1. Ndi munjira zipi zakuti tinakwanisa kuphata basa pabodzi na Yahova?

PIDACITA Yahova anthu, iye akhafuna kuti iwo aphate basa pabodzi na iye. Maseze lero anthu ndi akusowa ungwiro, atumiki akukhulupirika anakwanisa kuphata basa pabodzi na Yahova ntsiku zonsene. Mwacitsandzo, ife ‘tisaphata basa pabodzi na Yahova’ tingamwaza mphangwa zadidi za Umambo wace na kucita anyakupfundza. (1 Akorinto 3:5-9) Ndi mwai ukulu kakamwe udatipasa Nciti wa mphambvu zonsene toera kucita basa yakuti ndi yakufunika kakamwe! Mbwenye, ife nee tisaphata basa pabodzi na Yahova basi ene pakumwaza mphangwa. Mu nsolo uno, tinapfundza kuti tisaphata tani basa na iye tingaphedza banja yathu na abale athu mu mpingo, tingakhala akutambira alendo, tingaperekeka toera kucita mabasa mu gulu yathu pa dziko yonsene na tingathimizira utumiki wathu m’basa ya Yahova.—Akolose 3:23.

2. Thangwi yanji nee tisafunika kulandanisa na anango pinacita ife kuna Yahova?

² Ninga pinafuna kupfundza ife mu nsolo uno, ndi pyakufunika kakamwe kudziwa kuti tonsene ndife akusiyana. Thunga  yathu, ungumi wathu, makhaliro athu na maluso athu ndi akusiyana. Natenepa nee tisafunika kulandanisa na anango pinacita ife kuna Yahova. Mpostolo Paulu alonga: ‘M’bodzi na m’bodzi asafunika kudinga mabasace, natenepa iye anadzakhala na thangwi toera kutsandzaya na pinacita iye, tayu mukulandanisa na pinacita munthu unango.’—Agalata 6:4.

3. Thangwi yanji tinakwanisa kulonga kuti munthu onsene anatsalakana banjace akuphata basa na Yahova?

³ Yahova asafuna kuti titsalakane mabanja athu. Mwacitsandzo, imwe panango musawangisira kusaka kobiri toera kutsalakana banja yanu. Akazi azinji asakhala panyumba toera kutsalakana anawo. Pontho anyakubala athu angacimwana kutsalakanika okha, ife tisaatsalakana. Pyenepi ndi pyakufunika kakamwe. Bhibhlya isalonga: ‘Khala munthu nkhabe kutsalakana anthu akuti ndiye asafunika kuatsalakana, makamaka anthu a panyumba pace, iye asakhonda cikhulupiro, pontho ndi wakuipa kupiringana munthu wakusowa cikhulupiro.’ (1 Timoti 5:8) Khala muli na banja, panango nee munakwanisa kucita pizinji m’basa ya Yahova ninga munafuna imwe. Mbwenye lekani kufewa manungo! Yahova asakomerwa mungatsalakana banja yanu.—1 Akorinto 10:31.

4. Anyakubala anaikha tani pifuno pya Umambo pa mbuto yakutoma, pontho iwo asakhala na maphindu api?

⁴ Anyakubala Acikristu anakwanisa kuphata basa na Yahova mukuphedza anawo toera kukhala na pifuno m’basa ya Yahova. Anyakubala azinji acita pyenepi. Natenepa, anawo acimuna na acikazi asasankhula kutumikira Yahova m’basa ya ndzidzi onsene, ngakhale kutali na kunyumba kwawo. Anango asatumikira ninga amisionaryo, anango ninga apainiya m’mbuto zinafunika amwazi mphangwa azinji na anango ku Bheteli. Ndimomwene kuti ana angakhala kutali, anyakubala nkhabe kucedza nawo ndzidzi uzinji ninga munafuna iwo. Mbwenye iwo asakulumiza anawo toera apitirize kutumikira Yahova mwakukhonda tsalakana mbuto inagumanika iwo. Thangwi yanji? Thangwi iwo asakomerwa kakamwe anawo angaikha Yahova pa mbuto yakutoma mu umaso wawo. (3 Jwau 4) Azinji mwa anyakubala anewa asapibva ninga Yana, adalonga kuti ‘anapereka’ mwanace Samweli kuna Yahova. Iwo asapibva kuti ndi mwai ukulu kuphata basa na Yahova munjira ineyi.—1 Samwele 1:28.

