KODI pana cinthu cinango cakuti musafuna kucicita mu mpingo, mbwenye nee munakwanisa kucicita cincino? Panango ndi basa inacitwa na m’bale unango. Panango ndi basa peno mwai ukhali na imwe kale, mbwenye nee musakwanisabve kucita basa ineyi thangwi ya thunga, ungumi, kusowa kobiri peno kutsalakana banja. Peno imwe mwasiya basa ikhacita imwe mu ndzidzi uzinji thangwi ya macinjo mu gulu. Mwakukhonda tsalakana mathangwi, panango imwe munapibva kuti nee mukucita pyonsene pinakwanisa imwe m’basa ya Mulungu. M’makhaliro anewa, panango midzidzi inango munthu anakhala wakutsukwala. Natenepa, munakwanisa tani kukunda mabvero akuphonyeka ninga kutsukwala, kuipirwa, peno kukoya pinthu muntima? Munapitiriza tani kukhala akutsandzaya?

Ife tinakwanisa kukhala akutsandzaya tingapfundza kubulukira mu citsandzo ca Juwau M’batizi. Juwau akhali na miyai mizinji m’basa yace yakutumikira Yahova, mbwenye pinthu pidancitikira, iye nee akhapidikhira. Panango nee akhadziwa kuti mbadamala ndzidzi uzinji nkaidi kupiringana pidacita iye m’basa yace yakumwaza mphangwa. Mbwenye Juwau apitiriza kukhala wakutsandzaya, pontho apitiriza na n’khaliro unoyu mu umaso wace onsene. Ninji cidam’phedza? Pontho tinakwanisa tani kukhala akutsandzaya maseze tithimbane na nyatwa?

Mwezi wa Abril wa caka 29 P.K.K., Juwau M’batizi atoma basa yace yakukhunganya anthu toera kutambira Mesiya. Iye alonga: “Tcunyukani, thangwi Umambo wakudzulu uli cifupi.” (Mat. 3:2; Luka 1:12-17) Anthu azinji atawira. Mwandimomwene, anthu azinji akhabwera buluka kutali toera kudzabva mphangwa zace, pontho azinji atcunyuka mbabatizwa. Juwau acenjezambo atsogoleri a mauphemberi akuti akhaoneka ninga akulungama kuti anatongwa angakhonda kucinja. (Mat. 3:5-12) Iye aona kuti utumiki wace wafika kunkhomo pidabatiza iye Yezu mu caka 29 P.K.K. Kutomera penepo, Juwau apanga anango toera atowere Yezu, Mesiya wakupikirwa.—Juw. 1:32-37.

Thangwi ya basa yakupambulika ikhacita Juwau, Yezu alonga: “Mwa anthu onsene adabalwa na nkazi, nkhabepo nkulu kakamwe kupiringana Juwau M’batizi.” (Mat. 11:11) Mwakukhonda penula, Juwau akomerwa na nkhombo zidatambira iye. Ninga Juwau, anthu azinji lero asatambirambo nkhombo  zizinji. Onani citsandzo ca m’bale anacemerwa Terry. Iye na nkazace Sandra, amala pyaka pyakupiringana 50 m’basa ya ndzidzi onsene. Terry alonga: “Ndakhala na miyai mizinji kakamwe. Ndatumikira ninga mpainiya wa ndzidzi onsene, ndatumikira ku Bheteli, ndatumikira ninga mpainiya wakupambulika, muyang’aniri wa cisa na wa gawo, pontho cincino ndikutumikira ninga mpainiya wakupambulika.” Mphyakutsandzayisa kakamwe kutambira miyai mu gulu ya Yahova, mbwenye ninga pinafuna ife kupfundza kubulukira mu citsandzo ca Juwau, toera kupitiriza kukhala akutsandzaya tisafunika kuwangisira makhaliro athu angacinja.

