1. Kodi Akristu asafunika kucitanji toera athamange mpaka kunkhomo?

AKRISTU ali m’mapika a umaso. Mwakukhonda tsalakana khala tatoma cincino kucita mapika anewa, peno tiri na pyaka pizinji mbatikaacita, tisafunika kupitiriza kuthamanga mpaka kunkhomo. Uphungu udapereka mpostolo Paulu kuna Akristu a ku Filipi, unakwanisa kutiwangisa toera kuthamanga mpaka kunkhomo. Akristu anango a ku Filipi akhatumikira Yahova mu pyaka pizinji mu ndzidzi udatambira iwo tsamba ya Paulu. Iwo akhatumikira Yahova mwakukhulupirika, mbwenye Paulu aakumbusa kufunika kwa kupitiriza kuthamanga mwakupirira. Iye akhafuna kuti iwo apitirize kutowezera citsandzo cace ca ‘kuwangisira toera akwanise pikhafuna iwo.’—Afil. 3:14.

2. Thangwi yanji uphungu udapereka Paulu kuna Akristu a ku Filipi ukhali wakufunika?

² Uphungu udapereka Paulu kuna Akristu a ku Filipi ukhali wakufunika kakamwe. Mpingo kweneko ukhatcingwa kutomera mu ndzidzi udakhazikiswa iwo. Mu caka 50 P.K.K., Paulu na Sila acita pidaphembwa iwo na Mulungu toera ‘kuenda ku Masedhonya.’ Natenepa iwo aenda ku Filipi toera kamwaza mphangwa zadidi. (Mabasa 16:9) Kweneko, iwo agumana nkazi akhacemerwa Lidhya, wakuti “akhabvesera” mphangwa zadidi, pontho “Yahova afungula kakamwe ntima wace.” (Mabasa 16:14) Pidapita ndzidzi ungasi, iye abatizwa pabodzi na anthu a panyumba pace. Mbwenye mwakukhonda dembuka, Dyabo atoma kuaonesa nyatwa. Amuna a mu nzinda akwekweta Paulu na Sila mbaenda nawo kuna atongi a mu nzinda, pontho iwo aapambizira kuti asacitisa uviyaviya. Na thangwi ineyi, Paulu na Sila amenywa, aikhwa nkaidi, buluka penepo aapanga toera abuluke mu nzinda. (Mabasa 16:16-40) Kodi iwo abwerera nduli? Nee pang’ono pene! Kodi abale na alongo a mu mpingo udamala kwene kukhazikiswa acitanji?  Mwakutsandzayisa, iwo apirirambo! Mwandimomwene, iwo awangiswa kakamwe na citsandzo cadidi ca Paulu na Sila.

3. Kodi Paulu adzindikiranji, pontho ndi mibvundzo ipi inafuna ife kudinga?

³ Paulu akhadatonga toera kukhonda kubwera nduli. (2 Akor. 4:16) Iye akhadziwa kuti toera apitirize kuthamanga mpaka kunkhomo, akhafunika kuikha manyerezero ace ku nkhombo zikhafuna iye kudzatambira. Tisapfundzanji kubulukira ku citsandzo ca Paulu? Ndi pitsandzo pipi pya Akristu akukhulupirika lero pinapangiza kuti tinakwanisa kupirira mwakukhonda tsalakana nyatwa zinathimbana na ife? Kodi cidikhiro cathu ca ntsogolo cinatiwangisa tani toera tikhonde kubwerera nduli?

4. Paulu apitiriza tani kumwaza mphangwa pikhali iye nkaidi?

⁴ Nyerezerani pinthu pyonsene pidacita Paulu mu ndzidzi udalembera iye tsamba Akristu a ku Filipi. Iye akhali nkaidi ku Roma. Iye nee mbadakwanisa kubuluka kunja toera kumwaza mphangwa. Mbwenye iye apitiriza kumwazira mphangwa ale akhabwera kudzamuona, pontho akhalemba matsamba toera kuatumiza ku mipingo yakutali. Lero, munjira ibodzi ene, Akristu azinji akuti makhaliro awo nee asaatawirisa kubuluka panyumba, asacita pyonsene pinakwanisa iwo toera kumwazira mphangwa zadidi ale anabwera panyumba pawo. Iwo asalemberambo matsamba akuwangisa anthu anakhonda kuonana na iwo nkhope na nkhope.

