1. Ndi pinthu pipi pyakuti anyakubala asapifuna kuna anawo?

 ANYAKUBALA, ife tisadziwa kuti musafuna kuphedza ananu toera adziwe Yahova na kunfuna. Mbwenye Mulungu nee asaoneka. Mphapo munaphedza tani ananu toera amuone ninga Munthu wandimomwene mbakhala na uxamwali wakuwanga na iye?—Tiya. 4:8.

2. Anyakubala anakwanisa tani kupfundzisa anawo thangwi ya makhaliro a Yahova?

² Njira yakufunika kakamwe toera kuphedza ana kuti akhale na uxamwali wakuwanga na Yahova ndi kuapfundzisa Bhibhlya. (2 Tim. 3:14-17) Mbwenye Bhibhlya isalonga njira inango yakupfundzisa ana thangwi ya Yahova. M’bukhu ya Misangani, baba asapanga mwana toera akhonde kuduwala makhaliro a Yahova anaoneka kubulukira mu pinthu pidacita iye. (Mis. 3:19-21) Mu nsolo uno tinaona njira zingasi zakuti anyakubala anakwanisa kuphatisira pinthu pidacita Yahova toera kupfundzisa anawo thangwi ya iye.

3. Anyakubala anaphedza tani anawo?

³ Bhibhlya isalonga kuti ‘makhaliro akukhonda kuoneka a Mulungu asaoneka pakweca kubulukira pa ndzidzi udacitwa dziko, thangwi asapangizika kubulukira mu pinthu pidacita iye.’ (Aroma 1:20) Anyakubala, panango imwe musakomerwa kucedza na ananu. Natenepa phatisirani ndzidzi unoyu toera kuphedza ananu kuona kuti ‘pinthu pidacita Yahova’ pisabverana tani na makhaliro ace. Tendeni tione kuti anyakubala anapfundzanji na citsandzo ca Yezu.

4. Yezu aphatisira tani pinthu pidacita Yahova toera kupfundzisa? (Luka 12:24, 27-30)

 ⁴ Onani kuti Yezu aphatisira tani pinthu pidacita Yahova toera kupfundzisa. Pa ndzidzi unango, iye apanga anyakupfundzace toera ayang’ane makhungubwe na maluwa. (Lerini Luka 12:24, 27-30.) Yezu mbadakwanisa kulonga cinyama cinango peno muti unango, mbwenye iye asankhula mbalame na maluwa akuti anyakupfundzace akhaadziwa mwadidi. Panango anyakupfundzace akhaona makhungubwe mbakamburuka na maluwa mbakabuluka ntsanga. Nyerezerani kuti Yezu ali kuthonya pinthu pyenepi mu ndzidzi unalonga iye na anyakupfundzace. Kodi iye acitanji pakumala kulonga citsandzo ceneci? Iye apfundzisa anyakupfundzace kuti Babawo wakudzulu asapasa mwakudzala manja, pontho ndi wakukoma ntima. Yahova anapasa atumiki ace akukhulupirika cakudya na pyakubvala, ninga pinacita iye kuna makhungubwe na maluwa.

5. Ndi pinthu pipi pidacita Yahova pyakuti anyakubala anakwanisa kupiphatisira toera kupfundzisa anawo thangwi ya Yahova?

⁵ Anyakubala, munatowezera tani citsandzo ca Yezu mu ndzidzi unapfundzisa imwe ananu? Imwe munakwanisa kupanga mwananu thangwi ya cinthu cidacita Yahova cakuti musadzumatirwa naco kakamwe, ninga cinyama peno muti. Mu ndzidzi unacita imwe pyenepi, apangeni kuti cinthu ceneci cisatipfundzisanji thangwi ya Yahova. Kusiyapo pyenepi, imwe munakwanisambo kubvundza mwananu thangwi ya cinyama cinakomerwa na iye peno muti. Mungaphatisira pinthu pidacita Yahova pinakomerwa na mwananu, pinam’phedza toera abvesere mwadidi mu ndzidzi unalonga imwe thangwi ya makhaliro a Yahova.

