NSOLO WA PFUNDZIRO 14
“Anthu Onsene Anadzindikira Kuti Ndimwe Anyakupfundza Anga”
“Imwe mungafunana unango na ndzace, anthu onsene anadzindikira kuti ndimwe anyakupfundza anga.” —JUWAU 13:35.
NYIMBO 106 Tikulise N’khaliro wa Ufuni
PINAFUNA IFE KUPFUNDZA a
Kodi anthu azinji asanyerezeranji angaona ufuni unapangiza Mboni za Yahova? (Onani ndima 1)
1. Ninji pinadzumatirisa anthu azinji anagumanika pa misonkhano yathu pa ulendo wakutoma? (Onanimbo foto.)
NYEREZERANI kuti banja ibodzi yagumanika pa misonkhano mu Nyumba ya Umambo ya Mboni za Yahova pa ulendo wakutoma. Iwo asadzumatirwa kakamwe na njira idatambirwa iwo, pontho na ufuni unapangiza abale na alongo mu mpingo. Mu ndzidzi unabwerera iwo kunyumba, nkazi asapanga mamunace: ‘Anthu anewa ndi akusiyana kakamwe na anthu anango adadziwa ine, pontho ndakomerwa kakamwe kusonkhana nawo pabodzi.’
2. Thangwi yanji anango asasiya kutumikira Yahova?
2 Ufuni unapangiza atumiki a Yahova ndi wakupambulika kakamwe. Mbwenye iwo nee ndi aungwiro. (1 Juwau 1:8) Natenepa, mu ndzidzi unadziwana ife mwadidi na abale na alongo mu mpingo, panango tinatoma kuona madodo awo. (Aroma 3:23) Mwakutsukwalisa, anango atawirisa kuti madodo a anango aacitise kusiya kutumikira Yahova.
3. Anthu anadzindikira tani Akristu andimomwene? (Juwau 13:34, 35)
3 Onani pontho lemba idabuluswa nsolo uno. (Lerini Juwau 13:34, 35.) Anthu anakwanisa tani kudzindikira Akristu andimomwene? Thangwi ya ufuni unapangiza iwo kuna unango na ndzace, tayu thangwi yakukhala aungwiro. Onani kuti Yezu nee alonga kuti: ‘Mungafunana unango na ndzace munadzindikira kuti ndimwe anyakupfundza anga.’ Mbwenye iye alonga: “Imwe mungafunana unango na ndzace, anthu onsene anadzindikira kuti ndimwe anyakupfundza anga.” Na mafala anewa, Yezu apangiza kuti nee ndi atowereri ace basi akhafuna kudzindikira kuti ndi Akristu andimomwene, mbwenye anthu anango mbadadzindikirambo pyenepi thangwi yakufunana kwawo unango na ndzace.
4. Ndi mibvundzo ipi yakuti panango anthu anaicita thangwi ya Akristu andimomwene?
4 Anthu akuti nee ndi Mboni za Yahova, panango anabvundza: ‘Ufuni unatiphedza tani toera kudzindikira atowereri andimomwene a Yezu? Yezu apangiza tani ufuni kuna apostolo ace? Pontho tinakwanisa tani kutowezera citsandzo ca Yezu lero?’ Mboni za Yahova zisafunika kunyerezera mitawiro ya mibvundzo ineyi. Kucita pyenepi kunatiphedza toera kupangiza ufuni wandimomwene, makamaka tingatsukwalisana unango na ndzace.—Aef. 5:2.
THANGWI YANJI UFUNI USAPHEDZA TOERA KUDZINDIKIRA AKRISTU ANDIMOMWENE?
