1-2. Khala mudzati kukhala wakuthema toera kubatizwa, thangwi yanji nee musafunika kubwerera nduli? (Onani foto iri patsamba yakutoma.)

 KHALA imwe musafuna kubatizwa, ceneci ndi cifuno cadidi kakamwe. Kodi imwe muli wakukhunganyika toera kubatizwa cincino? Khala musaona kuti muli wakukhunganyika, pontho akulu a mpingo aona kuti mwathema, lekani kunyinyirika toera kubatizwa pa nsonkhano unatowera. Mungacita pyenepi, imwe munakhala na nkhombo zizinji m’basa ya Yahova.

² Kodi pana munthu adakupangani kuti musafunika kusasanyira makhundu anango mu umaso wanu mbamudzati kubatizwa, peno mwaona mwekhene kuti musafunika kucita pyenepi? Khala ndi tenepo, lekani kubwerera nduli. Imwe munakwanisa kuthambaruka toera kukwanirisa cifuno ceneci, mwakukhonda tsalakana khala ndimwe mwana peno nkulu.

3. Ndi mbvundzo upi udacita mamuna unango wa ku Etiopya kuna Filipi, pontho pyenepi pisaticitisa kukhala na mbvundzo upi? (Mabasa 8:36, 38)

³ Lerini Mabasa 8:36, 38. Mamuna wa mu utongi wa ku Etiopya abvundza m’mwazi mphangwa Filipi kuti: “Ninji cinandipingiza toera ndikhonde kubatizwa?” Mamuna unoyu akhafuna kakamwe kubatizwa. Kodi iye akhali wakukhunganyika toera kubatizwa?

4. Mamuna wa ku Etiopya apangiza tani kuti akhafuna kupitiriza kupfundza pizinji?

⁴ Mamuna unoyu wa ku Etiopya “akhadaenda ku Yerusalemu toera kulambira Mulungu.” (Mabasa 8:27) Natenepa pisaoneka kuti panango iye akhali mu uphemberi Waciyuda, pontho mwakukhonda penula iye apfundza thangwi ya Yahova m’Malemba akucena Acihebheri. Ngakhale tenepo, iye akhafuna kupfundza pinthu pizinji. Na thangwi ineyi, mu ndzidzi udaenda Filipi  kaonana naye, an’gumana mbakaleri mpukutu wa mprofeta Izaiya. (Mabasa 8:28) Mphangwa zikhaleri iye mu mpukutu unoyu zikhali cakudya cauzimu cakuuma. Mamuna unoyu nee akhafuna basi ene kupfundza pipfundziso pya m’Malemba pyakutoma, mbwenye akhafuna kupitiriza kupfundza pizinji.

5. Mamuna wa ku Etiopya acita tani pinthu mwakubverana na pikhapfundza iye?

⁵ Mamuna unoyu akhali nyabasa wankulu wa utongi wa Kandasi, Mambo wa nkazi wa ku Etiopya, pontho iye ‘akhatsalakana mpfuma yonsene ya mambo unoyu.’ (Mabasa 8:27) Natenepa iye akhali na mabasa mazinji kakamwe. Ngakhale tenepo, iye akhakwanisa kugumana ndzidzi toera kulambira Yahova. Mamuna unoyu nee akhakomerwa basi ene na undimomwene ukhapfundza iye, mbwenye akhacita pinthu mwakubverana na pikhapfundza iye. Na thangwi ineyi, iye acita ulendo buluka ku Etiopya kuenda ku Yerusalemu toera kalambira Yahova pa templo. Toera kucita ulendo unoyu, iye akhafunika kubvunga ndzidzi wace na kobiri yace, mbwenye iye akhafuna kulambira Yahova mwakukhonda tsalakana pinthu pyenepi.

6-7. Ufuni wa mamuna wa ku Etiopya kuna Yahova wankulumiza toera kucitanji?