6. Tisapfundzanji na citsandzo ca mai wace Christopher?

⁶ Kodi anyakubala asafunika kubvunga ndzidzi uzinji kakamwe toera kufufudza thangwi ya cinyama peno muti mbadzati kuciphatisira toera kupfundzisa anawo thangwi ya Yahova? Nkhabe. Yezu nee afokotoza kuti makhungubwe asadya tani, pontho kuti maluwa asakula tani. Maseze mwananu akomerwe na kupfundza pizinji thangwi ya pidacita Yahova, midzidzi inango mafala akucepa peno mbvundzo pinakwanisa kumphedza toera kubvesesa pinampfundzisa imwe. M’bale unango anacemerwa Christopher asakumbuka pinthu pidancitikira mu ndzidzi ukhali iye mwana. Iye alonga: “Mai wanga akhalonga mafala akucepa toera kutiphedza kuona kuti pinthu pidacita Yahova ndi pyakufunika kakamwe. Mwacitsandzo, tingakhala dhuzi na mapiri iye akhalonga: ‘Onani mapiri makulu na akubalika kakamwe! Yahova nee ndi wakudzumatirisa?’ Pontho mu ndzidzi ukhafamba ife dhuzi na bara, iye akhalonga: ‘Onani mabimbi amphambvu kakamwe! Mulungu nee ndi wamphambvu kakamwe?’” Christopher alonga: “Mafala anewa akucepa na akufunika akhatikhuya kakamwe.”

7. Munapfundzisa tani ananu toera anyerezere pinthu pidacita Yahova?

⁷ Mu ndzidzi unakula ananu, imwe munakwanisa kuapfundzisa toera anyerezere pinthu pidacita Yahova na kupfundza thangwi ya iye kubulukira mu pinthu pyenepi. Imwe munakwanisa kulonga cinthu cibodzi cidacita Yahova mbamubvundza ananu: “Cinthu ceneci cisakupfundzisanji thangwi ya Yahova?” Imwe munadzumatirwa, pontho munatsandzaya mungabva ntawiro wa ananu.—Mat. 21:16.

8. Ndi mwai upi ukhali na anyakubala a mu Izraeli mu ndzidzi ukhafamba iwo mu nseu?

⁸ Mu Izraeli, anyakubala akhakulumizwa toera kupfundzisa anawo matongero a Yahova mu ndzidzi ukhafamba iwo “mu nseu.” (Dheu. 11:19) Miseu ya mu Izraeli ikhali kunja kwa nzinda. Natenepa iwo akhakwanisa kuona pinyama pyakusiyana-siyana, mbalame na maluwa. Mu  ndzidzi ukhafamba anyakubala anewa mu nseu, iwo akhali na mwai wakucedza na anawo thangwi ya pinthu pidacita Yahova. Anyakubala, imwe munakwanisambo kukhala na miyai ineyi yakuphatisira pinthu pidacita Yahova toera kupfundzisa ananu. Onani kuti anyakubala anango acita tani pyenepi.

9. Mwapfundzanji na citsandzo ca Punitha na Katya?

⁹ Nyakubala unango anacemerwa Punitha, anakhala mu nzinda ukulu ku Indiya alonga: “Tingaenda kaona acibale athu kunja kwa nzinda, ife tikhaona pyenepi ninga mwai toera kuphedza anathu kuti apfundze pinthu pyakudzumatirisa pidacita Yahova. Ine ndaona kuti ananga asabvesesa mwadidi pinthu pidacita Yahova angakhala kutali na miseu yakuti iri na anthu azinji, pontho angakhala kutali na nzinda ukulu kakamwe.” Anyakubala, ananu cipo anaduwala ndzidzi unakhala imwe pabodzi na iwo pa mbuto yakubalika kakamwe. Katya, mulongo unango wa ku Moldávia alonga: “Cinthu cinakumbuka ine kakamwe ndi ndzidzi ukakhala ine pabodzi na anyakubalanga kunja kwa nzinda. Ine ndisapereka takhuta kakamwe kuna iwo thangwi yakundipfundzisa kutomera uwana wanga toera kukhala na ndzidzi wakuyang’ana pinthu pidacita Yahova na kuona makhaliro ace kubulukira mu pinthu pyenepi.”

10. Anyakubala anacitanji khala ndi pyakunentsa kuna iwo kuenda kunja kwa nzinda? (Onani bokosi yakuti “ Ciphedzo Kuna Anyakubala.”)

