1. Ninji pidacitisa Kaini kucita cisankhulo cakuipa, pontho cambwereseranji?

KAINI akhafunika kucita cisankhulo cakufunika kakamwe. Iye mbadakwanisa kutonga mabvero ace akuipa toera kucita pisankhulo pyadidi. Peno kutawirisa kutsogolerwa na mabvero ace, pyakuti mbapidambweresera nyatwa. Bhibhlya isatipanga kuti Kaini acita cisankhulo cakuipa. Cisankhulo cace cancitisa kupha m’bale wace Abheli, mbaluza uxamwali wace na Yahova.—Genesi 4:3-16.

2. Thangwi yanji ndi pyakufunika kucita pisankhulo pyadidi?

² Munjira ibodzi ene, tonsene tisacita pisankhulo mu umaso. Pisankhulo pinango mphyakufunika kakamwe, mbwenye pinango nkhabe. Ngakhale tenepo, pizinji mwa pisankhulo pyathu pinakwanisa kukhuya kakamwe umaso wathu. Tingacita pisankhulo pyadidi, tisakhala na nyatwa zakucepa mbitikhala akutsandzaya kakamwe. Mbwenye tingacita pisankhulo pyakuipa, tisathimbana na nyatwa na kutsukwala.—Misangani 14:8.

3. (a) Ninji pinafuna kutiphedza toera kucita pisankhulo mwandzeru? (b) Ndi mibvundzo ipi inafuna kudinga ife?

 ³ Ninji pinafuna kutiphedza toera kucita pisankhulo mwandzeru? Tisafunika kukhala na cikhulupiro kwa Mulungu, kunyindira kuti iye anadzatiphedza na kutipasa udziwisi unafunika ife toera kucita pisankhulo pyadidi. Pontho tisafunika kukhulupira Mafalace na kunyindira uphungu wace. (Lerini Tyago 1:5-8.) Tingakhala cifupi na Yahova na kufuna kakamwe Mafalace, pinatiphedza toera kunyindira kuti iye asadziwa pinthu pyadidi kwa ife. Natenepa tinadzasaka uphungu M’mafalace mbatidzati kucita pisankhulo. Mphapo tinathimizira tani maluso athu akucita pisankhulo pyadidi? Pontho tisafunika kucinja pisankhulo pinacita ife?

4. Ndi cisankhulo cipi cidacita Adhamu, pontho pyabweresanji?

⁴ Anthu atoma kucita pisankhulo pyakufunika kakamwe kutomera mu ndzidzi udacitwa iwo. Mamuna wakutoma, Adhamu, akhafunika kusankhula kubvera Nciti wace, Yahova, peno kubvera nkazace, Eva. Adhamu asankhula kubvera Eva, wakuti ancitisa kucita cisankhulo cakuipa kakamwe. Na thangwi ineyi, Yahova abulusa Adhamu m’munda wa Edheni na mukupita kwa ndzidzi afa. Lero, ife tisathabukambo thangwi ya cisankhulo cakuipa ca Adhamu.

5. Kodi tisafunika kuona tani ufulu wakucita pisankhulo?

⁵ Anthu anango asanyerezera kuti umaso mbudakhala wakukhonda nentsa mbadakhala na ufulu wakukhonda cita pisankhulo. Panango imwe musanyerezerambo tepo. Mbwenye mphyadidi kwa ife kukumbuka kuti Yahova nee acita anthu ninga marobhoti akuti nee asanyerezera nee kucita pisankhulo. Iye atipasa Mafalace, akuti asatipfundzisa kuti tinacita tani pisankhulo mwandzeru. Yahova asafuna kuti ticite pisankhulo, pontho pyenepi pinatiphedza. Nyerezerani pitsandzo pinatowera.

6, 7. Kodi Aisraeli akhafunika kucita cisankhulo cipi, pontho thangwi yanji cikhali cakunentsa kwa iwo? (Onani cithundzithundzi cakutoma.)