5. Fokotozani mafala a Yezu anagumanika pa Juwau 15:12, 13.
5 Yezu apangiza pakweca ntundu wa ufuni wakuti mbudaphedza anthu toera kudzindikira atowereri ace. (Lerini Juwau 15:12, 13.) Iye apanga atowereri ace: “Funanani unango na ndzace ninga mudakufunani ine.” Kodi mafala anewa asabvekanji? Ninga pidafokotoza Yezu, ufuni unoyu usacitisa Nkristu kufuna kakamwe anango kupiringana iye ene, ngakhale kupereka umaso wace thangwi ya Nkristu ndzace khala mphyakufunika. b
6. Mafala a Mulungu asapangiza tani kuti ufuni ndi wakufunika kakamwe?
6 Mafala a Mulungu asapangiza kuti ufuni ndi wakufunika kakamwe. Mwacitsandzo, anthu azinji asakomerwa kakamwe na mavesi awa a Bhibhlya: “Mulungu ndi ufuni.” (1 Juwau 4:8) “Funa ndzako ninga iwe ene.” (Mat. 22:39) “Ufuni usaphimbira madawo mazinji kakamwe.” (1 Ped. 4:8) “Ufuni nkhabe kumala.” (1 Akor. 13:8) Mavesi anewa na anango asapangiza pakweca kuti ndi pyakufunika kakamwe kupangiza ufuni.
7. Thangwi yanji Sathani cipo anakwanisa kugumanya anthu mbafunana unango na ndzace?
7 Anthu azinji asabvundza: ‘Ndinadziwa tani kuti uyu ndi uphemberi wandimomwene? Mauphemberi onsene asalonga kuti asapfundzisa undimomwene, mbwenye uphemberi ubodzi na ubodzi usapfundzisa pinthu pyakusiyana thangwi ya Mulungu.’ Sathani asacitisa kuti paoneke mauphemberi mazinji, pontho pyenepi pisacitisa kukhala pyakunentsa kuna anthu toera kudziwa uphemberi wandimomwene. Mbwenye iye cipo anakwanisa kugumanya anthu pa dziko yapantsi mbafunana unango na ndzace. Basi ene Yahova ndiye anakwanisa kucita pyenepi. Ife tisadziwa pyenepi thangwi ufuni usabuluka kuna Yahova. Natenepa, basi ene ale ali na nzimu wakucena na nkhombo za Yahova, ndiwo anakwanisa kupangiza ufuni wandimomwene kuna unango na ndzace. (1 Juwau 4:7) Na thangwi ineyi, Yezu alonga kuti basi ene atowereri ace mbadapangiza ufuni wandimomwene kuna unango na ndzace.
8-9. Ndi mabvero api anakhala na anthu azinji thangwi ya ufuni unapangiza Mboni za Yahova?
8 Ninga pidalonga Yezu, anthu azinji asadzindikira Akristu andimomwene thangwi ya ufuni wandimomwene unapangiza iwo kuna unango na ndzace. Mwacitsandzo, m’bale unango anacemerwa Ian asakumbuka ulendo wakutoma udagumanika iye pa nsonkhano wa gawo udacitwa mu kampo ya bhola cifupi na panyumba pace. Miyezi mingasi nsonkhano unoyu mbudzati kucitika, Ian akhadagumanika kale mu kampo ineyi toera kuona bhola. Iye alonga: “Anthu akhali pa nsonkhano wa gawo akhali akusiyana kakamwe na anthu akhadabwera kudzaona bhola. Mboni za Yahova zikhalonga mwacilemedzo, zikhadabvala mwadidi, pontho anawo akhapangiza makhaliro adidi.” Iye athimiza: “Kusiyapo pyonsene, anthu anewa akhali akutsandzaya na antendere. Pontho ndi pyenepi pikhafuna ine kuona mu umaso wanga. Ine nee ndisakumbuka nkhani zidacitwa ntsiku ineyi, mbwenye ndisapitiriza kukumbuka makhaliro adidi adapangiza Mboni za Yahova.” c Mwandimomwene, iwo asapangiza makhaliro anewa, thangwi ya ufuni wandimomwene uli na iwo kuna unango na ndzace. Nakuti tisafuna abale na alongo athu, ife tisaatsalakana mwadidi na mwacilemedzo.
