KODI makhaliro anu alandana na a aprofeta akale? Bhibhlya yakusasanyirwa papswa ya Traducão do Novo Mundo idabuluswa mu caka 2013 iri na ‘Ndandanda wa Mabvekero a Mafala,’ iwo wafokotoza kuti fala yakuti mprofeta , “Ndi munthu anaphatisirwa na Mulungu toera kubvekesa cifuniro cace. Aprofeta akhali akwati mphangwa a Mulungu, iwo nee akhalonga basi ene pinthu pya ntsogolo, mbwenye akhapereka pipfundziso pya Yahova, matongero ace na mphangwa zakutonga kwace.” Maseze nee ndimwe mprofeta, imwe musalongambo pya Mulungu, mbamudziwisa mphangwa zinagumanika m’Mafalace.​—Mat. 24:14.

Ndi mwai ukulu kakamwe kwa ife kupanga anango pya Yahova Mulungu wathu, na kuapfundzisa pya cifuniro cace kwa anthu! Tisacita khundu m’basa ineyi pabodzi na ‘anju anamburuka pakati pa thambo.’ (Apok. 14:6) Mbwenye panango tinathimbana na pinentso pyakuti pinaticitisa kuduwala mwai unoyu wadidi kakamwe uli na ife. Ndi pipi pingasi mwa pinentso pyenepi? Panango tinathimbana na kuneta, kufewa manungo peno mabvero akuti nee ndife akuthema. Aprofeta akukhulupirika akale athimbanambo na makhaliro anewa, mbwenye iwo nee abwerera nduli. Yahova aaphedza toera kukwanirisa mabasa awo. Tendeni tidinge pitsandzo pya aprofeta angasi toera kuona kuti tinaatowezera tani.

Midzidzi inango panango tinaneta thangwi ya mabasa a ntsiku na ntsiku, mbatinyerezera kuti nee tinakwanisa kuenda mu utumiki. Mwandimomwene, ife tisafunika kupuma; Yezu na apostolo ace acitambo pyenepi. (Mko. 6:31) Mbwenye nyerezerani pya Ezekyele pikhali iye mu Bhabhilonya na basa idapaswa iye toera kucita pakati pa Aisraele adabuluka ku Yerusalemu akuti akhali mu ubitcu. Mulungu apanga Ezekyele kuti akwate njerwa toera alembe nzinda wa Yerusalemu padzulu pace. Buluka penepo, Ezekyele akhafunika kufungira nzinda unoyu mwakuphiphirisa mbagona na kukhundu yace ya bzwere mu ntsiku zakukwana 390, buluka penepo mbagona pontho na kukhundu yace ya madyo mu ntsiku 40. Yahova apanga Ezekyele: ‘Ona! Ine ndinadzakumanga na nkhambala toera ukhonde kuzungunuka mpaka kumala kwa ntsiku zenezi  zinafuna iwe kufungira nzinda.’ (Ezek. 4:1-8) Pyenepi mbabidadzumisa Aisraele akuti akhali mu ubitcu, thangwi Ezekyele akhafunika kumala caka na ntsiku zingasi mbakacita basa ineyi yakunentsa. Kodi Ezekyele mbadakwanirisa tani basa ineyi?

Ezekyele abvesesa kuti thangwi yanji iye atumwa ninga mprofeta. Pidatuma iye Ezekyele, Mulungu ampanga: ‘Maseze Aisraele akhonde kukubvera peno akubvere, iwo anadzadziwa kuti akhalipo mprofeta pakati pawo.’ (Ezek. 2:5) Ezekyele apitiriza kukumbuka cifuniro ca basa yace. Natenepa, iye acita na ntima onsene basa yace yakuzungulira nzinda wa Yerusalemu mwakuphiphirisa. Iye apangiza kukhala mprofeta wandimomwene. Iye na Aisraele andzace akhali mu ubitcu atambira mphangwa izi: “Iwo amala kukatira [peno kufudza nzinda!]” Inde, Aisraele akwanisa kudzindikira kuti ‘akhalipo mprofeta pakati pawo.’​—Ezek. 33:21, 33.