⁶ Pikhali iwo n’Dziko Yakupikirwa, Aisraeli akhafunika kusankhula kulambira Yahova peno kulambira alungu. (Lerini Yoswa 24:15.) Panango ceneci cikhaoneka ninga cisankhulo cakukhonda nentsa. Mbwenye cisankhulo cawo mbacidaabweresera kufa peno umaso. Mu ndzidzi wa Atongi, Aisraeli apitiriza kucita pisankhulo pyakuipa. Iwo asiya kulambira Yahova mbatoma kulambira alungu authambi. (Atongi 2:3, 11-23) Mu ndzidzi wa mprofeta Eliya, mbumba ya Mulungu ikhafunika kusankhula kutumikira Yahova peno kulambira mulungu wauthambi Bhaale. (1 Amambo 18:21) Panango pyenepi pikhaoneka ninga pyakukhonda nentsa kucita thangwi kutumikira Yahova ndzidzi onsene ndi kwadidi kakamwe. Munthu wandzeru nee asafunika kulambira  alungu akusowa basa. Mbwenye mbumba nee yacita cisankhulo, natenepa Bhibhlya isalonga kuti Aisraeli akhapenula. Eliya awangisa mbumba mwandzeru toera kusankhula kulambira Mulungu wandimomwene, Yahova.

⁷ Thangwi yanji pikhali pyakunentsa kuna Aisraeli anewa kucita cisankhulo mwandzeru? Cakutoma, iwo nee akhakhulupira Yahova, mbakhonda kumbvera. Iwo nee akhanyindira Yahova, pontho nee akhasankhula ndzidzi toera kupfundza pya iye peno udziwisi wace. Mbadakhala na ndzidzi wakupfundza, mbadakwanisa kucita pisankhulo mwandzeru. (Masalmo 25:12) Caciwiri, Aisraeli akhanyengererwa na anthu a madziko anango. Anthu anewa acitisa Aisraeli kunyerezera pinthu pinango, ngakhale kuacitira pisankhulo. Buluka penepo, Aisraeli atoma kutowerera anthu anewa mbalambira alungu awo. Pyenepi ndi pinthu pikhadaacenjeza Yahova pyaka pizinji nduli.—Eksodo 23:2.

8. Ndi ntsonga ipi yakufunika inapfundza ife kubulukira mu citsandzo ca Aisraeli?

⁸ Citsandzo ca Aisraeli cisatipfundzisa kuti tingafuna kucita pisankhulo, tisafunika kuphatisira Mafala a Mulungu. Lemba ya Agalata 6:5 isatikumbusa kuti munthu onsene asafunika kucita ekha pisankhulo. Mwandimomwene, ife nee tisafunika kupanga munthu toera aticitire pisankhulo. M’mbuto mwace, m’bodzi na m’bodzi wa ife asafunika kupfundza pinalonga Mulungu kuti ndi pyadidi, mbasankhula kupicita.

9. Thangwi yanji ndi pyakugopswa kutawirisa anango kuticitira pisankhulo?

⁹ Tinatawirisa tani anango kuticitira pisankhulo? Tingaatawirisa tinakulumizika toera kucita cisankhulo cakuipa. (Misangani 1:10, 15) Pyenepi ndi pyakugopswa. Tisafunika kubvera cikumbuntima cathu cakupfundziswa na Bhibhlya. Tingatawirisa anango kuticitira pisankhulo, tinatowezera pisankhulo pyawo. Cisankhulo ceneci cinakwanisa kutibweresera nyatwa.

10. Ndi cenjezo ipi idapereka Paulu kuna Akristu a ku Galata?

¹⁰ Mpostolo Paulu acenjeza Akristu a ku Galata toera akhonde kucitirwa pisankhulo na anthu anango. (Lerini Agalata 4:17.) Abale anango a ku Galata akhayesera kucitira anango pisankhulo mu mpingo. Thangwi yanji akhacita pyenepi? Amuna anewa akufuna pya iwo basi akhafuna kuti abale atowerere iwo m’mbuto mwa apostolo. Iwo nee akhali akucepeseka, pontho nee akhalemedza ufulu ukhali na abale awo wakucita pisankhulo.

