1-3. Ndi api mathangwi anango anacitisa atumiki a m’basa ya ndzidzi onsene asiye mabasa awo?

ROBERT na Mary Jo alonga: “Pidamala ife pya 21 mbatikatumikira ninga amisionaryo, anyakubalathu onsene adzaphatwa na utenda. Ife tikhakomerwa na kuatsalakana. Mbwenye pikhali pyakunentsa kakamwe kusiya mbuto ikhatumikira ife.”

² William na Terrie alonga: “Pidadzindikira ife kuti nee tinakwanisabve kubwerera toera tipitirize na basa ikhaphata ife thangwi ya nkandzo wa ungumi, ife talira. Ndzidzi onsene tikhafuna kutumikira Yahova mu dziko inango, mbwenye nee mbatidakwanisabve.”

³ Aleksey alonga: “Ife tikhadziwa kuti ale akhatitcinga akhafuna kufunga Bheteli ikhatumikira ife. Mbwenye pidafunga iwo Bheteli, ife mbatibuluka, tatsukwala kakamwe.”

4. Ndi mibvundzo ipi inafuna ife kutawira mu nsolo uno?

⁴ Pontho atumiki azinji a m’basa ya ndzidzi onsene, kuphatanizambo ale akhatumikira pa Bheteli apaswa mabasa anango. * Abale na alongo anewa akukhulupirika panango anentseka toera kusiya mabasa akhakomerwa na iwo kakamwe. Ninji pinafuna kuaphedza toera kuthimbana na macinjo anewa? Imwe munaaphedza tani? Matawiro a mibvundzo ineyi anaphedza ife tonsene tingathimbana na macinjo mu umaso.

5. Ndi pinentso pipi pinathimbana na ale anatambira basa ipswa?

⁵ Mwakukhonda tsalakana khala tisatumikira pa Bheteli peno nkhabe, ife tinakwanisa kukulisa ufuni kuna anthu mbatikomerwa na mbuto inatumikira ife. Mbwenye tisatsukwala kakamwe tingasiya basa yathu. Tisatsuwa ale adasiya ife, pontho tisadzudzumika thangwi ya iwo, makamaka khala taasiya thangwi ya kutcingwa. (Mat. 10:23; 2 Akor. 11:28, 29) Kusiyapo pyenepi, panango pinakhala pyakunentsa kakamwe kucinja toera katumikira kumbuto inango thangwi pinaphemba kupfundza makhaliro anango. Ife tinakwanisambo kukhala na mabvero anewa tingabwerera kudabuluka ife. Robert na Mary Jo alonga: “Ife tikhadaduwala makhaliro athu, ngakhale kumwaza mphangwa mu cilongero cathu. Nakuti tikhatumikira kumbuto inango mu ndzidzi uzinji, tikhapibva ninga anthu a dziko inango, maseze tikhali mu dziko yathu.” Anango adapaswa basa ipswa panango anathimbana na nyatwa yakusowa kobiri. Panango iwo anakhala akusowa cinyindiro, akusowa citsidzikizo na akutsukwala. Ninji pinafuna kuaphedza?

6. Tinakhala tani na uxamwali wakuwanga na Yahova?

⁶ Khalani na uxamwali wakuwanga na Yahova. (Tiya. 4:8) Tinacita tani pyenepi? Mukunyindira iye ninga ‘Nyakubvesera phembero.’ (Masal. 65:2) Lemba ya Masalmo 62:8 isalonga: ‘Longani kuna iye pyonsene piri muntima mwanu.’ Yahova “anakwanisa kucita pizinji kakamwe kupiringana pinthu pyonsene pinaphemba ife peno pinanyerezera ife.” (Aef. 3:20) Yahova asatipasa pizinji kupiringana pinaphemba ife m’maphembero athu. Iye anakwanisa kumalisa nyatwa zathu munjira yakuti cipo tainyerezera kale.

7. (a) Ninji pinafuna kutiphedza toera kupitiriza kukhala na uxamwali wakuwanga na Yahova? (b) Mwakubverana na Ahebheri 6:10-12, ninji pinafuna kucitika tingapitiriza kutumikira Yahova mwakukhulupirika?