Lero, ife tisacenjeza anthu thangwi yakufudzwa kwa makhaliro onsene akuipa a dziko ya Sathani. Maseze panango tisaneta, mbwenye tisaphatisira mphambvu zathu toera kumwaza mphangwa za Mulungu, kucita maulendo akubwereza na kucitisa mapfundziro a Bhibhlya. Mu ndzidzi unakwanirisika maprofesiya a kumala kwa makhaliro ano a pinthu, tisakhala akutsandzaya thangwi “yakukhala anthu anacitisa kuti pifuniro pya Mulungu pidziwike.”

Na ciphedzo ca nzimu wa Yahova, tisawangisira na ntima wathu onsene, ngakhale tenepo, midzidzi inango tinafewa manungo thangwi anthu asakhonda mphangwa zathu. Mbwenye mphyadidi kukumbuka citsandzo ca mprofeta Yeremiya. Iye athimbana na kusingirirwa, kutikanwa na kupwazwa thangwi yakumwaza mphangwa kuna Aisraele. Pa ndzidzi unango, Yeremiya alonga: ‘Sinalongabve tayu pya iye, nee kulonga pontho pya dzina yace.’ Yeremiya akhali munthu wa mabvero ninga athu. Ngakhale tenepo, iye apitiriza kumwaza mphangwa za Mulungu. Thangwi yanji? Yeremiya athimiza: ‘Penepo mphangwa zanu zikhali ninga moto wakugaka muntima mwanga. Ndayesera kuupirira, mbwenye sinakwanisa tayu.’​—Yer. 20:7-9.

Munjira ibodzi ene, khala tisafewa manungo thangwi ya anthu anakhonda kutawira mphangwa zathu, tinakwanisa kuthimbana na makhaliro anewa mu kunyerezera mwacidikhodikho pya mphangwa zinamwaza ife. Izo zinakwanisa kukhala ninga ‘moto wakugaka muntima mwathu.’ Kuleri Bhibhlya ntsiku zonsene kutiphedza toera moto unoyu upitirize kugaka muntima mwathu.

Akristu anango anentseka kakamwe pidapaswa iwo mabasa akuti nee akhaadziwa kuti anatsalakana tani, peno kuti thangwi yanji apaswa mabasa anewa. Panango, mprofeta Ozeya athimbanambo na mabvero anewa. Yahova ampanga: ‘Ozeya, ndoko kamanga banja na nkazi waupombo, mbubala naye ana aupombo.’ (Oze. 1:2) Mbamudacitanji khala musafuna kumanga banja, mbwenye Mulungu akupangani kuti nkazanu anadzakhala nyaupombo? Ozeya atawira kucita pyenepi. Iye akwata Gomere ninga nkazace mbabala naye mwana wamamuna. Buluka penepo, Gomere abala pontho mwana wankazi na wamamuna. Pisaoneka kuti ana awiri akumalisa aabala mwaupombo. Yahova akhadapanga Ozeya kuti nkazi akhafuna iye kusemba ‘anadzaenda kuna amuna ananfuna kakamwe.’ Fala yakuti “amuna ananfuna” isapangiza kuti akhalipo azinji. Buluka penepo, iye mbadayesera kubwerera pontho kuna Ozeya. Cincino, nyerezerani kuti ndimwe Ozeya, mbamudatawira kuti abwerere pontho kuna imwe ninga nkazanu? Yahova apanga Ozeya toera kucita pyenepi. Ozeya abulusa kobiri toera kugula nkazace toera abwererane naye.​—Oze. 2:7; 3:1-5.