5. Munaphedza tani abale na alongo mu mpingo mwanu? (Onani cithundzithundzi cakutoma.)

⁵ Khala imwe nee musatsalakana banja, kodi munakwanisa kuphedza abale na alongo akuti ndi akuduwala, akukalamba peno ale akuti asafunika ciphedzo? Kodi munakwanisa kuphedza ale anatsalakana anthu anewa? Onani mu mpingo mwanu khala alipo anthu ninga anewa anafunika ciphedzo. Mwacitsandzo, panango alipo mulongo anatsalakana nyakubalace wakukalamba. Kodi munakwanisa kukhala na ndzidzi wakucedza na nyakubalace toera iye akwanise kucita pinango? Panango imwe munaphedza munthu mu kunkwata toera kuenda naye kumisonkhano, kubazari peno kaona munthu unango kunyumba ya ungumi. Mungacita pyenepi, mukuphata basa na Yahova toera kutawira phembero ya munthu unoyu.—Lerini 1 Akorinto 10:24.

6. Tinakhala tani akutambira alendo?

⁶ Anyakuphata basa na Mulungu asadziwika na kutambira alendo. (Ahebere 13:2) M’Bhibhlya, tinakwanisa kupfundza kubulukira mu pitsandzo pinapangiza kukoma ntima. (Genesi 18:1-5) Ife tisafunika kuphedza anango tingakhala na mwai wakucita pyenepi, mwakukhonda tsalakana khala ndi ‘anyakukhulupira andzathu’ peno nkhabe.—Agalata 6:10.

7. Ndi maphindu api anakhala na imwe mungatambira panyumba panu abale anatumikira m’basa ya ndzidzi onsene?

⁷ Ndiye tani kuna abale na alongo anatumikira m’basa ya ndzidzi onsene akuti nkhabe pakukhala. Kodi imwe musaphata basa na Yahova mukupasa mbuto yakukhala abale anewa? (Lerini 3 Jwau 5, 8.) Tingacita pyenepi, iwo pabodzi na ife tinakhala na maphindu. Bhibhlya isalonga kuti kweneku ndi ‘kuwangisana unango na ndzace.’ (Aroma 1:11, 12) Onani citsandzo ca Olaf. Pikhali iye m’phale, muyang’aniri wa cisa wakukhonda manga banja acedzera mpingo wace, mbwenye nee m’bodzi mu mpingo aperekeka toera kumpasa mbuto yakugona. Olaf aphemba anyakubalace akuti nee akhali Mboni za Yahova khala mbapidakwanisika kuti muyang’aniri wa cisa akhale na iwo panyumba pawo. Iwo atawira kuti pinakwanisika mbwenye alonga kuti Olaf anagona pa sofa. Olaf atawira pyenepi. Iye akhala na sumana yakutsandzayisa kakamwe na muyang’aniri wa cisa! Angalamuka namacibese akhacedza mafala akuwangisa kakamwe mu ndzidzi ukhadya iwo. Muyang’aniri wa cisa aphedza kakamwe Olaf, mbasankhula kutumikira Yahova m’basa ya ndzidzi onsene. Mu pyaka 40, Olaf atumikira ninga misionaryo m’madziko mazinji.

8. Thangwi yanji tisafunika kukhala akukoma ntima ngakhale kuna anthu akukhonda pereka takhuta? Perekani citsandzo.

⁸ Ife tinakwanisa kupangiza ufuni kuna alendo munjira zizinji, maseze akhonde kupereka takhuta. Mwacitsandzo, mulongo m’bodzi ku Espanya akhapfundza Bhibhlya na Yesica, nkazi wa ku Ekwadhori. Ntsiku inango mu ndzidzi ukhapfundza iwo, Yesica atoma kulira. Natenepa mulongo ambvundza kuti thangwi yanji. Yesica atawira kuti mbadzati kubwera ku Espanya, akhatcerenga kakamwe. Ntsiku inango iye nee akhali na cakudya toera kupasa mwanace wantsikana, mbampasa madzi basi. Yesica acita phembero mu ndzidzi ukhagonesa iye mwanace. Mwakukhonda dembuka, Mboni za Yahova ziwiri zafika panyumba pa Yesica mbampasa revista. Mbwenye iye aapwekera na apandula revista mbaapanga: “Cakudya cace ndi ceneci cinafuna imwe kuti ndipase mwananga?” Alongo ayesera kum’balangaza, mbwenye pyacimwanika. Mukupita kwa ndzidzi, alongo aenda kasiya ntsengwa ya cakudya pansuwo pace. Natenepa, iye akhalira mu ndzidzi wa pfundziro thangwi adzindikira kuti akhadapwaza ntawiro wa phembero yace. Mbwenye Yesica akhali wakutonga kutumikira Yahova.  Mwandimomwene, kupasa mwakudzala manja kudacita alongo kwabweresa maphindu adidi.—Koelete 11:1, 6.

