1. Dhavidhi alonganji thangwi ya kucepeseka kwa Yahova?

KODI mwandimomwene Yahova ndi wakucepeseka? Inde. Dhavidhi alonga: ‘Imwe musandipasa xango yanu yacipulumuso, pontho kucepeseka kwanu kusandikuza.’ (2 Sam. 22:36; Masal. 18:35) Pidalemba Dhavidhi mafala anewa, panango iye akhanyerezera ndzidzi udabwera Samweli kunyumba kwa babace toera kundzodza kuti adzakhale mambo wa Izraeli. Dhavidhi akhali mwana wacisere; ngakhale tenepo Yahova ansankhula toera kupitira mbuto Mambo Sauli.—1 Sam. 16:1, 10-13.

2. Tinapfundzanji mu nsolo uno?

² Mwandimomwene, Dhavidhi akhali na mabvero mabodzi ene ninga a nyamasalmo adalemba Masalmo kapitulu 113, adalonga thangwi ya Yahova kuti: ‘Iye asakotama toera kuona kudzulu na dziko yapantsi, asabulusa kupfumbi munthu wakusowa ciphedzo. Iye asabulusa ntcerengi pa dotha toera akhale pabodzi na atongi.’ (Masal. 113:6-8) Mu nsolo uno, cakutoma tinapfundza kuti Yahova apangiza tani n’khaliro unoyu wakucepeseka. Buluka penepo, tinaona kuti tinapfundzanji kubulukira mu citsandzo ca Mambo Sauli, mprofeta Dhanyeli na Yezu thangwi ya n’khaliro wakucepeseka.

3. Kodi Yahova asatitsalakana tani, pontho pyenepi pisapangizanji?

³ Yahova asapangiza kuti ndi wakucepeseka munjira inatsalakana iye atumiki ace akusowa ungwiro. Iye nee asatawira basi ene ulambiri wathu, mbwenye asationambo ninga axamwali ace. (Masal. 25:14) Toera tikhale na uxamwali na Yahova, iye apereka Mwanace ninga ntsembe toera tikwanise kulekererwa madawo athu. Mwandimomwene Yahova ndi wantsisi kakamwe.

4. Ndi cinthu cipi cidatipasa Yahova, pontho thangwi yanji?

 ⁴ Onani undimomwene unango unapangiza kuti Yahova ndi wakucepeseka. Ninga Nciti, Yahova mbadakwanisa kuticita ninga anthu akusowa ufulu wakusankhula. Mbwenye iye nee aticita tenepo. Iye aticita mwakulandana na iye, pontho atipasa ufulu wakusankhula. Pisankhulo pinacita ife ndi pyakufunika kuna Yahova, maseze ndife ang’ono na akufewa. Iye asafuna kuti tintumikire mwaufulu tayu mwakukakamizwa, pontho asafuna kuti tidzindikire nkhombo zinakhala na ife thangwi ya kumbvera. (Deut. 10:12; Iza. 48:17, 18) Tiri akutsandzaya kakamwe kutumikira Yahova wakuti ndi wakucepeseka kakamwe.

5. Yahova asatipfundzisa tani toera tikhale akucepeseka? (Onani foto iri patsamba yakutoma.)

⁵ Yahova asatipfundzisa toera kukhala akucepeseka kubulukira munjira inatitsalakana iye. Nkhabepo munthu unango kudzulu na pa dziko yapantsi wakuti ndi waudziwisi kakamwe kupiringana Yahova. Ngakhale tenepo, iye asatawira maonero a anango. Mwacitsandzo, Yahova atawirisa Mwanace toera kumphedza kucita pinthu pyonsene. (Mis. 8:27-30; Akol. 1:15, 16) Pontho, ngakhale Yahova ndi wamphambvu zonsene, iye asapasambo basa anthu anango. Mwacitsandzo, iye asankhula Yezu toera kukhala Mambo wa Umambo, pontho iye anadzapasambo basa ibodzi ene anthu akukwana 144.000 toera kudzatonga pabodzi na Yezu. (Luka 12:32) Mwandimomwene, Yahova apfundzisa Yezu toera kukhala Mambo na Nyantsembe Wankulu. (Aheb. 5:8, 9) Iye asapfundzisambo ale anafuna kudzatonga pabodzi na Yezu toera kudzacita mwadidi mabasa awo, mbwenye iye nee anadzaaonera kuti anadzacita tani mabasa anewa. Thangwi iye asanyindira kuti iwo anadzacita cifuno cace.—Apok. 5:10.