⁶ Mamuna wa ku Etiopya apfundza pinthu pyakufunika kakamwe na Filipi, kuphatanizambo undimomwene wakuti Yezu akhali Mesiya. (Mabasa 8:34, 35) Mamuna unoyu atsandzaya kakamwe pidadziwa iye pinthu pidancitira Yezu. Mphapo acitanji pidamala iye kupfundza pinthu pyenepi? Panango iye mbadapitiriza pyace tenepo thangwi yakukhala Muyuda wakuti akhalemedzwa kakamwe. Mbwenye kufuna kwace Yahova na Yezu kwankulumiza toera kucita cisankhulo cakubatizwa mbakhala ntowereri wa Yezu Kristu. Filipi aona kuti mamuna unoyu akhali wakukhunganyika, natenepa iye am’batiza.

⁷ Mungatowezera citsandzo ca mamuna unoyu wa ku Etiopya, imwe munakwanisambo kukhunganyika toera kubatizwa. Imwe munakwanisambo kulonga na cinyindiro consene kuti: “Ninji cinandipingiza toera ndikhonde kubatizwa?” Cincino tendeni tione kuti imwe munatowezera tani pinthu pidacita mamuna unoyu. Iye apitiriza kupfundza, aphatisira pikhapfundza iye, pontho apitiriza kuthimizira ufuni wace kuna Mulungu.

8. Mwakubverana na Juwau 17:3, ndi pinthu pipi pisafunika imwe kucita?

⁸ Lerini Juwau 17:3. Kodi mafala anewa a Yezu akuphedzani toera mutome kupfundza Bhibhlya? Kuna azinji a ife inde. Mphapo mafala mabodzi ene asatipangambo toera tipitirize kupfundza? Inde. Ife cipo tinasiya ‘kudziwa  Mulungu m’bodzi basi wandimomwene.’ (Ekle. 3:11) Ife tinapitiriza kupfundza kwenda na kwenda. Mu ndzidzi unapitiriza ife kucita pyenepi, tinakhala na uxamwali wakuwanga kakamwe na Yahova.—Mas. 73:28.

9. Tisafunika kucitanji pakumala kupfundza pipfundziso pyakutoma pya m’Bhibhlya?

⁹ Ife tingatoma kupfundza thangwi ya Yahova, tisapfundza basi ene pipfundziso pyakutoma pya m’Bhibhlya. Na thangwi ineyi, mu tsamba idalembera iye Ahebheri, mpostolo Paulu alonga kuti pipfundziso pyenepi ndi “pipfundziso pyakutoma.” Iye nee akhapwaza ‘pipfundziso pyakutoma,’ mbwenye akhapangiza kuti pipfundziso pyenepi pyalandana na nkaka wakuti usaphedza mwana toera kukula. (Aheb. 5:12; 6:1) Kusiyapo pyenepi, iye akulumizambo Akristu onsene toera apitirize kupfundza pipfundziso pizinji kupiringana pipfundziso pyakutoma, mbapfundza undimomwene wa m’Bhibhlya wakuti ndi wakunentsa kubvesesa. Kodi imwe musakomerwa na pipfundziso pyakunentsa kubvesesa pya m’Bhibhlya? Imwe musafuna kuthambaruka na kupitiriza kupfundza thangwi ya Yahova na cifuniro cace?

10. Thangwi yanji ndi pyakunentsa kuna anango toera kupfundza?

¹⁰ Kuna azinji a ife ndi pyakunentsa kupfundza. Ndiye tanimbo kuna imwe? Kodi imwe mwapfundza kuleri kuxikola? Imwe mukhakomerwa na pikhapfundza imwe mbamuona kuti mwapfundza mwadidi? Peno mukhaona kuti nee muli na maluso adidi akupfundza? Khala ndi tenepo nee muli mwekhene. Mbwenye Yahova anakuphedzani. Thangwi iye ndi waungwiro, pontho ndi Mpfundzisi wadidi kakamwe.

