1. Ninji pinapangiza kuti Yahova asapasa mwakudzala manja?

PAKUTOMA Yahova akhali ekha mu ndzidzi uzinji. Buluka penepo iye atonga kucita aanju kudzulu na anthu pa dziko yapantsi. Yahova, ‘Mulungu wakutsandzaya,’ asakomerwa na kupasa pinthu pyadidi. (1 Timoti 1:11; Tyago 1:17) Nakuti Yahova asafuna kuti tikhalembo akutsandzaya, iye asatipfundzisa toera tipase mwakudzala manja.—Aroma 1:20.

2, 3. (a) Thangwi yanji tisatsandzaya tingapasa mwakudzala manja? (b) Tinapfundzanji mu nsolo uno?

² Mulungu acita anthu mwakulandana na iye. (Genesi 1:27) Pyenepi pisabveka kuti Yahova aticita na makhaliro ninga ali na iye. Toera tikhale na kutsandzaya kwandimomwene na kutambira nkhombo za Yahova, tisafunika kutowezera citsandzo cace. Tisafunika kutsalakana anango na kupasa mwakudzala manja. (Afilipi 2:3, 4; Tyago 1:5) Thangwi yanji? Thangwi Yahova aticita munjira ineyi. Maseze ndife akusowa ungwiro,  tinakwanisa kutowezera Yahova na kupasa mwakudzala manja.

³ Cincino tinadinga ntsonga zingasi zinapfundzisa Bhibhlya thangwi yakupasa mwakudzala manja. Tinapfundza kuti thangwi yanji Yahova asatsandzaya tingapasa mwakudzala manja. Tinapfundzambo kuti kupasa kunatiphedza tani toera kucita basa idatipasa Yahova, pontho thangwi yanji kupasa mwakudzala manja ndi kwakutsandzayisa. Buluka penepo tinadinga kuti thangwi yanji tisafunika kupitiriza kupasa mwakudzala manja.

4, 5. Kodi Yahova na Yezu asapasa tani mwakudzala manja, pontho thangwi yanji tisafunika kuatowezera?

⁴ Yahova asafuna kuti tintowezere, ndi thangwi yace asatsandzaya tingapasa mwakudzala manja. (Aefesi 5:1) Yahova asafunambo kuti anthu akhale akutsandzaya. Tisadziwa pyenepi thangwi iye aticita mwakudzumatirisa, pontho aticitira dziko yakubalika kakamwe na pinthu pyonsene toera titsandzaye napyo. (Masalmo 104:24; 139:13-16) Natenepa, ife tisapasa mbiri Yahova tingacitisa anango kukhala akutsandzaya.

⁵ Ife tisatowezerambo Yezu, adakhazikisa citsandzo cadidi kakamwe cakuti tinapasa tani mwakudzala manja. Iye alonga: ‘Mwana wa munthu nee abwera toera kutumikirwa, mbwenye toera kutumikira na kupereka umaso wace ninga ciomboli toera kuombola anthu azinji.’ (Mateo 20:28) Pontho mpostolo Paulu awangisa Akristu: ‘Pitirizani kukhala na manyerezero anewa, akuti Kristu Yezu akhalambo nawo, iye asiya pyonsene pikhali na iye, mbakhala ninga bitcu.’ (Afilipi 2:5, 7) Natenepa tisafunika kubvundzika: ‘Ndinakwanisa kutowezera citsandzo ca Yezu mwakukwana?’—Lerini 1 Pedro 2:21.

6. Tisapfundzanji mu nsangani wa Yezu unalonga pya Nsamariya wadidi? (Onani cithundzithundzi cakutoma.)

⁶ Yahova asakomerwa tingatowezera citsandzo cadidi kakamwe cidapereka iye na Yezu. Tisacita pyenepi tingatsalakana anthu anango na kuona kuti tinaaphedza tani. Yezu apangiza kufunika kwa pyenepi mudalonga iye pya Nsamariya wadidi. (Lerini Luka 10:29-37.) Iye apfundzisa atowereri ace kuti iwo asafunika kuphedza anango, mwakukhonda tsalakana makhaliro awo na kudabuluka iwo. Musakumbuka kuti thangwi yanji Yezu alonga nsangani unoyu? Ndi thangwi yakuti Muyuda m’bodzi ambvundza: ‘Mwandimomwene mbani ndzanga?’ Ntawiro wa Yezu usatipfundzisa kuti khala tisafuna kukomeresa Yahova tisafunika kupasa mwakudzala manja ninga pidacita Nsamariya.