9 M’bale unango anacemerwa John aonambo pibodzi pyene pa ulendo wakutoma udagumanika iye pa misonkhano ya mpingo. Iye alonga: “Iwo akhapangiza makhaliro adidi kakamwe, mbakhala ninga anthu aungwiro. Ufuni wawo wandimomwene wandipasa cinyindiro cakuti ndagumana uphemberi wandimomwene.” d Pitsandzo pyenepi na pinango pizinji pisapangiza kuti Mboni za Yahova ndi Akristu andimomwene.
10. Ndi midzidzi ipi yakuti tisafunika kupangiza ufuni wandimomwene? (Onanimbo cidzindikiro capantsi.)
10 Ninga pidaona ife pakutoma, abale na alongo athu nee ndi aungwiro. Midzidzi inango, iwo analonga peno anacita pinthu pyakutitsukwalisa. e (Tiya. 3:2) M’midzidzi ineyi, ife tinakwanisa kupangiza ufuni wandimomwene kubulukira m’malongero athu na macitiro athu. Natenepa, tendeni tione kuti tinacita tani pyenepi mukutowezera citsandzo ca Yezu.—Juwau 13:15.
YEZU APANGIZA TANI UFUNI KUNA APOSTOLO ACE?
Yezu apitiriza kufuna apostolo ace, ngakhale mu ndzidzi udapangiza iwo makhaliro akuipa (Onani ndima 11-13)
11. Ndi makhaliro api akuipa adapangiza Tiyago na Juwau? (Onanimbo foto.)
11 Yezu nee akhadikhira kuti anyakupfundzace acite pinthu ninga anthu aungwiro. Mbwenye iye aaphedza mwaufuni toera acinje makhaliro awo kuti akhale akutawirika kuna Yahova. Ntsiku inango, Tiyago na Juwau apanga mai wawo toera akaphembe Yezu kuti aapase mbuto yakufunika kakamwe mu Umambo wace. (Mat. 20:20, 21) Thangwi yakucita pyenepi, Tiyago na Juwau apangiza kuti akhali akudzikuza, pontho iwo akhafuna kukhala akufunika kakamwe kupiringana anango.—Mis. 16:18.
12. Kodi basi ene ndi Tiyago na Juwau adapangiza makhaliro akuipa? Fokotozani.
12 Nee ndi Tiyago na Juwau basi ene adapangiza makhaliro akuipa pa ndzidzi unoyu. Onani pidacita apostolo anango pidabva iwo pyenepi: “Anyakupfundza khumi pidabva iwo pyenepi, aipirwa thangwi ya pidacita Tiyago na Juwau.” (Mat. 20:24) Panango pa ndzidzi unoyu, Tiyago na Juwau alongezana na apostolo anango. Panango iwo alonga mafala awa: ‘Musanyerezera kuti ndimwe ani imwe toera kuphemba mbuto yakufunika kakamwe mu Umambo? Nee ndimwe basi adaphata basa mwakuwanga na Yezu. Ife tathemambo kupaswa mbuto yakufunika kakamwe ninga imwe!’ Mwakukhonda tsalakana pidacitika pa ndzidzi unoyu, iwo nee apangiza ufuni kuna unango na ndzace.
13. Yezu atsalakana tani apostolo ace? (Mateu 20:25-28)
13 Kodi Yezu acitanji? Iye nee aipirwa. Pontho nee alonga kuti mbadasaka apostolo anango akucepeseka kakamwe akuti ndzidzi onsene mbadafunana unango na ndzace. Mbwenye iye acedza nawo mwakukhurudzika, thangwi akhadziwa kuti iwo akhafuna kucita pinthu pyadidi. (Lerini Mateu 20:25-28.) Ndzidzi onsene Yezu akhatsalakana mwaufuni apostolo ace, maseze iwo akhaketesana mwakubwereza-bwereza kuti mbani nkulu pakati pawo.—Marko 9:34; Luka 22:24.