11. Yahova asapangiza tani kuti ndi ‘Mpfundzisi Wankulu’?

¹¹ Yahova ndi “Mpfundzisi wanu Wankulu.” (Iza. 30:20, 21) Iye ndi wakupirira, waufuni, pontho ndi Mpfundzisi wacitsalakano. Iye asayang’ana pinthu pyadidi muna anyakupfundzace. (Mas. 130:3) Pontho iye nee asadikhira kuti ticite pinthu pyakuti nee tinakwanisa kupicita. Kumbukani kuti ndiye adacita ongo wathu wakuti ndi muoni wadidi kakamwe kuna ife. (Mas. 139:14) Pontho mwacibaliro ife tiri na cifuno toera kupfundza. Nciti wathu asafuna kuti tipitirize na kupfundza kwenda na kwenda mbatikomerwa na pinapfundza ife. Natenepa ndi pyakufunika ‘kufuna kakamwe’ undimomwene wa Bhibhlya cincino. (1 Ped. 2:2) Khazikisani pifuno pyakuti munapikwanirisa, pontho khalani na ndandanda yakuleri na kupfundza Bhibhlya. (Yos. 1:8) Na ciphedzo ca Yahova, imwe munakomerwa na kuleri na kupfundza pinthu pizinji thangwi ya iye.

12. Thangwi yanji tisafunika kupfundza pya umaso wa Yezu na utumiki wace?

¹² Ndzidzi onsene nyerezerani pya umaso wa Yezu na utumiki wace. Khala tisafuna kutumikira Yahova, tisafunika kutowezera citsandzo ca Yezu mwakukhulupirika makamaka ntsiku zino zakunentsa. (1 Ped. 2:21) Yezu apanga anyakupfundzace kuti iwo mbadathimbana na nyatwa. (Luka 14:27, 28) Ngakhale tenepo, iye akhali na cinyindiro cakuti iwo mbadakwanisa kupitiriza kukhala akukhulupirika kuna Mulungu ninga pidacita iye. (Juwau 16:33) Pfundzani pinthu pyonsene thangwi ya Yezu, pontho khazikisani cifuno cakutowezera citsandzo cace ntsiku zonsene.

13. Musafunika kupitiriza kuphembanji kuna Yahova, pontho thangwi yanji?

¹³ Nee pyakwana basi ene kukhala na cidziwiso. Ife tisafunika kukhala na cidziwiso toera tikwanise kupfundza pizinji thangwi ya Yahova na kukulisa makhaliro ninga ufuni kuna iye na cikhulupiro. (1 Akor. 8:1-3) Mu ndzidzi unapitiriza imwe kupfundza, phembani Yahova toera akuphedzeni kuthimizira cikhulupiro canu.  (Luka 17:5) Iye anatawira maphembero anu. Cikhulupiro candimomwene ciri na imwe thangwi ya kudziwa mwadidi Mulungu cinakuphedzani toera kuthambaruka.—Tiya. 2:26.

14. Mpostolo Pedhru apangiza tani kuti ndi pyakufunika kakamwe kuphatisira pinapfundza ife? (Onanimbo foto.)

¹⁴ Mpostolo Pedhru agomezera kuti kuna atowereri a Kristu ndi pyakufunika kakamwe kupitiriza kuphatisira pinapfundza iwo. Iye aphatisira citsandzo ca Nowa. Yahova apanga Nowa kuti iye mbadaphatisira madzi makulu toera kufudza anthu akuipa a mu ndzidzi unoyu. Kudziwa basi ene kuti mbakudabwera madzi makulu nee pikhali pyakukwana toera Nowa na banja yace apulumuke. Onani kuti Pedhru alonga pya ndzidzi wakuti Madzi Makulu mbadzati kuoneka na “ndzidzi ukhamangwa arka.” (1 Ped. 3:20) Mwakukhonda penula, Nowa na banja yace acita pinthu pidapangwa iwo na Mulungu mbamanga arka ikulu kakamwe. (Aheb. 11:7) Buluka penepo, Pedhru alandanisa pidacita Nowa na ubatizo mbalemba: “Mwakulandana na arka ineyi, ubatizo usakupulumusanimbo cincino.” (1 Ped. 3:21) Natenepa, ife tinakwanisa kulandanisa basa inacita imwe cincino kuti mukhale akuthema toera kubatizwa na basa idacita Nowa na banja yace mu pyaka pizinji toera kumanga arka. Mphapo musafunika kucitanji kuti mukhale wakuthema toera kubatizwa?

