1, 2. Ninji pinathimbana na atumiki a Yahova?

 KUTOMERA mu ntsiku za Abhele munthu wakukhulupirika mpaka lero, atumiki akukhulupirika a Yahova asathimbana na nyatwa. Mpostolo Paulu apanga Akristu Acihebheri kuti ‘mwapirira mayesero makulu na nyatwa’ toera kukhala akutawirika kuna Yahova na kutambira nkhombo zace. (Ahebere 10:32-34) Paulu alandanisa kupirira kwa Akristu na anyamapika Acigerego, ninga kuthamanga na kumenyana. (Ahebere 12:1, 4) Lero, tisacita mapika toera kuwina umaso, pontho tisathimbana na anyamalwa akuti asafuna kutifudza na kuticitisa kuluza kutsandzaya kwathu mbatikhonda kutambira nkhombo zathu ntsogolo.

² Tisamenya nkhondo yakunentsa kakamwe yakuthimbana na Sathani na dziko yace. (Aefesi 6:12) Nee tisafunika kukwatika na pipfundziso peno manyerezero a dziko. Kusiyapo pyenepi, tisafunika kucalira pinthu pyakuipa ninga kucita ulukwali, kufumali, kuledzera peno kuphatisira mitombwe yakuledzeresa. Tisafunikambo kupitiriza kuthimbana na kufewa manungo pabodzi na madodo athu.​—2 Akorinto 10:3-6; Akolose 3:5-9.

3. Kodi Yahova asatipfundzisa tani toera kuthimbana na anyamalwa athu?

³ Kodi tinakwanisadi kuwina nkhondo yakuthimbana na  anyamalwa amphambvu kakamwe? Inde mphyakukwanisika, mbwenye tisafunika kuwangisira! Paulu alandanisika na nyamaxoko pidalonga iye kuti: ‘Ndisaponya maxoko anga toera ndikhonde kumenya mphepo.’ (1 Akorinto 9:26) Ninga nyamaxoko asamenyana na nyamaxoko ndzace, tisafunikambo kuthimbana na anyamalwa athu. Yahova asatiphedza na kutipfundzisa toera kucita pyenepi kubulukira m’Bhibhlya. Iye asatiphedzambo mukuphatisira mabukhu athu, misonkhano ya mpingo, ya cisa na ya gawo. Kodi musaphatisira pipfundziso pyenepi pinatambira imwe? Khala nee musapiphatisira, mukumenya mphepo, natenepa nee munakwanisa kukunda nyamalwa wanu.

4. Tinakwanisa tani kukunda uipi?

⁴ Tisafunika kukhala maso ndzidzi onsene. Thangwi anyamalwa athu anakwanisa kutipomokera mwakukhonda dikhira peno mu ndzidzi unafewa ife. Bhibhlya isaticenjeza, pontho isatiwangisa na mafala awa: ‘Lekani kukundwa na pyakuipa, mbwenye kundani pyakuipa mukucita pyadidi.’ (Aroma 12:20) Tingapitiriza kuthimbana na uipi, tinakwanisa kuwina! Mbwenye, tingakhala akufewa mbatisiya kumenya nkhondo, Sathani, dziko yace na madodo athu pinakwanisa kutikunda. Natenepa cipo tisafunika kubwerera nduli. Lekani kubwerera nduli, pontho lekani kufewesa manja anu!​—1 Pedro 5:9.

5. (a) Tisafunika kukumbukanji toera tikhale akutawirika kuna Yahova na kutambira nkhombo zace? (b) Ndi pitsandzo pipi pya m’Bhibhlya pinafuna ife kudinga?

⁵ Toera kuwina tisafunika kukumbuka kuti thangwi yanji tisamenya nkhondo. Tisacita pyenepi thangwi tisafuna kukhala akutawirika kuna Yahova na kutambira nkhombo zace. Lemba ya Ahebere 11:6, isalonga: ‘Ule anafendedzera Mulungu asafunika kukhulupira kuti iye alipo, pontho asapasa nkhombo ale anansaka na ntima onsene.’ Kusaka Yahova na ntima onsene kusabveka kuwangisira kakamwe toera tikhale akutawirika kuna iye. (Machitiro 15:17, Tradução do Novo Mundo) M’Bhibhlya, muli na pitsandzo pizinji pya amuna na akazi adacita pyenepi. Mwacitsandzo, Yakobe, Rakele, Zuze na Paulu athimbana na makhaliro akunentsa m’manyerezero na m’manungo. Mbwenye iwo akwanisa kukunda nyatwa zenezi. Pitsandzo pyawo pisapangiza kuti tingawangisira, tinakwanisambo kutambira nkhombo za Yahova. Tendeni tidinge kuti tinacita tani pyenepi.