¹⁰ Mphapo ndiye tani khala nee ndi pyakukwanisika kuna imwe kuenda kunja kwa nzinda? Amol, wakuti asakhalambo ku Indiya alonga: “Kunakhala ine anyakubala asaphata basa maora mazinji, pontho kucita ulendo toera kuenda kunja kwa nzinda kusaphemba kobiri izinji kakamwe. Mbwenye anyakubala anakwanisa kuona pinthu pidacita Yahova na kucedza thangwi ya makhaliro ace mu ndzidzi unaenda iwo ku parki ing’ono.” Mungayang’ana mwadidi imwe munakwanisa kuona dhuzi na panyumba panu pinthu pizinji pidacita Yahova toera kupangiza ananu. (Mas. 104:24)  Imwe munakwanisa kuona mbalame, pinyama ping’ono-ping’ono, miti na pinthu pinango. Karina wa ku Alemanya alonga: “Mai wanga asakomerwa kakamwe na maluwa. Natenepa pikhali ine mwana, iye akhandipangiza maluwa akubalika kakamwe ndzidzi onsene ukhafamba ife pabodzi.” Anyakubala, imwe munakwanisambo kuphatisira mavidhyu mazinji na mabukhu analonga pinthu pidacita Mulungu anabuluswa na gulu yathu toera kupfundzisa ananu. Mwakukhonda tsalakana kunakhala imwe, munakwanisa kuphedza ananu toera ayang’ane pinthu pidacita Mulungu. Cincino tendeni tione makhaliro mangasi a Yahova akuti imwe munakwanisa kupfundzisa ananu.

11. Anyakubala anakwanisa tani kuphedza anawo toera aone ufuni wa Yahova?

¹¹ Toera kuphedza ananu kuti aone ufuni wa Yahova, imwe munakwanisa kuphatisira njira inatsalakana pinyama pizinji anapiana awo. (Mat. 23:37) Imwe munakwanisambo kulonga pinthu pyadidi pyakusiyana-siyana pinakomerwa na ife kakamwe. Karina adalongwa mu ndima idamala alonga: “Mu ndzidzi ukhafamba ife, mai wanga akhatipanga toera tilimire mbatiyang’ana maluwa akusiya-siyana, pontho akhatipanga kuti maluwa anewa asapangiza ufuni wa Yahova. Mukupita kwa pyaka, ine ndapitiriza kuyang’ana maluwa akusiyana-siyana, pontho iwo asandikumbusa kuti Yahova asatifuna kakamwe.”

12. Anyakubala anaphedza tani anawo toera aone udziwisi wa Mulungu? (Masalmo 139:14) (Onanimbo foto.)

¹² Phedzani ananu toera aone udziwisi wa Mulungu. Yahova ndi waudziwisi kakamwe kupiringana ife. (Aroma 11:33) Mwacitsandzo, imwe munakwanisa kupanga mwananu kuti madzi asacinjika tani mbakhala mitambo, pontho mitambo ineyi isacinjika tani mbikhala madzi. (Yobe 38:36, 37) Imwe munakwanisambo kupanga mwananu njira yakudzumatirisa idacitwa manungo a munthu. (Lerini Masalmo 139:14.) Onani kuti nyakubala anacemerwa Vladimir acita tani pyenepi. Iye alonga: “Ntsiku inango, mwanathu agwa na njinga mbaphekeka. Mbwenye pidapita ntsiku zingasi cironda cace cawanga. Natenepa, ine na nkazanga tampanga kuti Yahova acita manungo athu munjira yakuti anakwanisa kukondzeka okhene. Pontho tampanga kuti cipo taona cinthu cidacitwa na munthu cinakwanisa kucita pyenepi. Mwacitsandzo, karu ingacita cidengwa nkhabe kusasanyika yokhene. Citsandzo ceneci caphedza mwanathu toera kubvesesa udziwisi wa Yahova.”

13. Anyakubala anakwanisa tani kuphedza anawo toera aone mphambvu za Mulungu? (Izaiya 40:26)

 ¹³ Yahova asatipanga toera tiyang’ane kudzulu kuti tione mphambvu zace zakudzumatirisa. (Lerini Izaiya 40:26.) Imwe munakwanisambo kupanga ananu toera ayang’ane kudzulu mbanyerezera pinthu pinaona iwo. Mulongo anacemerwa Tingting wa ku Taiwan asakumbuka pinthu pidancitikira mu ndzidzi ukhali iye mwana. Iye alonga: “Ulendo unango, mai wanga andikwata mbatienda kunja kwa nzinda, pontho kweneko ife takwanisa kuona mwadidi kudzulu namasiku thangwi nee kukhali na magetsi. Pa ndzidzi unoyu ine ndikhadzudzumika khala mbidakwanisa kukhala wakukhulupirika kuna Yahova, thangwi axamwali anga akuxikola akhandiyesera toera ndikhonde kubvera Yahova. Mbwenye mama andiphedza toera ndinyerezere mphambvu zidaphatisira Yahova toera kucita nyenyezi zenezi zonsene, pontho andikumbusa kuti iye anakwanisa kuphatisira mphambvu zenezi toera kundiphedza ndingathimbana na mayesero. Kuona pinthu pyenepi kwandiphedza toera kudziwa mwadidi Yahova, pontho kwawangisa cifuno canga cakuntumikira.”

