1-2. Ninji pinacitika kazinji kene anthu angabatizwa, pontho tinapfundzanji mu nsolo uno?

 KODI imwe mwatoma kale kuona nsoka wa anthu anafuna kubatizwa? Panango mwaabva mbatawira mibvundzo miwiri inacitwa iwo mbadzati kubatizwa. Pontho mwaona axamwali awo na acibale awo mbatsandzaya kakamwe thangwi ya iwo. Pidabuluka iwo m’madzi, iwo akhali akutsandzaya kakamwe, pontho anthu akhamenya manja. Masumana onsene, anthu azinji asaperekeka kuna Yahova mbabatizwa ninga Mboni za Yahova.

² Ndiye tanimbo imwe? Khala imwe mukunyerezera kubatizwa, ndimwe munthu wakupambulika kakamwe mu dziko ino yakuipa, thangwi ‘mukusaka Yahova.’ (Mas. 14:1, 2) Nsolo uno wakhunganywa toera kukuphedzani, mwakukhonda tsalakana khala ndimwe mwana peno nkulu. Kuna ife akuti tamala kale kubatizwa, tisafunikambo kuwangisa cifuno cathu cakutumikira Yahova kwenda na kwenda. Natenepa tendeni tione mathangwi matatu mwa mathangwi mazinji anaticitisa kutumikira Yahova.

3. Thangwi yanji atumiki a Yahova asafuna undimomwene na ulungami? (Masalmo 119:128, 163)

³ Yahova apanga atumiki ace toera ‘afune undimomwene.’ (Zak. 8:19) Yezu apangambo atowereri ace toera akhale aulungami. (Mat. 5:6) Pyenepi pisapangiza kuti ife tisafunika kukhala na cifuno cakucita pinthu pyadidi pamaso pa Mulungu. Kodi imwe musafuna undimomwene na ulungami? Ife tiri na cinyindiro cakuti musafuna. Imwe musaida uthambi na pinthu pyonsene pyakuipa. (Lerini Masalmo 119:128, 163.) Munthu analonga uthambi asatowezera Sathani, ntongi wa dziko ino. (Juwau 8:44; 12:31) Cibodzi mwa pifuno pya Sathani ndi kupswipisa dzina ya Yahova Mulungu. Sathani asalonga uthambi thangwi ya Mulungu kutomera mu ndzidzi udacita iye pyenepi m’munda wa Edheni. Iye ayesera kucitisa anthu kunyerezera  kuti Yahova nee asaatsalakana, pontho ndi ntongi wakuipa ntima wakuti asabisira anthu pinthu pyadidi. (Gen. 3:1, 4, 5) Uthambi unoyu wa Sathani usacitisa anthu kukhala na maonero akuipa thangwi ya Yahova. Anthu angasankhula kukhonda ‘kufuna undimomwene,’ Sathani asaatsogolera toera acite ntundu onsene wa pinthu pyakuipa.—Aroma 1:25-31.

4. Yahova asapangiza tani kuti ndi “Mulungu analonga undimomwene”? (Onanimbo foto.)

⁴ Yahova ndi “Mulungu analonga undimomwene,” pontho iye asapfundzisa undimomwene anthu onsene ananfuna. (Mas. 31:5) Mukucita pyenepi, Yahova asaphedza anthu toera akhonde kunyengezwa na Sathani. Yahova asapfundzisambo atumiki ace toera akhale akukhulupirika na akulungama. Pyenepi pisaaphedza toera akhale akulemedzeka na ntendere wa m’manyerezero. (Mis. 13:5, 6) Iye akucitiranimbo pyenepi mu ndzidzi udatoma imwe kupfundza Bhibhlya. Imwe mwapfundza kuti pinalonga Yahova ndzidzi onsene ndi pyadidi kuna anthu, pontho pisakuphedzani. (Mas. 77:13) Natenepa imwe musafuna kucita pinthu pinakomeresa Mulungu. (Mat. 6:33) Kusiyapo pyenepi, imwe musafuna kutsidzikiza undimomwene na kupangiza kuti pinalonga Sathani thangwi ya Yahova Mulungu wathu ndi pyauthambi. Mphapo munacita tani pyenepi?

5. Munapangiza tani kuti musaphedzera undimomwene na ulungami?

⁵ Njira inacita imwe pinthu inakwanisa kupangiza kuti musaida uthambi wa Sathani, pontho musaphedzera undimomwene. Kusiyapo pyenepi, imwe munakwanisa kupangiza kuti musafuna kuti Yahova akhale ntongi wanu, pontho musafuna kucita pinthu pinankomeresa. Mphapo munacita tani pyenepi? Pangani Yahova m’phembero kuti musafuna kuntumikira kwenda na kwenda, buluka penepo mbamubatizwa. Kufuna undimomwene na ulungami kunakuphedzani toera kubatizwa.