6. Ninji pidaphedza Yakobe toera kupirira, pontho iye atambiranji? (Onani cithundzithundzi cakutoma.)

⁶ Mamuna wakukhulupirika Yakobe athimbana na pinentso mbapirira thangwi akhafuna Yahova na kupasa ntengo uxamwali wace na iye. Iye akhanyindira kakamwe mapikiro a Yahova akuti mbadapasa nkhombo dzindza yace. (Genesi 28:3, 4) Pikhali iye na pyaka 100 pyakubalwa, Yakobe athimbana na anju toera kutambira nkhombo za Mulungu. (Lerini Genesi 32:24-29.) Kodi Yakobe akhalidi na mphambvu yakukwana toera kuthimbana na anju mukuphatisira mphambvu zace? Mwandimomwene nkhabe! Mbwenye iye akhali dzololo, pontho apangiza kuti mbadawangisira kakamwe toera kutambira nkhombo! Yahova apasa nkhombo Yakobe thangwi yakupirira kwace mbampasa dzina ya Israele, yakuti isabveka “Nyakuthimbana na Mulungu.” Yakobe atambira nkhombo za Yahova na kukhala wakutawirika kuna iye. Ife tisafunambo kutambira nkhombo zenezi.

7. (a) Ndi makhaliro api akunentsa adathimbana na Rakele? (b) Mphapo ninji pidacita Rakele, pontho ndi nkhombo zipi zidatambira iye?

 ⁷ Rakele, nkazi wakufunika kakamwe wa Yakobe adikhirambo na cifuno consene toera kuona kukwanirisika kwa mafala adalonga Yahova kuna mamunace. Mbwenye pakhali na cinthu cakunentsa. Rakele nee akhakwanisa kubala mwana. Mu ndzidzi unoyu, nkazi angakhonda kubala akhatsukwala kakamwe. Kodi Rakele acitanji pikhathimbana iye na makhaliro anewa? Iye nee abwerera nduli. M’mbuto mwace, apitiriza kuphembera kakamwe kuna Yahova. Mulungu abvesera maphembero a Rakele akubulukira muntima, natenepa mukupita kwa ndzidzi Rakele abala mwana. Na thangwi ineyi iye alonga: ‘Ndathimbana kakamwe mbandiwina.’​—Genesi 30:8, 20-24.

8. Ndi pinentso pipi pidathimbana na Zuze? Kodi citsandzo ca Zuze cinatiphedza tani?

⁸ Kukhulupirika kwa Yakobe na Rakele panango kwakhuyambo mwana wawo Zuze mbakumphedza mu ndzidzi ukhathimbana iye na pinentso. Pikhali iye na pyaka 17 pyakubalwa, umaso wace wacinja kakamwe. Abale ace, akuti akhali na ntcanje angulisa ninga bitcu. Mukupita kwa ndzidzi iye amala pyaka pizinji nkaidi ku Ejito, maseze nee akhadaputa nseru. (Genesi 37:23-28; 39:7-9, 20, 21) Mbwenye Zuze nee abwerezera pinthu pyakuipa peno kukhala wakuipa. Thangwi iye akhali na uxamwali wakuwanga kakamwe na Yahova, mbaikha pyenepi m’manyerezero mwace. (Levitiko 19:18; Aroma 12:17-21) Citsandzo ca Zuze cinakwanisa kutiphedza. Maseze takuzwa m’makhaliro akunentsa peno khala umaso wathu ndi wakusowa cidikhiro tisafunika kupitiriza kupirira. Tingacita pyenepi, tinakwanisa kukhala na cinyindiro cakuti Yahova anadzatipasa nkhombo.​—Lerini Genesi 39:21-23.