Cinthu cidaphedza Juwau M’batizi toera kupitiriza kukhala wakutsandzaya ndi kupereka takhuta thangwi ya miyai ikhali na iye. Onani citsandzo ici. Pidamala Yezu kubatizwa, utumiki wa Juwau ukhabwerera nduli, mbwenye utumiki wa Yezu ukhatoma kuthimizirika. Anyakupfundza a Juwau akhadzudzumika, natenepa iwo ampanga: ‘Onani, iye akubatiza anthu, pontho anthu onsene ali kuenda kuna iye.’ (Juw. 3:26) Juwau aatawira: “Ali na mankhadzi wankazi ndi mankhadzi wamamuna. Mbwenye xamwali wa mankhadzi wamamuna angakhala cifupi mbabva pinalonga iye, asakomerwa thangwi yakubva fala ya mankhadzi wamamuna. Natenepa, kutsandzaya kwanga ndi kukulu kakamwe.” (Juw. 3:29) Juwau nee akhacita mapika na Yezu, pontho nee akhanyerezera kuti basa ikhacita iye ikhabwerera nduli thangwi ya basa ikulu ikhali na Yezu. M’mbuto mwace, Juwau akhapitiriza na kutsandzaya thangwi iye akhatsalakana basa yace ninga “xamwali wa mankhadzi wamamuna.”

Makhaliro a Juwau am’phedza toera apitirize kukhala wakutsandzaya maseze basa yace ikhali yakunentsa. Mbwenye Juwau akhali Nazireu kutomera ntsiku idabalwa iye, na thangwi ineyi, iye akhondeswa kumwa vinyu. (Luka 1:15) Yezu alonga thangwi ya umaso wakukhonda funa pizinji wa Juwau kuti: “Juwau abwera mbakhonda kudya nee kumwa.” Munjira inango, Yezu na anyakupfundzace nee akhafunika kucalira pinthu pikhacalira Anazireu, iwo akhali na umaso ninga wa anthu onsene. (Mat. 11:18, 19) Pontho, maseze Juwau nee acita pirengo, iye akhadziwa kuti anyakupfundza a Yezu kuphatanizambo ale akuti akhali anyakupfundza a Juwau akhali na mphambvu zakucita pirengo. (Mat. 10:1; Juwau 10:41) M’mbuto mwakudzudzumika na pinthu pyenepi, Juwau akhapitiriza kuphata basa idapaswa iye na Yahova mwaphinga.

Tingalemedza basa idapaswa ife na Yahova, tinapitiriza kukhala akutsandzaya. Terry adalongwa pakutoma, alonga: “Ndikhacita mabasa onsene akhapaswa ine.” Anganyerezera umaso wace m’basa ya ndzidzi onsene, iye asalonga: “Ine nee ndisasandikika, mbwenye basi ene ndisakumbuka pinthu pyadidi pidacita ine.”

Ife tinathimizira kutsandzaya kwathu tinganyerezera pinacitisa mabasa peno miyai yakutumikira inatipasa Yahova kukhala yakufunika kakamwe. Ndi mwai ukulu kakamwe ‘kuphata basa pabodzi na Mulungu.’ (1 Akor. 3:9) Combo cinapitiriza kukhala cakubalika tingacitsalakana ndzidzi onsene. Munjira ibodzi ene, ife tinakhala akutsandzaya tingapitiriza kunyerezera mwai uli na ife wakuphata basa pabodzi na Yahova. Ife nee tisafunika kulandanisa kuwangisira kwathu na kuwangisira kunacita anango. Pontho nee tisafunika kuona basa idapasa Yahova anango kuti ndi yakufunika kakamwe kupiringana basa idatipasa iye.—Agal. 6:4.

Panango Juwau akhadziwa kuti utumiki wace nee mbudapitiriza mu ndzidzi uzinji, mbwenye nee akhadziwa kuti mbudamala mwandzidzidzi. (Juw. 3:30) Mu caka 30 P.K.K., pakupita miyezi mitanthatu pidamala iye kubatiza Yezu, Juwau aikhwa nkaidi na Mambo Herodhi. Maseze akhali nkaidi, Juwau acita pyonsene pidakwanisa iye toera apitirize kupereka umboni. (Marko 6:17-20) Ninji pidam’phedza toera kukhala wakutsandzaya m’makhaliro anewa? Iye akhapitiriza kunyerezera pinthu pyauzimu.