5. Mwakubverana na mafala anagumanika pa Afilipi 3:12-14, ninji cidaphedza Paulu toera apitirize kunyerezera nkhombo za ntsogolo?

⁵ Paulu nee atawirisa kuti pinthu pyadidi peno pyakuipa pidacita iye, pincimwanise kutumikira Yahova. Natenepa, iye alonga kuti “ine ndisaduwala pinthu piri nduli mwanga,” natenepa iye mbadakwanisa kuwangisira toera kuphata “pinthu piri patsogolo,” pyakuti ndi kuthamanga mpaka kunkhomo. (Lerini Afilipi 3:12-14.) Ndi pinthu pipi pingasi pyakuti mbapidadzudzumisa Paulu? Cakutoma, iye akhadacita pinthu pyakudzumatirisa kakamwe mu uphemberi Waciyuda. Mbwenye akhaona pinthu pyenepi ninga “pyakusowa basa.” (Afil. 3:3-8) Caciwiri, maseze iye akhali na mabvero akupasika mulando thangwi yakutcinga Akristu, iye nee atawirisa kuti mabvero anewa ancimwanise kutumikira Yahova. Cacitatu, iye nee anyerezera kuti pinthu pyonsene pyadidi pidacitira iye Yahova pyakwana. Paulu amwaza mphangwa kakamwe, mwakukhonda tsalakana nyatwa zidatamba iye ninga kuikhwa nkaidi, kumenywa, kumenywa na miyala, kulobzweka, kuphatanizambo kusowa cakudya na cakubvala. (2 Akor. 11:23-27) Mbwenye mwakukhonda tsalakana pinthu pidacita iye na nyatwa zidatamba iye, Paulu aona kuti asafunika kupitiriza kutumikira Yahova. Ife tisafunikambo kucita pibodzi pyene.

6. Ndi pinthu pipi pingasi ‘pya nduli’ pyakuti tisafunika kupiduwala?

⁶ Tinatowezera tani citsandzo ca Paulu ca kuduwala ‘pinthu pya nduli’? Anango a ife, panango tisafunika kukunda mabvero akupasika mulando thangwi ya madawo adacita ife nduli. Khala ndi tenepo, mukuona tani kutoma kucita pfundziro ya munthu paekha thangwi ya ntsembe ya ciomboli ya Yezu? Mu ndzidzi unapfundza imwe, nyerezerani mwadidi, pontho citani phembero thangwi ya pyenepi, natenepa, pinakuphedzani toera mukhonde kukhala na mabvero akupasika mulando mwakusowa mathangwi. Lekani kupasika mulando thangwi ya madawo akuti Yahova akulekererani kale. Onani citsandzo cinango cinafuna kupfundza ife thangwi ya Paulu. Anango a ife, panango asiya mabasa akuti mbadaapfumisa toera akwanise kucita pizinji m’basa ya Yahova. Khala ndi tenepo, njira ibodzi ya kuduwala pinthu pidasiya ife nduli, ndi kukhonda kupinyerezera. (Num. 11:4-6; Koel. 7:10) ‘Pinthu pya nduli’ panango pinaphataniza pinthu pidacita ife m’basa  ya Yahova peno nyatwa zidapirira ife. Mwandimomwene, kunyerezera nkhombo zidatipasa Yahova na njira idatitsalakana iye pyaka pya nduli kunatiphedza toera kukhala cifupi na Iye. Mbwenye cipo tisafunika kunyerezera kuti pidacita ife m’basa ya Yahova pyakwana.—1 Akor. 15:58.

