1, 2. (a) Ndi basa ipi yakufunika kakamwe idapaswa Salomoni? (b) Ndi cinyindiro cipi cikhali na Dhavidhi thangwi ya Salomoni?

SALOMONI atambira basa yakupambulika kakamwe. Yahova ansankhula toera kutsogolera basa yakumanga templo mu Yerusalemu, yakuti ikhali basa yakufunika kakamwe mu ndzidzi unoyu! Templo ikhafunika kukhala ‘yakubalika kakamwe,’ pontho ikhafunika kukhala yakubvekera thangwi yakubalika kwayo. Kupiringana pyonsene, ikhafunika kukhala ‘nyumba ya Yahova, Mulungu wandimomwene.’—1 Pya dziko ya Israele 22:1, 5, 9-11.

² Mambo Dhavidhi akhali na cinyindiro cakuti Mulungu mbadaphedza Salomoni. Mbwenye Salomoni akhali ‘mwana na wakusowa maluso.’ Kodi mbadakhala na cipapo toera kutawira basa yakumanga templo? Peno thunga yace na kusowa kwace maluso mbakudancimwanisa kucita basa ineyi? Natenepa, Salomoni akhafunika kukhala wacipapo mbaphata basa.

3. Salomoni apfundzanji thangwi ya cipapo ca babace?

 ³ Salomoni apfundza pizinji thangwi ya cipapo ca babace, Dhavidhi. Ngakhale mu ndzidzi ukhali Dhavidhi m’phale, iye akunda pinyama pikhafuna kudya mabira a babace. (1 Samwele 17:34, 35) Iye apangizambo cipapo mu ndzidzi udapha iye nyankhondo wamphambvu kakamwe, Goliati. Mwandimomwene, na ciphedzo ca Mulungu na mwala ubodzi, Dhavidhi akunda Goliati.—1 Samwele 17:45, 49, 50.

4. Thangwi yanji Salomoni akhafunika kukhala wacipapo?

⁴ Tinakwanisa kubvesesa kuti thangwi yanji Dhavidhi akhali munthu wakuthema kupanga Salomoni toera kukhala wacipapo mbamanga templo. (Lerini 1 Pya dziko ya Israele 28:20.) Salomoni mbadakhonda kukhala na cipapo, nee mbadakwanisa kucita basa ineyi, ngakhale kuitoma. Pyenepi mbapidatekera kakamwe kupiringana kucita basa mwakuphonyeka.

5. Thangwi yanji tisafunika kukhala acipapo?

⁵ Ninga Salomoni, ife tisafuna ciphedzo ca Yahova toera kukhala acipapo na kucita mabasa anatipasa iye. Natenepa, tendeni tidinge pitsandzo pya anthu angasi adapangiza cipapo mu ndzidzi wakale. Buluka penepo tinaona kuti tinapangiza tani cipapo na kukwanirisa mabasa athu.

6. Ninji pinakudzumatirisani thangwi ya cipapo ca Zuze?

⁶ Zuze apangiza cipapo mu ndzidzi udayeserwa iye toera kucita ulukwali na nkazi wa Putifare. Iye akhadziwa kuti umaso wace mbudakhala pangozwi mbadakhonda kucita ulukwali. Mbwenye, iye apangiza cipapo mukukhonda mwakucimbiza.—Genesi 39:10, 12.

7. Rahabhe apangiza tani cipapo? (Onani cithundzithundzi cakutoma.)

⁷ Rahabhe ndi citsandzo cinango ca munthu wacipapo. Mu ndzidzi udafika Aisraeli akusuzumira dziko pa nyumba pace ku Yeriko, iye mbadakhonda kuaphedza thangwi yakugopa. Mbwenye nakuti akhanyindira Yahova, iye abisa amuna awiri mwacipapo mbaaphedza toera kuthawa mwadidi. (Yoswa 2:4, 5, 9, 12-16) Rahabhe akhakhulupira kuti Yahova ndi Mulungu wandimomwene, pontho akhali na cinyindiro cakuti iye mbadapasa dziko Aisraeli. Iye nee atawirisa kupingizwa na kugopa anthu, kuphatanizambo mambo wa ku Yeriko na anyankhondo ace. Mbwenye, apangiza cipapo mbapulumusa umaso wace na banjace.—Yoswa 6:22, 23.

