Mphangwa zidalemba Mateo na Luka zinalonga pya kutoma kwa umaso wa Yezu ndi zakusiyana thangwi anyakulemba anewa akhagomezera umaso wa anthu awiri akusiyana.

Bukhu ya Mateo isagomezera pya umaso wa Zuze. Iyo isalonga mabvero a Zuze pidadziwa iye kuti Mariya akhali na mimba, pidalota iye mbakafokotozerwa na anju thangwi ya mimba ya Mariya, pontho njira idatowezera iye pitsogolero pya anju. (Mateo 1:19-25) Isafokotozambo kuti Zuze acenjezwa tani na anju mu ndoto toera athawire ku Ejito pabodzi na banjace, pontho abvera tani. Bukhu ya Mateo isatipangambo kuti Zuze alota pontho mbakapangwa na anju toera kubwerera ku dziko ya Israeli na pakubwerera, akhafunika kukhala ndzidzi ungasi na banjace mu Nazareti. (Mateo 2:13, 14, 19-23) Makapitulu mawiri akutoma a Evanjelyu yace, Mateo alonga dzina ya Zuze maulendo masere, mbwenye ya Mariya basi ene kanai.

Mbwenye bukhu ya Luka isagomezera kakamwe pya Mariya. Isafokotoza pya ndzidzi udacedza iye na anju Gabhriyeli, pidaenda iye kaona Elizabheti na mafala ace akusimba Yahova. (Luka 1:26-56) Isafokotozambo pidalonga Simeoni kuna Mariya thangwi ya nyatwa zikhafuna kuthimbana na Yezu ntsogolo. Buluka penepo Luka afokotoza pidacitika mu ndzidzi udaenda Yezu ku templo na acibale ace pikhali iye na pyaka 12 pyakubalwa. Mu ndzidzi unoyu, Luka aphatisira mafala adalonga Mariya, tayu Zuze, pontho asatipanga pinthu pikhanyerezera Mariya thangwi ya pyenepi. (Luka 2:19, 34, 35, 48, 51) Makapitulu mawiri akutoma a Evanjelyu yace, Luka alonga dzina ya Mariya maulendo 12, mbwenye ya Zuze basi ene maulendo 3. Natenepa, Mateo agomezera kakamwe pya Zuze. Mbwenye Luka agomezera kakamwe pya Mariya.

Acibale a Yezu alongwambo mwakusiyana m’Maevanjelyu anewa mawiri. Mateo alonga pya acibale a Zuze, mbapangiza kuti Zuze akuza Yezu ninga mwanace, pontho mwakubverana na mwambo iye akhali na ufulu wakukhala mambo ninga Dhavidhi. Thangwi yanji? Thangwi Zuze akhali wa dzindza ya Mambo Dhavidhi kubulukira kwa mwanace, Salomoni. (Mateo 1:6, 16) Mbwenye, Luka alonga pya acibale a Mariya mbapangiza kuti Yezu akhali na ufulu wacibaliro toera kukhala mambo ninga Dhavidhi akhali wa ‘dzindza ya Dhavidhi.’ (Aroma 1:3) Thangwi yanji? Thangwi Mariya akhali wa dzindza ya Mambo Dhavidhi kubulukira kwa mwanace, Natane. (Luka 3:31) Mphapo thangwi yanji Luka nee alonga kuti Mariya akhali mwana wa Eli? Thangwi madzindza akale akhadziwika na madzina a amuna, tayu a akazi. Natenepa, pidalonga Luka pya Zuze ninga mwana wa Eli, pikhabveka kuti Zuze akhali nkamwene wa Eli.—Luka 3:23.

Ndandanda wa acibale a Yezu mu Evanjelyu ya Mateo na Luka usapangiza pakweca kuti Yezu akhali Mesiya wakupikirwa na Mulungu. Dzindza ya Yezu ikhadziwika kakamwe kwakuti Afarisi na Asadhuki, nee apenula kuti iye akhali wa dzindza ya Mambo Dhavidhi. Mphangwa zenezi za Mateo na Luka zinalonga pya acibale a Yezu zisawangisa cikhulupiro cathu mbatinyindira mwakukwana kuti pyonsene pidapikira Mulungu pinadzakwanirisika.