mateo 6:27, 28, 31, 34.

⁹ Mphapo, thangwi yanji Yezu alonga kuti nee tisafunika kudzudzumika na pinthu pinafuna ife kudya, kumwa peno kubvala? Kodi pinthu pyenepi si pyakufunika tayu kwa ife? Inde, mphyakufunika! Pontho, tingasowa kobiri yakugula pinthu pyenepi, tisakhala na thangwi yadidi toera kudzudzumika. Yezu akhadziwa pyenepi. Iye akhadziwa pinthu pikhafuna anthu. Iye akhadziwa kuti mu “ntsiku zakumalisa,” anyakupfundzace mbadathimbana na makhaliro akunentsa kakamwe. (2 Timoti 3:1) Mwandimomwene, lero anthu azinji nkhabe kuphata basa, mbwenye pinthu pisapitiriza kudhula kakamwe. M’mbuto zizinji, anthu ndi akutcerenga kakamwe, iwo nkhabe cakudya cakukwana. Mbwenye Yezu akhadziwambo kuti umaso wa munthu ndi wakufunika kakamwe ‘kupiringana cakudya, pontho manungo ndi akufunika kakamwe kupiringana cakubvala.’

10. Pidapfundzisa iye anyakupfundzace, ndi cinthu cipi cidalonga Yezu kuti ndi cakufunika kakamwe mu umaso wawo?

¹⁰ Nduli pang’ono mu nkhani ineyi, Yezu apfundzisa atowereri ace kuti pakucita phembero, asafunika kuphemba Babawo wakudzulu toera aapase pinthu pyakufunika kwa iwo. Iwo mbadakwanisa kuphembera tenepa: ‘Tipaseni cakudya cathu ca lero.’ (Mateo 6:11) Pa ndzidzi unango, Yezu aapanga toera kuphembera tenepa: ‘Tipaseni cakudya cathu ca lero mwakubverana na cakudya cinafunika pa ntsiku ibodzi na ibodzi.’ (Luka 11:3) Mbwenye pyenepi nee pisabveka kuti ndzidzi onsene tisafunika kunyerezera pinthu pinafunika ife kukhala napyo. Mwandimomwene, Yezu apfundzisa anyakupfundzace kuti kuphembera toera Umambo  wa Mulungu udze, ndi kwakufunika kakamwe kupiringana kuphemba pinafuna iwo. (Mateo 6:10; Luka 11:2) Toera kuphedza anyakupfundzace kuti akhonde kudzudzumika, Yezu aawangisa mu kuapasa cinyindiro cakuti Yahova asatsalakana anthu na pyonsene pidacita iye.

11, 12. Tisapfundzanji kubulukira munjira inatsalakanira Yahova mbalame zakudzulu? (Onani cithundzithundzi cakutoma.)

¹¹ Lerini Mateo 6:26. Tisafunika ‘kuyang’ana mwacidikhodikho mbalame zakudzulu.’ Maseze mbalame ndi zing’ono, izo zisadya pinthu pizinji. Mbidakhala mbalame ndi zikulu ninga anthu, mbazidadya cakudya cakunjipa kakamwe kupiringana anthu. Mbalame zisadya misapo, mbeu, pirombo na mpfunye. Mbwenye nee zisabzwala mbeu na kulima cakudya. Yahova asazipasa pyonsene pinafuna izo. (Masalmo 147:9) Mbwenye iye nee asaikha cakudya pa mulomo pazo! Izo zisafunika kusaka zokhene cakudya, angacisaka anacigumana.

¹² Yezu nee akhapenula kuti Yahova asadyesa mbalame, natenepa iye akhadziwa kuti Yahova anakwanisambo kutsalakana anthu. ^[1] (Onani cidzindikiro kunkhomo kwa nsolo uno.) (1 Pedro 5:6, 7) Ninga mbalame, ife nee tisafunika kukhala akupolola. Tisafunika kulima peno kusaka kobiri toera kugula cakudya cathu. Yahova anapasa nkhombo kuwangisira kwathu. Pontho, tingasowa cakudya peno kobiri yakukwana, Yahova anakwanisa kukulumiza anango toera kugawana na ife pinthu pyawo. Yahova asaphedzambo mbalame toera kugumana mbuto yakukhala. Iye azipasa luso yakumanga ntsandza, pontho acita tsanga na pinango toera mbalame zikwanise kumanga ntsandza. Yahova anatiphedzambo toera kugumana mbuto yakuthema toera kukhala na banja yathu.

