1-2. Kodi mafala a Yahova anagumanika pa Izaiya 65:16, 17, asatiphedza tani toera tikhonde kubwerera nduli?

“LEKANI KUBWERERA NDULI!” Mafala anewa akhali nsolo wa nsonkhano wa gawo wa caka ca 2017. Nsonkhano unoyu watipangiza kuti tinapirira tani nyatwa zinathimbana na ife. Mpaka lero papita pyaka pinai, mbwenye ife tisapitiriza kupirira pinthu pinacitika mu dziko ino.

² Ndi nyatwa zipi zidathimbana na imwe cincino? Kodi mwaferwa na munthu wakufunika pabanja panu peno xamwali wanu? Kodi muli kuthabuka na utenda? Muli kuthimbana na nyatwa thangwi yakukalamba? Kodi muli kuthabuka thangwi ya cidengwa cacibaliro, uphanga peno kutcingwa? Kodi musathabuka thangwi ya utenda wa Koronaviru peno pinthu pinango? Ife tisadikhira ntsiku yakuti nyatwa zenezi zonsene zinadzamala mpaka kuziduwala, pontho cipo zinadzaoneka pontho!—Lerini Izaiya 65:16, 17.

3. Ninji pisafunika ife kucita cincino, pontho thangwi yanji?

³ Umaso ndi wakunentsa mu dziko ino, pontho panango ife tinathimbana na nyatwa zakunentsa kakamwe ntsogolo. (Mat. 24:21) Mwandimomwene ife tisafunika kupitiriza kupirira. Thangwi yanji? Thangwi Yezu alonga kuti: ‘Mungapirira, munadzapulumusa umaso wanu.’ (Luka 21:19) Ife tinakwanisa kupirira tingabvesesa kuti anango asakwanisambo kupirira nyatwa zibodzi zene.

4. Thangwi yanji Yahova asapirira kakamwe kupiringana anthu onsene?

⁴ Yahova Mulungu asapirira kakamwe kupiringana anthu onsene. Panango imwe munadzumatirwa na pyenepi. Mbwenye munganyezera mwadidi imwe munabvesesa kuti thangwi iye asapiria kakamwe. Dziko yapantsi iri kutongwa na Dyabo, na thangwi ineyi iyo yadzala na nyatwa. Yahova ali na mphambvu toera kumalisa nyatwa zenezi cincino, mbwenye iye asadikhira ntsiku inafuna iye kucita pyenepi ntsogolo. (Aroma  9:22) Kusiyapo pyenepi, Mulungu wathu asapitiriza kupirira mpaka ingafika ntsiku idakhazikisa iye toera kumalisa uipi. Tendeni tione pinthu pingasi pyakuti Yahova asapipirira.

5. Kodi dzina ya Mulungu isapswipiswa tani, pontho imwe musapibva tani thangwi ya pyenepi?

⁵ Kupswipiswa kwa dzina yace. Yahova asafuna dzina yace, pontho asafuna kuti anthu onsene ailemedze. (Iza. 42:8) Mbwenye papita pyaka 6.000, dzina ya Mulungu isapitiriza kupswipiswa. (Masal. 74:10, 18, 23) Pyenepi pyatoma m’munda wa Edheni pidalonga Dyabo uthambi kuna Adhamu na Eva kuti Mulungu asaapingiza toera akhonde kukhala na cinthu cikhafuna iwo kuti akhale akutsandzaya. (Gen. 3:1-5) Kutomera pa ndzidzi unoyu, Yahova asapambizirwa kuti asapingiza anthu toera akhonde kukhala na pinthu pinafuna iwo. Yezu akhadzudzumika thangwi ya kupswipiswa kwa dzina ya Babace. Na thangwi ineyi, iye apanga anyakupfundzace toera aphembere tenepa: “Babathu muli kudzulu, dzina yanu mbiceneswe.”—Mat. 6:9.

6. Thangwi yanji Yahova asatawirisa kuti anthu atongane okhene mu ndzidzi uzinji?

⁶ Azinji asaida Mulungu na utongi wace. Yahova ndiye basi adathemba kutonga kudzulu na dziko yapantsi, pontho utongi wace ndi wadidi kakamwe. (Apok. 4:11) Mbwenye Dyabo asanyengeza anthu toera anyerezere kuti Mulungu nee athema kutonga. Mbapidakwata ndzidzi toera kupangiza kuti Yahova athema kutonga, pontho kuti iye asatonga mwadidi kakamwe. Mwaudziwisi, Mulungu asatawirisa kuti anthu atongane okhene mu ndzidzi uzinji toera akwanise kuona kuti angakhonda kutsogolerwa na Nciti, nkhabe cinafuna kwanisa iwo. (Yer. 10:23) Nakuti Mulungu asapirira, nkhabepo munthu anafuna kupenula kuti iye athema kutonga kudzulu na dziko yapantsi. Anthu onsene anadzadziwa kuti Yahova asatonga mwadidi kakamwe, pontho kuti basi ene Umambo wace ndiwo unafuna kubweresa ntendere na citsidzikizo pa dziko yapantsi.

