1. Kodi paraizu yauzimu ninji, pontho anthu ali mwenemu asafunika kucitanji?

 LERO, pa dziko yapantsi pali na paraizu iri na anthu azinji akuti asakhala muntendere, pontho asacita mabasa mazinji adidi toera kuphedza anango. Anthu ali m’paraizu ineyi asankhula kupitiriza mwenemu, pontho asafuna kuti anthu azinji kakamwe apitembo m’paraizu ineyi yadidi kakamwe. Ndi ipi paraizu ineyi? Ndi paraizu yauzimu! a

2. Ninji pinatidzumatirisa thangwi ya paraizu yauzimu?

² Sathani acitisa kuti dziko ino ikhale yakugopswa, yakudzala na uphanga na kuidana. (1 Juw. 5:19; Apok. 12:12) Ngakhale tenepo, ndi pyakudzumatirisa kuona njira inacitisa Yahova kuti atumiki ace akhale mwakukhonda dzudzumika na muntendere. Mulungu wathu waufuni asadziwa mwadidi kuti dziko ino isatithabusa, pontho isaticitisa kukhala akusowa citsidzikizo. Na thangwi ineyi, iye asatipasa citsidzikizo cinafuna ife toera tintumikire mwakutsandzaya na kupitiriza kuthambaruka mwauzimu. Bhibhlya isalonga paraizu yauzimu ninga “mbuto yakuthawira” na “munda wakuthirirwa mwadidi.” (Iza. 4:6; 58:11) Na ciphedzo ca Yahova, ale ali m’paraizu ineyi anakwanisa kukhala akutsandzaya na akutsidzikizika ngakhale mu ntsiku zino zakumalisa zakuti ndi zakunentsa kakamwe.—Iza. 54:14; 2 Tim. 3:1.

3. Mafala anagumanika pa Izaiya kapitulu 65 atoma kukwanirisika lini?

³ Yahova aphatisira mprofeta Izaiya toera kulemba kuti umaso mbudakhala tani m’paraizu yauzimu. Imwe munakwanisa kuleri pinthu pyenepi pidalemba iye mu kapitulu 65 ya bukhu ya Izaiya. Profesiya ineyi pakutoma yakwanirisika mu  caka 537 Kristu Mbadzati Kubalwa, mu ndzidzi udasudzulwa Ayuda mu ubitcu ku Bhabhilonya mbabwerera ku dziko yawo. Yahova apasa nkhombo Ayuda anewa, pontho aaphedza toera kumanga pontho papswa nzinda wa Yerusalemu wakuti ukhadamala kufudzwa. Nzinda wa Yerusalemu wakhala pontho wakubalika, pontho templo yamangwa papswa toera ikhale mbuto yakulambira Yahova mu Izraeli.—Iza. 51:11; Zak. 8:3.

4. Mafala a Izaiya kapitulu 65 asakwanirisika tani ntsiku zino?

⁴ Profesiya ya Izaiya yatoma kukwanirisika kaciwiri mu caka 1919. Thangwi mu caka ceneci, alambiri a Yahova asudzulwa mu pipfundziso pya Bhabhilonya Wankulu. Na thangwi ineyi, paraizu yauzimu yatoma kukula, pontho mipingo mizinji yakhazikiswa pa dziko yonsene. Amuna na akazi akuti kale akhali na makhaliro aulukwali na auphanga atoma kupangiza makhaliro adidi Acikristu na “kubvala uunthu upswa udacitwa mwakubverana na cifuno ca Mulungu.” (Aef. 4:24) Ndimomwene kuti pinthu pizinji pyadidi pidalemba Izaiya pinadzacitika pyonsene mu dziko ipswa. Mbwenye ngakhale cincino, ale ali m’paraizu yauzimu anakwanisa kukhala na nkhombo zizinji. Tendeni tione kuti thangwi yanji ndi pyadidi kuna ife kukhala m’paraizu yauzimu, pontho thangwi yanji nee tisafunika kubulukamo.