7. Tinapangiza tani kuti Yahova asacita pinthu munjira yadidi kakamwe? Fokotozani.

⁷ Thangwi inango inaticitisa kupasa mwakudzala manja ndi pidacitika m’munda wa Edheni. Sathani alonga kuti Adhamu na Eva mbadakhala akutsandzaya angakhonda kubvera Yahova mbacita pinafuna iwo basi. Eva akhali waumbirimi mbafuna kukhala ninga Mulungu. Adhamu akhali waumbirimi mbafuna kukomeresa Eva kupiringana Mulungu. (Genesi 3:4-6) Pyenepi pyabweresa nyatwa zizinji. Mwandimomwene, nee munthu m’bodzi anakwanisa kutsandzaya angakhala waumbirimi. Tingasowa umbirimi mbatipasa mwakudzala manja, tisapangiza kuti Yahova asacita pinthu munjira yadidi kakamwe.

8. Thangwi yanji Adhamu na Eva akhafunika kunyerezera anango?

⁸ Maseze Adhamu na Eva akhali okha m’munda wa Edheni, iwo akhafunikambo kunyerezera anango. Thangwi yanji? Yahova akhadaapasa basa toera kucita. Iye akhadaapanga kuti abalane adzadze dziko yapantsi na kuicita paraizu. (Genesi 1:28) Adhamu na Eva mbadafuna kuti anawo akhale akutsandzaya ninga pikhafuna Yahova kuna anthu onsene. Onsene mbadaphata basa pabodzi toera dziko yonsene ikhale paraizu. Ineyi mbidakhala basa ikulu kakamwe!

9. Thangwi yanji anthu mbadakhala akutsandzaya pakucita dziko yapantsi kukhala paraizu?

⁹ Anthu aungwiro akhafunikambo kuphata basa pabodzi na Yahova toera kucita dziko yapantsi kukhala paraizu mbakwanirisa cifuno cace. Munjira ineyi, iwo mbadapita m’mbuto yace yakupuma. (Ahebere 4:11) Basa ineyi mbidakhala yakutsandzayisa kakamwe! Yahova mbadaapasa nkhombo zizinji thangwi yakusowa umbirimi na kutsalakana anango.

10, 11. Ninji pinafuna kutiphedza toera kumwaza mphangwa na kucita anyakupfundza?

¹⁰ Lero, Yahova atipasa basa yakupambulika toera kuicita. Iye asafuna kuti timwaze mphangwa zadidi na kucita anyakupfundza. Toera kucita basa ineyi, tisafunika kutsalakana anango. Mbwenye basi ene tinapitiriza kucita basa ineyi tingakhala na mathangwi adidi: kufuna Yahova na anthu.

¹¹ Paulu alonga kuti iye pabodzi na Akristu  a mu ndzidzi wace akhali ‘anyakuphata basa pabodzi na Mulungu’ thangwi iwo akhamwaza mphangwa na kupfundzisa anthu undimomwene. (1 Akorinto 3:6, 9) Lero, tinakwanisambo ‘kuphata basa pabodzi na Mulungu’ tingaphatisira ndzidzi wathu, mphambvu zathu na mpfuma zathu m’basa yakumwaza mphangwa idatipasa iye. Unoyu ndi mwai ukulu kakamwe!

12, 13. Ndi nkhombo zipi zinakhala na ife tingacita anyakupfundza?