8. Kodi cipapo ca Yezu caphedza tani apostolo ace?

⁸ Apostolo akukhulupirika a Yezu apangizambo cipapo kakamwe. Iwo aona cipapo cikhali na Yezu, pyenepi pyaaphedza toera kuntowezera. (Mateo 8:28-32; Jwau 2:13-17; 18:3-5) Mu ndzidzi ukhayesera Asadhuki kuakhondesa kulonga pya Yezu, apostolo akhonda kucita pyenepi.—Machitiro 5:17, 18, 27-29.

9. Kodi lemba ya 2 Timoti 1:7 inatiphedza tani toera kudziwa kunabuluka cipapo?

 ⁹ Zuze, Rahabhe, Yezu na apostolo akhali akutonga kucita pinthu pyadidi. Iwo apangiza cipapo, tayu thangwi akhanyindira maluso awo, mbwenye thangwi yakunyindira kwawo Yahova. Midzidzi inango tingafuna cipapo, tisafunikambo kunyindira Yahova, tayu maluso athu. (Lerini 2 Timoti 1:7.) Tendeni tidinge makhundu mawiri anafunika ife kupangiza cipapo: m’banja mwathu na mu mpingo.

10. Thangwi yanji aphale na atsikana Acikristu asafunika kukhala acipapo?

¹⁰ Pana midzidzi mizinji yakuti aphale peno atsikana Acikristu asafunika kupangiza cipapo toera kutumikira Yahova. Iwo anakwanisa kupfundza kubulukira mu citsandzo ca Salomoni, adapangiza cipapo mu ndzidzi udacita iye pisankhulo mwandzeru toera kumanga templo. Maseze aphale na atsikana anakwanisa mukutsogolerwa na anyakubalawo, mbwenye iwo ali na ufulu wakucita pisankhulo pyawo. (Misangani 27:11) Iwo asafunika kukhala na cipapo toera kucita pisankhulo mwandzeru kuti anasankhula tani axamwali, ubalangazi, kupitiriza na makhaliro adidi, pontho ndzidzi unafuna iwo kubatizwa. Iwo asafunika cipapo ceneci thangwi asathimbana na pifuno pya Sathani, wakuti asaxola Mulungu.

11, 12. (a) Kodi Mose apangiza tani cipapo? (b) Aphale na atsikana anatowezera tani citsandzo ca Mose?

¹¹ Cisankhulo cibodzi cakufunika kakamwe cakuti aphale na atsikana asafunika kucicita ndi pifuno pyawo pyauzimu. M’madziko anango, aphale na atsikana asakakamizwa toera kuenda ku universidade na kugumana basa inalipa kobiri izinji. Madziko anango akutcerenga, aphale na atsikana panango anaona kuti asafunika kuphata basa toera kuphedza anyakubalawo na abale awo. Khala muli m’makhaliro anewa, nyerezerani citsandzo ca Mose. Iye akuzwa na mwana wa nkazi wa Farau, natenepa mbadasankhula kukhala na mpfuma kakamwe peno wakufunika kakamwe. Nyerezerani mikakamizo ikhathimbana na iye kubulukira kwa acibale, apfundzisi na aphungu ace! Mbwenye Mose akhali wacipapo mbasankhula kukhala na atumiki a Mulungu. Pidasiya Mose Ejito na mpfuma ya dziko ineyi, anyindira Yahova mwakukwana. (Ahebere 11:24-26) Na thangwi ineyi, Yahova ampasa nkhombo kakamwe, pontho anadzampasa nkhombo zizinji ntsogolo.

¹² Aphale na atsikana angasankhula kutumikira Yahova na kuikha Umambo pa mbuto yakutoma mu umaso wawo, iye anadzaapasa nkhombo. Iye anadzaaphedza toera kutsalakana pyakufuna pya mabanja awo. Mu ndzidzi wa apostolo, m’phale Timoti aphatisira umaso wace toera kutumikira Mulungu, imwe munakwanisambo kucita pyenepi. * (Onani cidzindikiro capantsi.)—Lerini Afilipi 2:19-22.

13. Kodi cipapo caphedza tani mulongo unango toera kukwanirisa pifuno pyace pyauzimu?

¹³ Mulongo unango wa ku Alabama, E.U.A., akhafunika kukhala wacipapo toera kukhazikisa pifuno m’basa ya Mulungu. Iye alemba: “Pikhakula ine, nee ndikhakomerwa kucedza na anthu. Ndikhanentseka kakamwe kucedza na anthu ku Nyumba ya Umambo, makamaka angakhala alendo.” Na  ciphedzo ca anyakubalace na anango mu mpingo, mulongo unoyu akwanirisa cifuno cace cakutumikira ninga mpainiya wa ndzidzi onsene. Iye alonga: “Dziko ya Sathani isakulumiza anthu toera kukhazikisa pifuno pya kuenda ku universidade, kukhala wakubvekera, kobiri izinji na pinthu pinango pyakumanungo.” Mbwenye iye adzindikirambo kuti anthu azinji nee anakwanisa kucita pyenepi, basi ene pisabweresa nyatwa. Iye athimiza: “Kutumikira Yahova kwandicitisa kukhala wakutsandzaya kakamwe thangwi yakukwanirisa pifuno pyanga.”