13. Ninji cinapangiza kuti ndife akufunika kakamwe kupiringana mbalame?

¹³ Pidamala Yezu kukumbusa anyakupfundzace kuti Yahova asadyesa mbalame, iye aabvundza: ‘Imwe na izo, anafunika maka simwe tayu?’ (Landanisani na Luka 12:6, 7.) Pidalonga Yezu mafala anewa, panango akhanyerezera kuti mwakukhonda dembuka mbadapereka umaso wace thangwi ya anthu onsene. Inde, Yezu nee afera mbalame peno pinyama pinango. Iye afa thangwi ya ife toera tikhale kwenda na kwenda.​—Mateo 20:28.

14. Ndi cinthu cipi cakuti munthu wakudzudzumika cipo anakwanisa kucicita?

¹⁴ Lerini Mateo 6:27, Tradução do Novo Mundo. Kodi Yezu akhabvekesanji pidalonga iye kuti ife nee tinakwanisa kuthimizira ntsiku za umaso wathu thangwi yakudzudzumika? Iye abvekesa kuti nee tinakwanisa kuthimizira ntsiku za umaso wathu mukudzudzumika na pinthu pinafuna ife. Mwandimomwene, tingadzudzumika kakamwe tinaphatwa na utenda, panango mpaka kufa.

15, 16. (a) Tisapfundzanji kubulukira munjira zinatsalakanira Yahova maluwa a m’munda? (Onani cithundzithundzi cakutoma.) (b) Ndi mibvundzo ipi isafunika ife kucitika, mphapo thangwi yanji?

¹⁵ Lerini Mateo 6:28-30. Tisakomerwa tingakhala na nguwo yadidi toera kubvala, makaka tingaenda mu utumiki, ku misonkhano ya mpingo, ya cisa na ya gawo. Mphapo tisafunika ‘kudzudzumika na pyakubvala’? Yezu akumbusa pontho anyakupfundzace kuti Yahova asatsalakana tani pinthu pidacita iye. Yezu aphatisira citsandzo ca ‘maluwa a m’munda.’ Ntundu wa ‘maluwa’ anewa panango ndi ale akuti n’Cizungu asacemerwa gladíolos, aguapé, íris na tulipas. Maluwa anewa nee asasona nguwo toera  kubvala, mbwenye iwo ndi akubalika kakamwe. Yezu alonga kuti ‘Salomoni mu mbiri yace yonsene nee abvala ninga ibodzi ya iwo tayu’!

¹⁶ Onani pidalonga Yezu patsogolo pace: ‘Khala Mulungu asabvazika tenepa tsanga ya m’munda, kodi iye nkhabe kukubvazikanimbo imwe acikhulupiro cakucepa?’ Inde, iye anatibvazika! Mbwenye anyakupfundza a Yezu akhafunika kuthimizira cikhulupiro cawo. (Mateo 8:26; 14:31; 16:8; 17:20) Iwo akhafunika kunyindira kuti Yahova asafuna kuaphedza, pontho kuti mwandimomwene iye mbadaaphedza. Ndiye tanimbo kwa ife? Kodi tisakhulupira kuti Yahova anadzatitsalakana?

17. Ninji pinafuna kufudza uxamwali wathu na Yahova?

¹⁷ Lerini Mateo 6:31, 32. Anthu azinji akuti nkhabe dziwa Yahova asadzudzumika kakamwe na kobiri na kufuna pinthu pizinji. Mbwenye tingacita pibodzi pyene, tinafudza uxamwali wathu na iye. Ife tisadziwa kuti Yahova ndi Babathu, pontho iye asatifuna. Ife tiri na cinyindiro cakuti tingacita pinatiphemba iye, mbatiikha Umambo pa mbuto yakutoma mu umaso wathu, iye anadzatipasa pyonsene pyakuti ndi pyakufunika kwa ife. Ife tisadziwambo kuti uxamwali wadidi na Yahova ndiwo unaticitisa kukhala akutsandzaya, pontho pyenepi pisatiphedza toera kukwana na ‘pyakudya na pyakubvala’ pinafuna ife.​—1 Timoti 6:6-8.