⁷ Toera kupitiriza na uxamwali na Yahova, tisafunika kuleri Bhibhlya ntsiku zonsene mbatinyerezera mwadidi pinaleri ife. Misionaryo unango wakale alonga: “Pitirizani na kucita kulambira kwa banja na kukhunganyika misonkhano, ninga pikhacita imwe kule kukhatumikira imwe.” Pontho pitirizani na kumwaza mphangwa zadidi mwaphinga mu mpingo wanu upswa. Yahova asakumbuka ale anapitiriza kuntumikira mwakukhulupirika, maseze iwo nee asakwanisabve kucita pyonsene pikhacita iwo kale.—Lerini Ahebheri 6:10-12.

8. Kodi mafala anagumanika pa 1 Juwau 2:15-17 anakuphedzani tani toera kukhala na umaso wakukhonda funa pizinji?

 ⁸ Khalani na umaso wakukhonda funa pizinji. Lekani tawirisa kuti pinthu pinadzudzumika na anthu mu dziko ya Sathani pikucitiseni kusiya kutumikira Yahova. (Mat. 13:22) Lekani kutawira pinthu pinalonga anthu anakhonda kutumikira Yahova, axamwali peno acibale anayesera kukuphedzani mukulonga kuti musafunika kukhala na kobiri izinji toera mukhale na umaso wadidi. (Lerini 1 Juwau 2:15-17.) Nyindirani Yahova, ule anapikira kutsalakana pifuno pyathu pyauzimu, pya m’manyerezero na pyakumanungo pa “ndzidzi wakuthema.”—Aheb. 4:16; 13:5, 6.

9. Mwakubverana na Misangani 22:3, 7, thangwi yanji ndi pyakufunika kucalira kufiyari kobiri toera kugula pinthu pyakukhonda funika, pontho ninji pinafuna kutiphedza toera kucita pisankhulo pyadidi?

⁹ Calirani kufiyari kobiri toera kugula pinthu pyakukhonda funika. (Lerini Misangani 22:3, 7.) Kucita ulendo panango kunaphemba kobiri zizinji, natenepa mphyakukhonda nentsa kukhala na mangawa. Toera kucalira mangawa, lekani kufiyari kobiri toera kugula pinthu pyakuti mwandimomwene imwe nkhabe kupifuna. Tinganentseka m’manyerezero thangwi ya kutsalakana nyakufunika wathu wakuti ali kuduwala, pinakhala pyakunentsa kuona kuti tinafiyari kobiri zingasi. M’makhaliro anewa, kumbukani kuti ‘kucita phembero na kudembetera’ kunakuphedzani toera kucita pisankhulo pyadidi. Yahova anakwanisa kutawira maphembero anu toera mukhale akukhurudzika mbamucita pisankhulo pyadidi.—Afil. 4:6, 7; 1 Ped. 5:7.

10. Tinakhala tani na axamwali apswa?

¹⁰ Citani uxamwali na anthu a makhaliro adidi. Pangani axamwali anu mabvero anu na pinentso pinathimbana na imwe, makamaka ale akuti athimbanambo na pinentso pibodzi pyene. Mungacita pyenepi, pinakuphedzani toera kukhala na mabvero adidi. (Koel. 4:9, 10) Axamwali anu akale a kumbuto ikhatumikira imwe anapitiriza kukhala abodzi ene. Mbwenye kumbuto inatumikira imwe cincino musafunika kukhala na axamwali apswa. Mbwenye kumbukani kuti toera kukhala na axamwali, musafunika kukhala wauxamwali. Munakwanisa tani kucita axamwali apswa? Pangani anango pyakugumana napyo pyadidi pidakhala na imwe m’basa ya Yahova toera iwo akwanise kuona kutsandzaya kwanu. Anango mu mpingo nee anakwanisa kubvesesa kuti thangwi yanji musakomerwa na basa ya ndzidzi onsene, ngakhale tenepo, anango anafuna kudziwa pizinji mbakhala axamwali anu adidi. Mbwenye lekani kulonga kakamwe thangwi ya imwe peno pinthu pidacita imwe m’basa ya Yahova, nee mabvero akuipa adakhala na imwe.

