M’PYAKA pidapita, ndisakumbuka ntsiku inango namacibese akuti kudambo kukhathondola ku Brookings, Dakota do Sul, E.U.A. Natenepa ndikhabva kuti ndzidzi wakuthondola uli cifupi. Ine pabodzi na anthu angasi tikhali pa mbuto inafuyirwa pinyama, tonsene tikhatetemera na mphepo. Tikhadalimira, pontho patsogolo pathu pakhali na basiya ikulu yakudzala na madzi akuthondola! Tendeni ndikupangeni pang’ono pya umaso wanga toera mudziwe kuti thangwi yanji tikhali pa mbuto ineyi.

Ndabalwa ntsiku 7 ya Murope mu caka 1936. Tabalwa anai, ine ndikhali wakumalisa. Tikakhala mu zunde ing’ono kumabulukiro dzuwa a Dakota do Sul. Kulima cikhali cinthu cakufunika pabanja pathu, mbwenye tayu cakufunika kakamwe. Anyakubalanga abatizwa ninga Mboni za Yahova mu caka 1934. Nakuti akhadaperekeka kuna Yahova, natenepa kucita cifuno cace cikhali cinthu cakufunika kakamwe kwa iwo. Mudatoma Pai wanga Clarence kutumikira ninga servo de companhia, mudapita ndzidzi ungasi m’bale wace Alfred atumikirambo ninga servo de companhia (Cincino asacemerwa mbveranisi wa nsoka wa akulu a mpingo) mu mpingo ung’ono ku Conde, Dakota do Sul.

Banja yathu ikhaenda kumisonkhano mwakukhonda phonya na ikhamwazambo mphangwa nyumba na nyumba toera kupanga anango pya tsogolo yadidi inalonga Bhibhlya. Citsandzo ca anyakubalanga na cipfundziso cidatipasa iwo catiphedza toera kufuna Yahova. Ine na m’bale wanga wankazi, Dorothy takhala ninga amwazi mphangwa a Umambo mukhali ife na pyaka pitanthatu pyakubalwa. Mu caka 1943, ndapita Xikola ya Utumiki wa Mulungu mukhatoma iyo kwene.

Misonkhano ya gawo na ya cisa ikhacita khundu yakufunika kakamwe mu umaso wathu.  Ndisakumbuka nsonkhano unango wa gawo mu caka 1949 ku Sioux Falls, Dakota do Sul. M’bale Grant Suiter acita nkhani ya pakweca ya nsolo wakuti “É mais Tarde do Que Pensais!” Iye agomezera kuti Akristu onsene akuperekeka asafunika kuphatisira umaso wawo toera kumwaza mphangwa zadidi za Umambo wa Mulungu. Buluka penepo, ndaperekeka kuna Yahova. Natenepa, ndabatizwa pa nsonkhano wa cisa ku Brookings, ntsiku 12 ya Bingu mu caka 1949. Ndi thangwi yace ndikhali pa mbuto inafuyirwa pinyama ninga pidalonga ine. Mu unai wathu tikhadikhira kubatizwa m’basiya ikulu ya fero.

Buluka penepo ndatonga kutumikira ninga mpainiya. Ndatoma ntsiku 1 ya Thongwe wa caka 1952, pikhali ine na pyaka 15 pyakubalwa. Bhibhlya isalonga: ‘Anafamba na anthu andzeru anadzakhalambo wandzeru,’ natenepa pa banja pathu pakhali na anthu azinji andzeru akuti aphedzera cisankhulo canga. (Misangani 13:20) Kazinji kene ndikhaenda kamwaza mphangwa na Julius, m’baleace baba, wakuti akhali na pyaka 60 pyakubalwa. Maseze akhali nkulu kupiringana ine, tikhakomerwa kakamwe kuenda pabodzi mu utumiki. Ndapfundza pizinji kakamwe kubulukira mu citsandzo cace. Mwakukhonda dembuka Dorothy adzakhalambo mpainiya.

Pikhali ine m’phale, anyakubalanga akhacemera ayang’aniri azinji a cisa na akazawo toera kukhala na ife. Jesse, Lynn Cantwell na banja inango, andiphedza kakamwe. Iwo akhanditsalakana na kundiwangisa. Angacedzera mipingo ya cifupi, midzidzi inango akhandicemera toera kuenda pabodzi na iwo mu utumiki. Ndikhakomerwa kakamwe kukhala na iwo! Ndikhafuna kucita pizinji m’basa ya Yahova ninga iwo na kutumikira ninga mpainiya.

Muyang’aniri wathu unango wa cisa akhali Bud Miller. Pidacedzera iye na nkazace Joan mpingo wathu, ndikhali na pyaka 18 pyakubalwa. Mu ndzidzi unoyu ndikhafunika kugumanika pa komiti inatsalakana pya nkhondo. Iwo akhafuna ndicite basa yakuti ikhali yakusiyana na mwambo wa Yezu wakuti nee tisafunika kucita khundu ya ndale za dziko. Mbwenye ndikhafuna kumwaza mphangwa zadidi za Umambo. (Jwau 15:19) Natenepa ndaadziwisa kuti ndine Nkristu.