TISAPIBVA TANI THANGWI YAKUKHALA M’PARAIZU YAUZIMU?

5. Mwakubverana na Izaiya 65:13, ndi nkhombo zipi ziri na ife thangwi yakukhala m’paraizu yauzimu?

⁵ Ungumi wadidi na cakudya cadidi. Profesiya ya Izaiya isapangiza kuti pali na kusiyana kukulu kuna anthu ali m’paraizu yauzimu na ale akuti nee ali m’paraizu ineyi. (Lerini Izaiya 65:13.) Yahova asapasa pizinji kupiringana pinafuna atumiki ace toera apitirize kumulambira. Iye asatipasa nzimu wace wakucena, Bhibhlya na cakudya cizinji cauzimu toera tikwanise ‘kudya, kumwa, mbatitsandzaya.’ (Apok. 22:17) Makhaliro athu ndi akusiyana kakamwe na a anthu akuti nee ali m’paraizu yauzimu. Anthu anewa ali na ‘njala, nyota, pontho asakhala na manyadzo.’ Thangwi iwo nee ali na uxamwali na Mulungu.—Amosi 8:11.

6. Lemba ya Yoeli 2:21-24 yalonga tani pinthu pinango pinatipasa Yahova, pontho tisafunika kucitanji toera kuphedzeka napyo?

⁶ Mprofeta Yoeli aphatisira pinthu pya ntsiku na ntsiku ninga pyakudya, vinyu na mafuta toera kupangiza kuti Yahova asapasa mwakudzala manja. Iye asatipasa pyakudya pyonsene pyauzimu pinafuna ife. (Yoeli 2:21-24) Yahova asacita pyenepi mukuphatisira Bhibhlya, mabukhu athu, saiti ya jw.org, misonkhano yathu ya mpingo, ya cisa na ya gawo. Tingaphatisira mwadidi pinthu pyenepi pinatipasa Yahova, tinapibva kuti tiri na ungumi wadidi, tisadyeswa mwadidi mwauzimu.

7. Thangwi yanji tiri na “makhaliro adidi a mitima”? (Izaiya 65:14)

⁷ Kutsandzaya. Atumiki a Mulungu anakwanisa ‘kukhuwa mwakutsandzaya’ thangwi mitima yawo yadzala na kupereka takhuta thangwi ya pinthu pinacita Yahova. (Lerini Izaiya 65:14.) Ife tiri na “makhaliro adidi a mitima” thangwi tisawangiswa na undimomwene wa Bhibhlya, kuphatanizambo cidikhiro cathu thangwi ya ntsembe ya Yezu. Kusiyapo pyenepi, kucedza na abale na alongo athu thangwi ya pinthu pyenepi pyadidi kusatitsandzayisa kakamwe.—Mas. 34:8; 133:1-3.

8. Ndi pinthu pipi piwiri pinapangiza kuti atumiki a Yahova ali m’paraizu?

⁸ Ufuni na kuphatana kwa atumiki a Yahova ndipyo pinapangiza kuti iwo ali m’paraizu yauzimu. ‘Kuphatana’ kweneku kusapangiza kuti umaso unadzakhala tani mu dziko ipswa, mu ndzidzi wakuti atumiki a Yahova anadzakhala akufunana kakamwe na akuphatana kakamwe  kupiringana lero. (Akol. 3:14) Mulongo m’bodzi alonga pinthu pidaona iye paulendo wakutoma udadziwa iye Mboni za Yahova. Iye alonga: “Ine ndikhadzati kuona kuti anthu asakhala tani akutsandzaya, ngakhale pabanja pathu. Ulendo wakutoma udaona ine kuti mwandimomwene anthu asatsalakanana mwaufuni ndi Mboni za Yahova.” Munthu onsene anafuna kukhala na kutsandzaya kwandimomwene asafunika kukhala m’paraizu yathu yauzimu. Anthu anakwanisa kulonga pinafuna iwo thangwi ya Mboni za Yahova, mbwenye ife tisadziwa kuti tiri na dzina yadidi na makhaliro adidi pamaso pa Yahova na kuna abale na alongo athu.—Iza. 65:15.

