Thangwi yanji mamuna akhacemerwa “Ngana” alonga kuti ‘mbadafudza’ unthaka wace angamanga banja na Rute? (Rute 4:1, 6)

Mu ndzidzi wakale, mamuna wakumanga banja angafa mbakhonda kusiya ana ninji pikhacitika na munda wace? Kodi dzina ya banja yace mbidafudzika? Mwambo wa Mose unatiphedza toera kutawira mibvundzo ineyi.

Ninji pikhacitika na munda wa mamuna wakuti afa peno agulisa munda wace thangwi ya kutcerenga? M’bale wace peno wacibale wace akhafunika kuombola munda unoyu. Pyenepi mbapidaphedza toera munda upitirize kukhala wa banja ibodzi ene.—Lev. 25:23-28; Num. 27:8-11.

Mphapo ninji pikhafunika kucitwa toera dzina ya banja ya mamuna unoyu ikhonde kufudzika? Nkazi adaferwa akhafunika kumanga banja na m’bale wa mamunace, ninga pidacitika na Rute. Mamuna unoyu akhafunika kumanga banja na nkazi wa m’bale wace adafa toera abale mwana wakuti mbadapitiriza na dzina ya mamuna adafa, pontho na unthaka wace. Masasanyiro anewa aufuni akhaphedzambo toera kutsalakana nkazi adaferwa na mamunace.—Dheu. 25:5-7; Mat. 22:23-28.

Onani pidacitikira Noemi. Iye akhadamanga banja na Elimeleki. Mbwenye mu ndzidzi udafa iye pabodzi na anace awiri, nkazace nee akhalibve na munthu toera kuntsalakana. (Rute 1:1-5) Pidabwerera iye ku Yuda, Noemi apanga nkwenyace Rute toera aphembe Bhoazi kuti akhale muomboli wa munda wawo. Iye akhali m’bale wa Elimeleki. (Rute 2:1, 19, 20; 3:1-4) Mbwenye Bhoazi akhadziwa kuti Elimeleki akhali na m’bale unango wakuti m’Bhibhlya asacemerwa “Ngana.” Natenepa iye ndiye akhafunika kuombola Noemi.—Rute 3:9, 12, 13.

Pakutoma “Ngana” akhafuna kuphedza. (Rute 4:1-4) Iye akhadziwa kuti mbadafunika kubvunga kobiri toera kugula munda, mbwenye akhadziwambo kuti thangwi yakukalamba, Noemi nee mbadakwanisa kubala mwana toera apitirize kukhala na munda wa Elimeleki. Nakuti munda unoyu mbudakhala wa Ngana, iye nee mbadabvunga kobiri mwakusowa basa.

Mbwenye Ngana acinja manyerezero ace pidadzindikira iye kuti mbadamanga banja na Rute. Iye alonga: “Nee ndinakwanisa kuuombola, gopa ndinafudza unthaka wanga.” (Rute 4:5, 6) Thangwi yanji iye acinja manyerezero ace?

Ngana peno munthu unango mbadamanga banja na Rute mbabala mwana wa mamuna, mwana unoyu mbadapaswa munda wa Elimeleki. Pyenepi ‘mbapidafudza’ tani “unthaka” wa Ngana? Bhibhlya nee isalonga pyenepi, mbwenye panango mathangwi ace akhali awa:

• Yakutoma, iye mbadabvunga kobiri toera kugula munda wa Elimeleki thangwi mukupita kwa ndzidzi, munda unoyu mbudakhala wa mwana wa Rute.

• Yaciwiri, iye mbadakhala na basa yakutsalakana Noemi pabodzi na Rute.

• Yacitatu, Rute mbadabala mwana na Ngana, iwo mbadafunika kugawana unthaka wawo na ana a Ngana.

• Yacinai, khala Ngana nee akhali na ana, mwana akhafuna kubala Rute mbadakhala na minda miwiri, wa Elimeleki na wa Ngana. Natenepa, iye mbadafa munda wace mbudakhala wa mwana wa Elimeleki. Ngana nee akhafuna kuluza unthaka wace toera kuphedza Noemi. Iye aona kuti mbapidakhala mwadidi kuti Bhoazi akhale muomboli. Bhoazi acita pyenepi thangwi akhafuna kuti “unthaka wa mamuna adafa upitirize na dzina yace.”—Rute 4:10.

Pisaoneka kuti Ngana akhafuna kakamwe pinthu pyace. Iye akhanyerezera basi ene pinthu pikhafuna iye. Maseze awangisira kakamwe toera dzina yace ikhonde kufudzika, iyo yafudzika thangwi mpaka lero ife nee tisadziwa dzina yace. Kusiyapo pyenepi, iye aluzambo mwai ukulu kakamwe udakhala na Bhoazi, thangwi Bhoazi adzakhala m’bodzi wa makolo a Mesiya, Yezu Kristu. Pyenepi pyakhala pyakutsukwalisa kakamwe kuna Ngana adakhonda kuphedza munthu akhafuna ciphedzo!—Mat. 1:5; Luka 3:23, 32.