9. Tinatowezera tani citsandzo ca Yakobe, Rakele na Zuze?

⁹ Lero, tisafunikambo kupirira makhaliro  akunentsa kakamwe. Panango musatsalakanwa mwakuipa, kuoniwa ninga wakusiyana na anango, kusingirirwa peno kuzondwa. Panango alipo anakucitirani ntcanje. M’mbuto mwakufewa manungo, kumbukani pinthu pidaphedza Yakobe, Rakele na Zuze toera kupitiriza kutumikira Yahova mwakutsandzaya. Mulungu aawangisa mbaapasa nkhombo thangwi iwo apasa ntengo kakamwe uxamwali wawo na iye. Iwo apitiriza kuthimbana peno kucita pinthu mwakubverana na maphembero awo. Nakuti tikukhala mu ntsiku zakumalisa, mphyakufunika kakamwe kupitiriza kukhala na cidikhiro cakuwanga cantsogolo! Kodi imwe muli dzololo toera kupitiriza kuwangisira kuti mukwanise kukhala wakutawirika kuna Yahova?

10, 11. (a) Thangwi yanji tisafunika kuwangisira toera kutambira nkhombo za Yahova? (b) Ninji pinafuna kutiphedza toera kucita pisankhulo pyadidi?

¹⁰ Thangwi yanji tisafunika kuwangisira toera kutambira nkhombo za Yahova? Thangwi ibodzi ndi yakuti ndife anthu akusowa ungwiro, pontho tisathimbana na pifuno pyakuipa. Anango asamenya nkhondo toera akomerwe na utumiki, anangombo asathimbana na nyatwa za ungumi peno kutsoperwa. Anango asanentseka toera kulekerera munthu adancitira pyakuipa. Mwakukhonda tsalakana khala tatoma kale kutumikira Yahova peno tatoma cincino, tonsene tisafunika kuthimbana na pinthu pinapingiza basa yathu kwa Yahova wakuti asapasa nkhombo munthu wakukhulupirika.

¹¹ Mwandimomwene mphyakunentsa kakamwe kukhala Nkristu na kucita pisankhulo pyadidi, makamaka tingathimbana na pifuno pyakuipa. (Yeremiya 17:9) Khala musathimbana na pyenepi, citani phembero kuna Yahova mbamuphemba nzimu wace wakucena. Phembero na nzimu wakucena pinakuphedzani toera kukhala na mphambvu yakucita pinthu pyadidi, buluka penepo munakwanisa kutambira nkhombo za Mulungu. Khalani wakutonga toera kukhala maso mwakubverana na maphembero anu. Yeserani kuleri Bhibhlya ntsiku zonsene, pontho khalani na ndzidzi wakucita pfundziro ya munthu paekha na kulambira kwa banja.​—Lerini Masalmo 119:32.

12, 13. Kodi Akristu awiri aphedzwa tani toera kuthimbana na pifuno pyakuipa?

¹² Tiri na pitsandzo pizinji pinapangiza kuti Mafala a Mulungu, nzimu wace na mabukhu athu Acikristu pyaphedza abale na alongo toera kukunda pifuno pyakuipa. Mwana unango wathunga aleri nsolo wakuti “Como Ven- cer Desejos Errados?” unagumanika mu Despertai! ya 8 de Dezembro de 2003. Apibva tani pidamala iye kuleri nsolo unoyu? Iye alonga: “Ndisamenya nkhondo toera kuthimbana na manyerezero akuipa. Pidaleri ine kuti ‘anango asamenya nkhondo ikulu kakamwe toera kukunda pifuno pyakuipa,’ pyandicitisa kuona kuti ndisacita khundu ya ubale wa pa dziko yonsene. Ndadzindikira kuti nee ndiri ndekha.” Mphale unoyu aphindulambo na nsolo wakuti “Deus Aprova Estilos de Vida Alternativos?” unagumanika mu Despertai! ya 8 de Outubro de 2003. Mu nsolo unoyu, iye adzindikira kuti anango asapitiriza kumenya nkhondo mu ndzidzi uzinji toera kukunda pifuno pyakuipa ndi ninga ‘kukhala na munga m’manungo.’ (2 Akorinto 12:7) Ngakhale tenepo, mu ndzidzi unapitiriza iwo kumenya nkhondo toera kukhala na makha liro akucena, asakhala na cidikhiro ca ntsogolo. Na thangwi ineyi iye alonga: “Ndisadziwa kuti ntsiku zonsene ndinakwanisa kukhala wakukhulupirika kuna Yahova. Ndisapereka takhuta kakamwe kuna Yahova thangwi yakuphatisira gulu yace toera kutiphedza pakuthimbana na dziko ino yakuipa.”