9. Mwakubverana na Izaiya 65:16, 17, ninji pinafuna kudzacitika na nyatwa?

⁹ Kupfulika na kukhurudzika. Lemba ya Izaiya 65:14 isalonga kuti ale anasankhula kukhala kunja kwa paraizu yauzimu, ‘asalira thangwi yakubva kupha m’mitima yawo na asakhuwa thangwi yakusanyika m’mitima yawo.’ Ndimomwene kuti atumiki a Mulungu asathimbanambo na pinentso pizinji. Mbwenye mwakukhonda dembuka, pinentso pyenepi ‘pinadzaduwalika, pontho nee pinadzaonekabve pamaso pa Mulungu.’ (Lerini Izaiya 65:16, 17.) Yahova anadzamalisa nyatwa zathu, pontho mukupita kwa ndzidzi anadzamalisa manyerezero akuipa akuti asatitsukwalisa kakamwe.

10. Thangwi yanji musaona kuti ndi mwai kukhala pabodzi na abale na alongo? (Onanimbo foto.)

¹⁰ Ngakhale cincino, ife tisakhala akukhurudzika tingaenda ku misonkhano. Thangwi kweneko tisakwanisa kuduwala pinthu pinatidzudzumisa mu dziko ino yakuipa. Tingapangiza makhaliro anacita khundu ya misapo ya nzimu wakucena wa Mulungu ninga ufuni, kukomerwa, ntendere, kukoma ntima na udidi, tiri kuphedzera toera tipitirize kukhala akukhurudzika na akupfulika m’paraizu yauzimu. (Agal. 5:22, 23) Kuna ife tonsene ndi mwai ukulu kakamwe kukhala mu gulu ya Mulungu. Ale anapitiriza kukhala m’paraizu yauzimu, mwakukhonda dembuka anadzaona kukwanirisika kwa maprofesiya onsene a Mulungu analonga pya kucita “kudzulu kupswa na dziko yapantsi ipswa.”

11. Mwakubverana na Izaiya 65:18, 19, tisapibva tani thangwi yakudziwa kuti Yahova acita paraizu yauzimu?

¹¹ Kupereka takhuta na kutsandzaya. Izaiya alonga kuti thangwi inango inaticitisa ‘kutsandzaya’ m’paraizu yauzimu ndi yakuti paraizu ineyi yacitwa na Yahova. (Lerini Izaiya 65:18, 19.) Mu dziko ino anthu azinji nee asapfundza thangwi ya Mulungu. Na thangwi ineyi, Yahova asatiphatisira toera kuaphedza kuti  apite m’paraizu yauzimu. Ife tisakomerwa kakamwe na nkhombo zonsene zinatipasa Yahova thangwi yakukhala mu undimomwene, pontho tisafuna kupanga anthu onsene thangwi ya nkhombo zenezi.—Yer. 31:12.

12. Musapibva tani mungaleri mapikiro anagumanika pa Izaiya 65:20-24?

¹² Kodi imwe nee muli wakutsandzaya, pontho nee musapereka takhuta munganyerezera cidikhiro ciri na ife thangwi yakukhala m’paraizu yauzimu? Nyerezerani kuti umaso unadzakhala tani mu dziko ipswa. Bhibhlya isalonga: “Mwenemu nee munadzaonekabve mwana wakuyamwa wakuti anadzakhala m’maso mu ntsiku zakucepa, nee munadzaonekabve nkhalamba yakuti inadzafa mbidzati kukwanirisa ntsiku zace.” Ife ‘tinadzamanga nyumba mbatikhalamo; pontho tinadzabzwala minda ya mauva mbatidya misapo yace.’ Ife ‘nee tinadzaphata basa papezi’ thangwi ‘tinadzapaswa nkhombo na Yahova.’ Iye apikira kutipasa umaso wakuti uli na cifuniro, wakutsidzikizika na wakutsandzayisa. ‘Mbatidzati kucemera,’ Yahova anadzadziwa pinafuna m’bodzi na m’bodzi wa ife, pontho ‘anadzakwanirisa cifuno ca pinthu pyonsene piri na umaso.’—Iza. 65:20-24; Mas. 145:16.