Panango Ozeya nee akhadziwa kuti mbadakhala na maphindu api angacita basa ineyi. Mbwenye Ozeya acita mwakukhulupirika pinthu pyenepi pyakunentsa mu umaso wace. Citsandzo ca Ozeya cisatiphedza toera kubvesesa mabvero adakhala na Mulungu mu ndzidzi udasiya Aisraele kulambira Yahova, mbalambira alungu anango. Pyakutsandzayisa ndi pyakuti Aisraele a ntima wadidi abwerera kuna Yahova.

Lero, Mulungu nkhabe panga munthu toera ‘kusemba nkazi waupombo.’ Ngakhale tenepo, tinapfundzanji mu citsandzo ca kuperekeka kwa Ozeya toera kucita basa idapaswa iye? Cakutoma, maseze mphyakunentsa kwa ife, tisafunika kukhala anthu akuperekeka m’basa yakumwaza mphangwa zadidi  za Umambo ‘m’mbuto zapakweca peno nyumba na nyumba.’ (Mach. 20:20) Panango, njira zinango zakumwaza mphangwa za Umambo, ndi zakunentsa kwa imwe. Anthu azinji anapfundza na Mboni za Yahova alonga kuti asakomerwa kupfundza Bhibhlya, mbwenye cipo anakwanisa kuenda nyumba na nyumba toera kumwaza mphangwa. Mbwenye mukupita kwa ndzidzi, azinji a iwo atoma kucita basa ikhanyerezera iwo kuti cipo mbadaikwanisa. Kodi pyenepi pisatipfundzisanji?

Tinakwanisa kupfundza ntsonga inango m’basa yakunentsa idatawira Ozeya. Basa idapaswa Ozeya yakutawira pontho nkazace, ikhali na mabvekero makulu. Mbwenye iye akhali na mathangwi mazinji toera kukhonda kucita pyenepi. Khala Ozeya nee alemba mphangwa zenezi, nee m’bodzi akhafuna kupidziwa. Panango ife tinakhalambo na mwai wakumwaza mphangwa za Yahova kuna munthu, panango nkhabe anafuna kudziwa pya mwai unoyu. Pyenepi pyacitika kuna Anna wakuti asapfundza ku universidade ku Estados Unidos. Mpfundzisi wace aphemba anyakupfundza toera kulemba mphangwa zinakomerwa na iwo kakamwe buluka penepo ayesere kutundusa anango mu kalasi toera akomerwembo nazo. Anna mbadakwanisa kupwaza mwai unoyu toera kupereka umboni. Mbwenye iye aona kuti unoyu ukhali mwai udapaswa iye na Mulungu. Iye adzindikira kuti pikhali pyakunentsa, natenepa, aphembera kuna Yahova mbakhala na cifuno toera kubandza mwai unoyu. Iye alemba mphangwa zace mukuphatisira nsolo uyu: “Kusanduka kwa Pinthu: Dingani Umboni Wace.”

Pidapangiza Anna mphangwa zenezi mu kalasi yace, ntsikana unango wakuti asakhulupira pya kusanduka kwa pinthu, ancita mibvundzo mizinji toera kupangiza kuti Anna akhalonga pyauthambi. Mbwenye Anna akwanisa kutsidzikiza cikhulupiro cace. Mpfundzisi wace akhuyiwa kakamwe, mbasankhula Anna ninga nyakupfundza adalemba mphangwa zakutundusa kakamwe. Kubulukira penepo, Anna acedza kakamwe na ntsikana adancita mibvundzo. Ninga maphindu akutawira basa ineyi idapaswa iye na Yahova, Anna alonga: “Cincino ndisamwaza mphangwa zadidi na cinyindiro, nee kugopa.”

Maseze nee ndife aprofeta ninga pikhacita atumiki akale, mbwenye tingatowezera nzimu wakudzimana wa aprofeta anewa, ninga Ezekyele, Yeremiya na Ozeya, tinakwanisambo kucita cifuno ca Yahova lero! Nkati mwa kulambira kwanu kwa banja peno pfundziro yanu pamwekha, lerini mphangwa zinalonga pya aprofeta, mbamunyerezera mwacidikhodikho kuti munatowezera tani pitsandzo pyawo.