Ndakomerwa kakamwe pidandipanga M’bale Miller kuti mbadaenda pabodzi na ine ku komiti ineyi.  Iye nee akhali munthu wamanyadzo, pontho nee akhagopiwa na anthu. Iye akhadziwambo mwadidi Malemba. Kukhala pabodzi na iye pyandiphedza kukhala na cipapo kakamwe! Buluka penepo, mu ndzidzi wa malimwe wa caka 1954, komiti yatawira phembo yanga thangwi ya nsonkhano unoyu. Natenepa ndikhali wakusudzuka toera kucita pizinji kuna Yahova.

Mukupita kwa ndzidzi, ndacemerwa toera kutumikira ku Bheteli mbitiphata basa m’munda wa Tor- re de Vigia pa Staten Island, Nova York. Ndatumikira kweneku cifupi na pyaka pitatu. Ndakhala na pyakugumana napyo pizinji pyakutsandzayisa thangwi ndikhaphata basa pabodzi na abale na alongo azinji andzeru.

Munda ukhagumanika ku Staten Island ndi mbuto ikhagumanika radyo yathu ya WBBR. Iwo ukhatsalakanwa na Mboni za Yahova kubulukira mu caka 1924 mpaka 1957. Anthu adasankhulwa toera kuphata basa ku munda wa Bheteli akhali 15 mpaka 20 basi. Azinji mwa ife tikhali aphale, pontho nee tikhali na maluso mazinji. Mbwenye M’bale wakugwesera wakudzodzwa, akhacemerwa Eldon Woodworth akhaphata basa pabodzi na ife. Iye akhali ninga baba kwa ife, pontho atipfundzisa pinthu pizinji kakamwe. Midzidzi inango pikhanentsana ife, M’bale Woodworth akhalonga: “Mwandimomwene ndi pyakutsandzayisa kakamwe pidacita Yahova kuna atumiki ace.”

M’bale Frederick W. Franz akhaphata pabodzi na ife na akhaphedza onsene. Iye akhali munthu wandzeru, pontho akhadziwa mwadidi Bhibhlya. Iye akhatsalakana m’bodzi na m’bodzi wa ife. Harry Peterson ndiye akhatiphikira. Pikhali pyakukhonda nentsa kwa ife kuphatisira dzinace yakumalisa m’mbuto mwa kuphatisira dzinace yakutoma, Papargyropoulos. Iye akhali m’bodzi mwa Akristu akudzodzwa, pontho akhafuna kakamwe utumiki. M’bale Peterson akhaphata mwadidi basa yace pa Bheteli, mbwenye cipo akhapwaza basa ya m’munda. Iye akhagawira marevista mazinji kakamwe pa mwezi ubodzi. Iye akhadziwambo mwadidi Bhibhlya na akhatawira mibvundzo mizinji ikhacita ife.

Kumunda tikhakhunganya misapo na masamba buluka penepo tikhaaikha ncombo. Munda unoyu  ukhabulusa cakudya cizinji kakamwe pa caka. Ndikhaphata basa na Etta Huth, mulongo wandzeru kakamwe. Iye akhacita ndandanda ukhaphatisira ife toera kukhunganya misapo na masamba. Alongo acifupi akhabwera kudzaphata basa na ife, pontho Etta akhaaphedza toera kutsalakana mwadidi basa yawo. Maseze Etta akhadziwa mwadidi kutsalakana misapo na masamba, iye ndzidzi onsene akhalemedza abale akhatumikira ninga ayang’aniri. Iye apangiza citsandzo cadidi kakamwe kwa ife tonsene.

Angela Romano akhali m’bodzi wa alongo acitsikana adabwera kudzatiphedza m’munda unoyu. Etta amphedza mudapita iye kwene mu undimomwene. Ine na Angie tamanga banja mwezi wa Bwinja mu caka 1958, natenepa tatsandzaya kutumikira Yahova pabodzi pyaka 58. Kukhulupirika kwa Angie kuna Yahova m’pyaka pyenepi, kwacitisa banja yathu kukhala yakuwanga. Iye ndi wandzeru, pontho ndisakwanisa kun’nyindira na ntima onsene, mwakukhonda tsalakana pinentso.

Pidagulisa abale mbuto za WBBR ku Staten Island mu caka 1957, ndatumikira ku Bheteli ya ku Brooklyn mu ndzidzi ungasi. Mbwenye pidamanga ine banja na Angie tasiya kutumikira pa Bheteli. Tatumikira ninga apainiya ku Staten Island mu pyaka pitatu. Ndaphatambo basa mu ndzidzi ungasi pa radyo ikhacemerwa WPOW.