¹² Kuphatisira mwakukwana ndzidzi wathu na mphambvu zathu pakumwaza mphangwa na kupfundzisa pisatsandzayisa kakamwe. Pyenepi ndi pinalonga abale na alongo athu azinji adakhala na mwai wakucitisa mapfundziro a Bhibhlya. Tisatsandzaya kakamwe tingaona anyakupfundza mbakomerwa thangwi yakubvesesa undimomwene unagumanika m’Bhibhlya, mbakulisa cikhulupiro cawo, kucita macinjo mu umaso wawo na kutoma kupanga anango pinapfundza iwo. Yezu akomerwambo kakamwe mudaona iye amwazi mphangwa 70 akhadatuma iye ‘mbabwerera mwakutsandzaya’ thangwi ya basa yadidi idacita iwo.—Luka 10:17-21.

¹³ Abale na alongo athu pa dziko yonsene yapantsi asatsandzaya kakamwe angaona kuti mphangwa za m’Bhibhlya ziri kuphedza anthu toera kucinja umaso wawo. Mwacitsandzo, mulongo m’bodzi wantsikana anacemerwa Anna akhafuna kucita pizinji m’basa ya Yahova. * (Onani cidzindikiro capantsi.) Natenepa iye afuluka mbaenda ku Europa Oriental mbuto yakuti ikhafunika amwazi mphangwa azinji. Iye alemba: “Kuno kuna miyai mizinji toera kucitisa mapfundziro a Bhibhlya, pontho ndisakomerwa kakamwe na pyenepi. Basa yanga isanditsandzayisa kakamwe. Ndingafika kunyumba nee ndisakhala na ndzidzi wakunyerezera pinthu pyanga. Ndisanyerezera basi ene anthu anapfundza na ine, nyatwa zawo na pinthu pinaadzudzumisa. Ndisasaka njira zadidi toera kuabalangaza na kuaphedza. Natenepa ndisaona pakweca kuti ‘kupasa kusatsandzayisa kakamwe kupiringana kutambira.’”—Machitiro 20:35.

14. Munatsandzaya tani na basa yakumwaza mphangwa maseze anthu akhonde kubvesera?

¹⁴ Maseze anthu nee asabvesera tingaamwazira mphangwa, tisatsandzaya thangwi tisaapasa mwai toera abve mphangwa zadidi. Yahova asadikhira kuti ticite pibodzi pyene pidaphemba iye Ezekyeli toera kucita: ‘Uapange mafala anga, maseze abvere peno nkhabe.’ (Ezekyele 2:7; Izaiya 43:10) Natenepa, mwakukhonda tsalakana njira inafuna kutawira anthu, Yahova asapasa ntengo kuwangisira kwathu. (Lerini Ahebere 6:10.) M’bale unango alonga: ‘Ife tabzwala, tathirira, pontho tacita phembero na cidikhiro cakuti Yahova anadzakulisa cifuno cawo.’—1 Akorinto 3:6.

15. Kodi tisafunika kukhala akupasa mwakudzala manja kuna ale anapereka takhuta basi? Fokotozani.

¹⁵ Yezu asafuna kuti tikhale akupasa mwakudzala manja thangwi pyenepi pisatitsandzayisa. Tingapasa mwakudzala manja, anthu azinji anakhalambo akupasa mwakudzala manja. Ndi thangwi yace asatipanga: ‘Pitirizani kupasa anthu, natenepa iwo anadzakupasanimbo. Iwo anadzakupimirani m’mabudu a nguwo zanu na n’dida wadidi, wakukhomerwa na wakutsindirwa mwadidi, wakudzala mbutayikira. Thangwi na n’dida unapimira imwe andzanu, iwo anadzakupimiranimbo na n’dida ubodzi ene.’ (Luka 6:38) Ndimomwene kuti mungakhala wakupasa mwakudzala manja, nee ndi anthu onsene anafuna kupereka takhuta. Mbwenye iwo angakhonda kupereka takhuta, pitirizani kupasa. Imwe nkhabe dziwa maphindu anafuna kukhala na imwe mungapasa.