7. Mbani adasandukira Yahova, pontho ninji pinafuna kucita iye kuna anthu anewa?

⁷ Kusandukirwa na anace anango. Yahova acita aanju na anthu mwakulungama na mwakusowa madodo. Adhamu na Eva akhali anthu akulungama, mbwenye Sathani wakuti adzakhala anju wakukhonda bvera aacitisa kusandukira Yahova. Aanju anango na anthu asankhulambo kukhonda bvera Yahova. (Yuda 6) Mukupita kwa ndzidzi, anthu anango a dzindza ya Izraeli yakuti ikhali mbumba idasankhulwa na Mulungu, akhonda kum’bvera mbalambira alungu authambi. (Iza. 63:8, 10) Mwandimomwene Yahova atsukwala na pyenepi. Ngakhale tenepo, iye apirira, pontho iye anapitiriza kupirira mpaka ndzidzi unafuna kufudza iye anthu onsene akukhonda bvera. Pyenepi pinadzabweresa nkhombo kuna atumiki ace akukhulupirika akuti pabodzi na iye asapirira pinthu pyakuipa mu dziko ino!

8-9. Ndi uthambi upi unalonga anthu thangwi ya Yahova, pontho ife tinaphedzera tani Yahova?

⁸ Uthambi wakuti Dyabo asapitiriza kuumwaza. Sathani apambizira ntumiki wakukhulupirika wa Yahova anacemerwa Yobe mbalonga kuti atumiki onsene a Yahova asalambira Mulungu thangwi ya pinthu pinapaswa iwo na iye. (Yobe 1:8-11; 2:3-5) Mpaka lero, Dyabo asapitiriza kupambizira atumiki a Yahova. (Apok. 12:10) Tingapirira pinentso, mbatipitiriza kukhala akukhulupirika kuna Yahova thangwi ya ufuni wathu kuna iye, tinapangiza kuti Sathani ndi nyauthambi. Ninga Yobe, ife tinadzapaswa nkhombo thangwi yakupirira kwathu.—Tiya. 5:11.

⁹ Sathani asaphatisira atsogoleri a mauphemberi authambi toera alonge kuti Yahova  ndi wakuipa ntima, pontho ndiye anathabusa anthu. Mwacitsandzo, mwana angafa, anango asalonga kuti ndi Mulungu ankwata, thangwi iye akhafuna anju unango kudzulu. Mafala anewa asatikanisa Mulungu! Mbwenye ife tisadziwa undimomwene. Tingaphatwa na utenda wakugopswa peno tingaferwa na munthu wakufunika, ife nee tisapasa mulando Mulungu wathu. Mbwenye ife tisakhulupira kuti ntsogolo iye anadzamalisa nyatwa zonsene. Kusiyapo pyenepi, ife tisapanga anthu onsene kuti Yahova ndi Mulungu waufuni. Pyenepi pisacitisa Mulungu toera akwanise kutawira ule ananxola.—Mis. 27:11.

10. Kodi lemba ya Masalmo 22:23, 24 isalonganji thangwi ya Yahova?

¹⁰ Kuthabuka kwa atumiki ace. Yahova ndi Mulungu wantsisi. Iye asatsukwala kakamwe angationa mbatithabuka thangwi ya nyatwa zinapirira ife ninga kutcingwa, mautenda peno kusowa kwathu ungwiro. (Lerini Masalmo 22:23, 24.) Yahova asatsukwala na nyatwa zathu, pontho iye anadzazimalisa. (Onanimbo Eksodo 3:7, 8; Izaiya 63:9.) Kusiyapo pyenepi, inadzafika ntsiku yakuti Yahova ‘anadzapukuta misozi yonsene m’maso mwathu, pontho nkhabe kudzaonekabve kufa, nee kutsukwala, nee kulira, nee kubva kupha.’—Apok. 21:4.