15. Tinapangiza tani kuti tatcunyuka na ntima onsene?

¹⁵ Cibodzi mwa pinthu pyakutoma pisafunika ife kucita ndi kutcunyuka madawo athu. (Mabasa 2:37, 38) Munthu anatcunyuka na ntima onsene asacita macinjo. Kodi imwe mwasiya pinthu pyakuti nee pisakomeresa Yahova ninga ulukwali, kufumali peno kutomali fodya na kuphatisira mafala akutikana? (1 Akor. 6:9, 10; 2 Akor. 7:1; Aef. 4:29) Khala mudzati kusiya pinthu pyenepi, pitirizani kuwangisira toera kupisiya. Cedzani na m’bale peno mulongo anakupfundzisani Bhibhlya peno phembani akulu a mpingo toera akuphedzeni na kukupasani pitsogolero. Khala ndimwe m’phale peno ntsikana, pontho musakhala na anyakubala anu, aphembeni toera akuphedzeni kuti mukwanise kusiya misambo yakuipa inakupingizani toera kubatizwa.

16. Kucita mabasa auzimu kusaphatanizanji?

 ¹⁶ Ndi pyakufunikambo kakamwe kucita mabasa auzimu. Mabasa anewa asaphataniza kugumanika pa misonkhano ya mpingo na kupereka mitawiro pa misonkhano ineyi. (Aheb. 10:24, 25) Pontho khala imwe ndimwe m’mwazi mphangwa, musafunikambo kumwaza mphangwa mwakukhonda phonya. Mungamwaza mphangwa kazinji kene, imwe munakomerwa kakamwe na basa ineyi. (2 Tim. 4:5) Khala ndimwe m’phale peno ntsikana, pontho musakhala pabodzi na anyakubala anu bvundzikani: ‘Kodi ine ndisafunika kukumbuswa na anyakubala anga toera kugumanika pa misonkhano peno toera kuenda kamwaza mphangwa? Peno ndisacita pyenepi na kufuna kwanga?’ Mungacita pyenepi na kufuna kwanu, imwe munapangiza kuti musakhulupira Yahova Mulungu, musanfuna, pontho musapereka takhuta kuna iye. Pyenepi ‘pinapangiza kuti ndimwe munthu wakuperekeka’ kuna Yahova. (2 Ped. 3:11; Aheb. 13:15) Miyoni yonsene inapereka ife kuna Yahova mwakukhonda kakamizwa isatsandzayisa kakamwe Mulungu wathu. (Onani 2 Akorinto 9:7.) Ife tisapereka miyoni ineyi thangwi tisatsandzaya tingapasa Yahova pinthu pyathu pyadidi kakamwe.

17-18. Ndi n’khaliro upi unafuna kukuphedzani toera kuthambaruka mpaka kubatizwa, pontho thangwi yanji? (Misangani 3:3-6)

¹⁷ Mu ndzidzi unathambaruka imwe toera kubatizwa, imwe munathimbana na pinentso pizinji. Anthu anango panango anakusingirirani thangwi ya pinthu pinakhulupira imwe; pontho anango anakutcingani. (2 Tim. 3:12) Panango imwe munawangisira toera kusiya cinthu cakuipa, mbwenye midzidzi inango mbamucita pontho cinthu ceneci. Kusiyapo pyenepi, panango munatsukwala thangwi yakukhonda kukwanirisa pifuno pyanu. Mphapo ninji cinafuna kukuphedzani toera kupirira? Ndi ufuni wanu kuna Yahova.