6-7. Tisapfundzanji na citsandzo ca Yahova thangwi ya kupasa mabasa anthu anango?

 ⁶ Nakuti Baba wathu wa kudzulu wakuti nee asafuna ciphedzo ca anango asapasa basa athu anango, natenepa ife tisafunikambo kucita pibodzi pyene. Mwacitsandzo, kodi imwe ndimwe nsolo wa banja peno ndimwe nkulu wa mpingo? Towezerani citsandzo ca Yahova mukupasa basa anthu anango, pontho calirani kuaonera kuti anacita tani mabasa anewa. Mungatowezera Yahova, basa inadzafamba mwadidi, pontho imwe munapfundzisa anango na kuaphedza toera akhale na cinyindiro mu pinthu pinacita iwo. (Iza. 41:10) Ndi pinthu pipi pinango pyakuti misolo ya banja na akulu a mpingo anakwanisa kupipfundza kubulukira mu citsandzo ca Yahova?

⁷ Bhibhlya isapangiza kuti Yahova asabvesera maonero aanju ace. (1 Ama. 22:19-22) Anyakubala, munatowezera tani citsandzo ca Yahova? Pingakwanisika, bvundzisani ananu toera kudziwa maonero awo thangwi ya basa inafuna kucita imwe. Khala maonero awo ndi adidi, citani mwakubverana na maonero awo.

8. Kodi Yahova apangiza tani kuti ndi wakupirira mu njira idatsalakana iye Abhrahamu na Sara?

⁸ Yahova asapangizambo kuti ndi wakucepeseka mukukhala wakupirira. Mwacitsandzo, Yahova asapangiza kuti ndi wakupirira atumiki ace angancita mibvundzo thangwi ya pinthu pinafuna iye kucita. Iye abvesera Abhrahamu mu ndzidzi ukhafuna iye kufudza Sodhoma na Gomora. (Gen. 18:22-33) Pontho kumbukani njira idatsalakana Yahova Sara wakuti akhali nkazi wa Abhrahamu. Pidabva Sara pikiro ya Yahova yakuti iye mbadakhala na mimba mu unkhalamba wace, iye aseka mbwenye Yahova nee aipirwa na pyenepi. (Gen. 18:10-14) Munjira ineyi, Yahova atsalakana Sara mwacilemedzo.

9. Kodi anyakubala na akulu a mpingo anapfundzanji na citsandzo ca Yahova?

⁹ Anyakubala na akulu a mpingo, munapfundzanji na citsandzo ca Yahova? Munacitanji khala ananu peno anthu anango mu mpingo nee asaphedzera pisankhulo pidacita imwe? Kodi imwe munaipirwa na iwo? Peno munayesera kubvesesa maonero awo? Mwandimomwene, anyakubala na akulu a mpingo angatowezera citsandzo ca Yahova, mabanja na mipingo isakhala na nkhombo zizinji. Mpaka pano, ife tapfundza kuti tinatowezera tani kucepeseka kwa Yahova. Cincino tinapfundza pitsandzo pinango pya m’Bhibhlya toera kuona kuti tinakhala tani akucepeseka.

10. Kodi Yahova asaphatisira tani pitsandzo pya anthu anango toera kutipfundzisa?

¹⁰ Ninga ‘Mpfundzisi wathu Wankulu,’ Yahova alembesa pitsandzo pya atumiki ace m’Bhibhlya toera kutipfundzisa. (Iza. 30:20, 21) Natenepa, tingapfundza Bhibhlya tinagumana pitsandzo pya anthu adapangiza makhaliro adidi akuti asakomeresa Mulungu. Pontho tinapfundzambo pinthu pidacitikira ale adakhonda kupangiza makhaliro adidi.—Masal. 37:37; 1 Akor. 10:11.