11. Tinaphedza tani anango angafuna kucita pisankhulo?

¹¹ Tonsene tinakwanisa kupfundza kubulukira mu citsandzo cadidi ca mpostolo Paulu. Iye akhadziwa kuti abale ace akhali na ufulu wakucita pisankhulo pyawo,  pontho iye akhalemedza ufulu unoyu. (Lerini 2 Akorinto 1:24.) Lero, akulu a mpingo asatowezera citsandzo ceneci mu ndzidzi unapereka iwo uphungu unalonga pya cisankhulo ca munthu paekha. Iwo asatsandzaya kupereka maonero kuna abale na alongo awo mukuphatisira Mafala a Mulungu. Mbwenye akulu a mpingo asafunika kucita mphole-mphole pakuphedzera cisankhulo ca Nkristu onsene, thangwi pyenepi pinakwanisa kubweresa maphindu peno nyatwa. Ntsonga yakufunika kakamwe ndi iyi: Tinakwanisa kuphedza anango kubvesesa uphungu wa Bhibhlya unabverana na makhaliro awo. Mbwenye abale na alongo ali na ufulu wakucita pisankhulo pyawo. Angacita pisankhulo mwandzeru iwo anakwanisa kuphindula. Mwandimomwene, cipo tisafunika kunyerezera kuti tiri na cidzo cakutonga pinafuna kucita abale na alongo athu.

12, 13. Thangwi yanji ndi pyakugopswa kucita pisankhulo tingaipirwa peno khala tatsukwala?

¹² Lero, anthu azinji asatowerera ntima wawo pakucita pisankhulo. Mbwenye pyenepi ndi pyakugopswa. Bhibhlya isaticenjeza kuti pakucita pisankhulo, nee tisafunika kubvera ntima wathu wakusowa ungwiro peno mabvero athu. (Misangani 28:26) Nee tisafunika kunyindira ntima wathu, thangwi ‘ntima ndi wakunyengeza kakamwe kupiringana pyonsene.’ (Yeremiya 17:9) M’Bhibhlya muli na pitsandzo pizinji pinapangiza kutsukwala kudakhala na anthu thangwi yakunyindira ntima wakusowa ungwiro. (1 Amambo 11:9; Yeremiya 3:17; 13:10) Natenepa, ninji pinacitika tingatowerera ntima wathu pakucita pisankhulo?

 ¹³ Yahova asatiphemba kuti tinfune na ntima wathu onsene na kufunambo ndzathu ninga ife ene. (Mateo 22:37-39) Mbwenye tisafunika kucita mphole-mphole. Malemba adadinga ife mu ndima idamala, asapangiza kuti ndi pyakugopswa kutawirisa mabvero athu toera atonge manyerezero athu na macitiro athu. Mwacitsandzo, ndi pyakunentsa kuna munthu wakuipirwa toera kucita cisankhulo cadidi. (Misangani 14:17; 29:22) Pontho mphyakunentsa kuna munthu wakutsukwala toera kucita cisankhulo mwandzeru. (Numero 32:6-12; Misangani 24:10) Tisafunika kutawirisa mwambo wa Mulungu toera kutsogolera manyerezero athu. (Aroma 7:25) Pakucita pisankhulo pyakufunika, nee tisafunika kutawirisa mabvero athu kutonga pinafuna ife kucita.

14. Tisadziwa tani kuti mphyadidi kucinja pisankhulo pinango?

¹⁴ Ife tisafunika kucita pisankhulo mwandzeru. Mbwenye munthu wandzeru asadziwa kuti asafunika kudinga cisankhulo cidacita iye panango kucicinja. Yahova Mulungu akhazikisa citsandzo cadidi kwa ife. Nyerezerani pidacita iye na Aninive mu ndzidzi wa Yona: ‘Pidaona Mulungu wandimomwene macitiro awo mbasiya njira zawo zakuipa, iye acinja manyerezero ace mbakhonda kuafudza.’ (Yona 3:10) Pidaona Yahova kuti Aninive acinja mbasiya kucita pyakuipa, iye acinja cisankhulo cace. Pyenepi pisapangiza kuti iye ndi wakulinganira, wakucepeseka na wantsisi. Mwakusiyana na anthu azinji, Yahova nee asacita pisankhulo mwakukhonda nyerezera, maseze aipirwe.