¹³ Dinganimbo citsandzo ca mulongo unango wa ku Estados Unidos. Iye alemba: “Ndisapereka takhuta thangwi yakutipasa pyonsene pinafuna ife pa ndzidzi wakuthema. Kazinji kene ndisaona kuti misolo ineyi yalemberwa ine. Mu pyaka pizinji ndisamenya nkhondo toera kucalira pifuno pyakuipa pinaida Yahova. Midzidzi inango ndisakhala na cifuno cakubwerera nduli mbandisiya kumenya nkhondo. Ndisadziwa kuti Yahova ndi wantsisi na wakulekerera, mbwenye nakuti ndiri na cifuno cakuipa, nkati mwa ntima mbandikomerwa naco, ndisaona kuti nee ndathema kutambira ciphedzo ca Yahova. Kuthimbana na pifuno pyenepi ntsiku zonsene pisakhuya umaso wanga. . . . Pakumala kuleri nsolo wakuti “Você Tem ‘um Coração Para Conhecer’ a Jeová?” mu revista ya A Sentinela ya 15 de Março de 2013, ndadzindikira kuti Yahova asafuna kundiphedza.”

14. (a) Kodi Paulu akhadziwanji thangwi yakufewa kwace? (b) Tinakunda tani kufewa kwathu?

¹⁴ Lerini Aroma 7:21-25. Paulu akhadziwa kuti mphyakunentsa kuthimbana na pifuno pyakuipa pabodzi na kufewa kwathu. Mbwenye iye akhali na cinyindiro cakuti mbadawina nkhondo ineyi angaphembera kuna Yahova, kunyindira ciphedzo cace na kupangiza cikhulupiro ku ntsembe ya Yezu. Ndiye tanimbo kwa ife? Kodi tinakwanisa kuwina nkhondo yakuthimbana na kufewa kwathu? Inde, tingatowezera citsandzo ca Paulu, kunyindira Yahova mwakukwana na kupangiza cikhulupiro ku ntsembe yaciomboli.

15. Kodi Yahova asatiphedza tani toera kupitiriza kukhala akukhulupirika na kupirira mayesero?

¹⁵ Panango midzidzi inango Mulungu anasiya kuti pinthu pinango picitike toera kuona kuti nkhani ineyi ndi yakufunika kwa ife mpaka papi. Mwacitsandzo, tinacitanji khala ife peno wacibale wathu asathimbana na utenda peno kutsalakanwa mwakuipa? Khala tisanyindira mwakukwana Yahova tinadzamphemba toera atipase mphambvu inafuna ife toera kupitiriza kukhala akukhulupirika, akutsandzaya mbatipitiriza kukhala na uxamwali wakuwanga na iye. (Afilipi 4:13) Pitsandzo pya Akristu azinji a ndzidzi wakale na wacincino, pisapangiza kuti phembero inakwanisa kutiwangisa na kutipasa cipapo cinafuna ife toera kupitiriza kupirira.

16, 17. Kodi imwe muli wakutonga toera kucitanji?

¹⁶ Sathani anakomerwa angakuonani kuti mukubwerera nduli mbamufewesa manja anu. Natenepa khalani wakutonga toera ‘kuphatirira mwakuwanga pinthu pyadidi.’ (1 Atesalonika 5:21) Munakwanisa kuwina nkhondo yakuthimbana na Sathani, dziko yace yakuipa na pifuno pyonsene pyakuipa! Munakwanisa kuwina basi ene munganyindira mwakukwana kuti Yahova anadzakuwangisani na kukuphedzani.​—2 Akorinto 4:7-9; Agalata 6:9.

¹⁷ Lekani kuluza cidikhiro. Lekani kubwerera nduli. Pitirizani kumenya nkhondo. Pitirizani kupirira. Khalani na cinyindiro cakukwana cakuti Yahova “anadzakupasani nkhombo mbamukhonda kusowa cinthu.”—Malakiya 3:10, NM.