14. Ndi midzidzi ipi isafunika anyakubala Acikristu kukhala acipapo?

¹⁴ Anyakubala Acikristu asafunikambo cipapo. Mwacitsandzo, panango patrau wanu anakuphembani toera kuphata basa midzidzi yakuthimizira yakuti inakucitisani kukhonda cita kulambira kwa banja, kuenda mu utumiki na kugumanika pa misonkhano. Musafunika cipapo toera kukhonda basa ineyi na kupangiza citsandzo cadidi kuna ananu. Panango anyakubala anango mu mpingo asatawirisa anawo toera kucita pinthu pyakuti imwe nee musafuna kuti ananu apicite. Anyakubala anewa angakubvundzani kuti thangwi yanji, munadzakhala wacipapo toera kuafokotozera mwacilemedzo?

15. Lemba ya Masalmo 37:25 na Ahebere 13:5 anaphedza tani anyakubala?

¹⁵ Pisafunika cipapo toera kuphedza anathu kukhazikisa na kukwanirisa pifuno m’basa ya Mulungu. Mwacitsandzo, panango anyakubala anango anagopa kukulumiza  anawo toera kutumikira ninga apainiya, kutumikira ku mbuto zinafunika ciphedzo, kutumikira ku Bheteli, peno kuphedzera basa yakumanga Nyumba za Umambo na za Misonkhano mikulu. Panango asagopa kuti anawo nee anadzakwanisa kutsalakana umaso wawo angakalamba. Mbwenye anyakubala andzeru asapangiza cipapo na cikhulupiro cakuti Yahova anadzakwanirisa mapikiro ace. (Lerini Masalmo 37:25; Ahebere 13:5.) Anyakubala anapangiza cipapo na kunyindira Yahova, asaphedza anawo toera kucitambo pibodzi pyene.—1 Samwele 1:27, 28; 2 Timoti 3:14, 15.

16. Anyakubala anango aphedza tani anawo toera kukhazikisa pifuno m’basa ya Mulungu, pontho pyenepi pyaphedza tani anawo?

¹⁶ Banja inango ku Estados Unidos yaphedza anawo toera kukhazikisa pifuno pya kutumikira Yahova. Baba wa ana anewa alonga: “Anathu mbadzati kukwanisa kufamba na kulonga, tikhaapanga kutsandzaya kunakhala na ife m’basa ya upainiya na kutumikira mu mpingo. Cincino iwo asacitambo pyenepi.” Iye athimiza, nakuti anawo akwanirisa pifuno pyenepi, pyaaphedza toera kuthimbana na mayesero a Sathani mbapitiriza kutumikira Yahova. M’bale unango wakuti ali na ana awiri alemba: “Anyakubala azinji asawangisira kakamwe toera kuphedza anawo kukwanirisa pifuno ninga masendzekero, ubalangazi na mapfundziro a dziko. Ndi pyakufunika kakamwe kuwangisira kuphedza anathu toera kukwanirisa pifuno pyakuti pinadzaaphedza kukulisa uxamwali wawo na Yahova. Pyenepi ndi pyakutsandzayisa kakamwe, tayu basi thangwi yakukwanirisa pifuno pyauzimu, mbwenye thangwi yakudziwa kuti tiri munjira ibodzi ene.” Khalani na cinyindiro cakuti anyakubala anaphedza anawo kukwanirisa pifuno m’basa ya Mulungu asakhala akutawirika kwa iye.