14. Ndi makhaliro api akhali na anthu m’mbuto zidakula apostolo a Yezu?
14 Mwakukhonda penula, Yezu akhakumbuka njira idakula m’bodzi na m’bodzi wa apostolo ace. (Juwau 2:24, 25) Iwo akula m’mbuto zakuti atsogoleri a mauphemberi akhapfundzisa kuti anthu mbadakhala akufunika angakhala m’mbuto zadidi kakamwe. (Mat. 23:6; onani vidhyu ya nsolo wakuti Primeiros Assentos na Sinagoga mu nota de estudo pa Mateu 23:6.) Kusiyapo pyenepi, atsogoleri a mauphemberi Aciyuda akhaoneka ninga anthu akufunika kakamwe kupiringana anango. f (Luka 18:9-12) Yezu akhadziwa kuti makhaliro anewa mbadakhuyambo apostolo ace. (Mis. 19:11) Iye akhadziwa kuti anyakupfundzace mbadacitambo madodo, pontho iye akhapirira mu ndzidzi ukhadodoma iwo. Yezu akhadziwa kuti iwo akhafuna kucita pinthu pyadidi. Natenepa, akhaaphedza mwakupirira toera akhale akucepeseka mbafunana unango na ndzace.
TINATOWEZERA TANI CITSANDZO CA YEZU?
15. Tisapfundzanji na pinthu pidacita Tiyago na Juwau?
15 Ife tinakwanisa kupfundza pizinji na pinthu pidacita Tiyago na Juwau. Iwo nee akhafunika kuphemba mbuto yakufunika kakamwe mu Umambo wa Yezu. Mbwenye apostolo anango nee akhafunika kutawirisa kuti pinthu pyenepi piacitise kukhonda bverana. Ngakhale tenepo, Yezu atsalakana apostolo anewa 12, mwaufuni na mwakukoma ntima. Tisapfundzanji? Ife nee tisafunika kunyerezera basi ene pinthu pyakuipa pidacita anango, mbwenye tisafunikambo kunyerezera mabvero anakhala na ife thangwi ya pinthu pidaticitira iwo. Ninji pinafuna kutiphedza toera kucita pyenepi? Tingatsukwaliswa na m’bale peno mulongo, tisafunika kubvundzika tenepa: ‘Thangwi yanji pinthu pidacita iye pyanditsukwalisa kakamwe? Kodi pinthu pidacita iye pisapangiza kuti ndina makhaliro akuti ndisafunika kuacinja? Kodi munthu unoyu adanditsukwalisa ali kuthimbana na nyatwa? Maseze ndisaona kuti ndiri na mathangwi toera kutsukwala, kodi ine ndinakwanisa kupangiza ufuni mbandimulekerera?’ Tingawangisira toera kutsalakana anango mwaufuni, tinapangiza kuti ndife atowereri andimomwene a Yezu.
16. Ndi cinthu cipi cinango cinapfundza ife na citsandzo ca Yezu?
16 Citsandzo ca Yezu cisatipfundzisambo kufunika kwa kuwangisira toera kubvesesa pinthu pinacita abale na alongo athu. (Mis. 20:5) Yezu akhakwanisa kuona pinthu piri m’mitima ya anthu, mbwenye ife nkhabe kwanisa kucita pyenepi. Ngakhale tenepo, ife tinakwanisa kukhala akupirira abale na alongo athu angatitsukwalisa. (Aef. 4:1, 2; 1 Ped. 3:8) Pyenepi pinakhala pyakukhonda nentsa kuna ife tingaadziwa mwadidi. Onani citsandzo cibodzi.
17. Muyang’aniri wa cisa m’bodzi aphedzeka tani thangwi ya kudziwa mwadidi m’bale unango?
17 Muyang’aniri wa cisa m’bodzi asakumbuka m’bale unango m’mipingo ikhacedzera iye ku Afrika Oriental. Pakutoma, iye akhanyerezera kuti m’bale unoyu akhali wakusowa ufuni. Mphapo muyang’aniri wa cisa unoyu acitanji? Iye alonga: “M’mbuto mwa kucalira m’bale unoyu, ine ndaona kuti ndikhafunika kundziwa mwadidi.” Muyang’aniri wa cisa pidadziwa iye m’bale unoyu iye aona kuti njira idakuzwa iye ikhakhuya makhaliro ace. Muyang’aniri wa cisa unoyu athimiza: “Ine ndadzindikira kuti m’bale awangisira kakamwe toera kusiya makhaliro ace kuti akwanise kucita uxamwali na anthu anango, pontho ndaona kuti iye akhadacinja kakamwe. Ife tadzakhala axamwali a ponda ndipondembo.” Mwandimomwene, tingawangisira toera kudziwa mwadidi abale na alongo athu, kazinji kene pisakhala pyakukhonda nentsa toera kupangiza ufuni kuna iwo.