15. Thangwi yanji midzidzi inango tisafunika kucinja cisankhulo cathu?

¹⁵ Midzidzi inango mphyadidi kudinga cisankhulo cathu, makamaka makhaliro angacinja. Kumbukani kuti Yahova midzidzi inango akhacinja pisankhulo pyace. (1 Amambo 21:20, 21, 27-29; 2 Amambo 20:1-5) Ndzidzi unango tisacinja cisankhulo cathu panango tingapangwa mphangwa zipswa. Nyerezerani citsandzo ca Mambo Dhavidhi. Iye acita cisankhulo kuna ndzukulu wa Sauli Meribaale [Mefiboseti] thangwi ya mphangwa zakuphonyeka zidabva iye. Mbwenye pidatambira Dhavidhi mphangwa zakundendemera, iye acinja cisankhulo cace. (2 Samwele 19:24-29) Midzidzi inango, panango mphyandzeru kwa ife kucitambo pibodzi pyene.

16. (a) Ndi maonero api akuphedza pakucita pisankhulo? (b) Thangwi yanji midzidzi inango tisafunika kucinja pisankhulo, pontho tinacita tani pyenepi?

¹⁶ Bhibhlya isalonga kuti nee tisafunika kucimbiza pakucita pisankhulo pyakufunika. (Misangani 21:5) Tisafunika kukhala na ndzidzi wakunyerezera mwadidi makhundu onsene toera tikwanise kucita cisankhulo candzeru. (1 Atesalonika 5:21) Nsolo wa banja mbudzati kucita cisankhulo, usafunika kukhala na ndzidzi wakufufudza Malemba na mabukhu athu. Pontho  mphyakufunikambo kubvesera maonero a anthu anango a pabanja. Kumbukani kuti Mulungu apanga Abhrahamu toera abvere nkazace. (Genesi 21:9-12) Akulu a mpingo asafunikambo kukhala na ndzidzi wakufufudza. Angatambira mphangwa zipswa zinapangiza kuti asafunika kucinja pisankhulo pidacita iwo, nee asafunika kugopa kuluza cilemedzo. Akulu a mpingo akucepeseka na akulinganira, asakhala dzololo toera kucinja manyerezero na pisankhulo pyawo khala ndi pyakufunika. Pontho mphyadidi kwa ife kutowezera pitsandzo pyawo. Pyenepi pisaphedza mpingo toera kukhala wakuphatana na wantendere.—Machitiro 6:1-4.

17. Ninji pinafuna kutiphedza toera kucita pisankhulo pyadidi?

¹⁷ Pisankhulo pinango mphyakufunika kakamwe kupiringana pinango. Mwacitsandzo, toera kusankhula kumanga banja peno munthu wakumanga naye banja ndi cisankhulo cakufunika kakamwe. Cisankhulo cinango cakufunika kakamwe ndi kutoma basa ya ndzidzi onsene. Mbatidzati kucita pisankhulo ninga pyenepi, tisafunika kunyerezera mwadidi na kuphemba ciphedzo ca Yahova. Pyenepi panango pinaphemba ndzidzi, mbwenye khala tisafuna kucita cisankhulo mwandzeru, tisafunika kunyindira Yahova, kubvera cipfundziso cace na citsogolero cace. (Misangani 1:5) Yahova atipasa uphungu wakufunika kubulukira M’mafalace. Natenepa, mphyakufunika kwa ife kufufudza na kuphemba citsogolero cace. Iye anakwanisa kutipasa makhaliro anafuna ife toera kucita pisankhulo pyakubverana na cifuno cace. Mbatidzati kucita pisankhulo pyakufunika, ndzidzi onsene tisafunika kubvundzika: ‘Cisankhulo ceneci cisapangiza kuti ndisafuna Yahova? Cinadzabweresa kutsandzaya na ntendere m’banja mwanga? Pontho cinapangiza kuti ndine wakupirira na wakupfulika?’

18. Thangwi yanji Yahova asadikhira kuti ticite tekha pisankhulo pyathu?

¹⁸ Yahova nkhabe kutikakamiza toera kunfuna na kuntumikira. M’mbuto mwace, iye atipasa ufulu wakucita cisankhulo. Iye asalemedza ufulu wathu wakusankhula mwakukhonda tsalakana khala tinadzantumikira peno nkhabe. (Yoswa 24:15; Koelete 5:4) Mbwenye iye asadikhira kuti ticite pisankhulo mwakubverana na pinalonga Bhibhlya. Tingakhulupira pitsogolero pya Yahova na kuphatisira midida inatipasa iye, tinacita pisankhulo mwandzeru. Pontho tinapangiza kuti tikupitiriza kukula mwauzimu.—Tyago 1:5-8; 4:8.