18. Kodi Yahova asadziwanji thangwi ya pinafuna ife, mphapo anadzacitanji kwa ife?

¹⁸ Lerini Mateo 6:33. Tingaikha Umambo pa mbuto yakutoma, Yahova anadzatipasa pyonsene pinafunika kwa ife. Yezu afokotoza kuti thangwi yanji tisafunika kukhala na cinyindiro ku pikiro ineyi. Iye alonga: ‘Babanu wakudzulu asadziwa kuti musafuna pinthu pyenepi.’ Yahova asadziwa pinafunika kwa imwe maseze mbamudzati kunyerezera kuti musapifuna. (Afilipi 4:19) Iye asadziwa nguwo zakuti tinazifuna ntsogolo. Iye asadziwambo cakudya cinafuna imwe. Pontho asadziwa kuti imwe na banjanu musafuna mbuto yakukhala. Yahova anadzacita pyonsene toera mukwanise kugumana pinthu pyakuti ndi pyakufunikadi kwa imwe.

19. Thangwi yanji nee tisafunika kudzudzumika na pinthu pinafuna kucitika ntsogolo?

¹⁹ Lerini Mateo 6:34. Paulendo unango Yezu apanga anyakupfundzace: ‘Lekani kudzudzumika.’ Yahova anadzatipasa pinafuna ife pa ntsiku. Na thangwi ineyi, nee tisafunika kudzudzumika kakamwe na pinthu pinafuna kucitika ntsogolo. Tingacita pyenepi, tinatoma kunyindirika tekhene, pinthu pyakuti pinadzafudza uxamwali wathu na Yahova. M’mbuto mwace, tisafunika kunyindira Yahova na ntima onsene.​—Misangani 3:5, 6; Afilipi 4:6, 7.

20. (a) Ndi cifuno cipi cakuti munakwanisa kukhazikisa m’basa ya Yahova? (b) Munacitanji toera kululupisa umaso wanu?

²⁰ Mphyakutsukwalisa kakamwe khala tisaphatisira ndzidzi uzinji toera kukhala na  pinthu pizinji kakamwe m’mbuto mwakutumikira Yahova na ntima onsene! M’mbuto mwace, tisafunika kutumikira Yahova na ntima onsene. Mwacitsandzo, munakwanisa kuphedza mpingo wakuti uli na kufuna kukulu kwa amwazi mphangwa? Munakwanisa kutumikira ninga mpainiya? Peno khala musatumikira ninga mpainiya, mwanyerezera kale toera kuenda ku Xikola Ya Amwazi Mphangwa a Umambo? Munakwanisa kuphatisira ntsiku zingasi toera kuphedza pa Bheteli peno pa ofesi yakuthumburuzira mabukhu? Munakwanisa kuphedzera kumangwa kwa Nyumba ya Umambo pacisa canu ninga nyakuperekeka peno kutumikira m’basa yakumanga? Nyerezerani kuti munacitanji toera umaso wanu ukhale wakululupa pyakuti pinakuphedzani toera kuphatisira ndzidzi na mphambvu ku mabasa a Umambo. Bokosi yakuti “ Munalulupisa Tani Umaso Wanu” isapereka maonero mangasi. Citani phembero toera Yahova akuphedzeni kucita cisankhulo cakuthema. Buluka penepo citani macinjo akufunika.

21. Ninji pinadzatiphedza toera kukhala na uxamwali na Yahova?

 ²¹ Yezu atipfundzisa toera kuikha Umambo pa mbuto yakutoma. Tingacita pyenepi, tinacalira kudzudzumika kakamwe thangwi ya pinthu pyakufunika kwa ife. Tisakhala na uxamwali wakuwanga na Yahova thangwi tisanyindira kuti iye anadzatiphedza. Ife tapfundza kuti tisafunika kuona mwadidi pinafuna ife kugula na pinthu pyonsene pinapereka dziko maseze tinakwanisa kupilipa. Tingalulupisa umaso wathu cincino, pinatiphedza kupitiriza kukhala akukhulupirika kwa Yahova na toera “kuphatirira mwakuwanga umaso wandimomwene” udatipikira iye.​—1 Timoti 6:19, NM.