18. Ndi mibvundzo ipi inafunika ife kucitika tingatsukwaliswa na m’bale peno mulongo? (Misangani 26:20)
18 Midzidzi inango, panango tinafunika kucedza na m’bale peno mulongo adatitsukwalisa. Mbwenye pakutoma pinakhala mwadidi kubvundzika tenepa: ‘Kodi ine ndiri na undimomwene onsene thangwi ya pinthu pidacitika?’ (Mis. 18:13) ‘Kodi iye anditsukwalisa mwakufuna?’ (Ekle. 7:20) ‘Ine ndacitambo kale madodo ninga anewa?’ (Ekle. 7:21, 22) ‘Ndingacedza na munthu unoyu adanditsukwalisa, pyenepi pinathimizira kukhonda bverana kwathu?’ (Lerini Misangani 26:20.) Tingakhala na ndzidzi toera kunyerezera mibvundzo ineyi, panango tinaona kuti ufuni unatikulumiza toera kusiya kunyerezera pinthu pidacitika mbatilekerera m’bale wathu.
19. Muli wakutonga toera kucitanji?
19 Mboni za Yahova zisapangiza kuti ndi anyakupfundza andimomwene a Yezu thangwi ya kufunana kwawo unango na ndzace. M’bodzi na m’bodzi wa ife anapangiza kuti ndi nyakupfundza wandimomwene wa Yezu angapangiza ufuni kuna abale na alongo mwakukhonda tsalakana madodo awo. Tingapangiza ufuni wandimomwene, anango anadzindikira uphemberi wandimomwene mbalambira pabodzi na ife Yahova, Mulungu waufuni. Natenepa, tendeni tikhale akutonga kupangiza ufuni unapangiza kuti ndife Akristu andimomwene.
NYIMBO 17 ‘Ndisafuna’
a Anthu azinji asapfundza undimomwene thangwi yakuona ufuni wandimomwene unapangiza atumiki a Yahova. Mbwenye ife ndife akusowa ungwiro, na thangwi ineyi midzidzi inango pisakhala pyakunentsa toera kupangiza ufuni kuna Akristu andzathu. Natenepa, tendeni tione kuti thangwi yanji ufuni ndi wakufunika kakamwe, pontho tinatowezera tani citsandzo ca Yezu tingatsukwaliswa na anango.
b Onani bukhu yakuti “Bwera Dzanditowera,” nsolo 17, ndima 10-11.
c Onani nsolo wakuti “Finalmente, a minha vida tem objetivo,” mu A Sentinela de 1 de Novembro de 2012, tsa. 13-14.
d Onani nsolo wakuti “A minha vida parecia muito boa,” mu A Sentinela de 1 de Maio de 2012, tsa. 18-19.
e Nsolo uno nee usalonga pya madawo makulu akuti asafunika kutsalakanwa na akulu a mpingo, ninga analongwa pa 1 Akorinto 6:9, 10.
f Anthu anango asalonga kuti mpfundzisi unango Waciyuda alonga: “Pa dziko yonsene yapantsi nkhabepo anthu akupiringana 30 akulungama ninga Abhrahamu. Khala alipo 30, ine na mwananga ndife awiri mwa anthu anewa; khala alipo khumi, ine na mwananga ndife awiri mwa iwo; khala alipo axanu, ine na mwananga ndife awiri mwa iwo; khala ndi awiri, ndine na mwananga; khala ndi m’bodzi, ndine.”