11. Munacitisa tani kuti banja yanu ipitirize kukhala yakutsandzaya?

¹¹ Imwe mungasiya basa yanu thangwi ya nyatwa za ungumi wa ndzanu wa m’banja, lekani kumpasa mulando. Munjira inango, khala imwe  muli na nyatwa za ungumi, lekani kupasika mulando mbamunyerezera kuti mwatsukwalisa ndzanu wa m’banja. Kumbukani kuti ndimwe “manungo mabodzi,” pontho mwapikira kuna Yahova kuti munatsalakanana unango na ndzace m’makhaliro onsene. (Mat. 19:5, 6) Khala imwe mwasiya basa yanu thangwi ndzanu wa m’banja ali na mimba mwakukhonda dikhira, citani pyonsene toera mwananu adziwe kuti iye ndi wakufunika kakamwe kupiringana basa ikhali na imwe. Pangani mwananu kazinji kene kuti musamuona ninga ‘muoni’ wakubuluka kwa Mulungu. (Masal. 127:3-5) Mu ndzidzi ubodzi ene, mpangeni nkhombo zidakhala na imwe m’basa yanu. Mungacita pyenepi munaphedza mwananu toera aphatisire umaso wace m’basa ya Yahova ninga pidacita imwe.

12. (a) Tinaphedza tani ale ali m’basa ya ndzidzi onsene toera apitirize na basa yawo? (b) Tinaaphedza tani toera akhale na mabvero adidi m’basa ipswa idatambira iwo?

¹² Mwakutsandzayisa, mipingo mizinji kuphatanizambo abale na alongo asaphedza ale ali m’basa ya ndzidzi onsene toera apitirize na basa yawo. Iwo asacita pyenepi toera kuawangisa kuti apitirize na basa yawo, kuaphedza na pinthu pyakumanungo, peno kuphedza acibale awo akuti asakhala kutali na iwo. (Agal. 6:2) Ale akuti ali m’basa ya ndzidzi onsene angacinjwa mbabwera mu mpingo wanu, lekani kunyerezera kuti nee akhaphata mwadidi basa peno acita cinthu cakuipa. * M’mbuto mwace, aphedzeni toera akhale na mabvero adidi m’basa ipswa idatambira iwo. Atambireni mwadidi, pontho asimbeni thangwi ya basa idacita iwo, ngakhale ungumi wawo nkhabe kuatawirisa toera kucita pizinji. Sakani kuadziwa mwadidi. Pfundzani kubulukira ku udziwisi wawo, pidapfundza iwo na pidatamba iwo.

13. Ndi ciphedzo cipi cinafunika ife kupereka kuna ale anatambira basa ipswa?

 ¹³ Pakutoma, ale anatambira basa ipswa anafuna ciphedzo canu toera kugumana nyumba, njira yakucita ulendo, basa na pinthu pinango pyakufunika. Iwo anafunambo kubva mphangwa za pinthu pinacitika ntsiku na ntsiku ninga kulipa nsonkho, kobiri toera kutsidzikizwa peno seguro. Cinthu cinafuna iwo kakamwe, nee ndi kubverwa ntsisi, mbwenye asafuna kuti anango abvesese makhaliro awo. Panango iwo peno acibale awo akuthimbana na nyatwa za ungumi. Panango iwo akutsukwala thangwi yakuferwa na wawo wakufunika. * Panango iwo anatsukwala angakhala okhene thangwi yakukhonda kukhala pabodzi na abale auzimu a kule kukhatumikira iwo. Pinakwata ndzidzi toera iwo amalise mabvero anewa akuti panango asaadzudzumisa.