9, 10. (a) Ndi miyai ipi inango ikhali na Aizraeli toera kuperekeka? (b) Abale anakwanisa kuphedzera munjira zipi mu mpingo lero?

⁹ Mu ndzidzi wakale, Aizraeli akhali na miyai mizinji toera kuperekeka. (Eksodo 36:2; 1 Pya dziko ya Israele 29:5; Nehemiya 11:2) Lero, imwe mulimbo na miyai mizinji toera kuphatisira ndzidzi wanu, pinthu pyakumanungo na maluso toera kuphedza abale na alongo. Mungacita pyenepi, munatsandzaya kakamwe, pontho Yahova anakupasani nkhombo.

¹⁰ Mafala a Mulungu asakulumiza amuna mu mpingo toera kuphata basa na Yahova mu kutumikira ninga atumiki akutumikira na akulu a mpingo. (1 Timoti 3:1, 8, 9; 1 Pedro 5:2, 3) Ale anacita pyenepi asafuna kuphedza anango munjira zizinji kuphatanizambo pakulambira. (Machitiro 6:1-4) Kodi akulu a mpingo akuphembani kale toera kuphata basa ninga kalindi, kutsalakana mabukhu, pisa pinafuna kumwazwa mphangwa, kusasanyira Nyumba ya Umambo peno mabasa anango? Abale anaphedzera m’mabasa anewa alonga kuti asatsandzaya kakamwe.

11. Ndi maphindu api adakhala na mulongo m’bodzi m’basa yakumanga?

¹¹ Ale anaperekeka toera kuphata basa yakumanga kazinji kene asakhala na axamwali apswa. Mulongo m’bodzi anacemerwa Margie aphata basa yakumanga Nyumba za Umambo mu pyaka 18. M’basa ineyi, iye akhacita uxamwali na alongo acitsikana mbaapfundzisa basa. Iye alonga kuti ineyi ndi njira yadidi toera kuwangisana unango na ndzace. (Aroma 1:12) Mwandimomwene,  mu ndzidzi ukhathimbana iye na pinentso, axamwali ace akhamuwangisa. Kodi imwe mwaperekeka kale m’basa yakumanga? Imwe munakwanisa kuphata basa, maseze nee musadziwa basa yakumanga.

12. Munaphedzera tani pangacitika cidengwa?

¹² Ife tinakwanisambo kuphata basa na Yahova mukuphedza abale athu pangacitika cidengwa. Mwacitsandzo, ife tinakwanisa kupereka kobiri. (Jwau 13:34, 35; Machitiro 11:27-30) Njira inango toera kuphedzera ndi kucenesa peno kusasanyira paswa pinthu pidagudjuka na cidengwa. Gabriela, mulongo wa ku Poloniya wakuti nyumba yace ikhadagomoka na madzi, atsandzaya kakamwe kuona abale a mipingo ya pacisa mbam’phedza. Iye alonga kuti anganyerezera pyenepi, nee asadzudzumika na pinthu pyonsene pidaluza iye, mbwenye asanyerezera basi ene pinthu pidawina iye. Iye alonga: “Pinthu pyenepi pyandiphedza toera kuona kuti kucita khundu ya mpingo Wacikristu ndi mwai ukulu kakamwe, pontho ndi kwakutsandzayisa kakamwe.” Anthu azinji adaphedzwa pa cidengwa ceneci akhalambo na mabvero mabodzi ene. Pontho ale anaphata basa na Yahova toera kuphedza abale asakhala akutsandzaya kakamwe.—Lerini Machitiro 20:35; 2 Akorinto 9:6, 7.