¹⁸ Ufuni wanu kuna Yahova ndi n’khaliro wadidi kakamwe. (Lerini Misangani 3:3-6.) Ufuni wakuwanga kuna Mulungu unakuphedzani toera kupirira nyatwa zinathimbana na imwe. Pontho n’khaliro unoyu unakuphedzani toera mukhonde kusiya kutumikira Yahova mungathimbana na nyatwa. Bhibhlya kazinji kene isalonga kuti Yahova asapangiza ufuni wakukhonda mala kuna atumiki ace. Ufuni unoyu usapangiza kuti iye cipo anasiya kufuna atumiki ace. (Mas. 100:5) Imwe mwacitwa mwakulandana na Mulungu. (Gen. 1:26)  Mphapo munapangizambo tani ufuni unoyu wakukhonda mala?

19. Munapangiza tani kuti musapereka takhuta kakamwe thangwi ya pinthu pyonsene pinakucitirani Yahova? (Agalata 2:20)

¹⁹ Tomani kupereka takhuta kuna Yahova. (1 Ates. 5:18) Ntsiku zonsene bvundzikani: ‘Kodi Yahova asapangiza tani ufuni wace kuna ine?’ Buluka penepo, m’maphembero anu perekani takhuta kuna Yahova mbamulonga pinthu pidakucitirani iye. Onani kuti pinthu pyadidi pinakucitirani Yahova ndi thangwi yakuti iye asakufunani. Mpostolo Paulu adzindikirambo pyenepi thangwi ya Yahova. (Lerini Agalata 2:20.) Bvundzikani: ‘Kodi ine ndisafunambo kupangiza ufuni wanga kuna Yahova?’ Ufuni wanu kuna Yahova unakuphedzani toera kupitiriza kukunda mayesero na kupirira nyatwa. Ufuni unoyu unakukulumizani toera kupitiriza kulambira Yahova, mbamupangiza kuna Babanu wakudzulu kuti musanfuna kakamwe ntsiku zonsene.

20. Musafunika kucitanji toera muperekeke kuna Yahova, pontho thangwi yanji ceneci ndi cisankhulo cakufunika kakamwe?

²⁰ Mukupita kwa ndzidzi, ufuni wanu kuna Yahova unakukulumizani toera kucita phembero yakuperekeka kuna iye. Kumbukani kuti mungaperekeka kuna Yahova, imwe munakhala na cidikhiro cakukhala ntumiki wace kwenda na kwenda. Imwe mungaperekeka kuna Yahova, musapikira kuti munantumikira ndzidzi onsene ngakhale m’midzidzi yakunentsa. Imwe nee munafunika kuperekeka pontho kuna Yahova pakumala kucita phembero ineyi yakuperekeka. Mwandimomwene, mu umaso wanu munacita pisankhulo pizinji pyadidi, mbwenye cisankhulo cakuperekeka kuna Yahova ndi cadidi kakamwe kupiringana pisankhulo pyenepi. (Mas. 50:14) Sathani anayesera kukucitisani kusiya kufuna Babanu wakudzulu toera musiye kukhala wakukhulupirika kuna Yahova. Lekani tawirisa kuti Sathani acite pyenepi kuna imwe. (Yobe 27:5) Ufuni wanu kuna Yahova unakuphedzani toera kupitiriza kuntumikira mbamukhala na uxamwali wakuwanga kakamwe na Babanu wakudzulu.

21. Thangwi yanji tinakwanisa kulonga kuti ubatizo ndi kutoma kwa umaso wathu toera kutumikira Yahova?

²¹ Mungamala kuperekeka kuna Yahova, dziwisani akulu a mpingo wanu kuti musafuna kubatizwa. Mbwenye kumbukani kuti ubatizo ndi kutoma kwa umaso wanu toera kutumikira Yahova kwenda na kwenda. Natenepa wangisani ufuni wanu kuna Yahova cincino. Pontho khazikisani pifuno pyakuti pinakuphedzani toera kuwangisa ufuni unoyu ntsiku zonsene. Kucita pyenepi kunakukulumizani toera mubatizwe. Ntsiku inafuna kubatizwa imwe inadzakhala yakutsandzayisa kakamwe. Mbwenye kutsandzaya kweneku kunapitiriza kwenda na kwenda. Natenepa pitirizani kufuna Yahova pabodzi na Mwanace.