14. Anyakubala anaphatisira tani pinthu pidacita Yahova toera kuphedza anawo toera aone kuti Yahova ndi Mulungu wakutsandzaya?

¹⁴ Pinthu pidacita Yahova pisapangiza kuti iye ndi wakutsandzaya, pontho asafuna kuti ife tikhalembo akutsandzaya. Asiyentista adzindikira kuti pinyama pizinji pisasendzeka, kuphatanizambo mbalame na nyama za m’madzi. (Yobe 40:20) Mwaona kale mwananu mbaseka angaona cinyama cikusendzeka? Panango iwo anaona anapaka mbasendzeka na bhola peno anambwa ang’ono mbasendzeka pabodzi. Ulendo unango unaona imwe ananu mbaseka mu ndzidzi unaona iwo cinyama ciri kusendzeka, imwe munakwanisa kuakumbusa kuti ife tisatumikira Mulungu wakutsandzaya.—1 Tim. 1:11.

15. Ninji pinafuna kuphedza anyakubala toera kudziwa mwadidi pinanyerezera anawo? (Misangani 20:5) (Onanimbo foto.)

¹⁵ Midzidzi inango, panango pinakhala pyakunentsa kuna anyakubala toera kucedza na anawo thangwi ya nyatwa zinathimbana na iwo. Khala pyenepi pisacitika kuna imwe, panango  musafunika kudziwa mwadidi pinanyerezera ananu. (Lerini Misangani 20:5.) Anyakubala anango aona kuti pisakhala pyakukhonda nentsa kucita pyenepi angacedza na anawo mukuphatisira pinthu pidacita Yahova. Thangwi yanji? Thangwi ibodzi ndi yakuti anyakubala na anapiana nee asadzudzumika na pinthu pinango. Nyakubala m’bodzi wa ku Taiwan anacemerwa Masahiko alonga thangwi inango: “Ine na nkazanga pabodzi na anathu tingafamba m’mapiri peno n’khundu mwa bara pyenepi pisatsandzayisa kakamwe anathu. Natenepa pisakhala pyakukhonda nentsa kuna ife toera kuadziwa mwadidi na kudziwa pinanyerezera iwo.” Katya, adalongwa mu ndima zakutoma alonga: “Mu ndzidzi wa ferya kuxikola, kazinji kene mai wanga akhandikwata mbatienda kaona parki yakubalika kakamwe. Ku mbuto ineyi, pikhali pyakukhonda nentsa kuna ine kumpanga pinthu pikhandicitikira kuxikola peno pinthu pikhadzudzumika na ine.”

16. Mabanja anakwanisa tani kutsandzaya na pinthu pidacita Yahova?

¹⁶ Banja ingacedza pabodzi mukuphatisira pinthu pidacita Yahova isakhala yakusudzuka na yakutsandzaya, pontho pyenepi pisaaphedza toera kufunana kakamwe unango na ndzace. Bhibhlya isalonga kuti ‘pana ndzidzi wakuseka na ndzidzi wakubvina.’ (Ekle. 3:1, 4) Yahova acita mbuto zakubalika kakamwe pa dziko yapantsi zakuti ife tinakwanisa kucita pinthu pinakomerwa na ife. Mabanja mazinji a mu nzinda asakomerwa kuenda kunja kwa nzinda, ku mapiri peno ku praya. Anapiana anango asakomerwa na kuthamanga, kusendzeka mparki, kuona pinyama, kusambirira n’nyandza, nthawala peno m’bara. Pana njira zizinji zakuti tinakwanisa kuphatisira pinthu pidacita Yahova toera kuticitisa kukhala akutsandzaya.

17. Thangwi yanji anyakubala asafunika kuphedza anawo toera akomerwe na pinthu pidacita Yahova?

¹⁷ Mu dziko ipswa, anyakubala pabodzi na anawo anadzatsandzaya kakamwe na pinthu pidacita Yahova. Mu ndzidzi unoyu, ife nee tinadzafunikabve kugopa pinyama, pontho ipyo nee pinadzatigopambo. (Iza. 11:6-9) Ife tinadzatsandzaya na pinthu pidacita Yahova kwenda na kwenda. (Mas. 22:26) Mbwenye anyakubala, lekani kudikhira ndzidzi unoyu toera kuphedza ananu kuti akomerwe na pinthu pidacita Yahova. Mungaphatisira pinthu pidacita Yahova toera kupfundzisa ananu thangwi ya iye, iwo anakhala na mabvero mabodzi ene ninga a Mambo Dhavidhi adalonga kuti: “Imwe Yahova, nkhabepo unango adacita pinthu ninga pidacita imwe.”—Mas. 86:8.