Ine na Angie tikhapitiriza kukhala na umaso wakukhonda funa pizinji toera tikwanise kutumikira konsene kukhafunika ife. Na thangwi ineyi, mu caka 1961 tatambira ncemerero mbitienda katumikira ninga apainiya akupambulika ku Falls City, Nebraska. Mbwenye pidafika ife kwene kweneko, tacemerwa ku Xikola ya Utumiki wa Umambo ya mwezi ubodzi ku South Lansing, Nova York. Tatsandzaya kakamwe na cipfundziso cidatambira ife, pontho tikhanyerezera kuti pakumala xikola mbitidabwerera ku Nebraska. Mbwenye tadzumatirwa kakamwe pidapaswa ife basa ipswa. Ikhali basa toera kuenda katumikira ninga amisionaryo ku Camboja! Mu dziko ineyi yakubalika ya Southeast Asia, taona, tabva na tayesera pinthu pyakuti kwa ife pikhali pipswa. Tikhafuna kakamwe kupanga anthu pya mphangwa zadidi za Umambo.

Mbwenye mukupita kwa ndzidzi makhaliro a ndale za dziko acinja ku Cambodia, natenepa tikhafunika kuenda ku South Vietnam. Pidapita pyaka piwiri ndaduwala kakamwe, mbitibwerera ku Estados Unidos. Ndikhafunika kupuma pang’ono toera ndikwanise kuwanga. Pidawanga ine, ndatoma pontho kutumikira ninga mpainiya.

Mwezi wa Murope mu caka 1965 tatoma basa yakucedzera mipingo. M’pyaka 33, ine na Angie tatsandzaya kakamwe kutumikira ninga ayang’aniri a cisa na a gawo, pontho taphedzera misonkhano ya gawo. Ndikhakomerwa kakamwe na basa ineyi, kutomera mu ndzidzi unoyu misonkhano ya gawo ndzidzi onsene isakhala yakutsandzayisa kakamwe. M’pyaka pingasi tacedzera mipingo mu nzinda wa Nova York, pontho misonkhano mizinji ya gawo ikhacitwa ku Yankee Stadium.

Ine na Angie tikhatambira mabasa mazinji mapswa na akunentsa. Mu caka 1995, ndaphembwa  toera kupfundzisa Xikola Yakupfundzisa Basa Ya Utumiki. Pidamala pyaka pitatu, tacemerwa ku Bheteli. Pakumala pyaka 40, ndakomerwa kakamwe kubwerera pontho ku Bheteli, kudatoma ine basa ya ndzidzi onsene. Mu ndzidzi ungasi, ndaphata basa mu Departamentu ya Basa, pontho ninga mpfundzisi wa maxikola akusiyana-siyana. Mu caka 2007, Mathubo Akutonga akhazikisa Departamentu ya Maxikola a Utumiki toera kutsalakana maxikola onsene akhacitwa pa Bheteli, pontho m’pyaka pizinji ndatumikira ninga muyang’aniri wa maxikola anewa.

Cincino, kwacitwa macinjo mazinji a maxikola pa Bheteli. Xikola ya Akulu a Mpingo yatoma mu caka 2008. Natenepa m’pyaka piwiri, apfundziswa akulu a mpingo akupiringana 12.000 ku Patterson na ku Bheteli ya ku Brooklyn. Xikola ineyi isacitwambo m’mbuto zinango zizinji. Mu caka 2010, Xikola Yakupfundzisa Basa Ya Utumiki yacinjwa mbikhala Xikola ya Bhibhlya kwa Abale Akukhonda Kumanga Banja, buluka penepo yakhazikiswambo Xikola ya Bhibhlya kwa Akristu Akumanga Banja.

Mwezi wa Nyendzi wa caka 2014, maxikola anewa mawiri abvungazwa mbikhala Xikola ya Amwazi Mphangwa a Umambo. Anyakupfundza anakwanisa kukhala anyakumanga banja na azice. Abale azinji pa dziko yapantsi akhala akutsandzaya pidabva iwo kuti anakhalambo na xikola ineyi n’dziko yawo. Mphyakutsandzayisa kudziwa kuti azinji anadzakhala na mwai wakucita maxikola anewa. Pontho ndisakomerwa kakamwe kucedza na abale azinji adacita macinjo mu umaso wawo toera kutambira cipfundziso ceneci.

Ndinganyerezera pya umaso wanga kutomera ntsiku idabatizwa ine pa mbuto inafuyirwa pinyama mpaka lero, ndisapereka takhuta kuna Yahova thangwi yakukhala na anthu andzeru. Iwo andiphedza toera kudziwa mwadidi Yahova na kuntumikira. Iwo akhali a mathunga akusiyana-siyana, pontho azinji akhali na misambo yakusiyana na yanga. Mbwenye ndakwanisa kuona m’makhaliro awo kuti akhafuna kakamwe Yahova. Ndisapereka takhuta kakamwe thangwi yakukhala na axamwali andzeru mu gulu ya Yahova akuti ndinakwanisa kupfundza kubulukira kwa iwo.