7. Mwakubverana na lemba ya 1 Akorinto 9:24-27, tisafunika kucitanji toera kuwina mapika a umaso? Perekani citsandzo.

⁷ Paulu abvesesa mafala a Yezu akuti: “Wangisirani kakamwe.” (Luka 13:23, 24) Paulu akhadziwa kuti akhafunika kuwangisira mpaka kunkhomo ninga pidacita Kristu. Natenepa iye alandanisa umaso Wacikristu na mapika. (Lerini 1 Akorinto 9:24-27.) Nyakucita mapika asaikha manyerezero ace ku nzera wakumalisa mbakhonda kudzudzumika na pinthu pinango. Mwacitsandzo, anyakucita mapika m’mizinda, panango anathamanga m’miseu yakuti iri na anthu anacita malonda peno pinthu pinango pyakuti pinakwanisa kuadzudzumisa. Kodi mphyakukwanisika nyakucita mapika alimire mbayang’ana pinthu pinaguliswa n’khundu mwa nseu? Khala iye asafuna kuwina, nee anacita pyenepi! M’mapika a umaso, tisafunikambo kucalira kudzudzumika na pinthu pinango. Tingapitiriza kunyerezera muoni wathu mbatitumikira Yahova mwaphinga ninga pidacita Paulu, tinadzatambira nkhombo!

8. Ndi pinentso pipi pitatu pinafuna kudinga ife?

⁸ Cincino tendeni tidinge pinentso pitatu pyakuti pinakwanisa kutifewesa manungo. Cinentso cakutoma ndi pinthu pinacitika mwakukhonda dikhira. Caciwiri ndi kusowa mphambvu thangwi yakukalamba. Cacitatu ndi kuthimbana na nyatwa mu ndzidzi uzinji. Ife tinakwanisa kuphedzeka tingadziwa kuti anango athimbana tani na pinentso pyenepi.—Afil. 3:17.

9. Kodi pinthu pinacitika mwakukhonda dikhira pinatikhuya tani?

⁹ Pinthu pinacitika mwakukhonda dikhira. Ife tisadikhira pinthu pyadidi pidapikira Yahova. Mprofeta Habhakuki alonga kuti akhafuna kakamwe kuti Yahova amalise uipi mu Yuda, mbwenye Yahova ampanga toera ‘apitirize kudikhira.’ (Hab. 2:3) Tingaona kuti pinthu pikhadikhira ife pikudembuka, panango tinaluza phinga yathu  mbatifewa manungo. (Mis. 13:12) Pyenepi pyacitikirambo abale mu pyaka 1914. Mu ndzidzi unoyu, Akristu azinji akudzodzwa akhadikhira kuenda kudzulu mu caka 1914. Mphapo pidakhonda ipyo kucitika, kodi Akristu anewa akukhulupirika acitanji?

10. Kodi banja inango yacitanji pidaona iwo kuti pinthu pikhadikhira iwo nee pyacitika?

¹⁰ Onani citsandzo ca Akristu awiri akukhulupirika adakunda pinentso pyenepi. M’bale Royal Spatz abatizwa mu caka 1908 pikhali iye na pyaka 20. Iye akhali na cinyindiro cakuti mwakukhonda dembuka mbadaenda kudzulu. Natenepa pikhafuna iye kumanga banja mu caka 1911, apanga mankhadzi wace anacemerwa Pearl kuti: “Iwe usadziwa pinafuna kucitika mu caka 1914. Khala ife tisafuna kumanga banja, mphyadidi kucita pyenepi mwakucimbiza!” Kodi banja ineyi yabwerera nduli pidakhonda iwo kutambira muoni wakuenda kudzulu mu caka 1914? Nkhabe, thangwi cifuno cawo cakutoma cikhali kutumikira Mulungu mwakukhulupirika, tayu kuenda kudzulu. Iwo apitiriza kuthamanga mwakupirira. Mwandimomwene, Royal na Pearl apitiriza kukhala aphinga na akukhulupirika mu pyaka pizinji mpaka kufa kwawo. Mwakukhonda dembuka, Yahova anadzacenesa dzina yace, kumalisa uthambi onsene unapambizirwa iye mbakwanirisa mapikiro ace onsene. Khalani na cinyindiro cakuti pinthu pyenepi pinadzacitika pa ndzidzi udakhazikisa Yahova. Mpaka ndzidzi unoyu, tisafunika kupitiriza kutumikira Mulungu wathu, mbatikhonda kutawirisa pinthu pinacitika mwakukhonda dikhira pitifewese manungo peno pitibweze nduli.