13. Lemba ya Izaiya 65:25 isapangiza tani macinjo anacita anthu angapfundza undimomwene?

¹³ Ntendere na citsidzikizo. Na ciphedzo ca nzimu wakucena wa Yahova, anthu azinji akuti kale akhali auphanga na akusowa ulungami acinja umaso wawo mwakudzumatirisa. (Lerini Izaiya 65:25.) Thangwi yakuwangisira kwawo, iwo akwanisa kusiya makhaliro akuipa. (Aroma 12:2; Aef. 4:22-24) Ndimomwene kuti thangwi yakusowa ungwiro, ife tisapitiriza kucita madodo. Mbwenye Yahova ali kugumanya “anthu a mitundu yonsene” ananfuna, pontho akuti asafunana unango na ndzace toera akhale muntendere na akuphatana. (Tito 2:11) Pyenepi ndi pinthu pyakuti basi ene ndi Mulungu Wamphambvu Zonsene anakwanisa kupicita!

14. Citsandzo ca m’bale adalongwa pa ndima cisapangiza tani kuti mafala anagumanika pa Izaiya 65:25 ndi andimomwene?

¹⁴ Kodi munthu anakwanisadi kucinja umaso wace? Onani pidacitikira m’phale unango wakuti pikhali iye na pyaka 20 afungirwa nkaidi kazinji kene, pontho akhali na umaso waulukwali na wauphanga. Iye akhafungirwa nkaidi thangwi ya kuba makaru, kuba m’manyumba na kucita pinthu pinango pyakuipa. Ndzidzi onsene iye akhamenyana na anthu. Mbwenye pidabva iye undimomwene wa Bhibhlya mbatoma kugumanika pa misonkhano ya Mboni za Yahova, iye akhala na cinyindiro cakuti agumana cinthu cakufunika kakamwe mu umaso wace cakuti ndi paraizu yauzimu. Pidamala iye kubatizwa, ndzidzi onsene akhanyerezera kuti mafala anagumanika pa Izaiya 65:25 asabverana tani na pinthu pidancitikira. Iye asiya kukhala waukali na wauphanga ninga nkhalamu, mbakhala munthu wantendere ninga bira.

15. Thangwi yanji tisafuna kuphedza anthu anango toera alambirembo Yahova pabodzi na ife, pontho tinacita tani pyenepi?

¹⁵ Lemba ya Izaiya 65:13 isatoma na mafala awa: “Yahova Mbuya Wankulu Kakamwe alonga.” Pontho vesi 25 isamalisa na mafala akuti “alonga Yahova.” Ife tisadziwa kuti pinalonga Yahova ndzidzi onsene pisacitika. (Iza. 55:10, 11) Pyenepi pisabveka kuti paraizu yauzimu ndi yandimomwene. Yahova agumanya alambiri ace munjira yakudzumatirisa. Pakati pa alambiri a Yahova, ife tinakwanisa kukhala muntendere ninga nee tiri mu dziko ino yakuipa. (Mas. 72:7) Na thangwi ineyi, ife tisafuna kuphedza anthu azinji kuti alambirembo Yahova pabodzi na ife. Tinakwanisa kucita pyenepi tingawangisira m’basa yakucita anyakupfundza.—Mat. 28:19, 20.