6. Mwakubverana na Masalmo 45:4, ndi mathangwi api anakucitisani kufuna Yezu Kristu?

⁶ Thangwi yanji musafuna Yezu Kristu? Mathangwi mangasi asagumanika pa Masalmo 45:4. (Lerini.) Yezu asafuna undimomwene, kucepeseka na ulungami. Imwe mungafuna undimomwene na ulungami, pyenepi pinapangiza kuti musafunambo Yezu Kristu. Mwacipapo, Yezu atsidzikiza undimomwene na ulungami. (Juwau 18:37) Mphapo Yezu apangiza tani kuti akhali wakucepeseka?

7. Ninji pinapangiza kuti Yezu ndi wakucepeseka?

⁷ Yezu apangiza kuti ndi wakucepeseka  kubulukira mu pinthu pidacita iye. Mwacitsandzo, iye nee akhapasika mbiri thangwi ya pinthu pikhacita iye, mbwenye akhapasa mbiri Babace. (Marko 10:17, 18; Juwau 5:19) Kodi kucepeseka kwa Yezu kusakukulumizani toera kucitanji? Mwakukhonda penula kusakukulumizani toera kunfuna na kuntowezera. Mphapo thangwi yanji Yezu ndi wakucepeseka? Thangwi iye asafuna Babace, pontho asatowezera kucepeseka kwace. (Mas. 18:35; Aheb. 1:3) Kodi imwe nee musafuna kukhala xamwali wa Yezu, wakuti asatowezera mwadidi makhaliro a Yahova?

8. Thangwi yanji tisafuna Yezu ninga Mambo wathu?

⁸ Ife tisafuna Yezu ninga Mambo wathu thangwi iye ndi Ntongi wadidi kakamwe. Kusiyapo pyenepi, ndi Yahova adapfundzisa Mwanace mban’khazikisa ninga mambo. (Iza. 50:4, 5) Pontho nyerezerani pinthu pidacita Yezu toera kupangiza ufuni. (Juwau 13:1) Nakuti Yezu ndi Mambo wanu, iye athema kufuniwa na imwe. Iye alonga kuti ale ananfuna mwandimomwene asaacemera axamwali ace thangwi iwo asapangiza kuti asanfuna mukubvera matongero ace. (Juwau 14:15; 15:14, 15) Ndi mwai ukulu kakamwe kukhala xamwali wa Mwana wa Yahova!

9. Ubatizo wa Akristu walandana tani na wa Yezu Kristu?

⁹ Ubodzi mwa mitemo idapereka Yezu ndi wakuti atowereri ace asafunika kubatizwa. (Mat. 28:19, 20) Iye abatizwambo toera kupangiza citsandzo. Mbwenye ubatizo wace wasiyana pang’ono na ubatizo wa atowereri ace. (Onani bokosi ya nsolo wakuti “ Ubatizo wa Yezu Wasiyana Tani na Ubatizo wa Atowereri Ace?”) Ngakhale tenepo, iwo ndi wakulandana pang’ono na ubatizo wa atowereri ace. Mu ndzidzi udabatizwa iye, Yezu aperekeka toera kucita cifuno ca Babace. (Aheb. 10:7) Munjira ibodzi ene, atowereri a Kristu angabatizwa asapangiza pakweca kuti iwo aperekeka kuna Yahova Mulungu. Pakumala kubatizwa, cinthu cakufunika kakamwe kuna iwo ndi kucita cifuno ca Mulungu, tayu cifuno cawo. Natenepa iwo asatowezera citsandzo ca Mbuya wawo.

10. Thangwi yanji kufuna Yezu kunakukulumizani toera kubatizwa?

¹⁰ Imwe mwatawira kuti Yezu ndi Mwana m’bodzi ekha wa Yahova, pontho ndi Yahova adan’khazikisa toera kutitonga. Imwe musadziwa kuti Yezu ndi wakucepeseka, pontho asatowezera mwadidi citsandzo ca Babace. Imwe mwapfundza kuti Yezu apasa cakudya anthu akhabva njala, abalangaza anthu akutsukwala, pontho awangisa atenda. (Mat. 14:14-21) Imwe musaona njira inatsogolera iye mpingo wace lero. (Mat. 23:10) Kusiyapo pyenepi, imwe musadziwa kuti ninga Mambo wa Umambo wa Mulungu, iye anadzacita pinthu pizinji pyadidi ntsogolo. Mphapo munapangiza tani kuti musafuna Yezu? Imwe munakwanisa kucita pyenepi mungatowezera citsandzo cace. (Juwau 14:21) Cibodzi mwa pinthu pyakutoma pyakuti munakwanisa kupicita toera kutowezera citsandzo cace ndi kuperekeka kuna Yahova mbamubatizwa.