17. Ndi mabasa api akuti asafunika cipapo mu mpingo Wacikristu?

¹⁷ Ife tisafunikambo kupangiza cipapo mu mpingo. Mwacitsandzo, akulu a mpingo asafunika cipapo mu ndzidzi unatsalakana iwo nkhani ya m’bale peno mulongo adacita madawo makulu, peno mu ndzidzi unaphedza iwo ale akuti umaso wawo uli pangozwi thangwi ya nyatwa za ungumi. Akulu a mpingo anango asacedzera anthu ali n’kaidi toera kupfundza na ale anapangiza cifuno peno kutsogolera misonkhano. Ndiye tani kulonga pya alongo acitsikana? Iwo ali na miyai mizinji toera kupangiza cipapo na kutumikira Yahova. Iwo anakwanisa kutumikira ninga apainiya, kuenda kaphedzera mbuto zinafunika ciphedzo, kuphedzera basa yakumangwa kwa Nyumba za Umambo pacisa cawo na kuenda ku Xikola ya Amwazi Mphangwa a Umambo. Anango asacemerwa toera kuenda ku Xikola ya Gileade.

18. Alongo akukalamba anapangiza tani cipapo?

¹⁸ Ife tisafuna kakamwe alongo athu akukalamba, pontho tisapereka takhuta thangwi yakukhala nawo mu mpingo! Maseze anango nee asakwanisa kucita pizinji m’basa ya Mulungu, iwo asapitiriza kupangiza cipapo na kucita basa. (Lerini Tito 2:3-5.) Mwacitsandzo, mulongo wakukalamba asafunika kupangiza cipapo angaphembwa na akulu a mpingo toera kuphedza mulongo wacitsikana thangwi ya mabvaliro ace. Iye nee anadzapwekera mulongo wacitsikana thangwi ya mabvaliro ace, mbwenye anamphedza mwaufuni toera kuona kuti mabvaliro ace asakhuya tani anango. (1 Timoti  2:9, 10) Alongo akukalamba angapangiza cipapo munjira ineyi, mpingo usakhala wakuwanga.

19. (a) Abale akubatizwa anakhala tani acipapo? (b) Lemba ya Afilipi 2:13 na 4:13 anaphedza tani abale toera kukhala acipapo?

¹⁹ Abale akubatizwa asafunikambo kukhala acipapo mbacita basa. Angatumikira ninga atumiki akutumikira na akulu a mpingo, mpingo usaphindula kakamwe. (1 Timoti 3:1) Mbwenye anango asanyinyirika toera kucita pyenepi. Panango m’bale akhadacita madawo nduli, pontho cincino asapibva kuti nee athema toera kutumikira ninga ntumiki wakutumikira peno nkulu wa mpingo. Panango m’bale anapibva kuti nee ali na maluso toera kutumikira. Khala musapibva tenepo, Yahova anakwanisa kukuphedzani toera kukhala wacipapo. (Lerini Afilipi 2:13; 4:13.) Kumbukani citsandzo ca Mose. Iye akhapibvambo kuti nee athema kucita basa ikhadamphemba Yahova toera kucita. (Eksodo 3:11) Mbwenye Yahova amphedza toera kukhala wacipapo mbacita basa idaphembwa iye. M’bale wakubatizwa anakhala tani na cipapo ninga ceneci? Iye anakwanisa kuphemba ciphedzo ca Yahova na kuleri Bhibhlya ntsiku zonsene. Iye anakwanisa kunyerezera mwacidikhodikho pitsandzo pya anthu adapangiza cipapo analongwa m’Bhibhlya. Pontho anakwanisa kuphemba mwakucepeseka ciphedzo ca akulu a mpingo na kuperekeka toera kuphedzera mu mpingo mabasa anango akufunika. Ife tikuphemba abale onsene akubatizwa toera kukhala acipapo na kuphata basa mwaphinga mu mpingo!

20, 21. (a) Dhavidhi akumbusanji Salomoni? (b) Ndi cinyindiro cipi cisafunika kukhala na ife?

²⁰ Mambo Dhavidhi akumbusa Salomoni kuti Yahova mbadakhala na iye mpaka kumalisa basa yakumanga templo. (1 Pya dziko ya Israele 28:20) Salomoni anyerezera mwacidikhodikho mafala anewa, mbakhonda kutawirisa kuti thunga yace peno kusowa kwace maluso kuncimwanise kucita basa. Mbwenye, iye apangiza cipapo cikulu, pontho mukuphedzwa na Yahova, amanga templo yakubalika kakamwe mu pyaka pinomwe na hafu.

²¹ Yahova aphedza Salomoni, pontho anakwanisambo kutiphedza toera kukhala acipapo na kucita mabasa athu, m’banja mwathu na mu mpingo. (Izaiya 41:10, 13) Tingapangiza cipapo ninga atumiki a Yahova, tinakwanisa kukhala na cinyindiro cakuti iye anatipasa nkhombo cincino na ntsogolo. Natenepa, ‘khalani acipapo mbamucita basa.’