 KUPHEDZA ANANGO TOERA APITE M’PARAIZU YAUZIMU

16. Ninji pinafuna kuphedza anango toera afune kupita m’paraizu yauzimu?

¹⁶ M’bodzi na m’bodzi wa ife anakwanisa kucita cinthu cakufunika toera kuphedza anango kuti afunembo kupita m’paraizu yauzimu. Ife tinacita pyenepi tingatowezera Yahova. Iye nee asakakamiza anthu toera apite mu gulu yace. M’mbuto mwace, Yahova ‘asabweresa’ anthu kuna iye mwakukoma ntima. (Juw. 6:44; Yer. 31:3) Na thangwi ineyi, anthu a mitima yadidi angamala kupfundza makhaliro a Yahova, iwo asafuna kukhala axamwali ace. Mphapo makhaliro athu na macitiro athu adidi anaphedza tani anthu anango toera apite m’paraizu yauzimu?

17. Tisafunika kucitanji toera anango afunembo kupita m’paraizu yauzimu?

¹⁷ Njira ibodzi yakucitisa anthu kuti afune kupita m’paraizu yauzimu ndi kutsalakana abale na alongo athu mwaufuni na mwakukoma ntima. Munthu angabwera pa Nyumba ya Umambo paulendo wakutoma, ife tisafuna kuti iye akhale na mabvero mabodzi ene ninga adakhala na ale akuti panango agumanika pa misonkhano mu mpingo wa ku Korinto. Iwo alonga: “Mwandimomwene, Mulungu ali na imwe.” (1 Akor. 14:24, 25; Zak. 8:23) Toera kucita pyenepi, ife tisafunika kupitiriza kubvera uphungu wakukhala “muntendere unango na ndzace.”—1 Ates. 5:13.

18. Tisafunika kucitanji toera anthu anango afunembo kupita mu gulu ya Yahova?

¹⁸ Ndzidzi onsene tisafunika kuwangisira kuona abale na alongo athu ninga munaaonera Yahova. Ife tinakwanisa kucita pyenepi tingaona makhaliro awo adidi, tayu madodo awo, thangwi mwakukhonda dembuka madodo awo nee anadzaonekabve. Khala tiri na nkandzo na m’bale peno mulongo tisafunika kuumalisa  mwaufuni, mbatikhala ‘akukoma ntima kuna unango na ndzace, akubvera ntsisi kakamwe, mbatilekererana na ntima onsene unango na ndzace.’ (Aef. 4:32) Tingacita pyenepi, anthu anango anafuna kupita m’paraizu yauzimu toera atsalakanwembo munjira ineyi. b

PITIRIZANI M’PARAIZU YAUZIMU

19. (a) Mwakubverana na bokosi yakuti “ Iwo Abuluka, Mbwenye Abwerera,” anthu anango alonganji pidabwerera iwo m’paraizu yauzimu? (b) Tisafunika kupitiriza kucitanji? (Onanimbo foto.)

¹⁹ Ife tisatsandzaya kakamwe thangwi yakukhala m’paraizu yauzimu! Lero, paraizu ineyi ndi yakubalika kakamwe, pontho muli na anthu azinji kakamwe kupiringana kale. Ife tinapitiriza kupereka takhuta kuna Yahova thangwi ya kuticitira paraizu ineyi yauzimu. Khala munthu asafuna kukhala wakutsandzaya, wakukhurudzika na wakutsidzikizika, asafunika kupita m’paraizu yauzimu mbapitiriza mwenemu. Mbwenye tisafunika kucita mphole-mphole thangwi Sathani anapitiriza kutinyengeza toera tibuluke mwenemu. (1 Ped. 5:8; Apok. 12:9) Ife nee tisafuna kuntawirisa kuti iye acite pyenepi kuna ife. Tendeni ticite pyonsene pinakwanisa ife toera kutsidzikiza kubalika, kucena na ntendere uli na ife m’paraizu yauzimu.