11. Kodi Yahova asapibva tani thangwi ya atumiki ace akukhulupirika adafa?

¹¹ Kutsuwa axamwali ace adafa. Kodi Yahova asapibva tani thangwi ya amuna na akazi akukhulupirika adafa? Iye asafuna kakamwe kuaona pontho. (Yobe 14:15) Yahova asafuna kakamwe kuona pontho xamwali wace Abhrahamu. (Tiya. 2:23) Kusiyapo pyenepi, Yahova atsuwa kakamwe kucedza pontho na Mose wakuti akhalonga naye ‘nkhope na nkhope.’ (Eks. 33:11) Iye asafuna kakamwe kubva pontho Dhavidhi na anyamasalmo anango mbaimba nyimbo zawo zakusimba Mulungu.  (Masal. 104:33) Maseze axamwali anewa a Yahova afa, iye nee aaduwala. (Iza. 49:15) Iye asakumbuka makhaliro awo onsene. Mwandimomwene, kuna Yahova ‘iwo onsene ali m’maso.’ (Luka 20:38) Natenepa inadzafika ntsiku yakuti iye anadzaalamusa muli akufa, mbabvesera pontho maphembero awo akubulukira muntima mbatawira ulambiri wawo. Na thangwi ineyi, khala mwaferwa na munthu anafuna imwe, mafala anewa anakwanisa kukubalangazani.

12. Ndi pinthu pipi pyakuti Yahova asatsukwala napyo kakamwe ntsiku zino zakumalisa?

¹² Anyakuipa asathabusa anthu andzawo. Pidatoma anthu kukhonda bvera Mulungu mu Edheni, Yahova akhadziwa kuti uipi mbudatekera kakamwe. Yahova asaida pinthu pyakuipa pinacitika pa dziko yapantsi lero ninga kusowa ulungami na uphanga. Ndzidzi onsene iye asatsidzikiza anthu akuti asafuna ciphedzo kakamwe, ale akuti nkhabe kwanisa kutsidzikizika okhene ninga ana aumphawi na azice. (Zak. 7:9, 10) Pontho Yahova asatsukwala kakamwe angaona atumiki ace akukhulupirika mbathabuswa peno kuikhwa nkaidi. Khalani na cinyindiro cakuti iye asafuna imwe monsene akuti musapirira pabodzi na iye.

13. Ndi pinthu pipi pyakuipa pinacita anthu lero, pontho Mulungu anadzacitanji na anthu anewa?

¹³ Kutekera kwa makhaliro aulukwali. Anthu acitwa toera kutowezera makhaliro a Mulungu, mbwenye Sathani asafuna kakamwe kuti anthu acite pinthu pyaulukwali. Pidaona Mulungu kuti ‘uipi watekera kakamwe’ mu ntsiku za Nowa, ‘Yahova atsukwala thangwi yakucita anthu pa dziko yapantsi, pontho iye atsukwala muntima mwace.’ (Gen. 6:5, 6, 11) Kodi pinthu pyacinja kubulukira pa ndzidzi unoyu? Nkhabe. Sathani asakomerwa kakamwe thangwi yakuthimizirika kwa mitundu yonsene yaulukwali, kuphatanizambo kupita m’mabonde kwa amuna na akazi, amuna na amuna peno akazi na akazi. (Aef. 4:18, 19) Pontho iye asakomerwa kakamwe ntumiki wa Yahova angacita madawo. Kupirira kwa Yahova kungamala, iye anadzafudza anthu onsene aulukwali akuti nkhabe funa kucinja.

14. Kodi anthu asatsalakana tani dziko yapantsi na pinyama?

¹⁴ Kufudzwa kwa pinthu pidacita iye. Lero anthu asaponderera anthu andzawo toera kuathabusa, pontho nee asatsalakana mwadidi dziko yapantsi na pinyama pidacita Yahova mbapipereka kuna iwo toera apitsalakane. (Koel. 8:9; Gen. 1:28) Asiyentista anango asalonga kuti thangwi yakukhonda kutsalakana mwadidi pinyama, mitundu yakupiringana 1.000.000 ya pinyama nee pinaonekabve mu pyaka pingasi pinatowera. Na thangwi ineyi, ndi pyakukhonda nentsa kubvesesa anthu angalonga kuti dziko yapantsi iri pangozwi! Mbwenye ife tisapereka takhuta kuna Yahova thangwi iye apikira kuti ‘anadzafudza ale anafudza dziko yapantsi,’ pontho kuti anadzacitisa dziko yonsene yapantsi kukhala paraizu.—Apok. 11:18; Iza. 35:1.

15-16. Ninji cinafuna kutikulumiza toera tipitirize kupirira ninga pinacita Yahova? Perekani citsandzo.