11-12. Thangwi yanji tinakwanisa kupitiriza kutumikira Yahova mwakukhulupirika ngakhale tikhonde kukhala na mphambvu zizinji ninga zikhali na ife? Perekani citsandzo.

¹¹ Kusowa mphambvu thangwi yakukalamba. Mwakusiyana na munthu anacita mapika andimomwene, imwe nee musafunika kukhala na mphambvu zakumanungo toera mukhale na cikhulupiro cakuwanga kuna Yahova na kukhala waphinga m’basa yace. Azinji akuti nkhabebve mphambvu izinji, asapitiriza kucita pizinji kuna Yahova. (2 Akor. 4:16) Mwacitsandzo, M’bale Arthur Secord, * akhali na pyaka 88 pyakubalwa, iye akhadatumikira pa Bheteli mu pyaka 55, pontho akhanentseka na ungumi. Ntsiku inango nfurumero m’bodzi aenda pa talimba pace toera antsalakane. Iye amuyang’ana mbampanga: “M’bale Arthur Secord, mwacita pizinji kakamwe m’basa ya Yahova.” Mbwenye Arthur nee akhaikha manyerezero ace ku pinthu pidacita iye nduli. M’bale Arthur amuyang’ana, am’mwetulira mbalonga: “Inde, ndimomwene. Cakufunika nee ndi pinthu pidacita ife. Mbwenye cakufunika kakamwe ndi kupitiriza kukhala akukhulupirika.”

¹² Panango imwe mwatumikira Yahova mu  pyaka pizinji, mbwenye cincino musaona kuti ungumi wanu nee usakutawirisani kucita pizinji ninga pikhacita imwe kale. Khala ndi tenepo, lekani kufewa manungo. Khalani na cinyindiro kuti Yahova asakumbuka, pontho asakomerwa na basa idacita imwe. (Aheb. 6:10) Kumbukani kuti ife nee tinapangiza kuti tisafuna Yahova kubulukira m’mabasa mazinji anam’phatira ife. M’mbuto mwace, tisapangiza kuti tisafuna kakamwe Yahova tingapangiza makhaliro adidi mbaticita pyonsene pinakwanisa ife. (Akol. 3:23) Yahova asabvesesa pinthu pinacimwana ife kucita, pontho nee asaphemba pizinji kupiringana pinacita ife.—Marko 12:43, 44.

13. Ninji pidacitikira Anatoly na Lidiya, pontho pyenepi pisatiwangisa tani toera kupitiriza kutumikira Yahova, ngakhale tatoma kale?

¹³ Kuthimbana na nyatwa mu ndzidzi uzinji. Atumiki anango a Yahova asapirira nyatwa na mitcingo mu pyaka pizinji. Mwacitsandzo, Anatoly Melnik * wa ku Moldávia akhali na pyaka 12 mu ndzidzi udamangwa babace, mbaikhwa nkaidi, buluka penepo aendeswa ku Sibherya, nsindzo wa makilometru 7.000. Pidapita caka cibodzi, Anatoly, mai wace na yavu wace amangwambo mbaendeswa ku Sibherya. Mukupita kwa ndzidzi, iwo akwanisa kugumanika pa misonkhano mu nzinda ubodzi, mbwenye akhafunika kufamba makilometru 30 mu jelo, pontho kukatonthola kakamwe. Buluka penepo, M’bale Melnik amala pyaka pitatu nkaidi kutali na nkazace Lidiya na mwanawo wankazi wa caka cibodzi cakubalwa. Maseze athimbana na nyatwa mu pyaka pizinji, Anatoly na banjace apitiriza kutumikira Yahova mwakukhulupirika. Cincino Anatoly ali na pyaka 82 pyakubalwa, pontho asatumikira ninga m’bodzi wa Komiti ya Filiali ya ku Asiya Central. Ninga Anatoly na Lidiya, tendeni ticite pyonsene pinakwanisa ife m’basa ya Yahova mbatipitiriza kupirira ninga pidacita ife.—Agal. 6:9.

