Thangwi yanji mu ndzidzi ukhafuna kufa Yezu alonga mafala a Dhavidhi anagumanika pa Masalmo 22:1?

Mafala anango adalonga Yezu mbadzati kufa ndi ale anagumanika pa Mateu 27:46: “Mulungu wanga, Mulungu wanga, thangwi yanji mwandisiya?” Pidalonga Yezu mafala anewa, akwanirisa mafala a Dhavidhi anagumanika pa Masalmo 22:1. (Marko 15:34) Mbapidakhala pyakudawika kulonga kuti Yezu aphatisira mafala anewa thangwi iye akhadatsukwala peno akhadaluza cikhulupiro kuna Mulungu pa ndzidzi unoyu. Yezu akhadziwa kuti thangwi yanji akhafunika kufa, pontho iye akhali dzololo toera kupereka umaso wace. (Mat. 16:21; 20:28) Yezu akhadziwambo kuti pa ndzidzi ukhafuna iye kufa, Yahova nee mbadantsidzikiza. (Yobe 1:10) Natenepa Yahova nee atsidzikiza Yezu toera kupangiza kuti iye mbadapitiriza kukhala wakukhulupirika mwakukhonda tsalakana nyatwa zikhafuna kuthimbana na iye mpaka kufa.—Marko 14:35, 36.

Mphapo thangwi yanji Yezu alonga mafala anewa a nyamasalmo? Maseze ife nee tiri na cinyindiro consene, tendeni tilonge mathangwi mangasi akuti panango acitisa Yezu kulonga mafala anewa. *

Mukulonga mafala anewa, panango Yezu akhagomezera kuti Yahova nee mbadantsidzikiza toera akhonde kufa. Yezu akhafunika kupereka umaso wace ninga ciomboli mwakusowa ciphedzo ca Yahova. Yezu akhali munthu waunyama, natenepa iye akhafunika ‘kufera anthu onsene.’—Aheb. 2:9.

 Mukulonga mafala anagumanika pa vesi ineyi ya masalmo, kodi Yezu akhafuna kuti anango anyerezere pinthu pyonsene pinalongwa m’bukhu ineyi ya masalmo? Mu ndzidzi wa Yezu, Ayuda akhali na nsambo wakuikha m’manyerezero pinthu pizinji pinalongwa m’bukhu ineyi ya masalmo. Iwo angabva vesi ibodzi basi ya masalmo, akhakwanisa kunyerezera pinthu pinalongwa m’bukhu ineyi. Khala Yezu akhanyerezera pyenepi, pisaoneka kuti iye aphedza atowereri ace azinji akuti akhali Ayuda toera kukumbuka maprofesiya mazinji anagumanika m’bukhu ineyi ya masalmo analonga pya kufa kwace. (Masal. 22:7, 8, 15, 16, 18, 24) Kusiyapo pyenepi, mavesi akumalisa a kapitulu ineyi ya masalmo asasimba Yahova, pontho iwo asafokotoza kuti iye ndi Mambo wa pa dziko yonsene yapantsi.—Masal. 22:27-31.

Mukuphatisira mafala anewa a Dhavidhi, kodi Yezu akhafuna kulonga kuti akhali wakusowa mulando? Yezu mbadzati kuphiwa, anyakutonga miseru Aciyuda ampambizira kuti iye atikana Mulungu. (Mat. 26:65, 66) Anyakutonga miseru Aciyuda agumanyikana mwakucimbiza namasiku mbatonga nseru unoyu mwakukhonda kutowezera mitemo. (Mat. 26:59; Marko 14:56-59) Pidalonga Yezu mafala akuti: “Mulungu wanga, Mulungu wanga, thangwi yanji mwandisiya?” Panango iye akhafuna kupangiza kuti nee acita cinthu cakuipa toera kuphiwa.

Kodi mafala adalonga Yezu asakumbusambo anango kuti Dhavidhi adalemba bukhu ya masalmo athabuka thangwi yakukhonda kukhulupira Yahova? Mbvundzo udacita Dhavidhi nee usapangiza kuti iye nee akhakhulupira Mulungu. Pakumala kucita mbvundzo unoyu, iye alonga kuti akhanyindira kuti Yahova mbadapulumusa atumiki ace, pontho Yahova apitiriza kumpasa nkhombo. (Masal. 22:23, 24, 27) Munjira ibodzi ene, Maseze Yezu “Mwana wa Dhavidhi” athabuka pa muti udakhomerwa iye, pyenepi nee pisabveka kuti iye nee akhali wakutawirika kuna Yahova.—Mat. 21:9.

Kodi mafala anewa adalonga Yezu asapangiza kuti iye akhadatsukwala kakamwe thangwi Yahova nee antsidzikiza toera iye apangize kukhulupirika kwace? Cifuno cakutoma ca Yahova nee cikhali cakuti Mwanace athabuke mbafa. Mbwenye iye atawirisa kuti Mwanace athabuke mbafa thangwi ya madawo adacita Adhamu na Eva. Yezu nee akhadacita cinthu cakuipa, mbwenye iye akhafunika kuti athabuke na kufa toera kutawira mibvundzo idacita Sathani na kupereka umaso wace toera kulipa umaso udaluza Adhamu. (Marko 8:31; 1 Ped. 2:21-24) Pyenepi mbapidakwanisika basi ene khala Yahova asiya kutsidzikiza Yezu pa ndzidzi unoyu.

Kodi Yezu akhayesera kuphedza atowereri ace toera abvesese thangwi idacitisa Yahova kutawirisa kuti iye aphiwe munjira ineyi? * Yezu akhadziwa kuti kufa kwace ninga phanga pa muti mbakudacitisa anthu azinji kusiya kuntowera. (1 Akor. 1:23) Khala atowereri ace akhaikha manyerezero awo ku mathangwi adacitisa kuti iye aphiwe, iwo mbadabvesesa mabvekero a kufa kwace. (Agal. 3:13, 14) Buluka penepo iwo mbadamuona ninga Mpulumusi, tayu ninga phanga.

Mwakukhonda tsalakana mathangwi adacitisa Yezu kulonga mafala anewa, iye akhadziwa kuti kufa pa muti munjira ineyi kukhacita khundu ya cifuno ca Yahova. Pidapita ndzidzi pang’ono pakumala kulonga mafala anagumanika m’bukhu ya masalmo, Yezu alonga: “Pyonsene pyakwanirisika!” (Juwau 19:30; Luka 22:37) Natenepa, kutawirisa kudacita Yahova kuti Yezu athabuke munjira ineyi mu ndzidzi wakucepa pyacitisa kuti Yezu akwanirise cifuniro cidadzera iye pa dziko yapantsi. Pontho pyenepi pyacitisa kuti iye akwanirise pinthu pyonsene pidalembwa thangwi ya iye “mu Mwambo wa Mose na m’mabukhu a Aprofeta na a Masalmo.”—Luka 24:44.