Pikhali Juwau nkaidi atambira mphangwa thangwi ya kuthimizirika kwa utumiki wa Yezu. (Mat. 11:2; Luka 7:18) Juwau akhali na cinyindiro cakuti Yezu akhali Mesiya, mbwenye akhadzudzumika kuti Yezu mbadakwanirisa tani pyonsene pikhalongwa m’Malemba kuti Mesiya mbadapicita. Nakuti Mesiya mbadakhala mambo, kodi Yezu mbadatoma kutonga mwakukhonda dembuka? Kodi pyenepi mbapidacitisa  Juwau kubuluswa nkaidi? Juwau akhafuna kudziwa pizinji thangwi ya Yezu, natenepa iye atuma anyakupfundzace toera kabvundza Yezu: “Kodi ndimwe adalongwa kuti Anabwera, peno tisafunika kudikhira unango?” (Luka 7:19) Pidabwerera iwo, Juwau aabvesera mwadidi mu ndzidzi ukhafokotoza iwo pirengo pyakuwangisa anthu pikhacita Yezu, pontho mafala adalonga Yezu kuna Juwau: “Cincino maboliboli ali kuona, anyakulamala miyendo ali kufamba, anyamatanya akuwangiswa, madhrodhro ali kubva, anthu akufa ali kulamuswa, pontho anyakutcerenga ali kubva mphangwa zadidi.”—Luka 7:20-22.

Mwakukhonda penula, Juwau awangiswa na mphangwa zidapangwa iye na anyakupfundzace. Pyaoneka pakweca kuti Yezu akhakwanirisa maprofesiya akhalonga pya Mesiya. Maseze kubwera kwa Yezu nee mbakudacitisa Juwau kubuluswa nkaidi, Juwau akhadziwa kuti utumiki wace ukhali wakufunika. Mwakukhonda kutsalakana makhaliro ace, iye akhali na mathangwi toera kukhala wakutsandzaya.

Ninga Juwau, ife tingaikha manyerezero athu ku pinthu pyauzimu, tinakwanisa kupirira mwakutsandzaya. (Akol. 1:9-11) Tinakwanisa kucita pyenepi tingaleri Bhibhlya na kunyerezera mwadidi pinaleri ife, pyenepi pinatiphedza toera kudziwa kuti pyonsene pinacita ife kuna Mulungu ndi pyakufunika. (1 Akor. 15:58) Sandra alonga: “Kuleri kapitulu ibodzi ya Bhibhlya pa ntsiku, kusandiphedza toera kufendedzera cifupi Yahova. Pyenepi pisandiphedza toera kuikha manyerezero anga kuna Yahova, tayu kuna ine.” Ife tinakwanisa kuikha manyerezero athu ku basa inacita abale na alongo athu kuna Yahova, pontho pyenepi pinatiphedza toera kukhonda kunyerezera pya ife basi. Sandra athimiza: “Maprogramu a JW Broadcasting^® anapangizwa miyezi yonsene asatiphedza toera kukhala cifupi na gulu, pontho maprogramu anewa asatiphedza toera kupitiriza kukhala akutsandzaya m’basa yathu.”

Mu ndzidzi wakucepa udamwaza mphangwa Juwau M’batizi, iye amwaza mphangwa na “nzimu pabodzi na mphambvu ninga za Eliya,” pontho ninga Eliya, iye “akhali munthu wa mabvero ninga ali na ife.” (Luka 1:17; Tiya. 5:17) Tingapitiriza kutowezera citsandzo cace cakupereka takhuta na kuikha manyerezero athu ku pinthu pyauzimu, ife tinakwanisambo kupitiriza kukhala akutsandzaya, mwakukhonda tsalakana pinafuna kuticitikira.