13. Tinawangisa tani ufuni wathu kuna Yahova tingaperekeka m’basa yace? Perekani citsandzo.

¹³ Mulongo anacemerwa Stephanie na alongo anango aphata basa na Mulungu mukuphedza Mboni za Yahova zidathawa nkhondo mbizienda ku Estados Unidos. Iwo aphedza anthu anewa toera kugumana nyumba na pyombo pya n’nyumba. Iye alonga: “Ife takulumizika na kutsandzaya kudakhala na iwo pakuona ufuni wa abale awo pa dziko yonsene yapantsi. Iwo akhanyerezera kuti ife taaphedza, mbwenye adatiphedza kakamwe ndiwo. Ufuni, kuphatana, cikhulupiro na kunyindira Yahova kukhapangiza iwo kwawangisa kakamwe ufuni wathu kuna Yahova, pontho pyenepi pisaticitisa kupereka takhuta kakamwe na mwai unatambira ife mu gulu yace.”

14, 15. (a) Ndi n’khaliro upi udapangiza mprofeta Izaiya? (b) Akristu anatowezera tani n’khaliro wa Izaiya?

¹⁴ Kodi imwe musafuna kuthimizira utumiki wanu m’basa ya Yahova? Muli dzololo toera kuenda kamwaza mphangwa ku mbuto inafunika amwazi mphangwa azinji? Ndimomwene kuti nee tisafunika kuenda kutali toera kupasa mwakudzala manja. Mbwenye pana abale na alongo anango anakwanisa kucita pyenepi. Iwo ali na n’khaliro ninga wa mprofeta Izaiya. Pidabvundza Yahova  kuti, ‘Ndinatuma ani, pontho mbani anafuna khala ntumiki wanga?’ iye atawira: ‘Ndiri pano! Nditumeni!’ (Izaiya 6:8) Kodi muli dzololo toera kuphedzera mu gulu ya Yahova? Munakwanisa kuphedzera munjira zipi?

¹⁵ Yezu alonga pya kumwaza mphangwa na kucita anyakupfundza: ‘Basa yakubvuna ndi ikulu, mbwenye anyabasa acepa. Natenepa, phembani Mwanaciro munda kuti atumize anyabasa toera kubvuna.’ (Mateo 9:37, 38) Kodi munakwanisa kutumikira ninga mpainiya ku mbuto inafunika amwazi mphangwa azinji? Kodi munakwanisa kuphedza munthu unango toera kucita pyenepi? Abale na alongo azinji asaona kuti njira yadidi kakamwe toera kupangiza ufuni wawo kuna Mulungu na kuna anyakuendekana awo ndi kutumikira ninga mpainiya ku mbuto inafunika amwazi mphangwa azinji. Kodi munakwanisa kunyerezera njira zinango toera kucita pizinji m’basa ya Yahova? Mungacita pyenepi, munatsandzaya kakamwe.

16, 17. Ndi njira zipi zinango zakuti munakwanisa kucita pizinji m’basa ya Yahova?

¹⁶ Kodi muli dzololo toera kutumikira ku Bheteli peno kuphedzera basa yakumanga mu ndzidzi wakucepa peno ntsiku zingasi pasumana? Ndzidzi onsene gulu ya Yahova isafuna anthu akuti ali dzololo toera kutumikira m’mbuto zonsene zinafunika, pontho ali dzololo toera kucita pyonsene pinaphembwa iwo mwakukhonda tsalakana maluso awo. Yahova asakomerwa na munthu onsene anaperekeka toera kutumikira konsene kunafunika ciphedzo.—Masalmo 110:3.

¹⁷ Kodi musafuna kuthimizira maluso anu toera mukwanise kutumikira Yahova mwakukwana? Panango munakwanisa kuenda ku Xikola ya Amwazi Mphangwa a Umambo. Xikola ineyi isaphedza abale na alongo akukola mwauzimu akuti asatumikira kale Yahova m’basa ya ndzidzi onsene toera akwanise kuphatisirwa na gulu yace munjira zizinji. Ale anenda ku xikola ineyi asafunika kukhala dzololo toera kutumikira konsene kunatumwa iwo. Kodi muli dzololo toera kutumikira Yahova munjira ineyi?—1 Akorinto 9:23.

18. Ndi nkhombo zipi zinakhala na ife tingaphata basa na Yahova ntsiku zonsene?

¹⁸ Nakuti ndife atumiki a Yahova, ndife akupasa mwakudzala manja, adidi, akukoma ntima na aufuni. Ife tisatsalakana anango ntsiku zonsene. Pyenepi pisaticitisa kukhala akutsandzaya na antendere. (Agalata 5:22, 23) Mwakukhonda tsalakana makhaliro anu, munatsandzaya mungatowezera kupasa mwakudzala manja kwa Yahova na kukhala m’bodzi wa anyabasa andzace akufunika!—Misangani 3:9, 10.