¹⁵ Mu pyaka pizinji, Babathu wakudzulu asapirira nyatwa zizinji. (Onani bokosi ya nsolo wakuti “ Ndi Pinthu Pipi Pinapirira Yahova?”) Yahova mbadakwanisa kufudza kalene dziko ino yakuipa. Mbwenye kupirira kwace kusatiphedza kakamwe! Toera kubvesesa pyenepi nyerezerani kuti mamuna na nkazace apangwa kuti mwanawo wakuti adzati kubalwa ali na utenda wakugoswa, pontho angabalwa anathimbana na nyatwa zizinji, kusiyapo pyenepi, iye anafa mbaciri mwana. Ngakhale tenepo, anyakubala anewa atsandzaya pidabalwa mwanawo,  maseze akhadziwa kuti pinakhala pyakunentsa toera kuntsalakana. Nakuti iwo asanfuna, iwo asapirira nyatwa zonsene toera kumphedza kuti akhale na umaso wadidi kakamwe.

¹⁶ Munjira ibodzi ene, anthu onsene a dzindza ya Adhamu na Eva asabalwa na madawo. Ngakhale tenepo, Yahova asaafuna, pontho asaatsalakana. (1 Juwau 4:19) Mwakusiyana na anyakubala adalonga ife, Yahova anakwanisa kumalisa nyatwa zathu. Iye akhazikisa ndzidzi wakuti anadzamalisa nyatwa zonsene zinathimbana na anthu. (Mat. 24:36) Ufuni wa Yahova usatikulumiza toera tipitirize kupirira mpaka pa ndzidzi unoyu.

17. Kodi mafala anagumanika pa Ahebheri 12:2, 3 asatiwangisa tani toera tipitirize kupirira?

¹⁷ Yahova asapirira kakamwe. Yezu atowezerambo kupirira kwa Babace. Mwacitsandzo, pikhali iye pa dziko yapantsi, Yezu apirira kutikanwa, kupaswa manyadzo na kuthabuswa pamuti udakhomerwa iye thangwi ya ife. (Lerini Ahebheri 12:2, 3.) Mwakukhonda penula, kupirira kwa Yahova kwapasa mphambvu Yezu toera akwanisembo kupirira. Munjira ibodzi ene, kupirira kwa Yahova kunatipasambo mphambvu toera tikwanise kupirira.

18. Lemba ya 2 Pedhru 3:9 isatiphedza tani toera kubvesesa pinthu pinacitika thangwi yakupirira kwa Yahova?

¹⁸ Lerini 2 Pedhru 3:9. Yahova asadziwa ndzidzi wadidi toera kufudza dziko ino yakuipa. Mbwenye kupirira kwace kusacitisa anthu azinji kupfundza Bhibhlya mbandziwa. Pontho cincino mwinji ukulu wa anthu akupiringana mamiliyau 8 asamulambira. Onsene asapereka takhuta thangwi Yahova apirira mpaka iwo kubalwa, kupfundza toera kunfuna, mbaperekeka kuna iye. Yahova angadzapasa nkhombo pikwi na pikwi pya anthu anafuna kupirira mpaka kunkhomo, pinadzaoneka pakweca kuti iye akhali na mathangwi adidi toera kupirira!

19. Tisafunika kupitiriza kucitanji, pontho ndi nkhombo zipi zinafuna kudzatambira ife?

¹⁹ Yahova asatipfundzisa kuti tinapirira tani mwakutsandzaya. Mwakukhonda tsalakana pinthu pyonsene pyakutsukwalisa na nyatwa zidabweresa Sathani, Yahova asapitiriza kukhala “Mulungu wakutsandzaya.” (1 Tim. 1:11) Munjira ibodzi ene, ife tinakwanisambo kupitiriza kukhala akutsandzaya mu ndzidzi unadikhira ife mwakupirira kuti Yahova acenese dzina yace, apangize kuti athema kutonga kudzulu na dziko yapantsi, amalise pinthu pyonsene pyakuipa na nyatwa zinathimbana na ife lero. Natenepa tendeni tipitirize kupirira, mbatibalangazwa thangwi ya kudziwa kuti Babathu wakudzulu asapirirambo. Tingacita pyenepi, mafala awa anadzakhala andimomwene kuna m’bodzi na m’bodzi wa ife: “Nyakutsandzaya ndi munthu anapitiriza kupirira nyatwa, thangwi angaoniwa kuti ndi wakuthema anadzatambira nthimba ya umaso, wakuti Yahova apikira toera kupasa ale anapitiriza kunfuna.”—Tiya. 1:12.