11. Ndi cinthu cipi cakufunika kakamwe cinafuna kukukulumizani toera kubatizwa, pontho thangwi yanji?

¹¹ Ndi cinthu cipi cakufunika kakamwe cinafuna kukukulumizani toera kubatizwa? Yezu apangiza cinthu ceneci mu ndzidzi udalonga iye thangwi ya matongero akufunika kakamwe. Iye alonga: “Funa Yahova Mulungu wako na ntima wako onsene, na umaso wako onsene, na ndzeru zako zonsene na mphambvu zako zonsene.” (Marko 12:30) Kodi imwe musafuna Mulungu munjira ineyi?

12. Thangwi yanji musafuna Yahova? (Onanimbo foto.)

¹² Pana mathangwi mazinji anaticitisa kufuna Yahova. Mwacitsandzo, imwe musadziwa kuti Yahova ‘ndiye anapasa umaso,’ pontho  ndi Mpasi wa “muoni onsene wadidi na wakulungama.” (Mas. 36:9; Tiya. 1:17) Natenepa, pinthu pyonsene pyadidi pinakomerwa na imwe pisabulukira kuna Mulungu wathu waufuni anapasa mwakudzala manja.

13. Thangwi yanji ciomboli ndi muoni wadidi kakamwe?

¹³ Ciomboli ndi muoni wadidi kakamwe udatipasa Yahova. Thangwi yanji? Nyerezerani uxamwali wakuwanga ukhali na Yahova na Mwanace. Yezu alonga: “Baba asandifuna” pontho “ine ndisafuna Baba.” (Juwau 10:17; 14:31) Uxamwali unoyu wakhala wakuwanga kakamwe mu ndzidzi udakhala iwo pabodzi mu pyaka pizinji kakamwe. (Mis. 8:22, 23, 30) Natenepa nyerezerani kutsukwala kudakhala na Yahova pidatawirisa iye kuti Mwanace athabuswe mbaphiwa. Yahova asafuna kakamwe anthu kuphatanizambo imwe. Na thangwi ineyi, iye apereka Mwanace ninga ntsembe toera imwe na anango mukwanise kukhala na umaso wa kwenda na kwenda. (Juwau 3:16; Agal. 2:20) Ineyi ndi thangwi ikulu kakamwe inaticitisa kufuna Mulungu.

14. Ndi cipi cisankhulo cadidi kakamwe cakuti munakwanisa kucicita mu umaso wanu?

¹⁴ Ufuni wanu kuna Yahova wathimizirika thangwi imwe mwapfundza pinthu pizinji thangwi ya iye. Mwakukhonda penula, imwe musafuna kakamwe kukhala na uxamwali wakuwanga na Yahova cincino na kwenda na kwenda. Pyenepi mphyakukwanisika. Mwaufuni,  iye asakukulumizani toera mutsandzayise ntima wace. (Mis. 23:15, 16) Imwe munakwanisa kucita pyenepi kubulukira mu pinthu pinalonga imwe na pinacita imwe. Njira inacita imwe pinthu mu umaso wanu inapangiza kuti mwandimomwene musafuna Yahova. (1 Juwau 5:3) Ceneci ndi cisankhulo cadidi kakamwe cakuti imwe munakwanisa kucicita mu umaso wanu.

15. Munapangiza tani kuti musafuna Yahova?

¹⁵ Munapangiza tani kuti musafuna Yahova? Pakutoma, imwe musafunika kucita phembero yakupambulika toera kuperekeka kuna Mulungu wandimomwene. (Mas. 40:8) Buluka penepo, musafunika kupangiza pakweca kuperekeka kweneku mu kubatizwa. Ninga pidapfundza ife mu ndima zakutoma, ubatizo wanu ndi cinthu cakutsandzayisa na cakufunika kakamwe mu umaso wanu. Thangwi imwe munatoma umaso upswa mbamucita pinthu pinakomeresa Yahova, tayu pinakomerwa na imwe. (Aroma 14:8; 1 Ped. 4:1, 2) Ceneci ndi cisankhulo cikulu kakamwe, mbwenye cisankhulo ceneci cinakuphedzani toera mukhale na umaso wadidi kakamwe. Munjira ipi?