14. Kodi abale na alongo anango aphedza tani mulongo toera adzolowere makhaliro mapswa?

¹⁴ Mungamwaza mphangwa pabodzi na iwo, pontho mungaawangisa kubulukira ku citsandzo canu cadidi munaaphedza toera adzolowere makhaliro mapswa. Mulongo unango adatumikira mu pyaka pizinji ku dziko inango alonga: “Kukhatumikira ine kale, ndikhacitisa mapfundziro a Bhibhlya ntsiku zonsene. Mbwenye pidacinjwa ine mbandienda kumbuto inango pikhali pyakunentsa, ngakhale kugumana munthu toera kupfundza naye Bhibhlya peno kupangiza vidhyu mu utumiki. Mbwenye abale na alongo anango a mu mpingo wanga upswa akhandiphedza toera kuenda pabodzi na iwo kacitisa maulendo akubwereza na mapfundziro a Bhibhlya. Kuona abale na alongo anewa aphinga na acipapo mbakacitisa mapfundziro a Bhibhlya akuthambaruka kwandiphedza toera kukhala na maonero adidi. Natenepa ndapfundza kutomesa makani mucisa cipswa. Pyenepi pyandiphedza toera kukhala pontho wakutsandzaya.”

15. Munakwanisa tani kupembera m’basa yanu ipswa?

¹⁵ Imwe munakwanisa kupembera m’basa yanu ipswa. Lekani kunyerezera kuti nee mukhaphata mwadidi basa yanu peno kunyerezera kuti  nee ndimwe wakufunika. Nyerezerani njira zizinji zinakuphedzani Yahova cincino, pontho pitirizani kumwaza mphangwa. Towezerani Akristu akukhulupirika a mu ndzidzi wa apostolo. Konsene kwene kukhagumanika iwo, “akhaenda mbamwaza mphangwa zadidi.” (Mabasa 8:1, 4) Kuwangisira kwanu toera kumwaza mphangwa kunadzabweresa nkhombo. Mwacitsandzo, apainiya adathamangiswa mu dziko ibodzi aenda mu dziko inango ya cifupi yakuti ikhali na cifuno cikulu ca amwazi mphangwa a cilongero cawo. Pidapita miyezi mingasi, mwakucimbiza yakhazikiswa misoka ipswa.

16. Munakhala tani akutsandzaya m’basa yanu ipswa?

¹⁶ “Kutsandzaya kunapereka Yahova ndi ciwangiso canu.” (Neh. 8:10) Kutsandzaya kwathu kusabulukira mu uxamwali wathu na Yahova, tayu kubulukira m’basa yathu, maseze tikomerwe nayo kakamwe. Khala ife tisafuna kukhala akutsandzaya, tisafunika kukhala na uxamwali wakuwanga na Yahova, mbatipitiriza kun’nyindira toera atipase udziwisi, atitsogolere mbatiphedza. Kumbukani kuti imwe mukhafuna basa yanu yakale thangwi mukhacita pyonsene pikhakwanisa imwe toera kufuna anthu kweneko. Ikhani manyerezero anu m’basa yanu ipswa, pontho onani kuti Yahova anakuphedzani toera mukomerwembo nayo.—Koel. 7:10.

17. Ninji cinafunika ife kukumbuka thangwi ya basa yathu?

¹⁷ Tisafunika kukumbuka kuti kutumikira kwathu Yahova ndi kwa kwenda na kwenda, mbwenye basa yathu ndi ya ndzidzi wakucepa. Mu dziko ipswa, panango ife tonsene tinatambira basa ipswa. Aleksey adalongwa pakutoma kwa nsolo uno, alonga kuti macinjo anatambira iye asan’khunganya toera kuthimbana na macinjo a ntsogolo. Iye athimiza: “Ndzidzi onsene ine ndisadziwa kuti Yahova na dziko ipswa ndi pinthu pyandimomwene, mbwenye midzidzi inango pisaoneka ninga piri kutali pang’ono. Cincino uxamwali wanga na Yahova uli wakuwanga kakamwe, pontho ndisadziwa kuti dziko ipswa inafika cincino.” (Mabasa 2:25) Mwakukhonda tsalakana basa yathu, tendeni tipitirize kukhala na uxamwali wakuwanga na Yahova. Iye cipo anatisiya, mbwenye anapitiriza kutiphedza toera kukhala akutsandzaya mu ndzidzi unacita ife pyonsene pinakwanisa ife m’basa yace, mwakukhonda tsalakana pinafuna kucitika.—Iza. 41:13.