14. Paulu akhafunika kucitanji toera kutambira muoni?

¹⁴ Paulu akhali na cinyindiro cakuti mbadamalisa mapika mbakwanirisa cifuno cace. Ninga Nkristu wakudzodzwa, iye akhadikhira kutambira ‘muoni wakucemerwa kwace na Mulungu.’ Mbwenye toera kukwanirisa cifuno cace, iye akhadziwa kuti akhafunika ‘kuwangisira.’ (Afil. 3:14) Paulu aphatisira citsandzo cadidi toera kuphedza Akristu a ku Filipi kuikha manyerezero awo ku cifuno cawo.

15. Paulu aphatisira tani citsandzo ca utongi toera kuwangisa Akristu a ku Filipi toera apitirize ‘kuwangisira’?

¹⁵ Paulu akumbusa Akristu a ku Filipi pya cidikhiro cawo ca kuenda kakhala kudzulu. (Afil. 3: 20) Thangwi yanji iwo akhafunika kukumbuka pyenepi? Mu ntsiku zenezi, anthu akhafuna kakamwe kukhala a dziko ya Roma, thangwi pyenepi pikhaaphedza kakamwe. * Mbwenye Akristu akudzodzwa akhali anthu a utongi wakufunika kakamwe wakuti mbudaaphedza kakamwe. Utongi Waciroma nee ukhali wakufunika kakamwe tingaulandanisa na utongi wakudzulu! Na thangwi ineyi, Paulu awangisa Akristu a ku Filipi toera apangize “makhaliro adidi mwakubverana na mphangwa zadidi zinalonga pya Kristu.” (Afil. 1:27) Lero, Akristu akudzodzwa asakhazikisa citsandzo cadidi mu ndzidzi unawangisira iwo toera kutambira umaso wakukhonda mala kudzulu.

16. Mwakukhonda tsalakana khala cidikhiro cathu ndi cakukhala kudzulu peno pa dziko yapantsi, ninji cinafunika ife kupitiriza kucita mwakubverana na Afilipi 4:6, 7?

¹⁶ Mwakukhonda tsalakana khala cidikhiro cathu ndi cakukhala na umaso wakukhonda mala kudzulu peno mparaizu pa dziko yapantsi, tisafunika kuwangisira toera kutambira muoni unoyu. Pontho, mwakukhonda tsalakana makhaliro athu, ife nee tisafunika kuyang’ana pinthu pidasiya ife nduli; pontho nee tisafunika kutawirisa cinthu cinango citicimwanise kutumikira Yahova. (Afil. 3:16) Panango tadikhira mu ndzidzi uzinji toera kuona kukwanirisika kwa mapikiro a Yahova, peno takalamba, pontho nee tiri na mphambvu zizinji. Panango ife tapirira nyatwa na mitcingo mu pyaka pizinji. Mwakukhonda tsalakana pinathimbana na imwe, “lekani kudzudzumika, nee na cinthu cibodzi.” M’mbuto mwace, dziwisani Mulungu maphembo anu kubulukira mu kucita phembero, natenepa iye anakupasani ntendere wakuti usapiringana kubvesesa konsene.—Lerini Afilipi 4:6, 7.

17. Tinapfundzanji mu nsolo unatowera?

¹⁷ Ninga nyakucita mapika wakuti asawangisira kakamwe angaona kuti ali dhuzi toera kufika kunkhomo, ife tisafunikambo kuikha manyerezero athu ku muoni unafuna ife kutambira mbatiwangisira toera kumalisa mapika a umaso. Yahova asatipikira pinthu pyadidi kakamwe ntsogolo. Na thangwi ineyi, tisafunika kucita pyonsene pinakwanisa ife mwakubverana na makhaliro athu na mphambvu zathu. Mphapo tinacitanji toera tipitirize kuthamanga munjira yadidi mpaka kunkhomo? Nsolo unatowera unadzatiphedza toera kuona pinthu pinafunika ife kuikha pakutoma mu umaso wathu, mbatidzindikira kuti ndi “pinthu pipi pyakufunika kakamwe.”—Afil. 1:9, 10.