16. Mwakubverana na Masalmo 41:12, Yahova anapasa tani nkhombo ale anaperekeka toera kuntumikira?

¹⁶ Yahova asapasa mwakudzala manja kupiringana anthu onsene. Mwakukhonda tsalakana pinthu pinampasa imwe, iye anapitiriza kukupasani pizinji kupiringana pyenepi. (Marko 10:29, 30) Iye anakupasani nkhombo zizinji na umaso wadidi kakamwe ngakhale mu dziko ino yakuipa. Mbwenye nee ndi pyenepi basi pinakupasani Yahova. Pakumala kubatizwa, imwe munakwanisa kupitiriza kucita pinthu pizinji. Imwe munakwanisa kupitiriza kutumikira Babanu waufuni kwenda na kwenda. Pontho ufuni wanu kuna Yahova na ufuni wace kuna imwe unapitiriza kuthimizirika. Kusiyapo pyenepi, imwe munadzakhala kwenda na kwenda ninga Yahova.—Lerini Masalmo 41:12.

17. Ndi cinthu cipi cakuti Yahova nee ali naco, pontho imwe munakwanisa kumpasa?

¹⁷ Mungaperekeka kuna Mulungu mbamubatizwa, imwe musakhala na mwai wakumpasa cinthu cakufunika kakamwe. Ndiye anakupasani pinthu pyonsene pyadidi, pontho asakuphedzani toera kukhala na umaso wakutsandzaya.  Natenepa, imwe munakwanisambo kupasa Mwanaciro wa kudzulu na pantsi cinthu cakuti iye adzati kukhala naco. Cinthu ceneci ndi cifuno canu cakuntumikira mwakukhulupirika. (Yobe 1:8; 41:11; Mis. 27:11) Ineyi ndi njira yadidi kakamwe yakuphatisira umaso wanu. Mwakukhonda penula, ufuni wanu kuna Yahova ndi cinthu cakufunika kakamwe cinakukulumizani toera kubatizwa.

18. Ndi mibvundzo ipi inafunika ife kucitika?

¹⁸ Kodi imwe munabatizwa? Ntawiro wa mbvundzo unoyu usanyindira imwe. Mbwenye panango ndi pyakufunika kubvundzika: ‘Thangwi yanji ndidzati kubatizwa?’ (Mabasa 8:36) Kumbukani mathangwi matatu adapfundza ife mu nsolo uno anatikulumiza toera kubatizwa. Yakutoma, imwe musafuna undimomwene na ulungami. Natenepa bvundzikani: ‘Kodi ine ndisafuna kuona anthu onsene mbalonga undimomwene na kucita pinthu pyadidi? Yaciwiri, imwe musafuna Yezu Kristu. Natenepa bvundzikani: ‘Ndisafuna kuti Mwana wa Mulungu akhale Mambo wanga, pontho ndisafuna kutowezera citsandzo cace?’ Thangwi yacitatu na yakufunika kakamwe, imwe musafuna Yahova. Natenepa bvundzikani: ‘Ndisafuna kutsandzayisa ntima wa Yahova mu kuntumikira?’ Khala imwe mwatawira mibvundzo ineyi kuti inde, mphapo thangwi yanji nee mwabatizwa?—Mabasa 16:33.

19. Thangwi yanji nee musafunika kunyinyirika toera kubatizwa? Perekani citsandzo. (Juwau 4:34)

¹⁹ Khala imwe musanyinyirika toera kubatizwa, onani citsandzo cidaphatisira Yezu. (Lerini Juwau 4:34.) Yezu alandanisa kucita cifuno ca Pai wace na cakudya. Thangwi yanji? Thangwi cakudya ndi cadidi kuna ife. Yezu akhadziwa kuti pinthu pyonsene pinatiphemba Yahova toera kucita ndi pyadidi kuna ife. Yahova nee asafuna kuti ticite pinthu pinatiphekesa. Mphapo Yahova asafuna kuti imwe mubatizwe? Inde. (Mabasa 2:38) Natenepa, imwe munakwanisa kukhala na cinyindiro cakuti kubvera ntemo unoyu kunakuphedzani. Khala imwe nee musanyinyirika toera kudya cakudya cadidi kakamwe, thangwi yanji musanyinyirika toera kubatizwa?

20. Tinapfundzanji mu nsolo unatowera?

²⁰ Thangwi yanji anango asanyinyirika toera kubatizwa? Azinji panango anatawira kuti: “Ndidzati khunganyika.” Cisankhulo cakuperekeka kuna Yahova na kubatizwa ndi cisankhulo cadidi kakamwe cakuti munakwanisa kucicita mu umaso wanu. Natenepa musafunika kukhala na ndzidzi toera kunyerezera mwadidi thangwi ya cisankhulo ceneci, pontho pyenepi pisaphemba kuwangisira toera mukhale wakuthema kubatizwa. Mphapo khala imwe musafuna na ntima onsene kubatizwa, musafunika kucitanji toera mukhale wakuthema? Ife tinatawira mbvundzo unoyu mu nsolo unatowera.