16. Mbani anafuna ife kupasa mwakudzala manja, pontho thangwi yanji?

¹⁶ Anthu akupasa mwakudzala manja nkhabe dikhira kubwezerwa cinthu. Yezu alonga: ‘Iwe ungacita phwando, cemera akutcerenga, akulamala, akutcikama na maboliboli. Tenepa unadzakhala wakutsandzaya thangwi iwo anacimwana kukubwezera pinthu.’ (Luka 14:13, 14) Bhibhlya isalongambo: ‘Nyakupasa mwakudzala manja anadzatambira nkhombo,’ pontho ‘Anyakutsandzaya ndi ale anatsalakana amphawi.’ (Misangani 22:9; Masalmo 41:1) Ife tisafunika kupasa mwakudzala manja thangwi mwandimomwene tisafuna kuphedza anango.

17. Ndi njira zipi zingasi zakupasa zakuti zisatitsandzayisa?

¹⁷ Mudalonga Paulu mafala a Yezu akuti ‘kupasa kusatsandzayisa kakamwe kupiringana kutambira,’ iye nee akhalonga basi ene kupasa pinthu pyakumanungo. Ife  tinakwanisambo kuwangisa anango, kuapasa uphungu wa m’Bhibhlya na kuaphedza munjira inango. (Machitiro 20:31-35) Kubulukira mu pinthu pidalonga Paulu na pidacita iye, atipfundzisa kufunika kwa kupasa mwakudzala manja mukuphatisira ndzidzi wathu, mphambvu zathu, citsalakano cathu na ufuni wathu.

18. Kodi anyakufufudza azinji alonganji thangwi yakupasa mwakudzala manja?

¹⁸ Anyakufufudza pya makhaliro a anthu adzindikirambo kuti kupasa kusatsandzayisa. Mwakubverana na nsolo ubodzi udalemba iwo, anthu alonga kuti asatsandzaya kakamwe angacitira anango pinthu pyadidi. Anyakufufudza alonga kuti tingaphedza anango, tisapibva kuti umaso wathu uli na cifuniro. Anyakudziwisa anango alonga kuti anthu anaphata basa mwakuperekeka asatsandzaya, pontho asakhala na ungumi wadidi. Mwandimomwene, pidadzindikira iwo nkhabe kutidzumatirisa, thangwi Nciti wathu waufuni, Yahova, ndzidzi onsene asalonga kuti kupasa kusatitsandzayisa.—2 Timoti 3:16, 17.

19, 20. Thangwi yanji musafunika kupasa mwakudzala manja?

¹⁹ Khala anthu anakhala na ife cifupi asatsalakana pinthu pyawo basi, pinakhala pyakunentsa kupitiriza kupasa mwakudzala manja. Mbwenye Yezu atikumbusa kuti matongero makulu mawiri a mwambo ndi kufuna Yahova na ntima wathu onsene, umaso, ndzeru na mphambvu, pontho kufuna ndzathu ninga ife ene. (Marko 12:28-31) Mu nsolo uno tapfundza kuti ale anafuna Yahova asantowezera. Yahova na Yezu ndi akupasa mwakudzala manja. Iwo asatikulumiza toera titowezere citsandzo cawo, thangwi iwo asadziwa kuti pyenepi pinatitsandzayisa kakamwe. Tingapasa Mulungu na anyakuendekana athu mwakudzala manja, tinapasa mbiri Yahova, pontho pyenepi pinadzaphindulisa ife na anango.

²⁰ Mwandimomwene imwe mukucita pyonsene pinakwanisa imwe toera kupasa mwakudzala manja na kuphedza anango, makamaka abale na alongo athu. (Agalata 6:10) Mungapitiriza kucita pyenepi, anthu anakomerwa kakamwe mbakufunani, pontho imwe munadzakhala akutsandzaya. Bhibhlya isalonga: ‘Anapasa mwakudzala manja anadzapaswa nkhombo, pontho anapasa pizinji anadzapaswambo pizinji.’ (Misangani 11:25) Mu umaso wathu na mu utumiki pana njira zizinji zakupasa mwakudzala manja na kukhala akukoma ntima. Tinadzadinga zingasi mwa njira zenezi mu nsolo unatowera.