11. Tisapfundzanji na pinthu pidacita Sauli?

¹¹ Nyerezerani pinthu pidacitikira Mambo Sauli. Pakutoma iye akhali m’phale wakucepeseka. Iye akhadzindikira pinthu pikhacimwana iye kucita, pontho akhanyinyirika toera kutawira mabasa mazinji. (1 Sam. 9:21; 10:20-22) Mbwenye mukupita kwa ndzidzi Sauli adzakhala wakudzikuza. Iye atoma kupangiza n’khaliro unoyu wakudzikuza pidamala iye kwene kukhazikiswa ninga mambo. Ntsiku inango, iye acimwana kukhala wakupirira mu ndzidzi ukhadikhira iye mprofeta Samweli.  M’mbuto mwakunyindira kuti Yahova anacita pinthu kuna mbumba, Sauli apereka ntsembe mwakukhonda tawiriswa. Na thangwi ineyi, Sauli aluza uxamwali wace na Yahova, pontho mukupita kwa ndzidzi iye aluza umambo wace. (1 Sam. 13:8-14) Mwandimomwene, citsandzo ceneci cinatiphedza toera kucalira kucita pinthu mwakudzikuza.

12. Kodi Dhanyeli apangiza tani kuti akhali wakucepeseka?

¹² Mwakusiyana na citsandzo cakuipa ca Sauli, onani citsandzo cadidi ca mprofeta Dhanyeli. Mu umaso wace onsene, Dhanyeli apitiriza kukhala wakucepeseka, pontho ndzidzi onsene akhasaka citsogolero ca Yahova. Mwacitsandzo, Dhanyeli pidaphatisirwa iye na Yahova toera kufokotoza ndoto za Nabhukodhonozore, iye nee adzikuza. Mbwenye, mwakucepeseka iye apereka mbiri yonsene kuna Yahova. (Dan. 2:26-28) Kodi pyenepi pisatipfundzisanji? Khala abale asakomerwa kakamwe na nkhani zinacita ife peno khala tiri na maluso akumwaza mphangwa, tisafunika kupasa mbiri Yahova. Mwakucepeseka, ife tisafunika kudziwa kuti takwanisa kucita pinthu pyenepi basi ene na ciphedzo ca Yahova. (Afil. 4:13) Tingacita pyenepi, tikutowezerambo citsandzo cadidi ca Yezu. Munjira ipi?

13. Tisapfundzanji thangwi ya kucepeseka kwa Yezu m’mafala anagumanika pa Juwau 5:19, 30?

¹³ Maseze Yezu akhali Mwana waungwiro wa Mulungu, iye akhanyindira Yahova. (Lerini Juwau 5:19, 30.) lye cipo anyerezera kukhala sawasawa na Babace wakudzulu. Lemba ya Afilipi 2:6 isalonga kuti Yezu “nee anyerezera kukhala pa mbuto ya Mulungu, peno kukhala sawasawa na Mulungu.” Yezu akhadzindikira pinthu pikhacimwana iye kucita, pontho akhalemedza utongi wa Babace.

14. Kodi Yezu atawira tani pidaphembwa iye pinthu pyakuti nee akhali wakuthema toera kupicita?

¹⁴ Nyerezerani pinthu pidacita Yezu mu ndzidzi udaenda Tiyago na Juwau pabodzi na mai wawo kamphemba cinthu cakuti iye nee akhali wakuthema toera kuapasa. Mwakukhonda dembuka, Yezu aapanga kuti basi ene ndi babace wakudzulu anasankhula ale anafuna kukhala kunkono wace wa madyo na nkono wace wa dzwere mu Umambo. (Mat. 20:20-23) Yezu akhadziwa pinthu pikhacimwana iye kucita. Iye akhali wakucepeseka. Iye akhacita basi ene pinthu pikhapangwa iye na Yahova. (Juwau 12:49) Tinatowezera tani citsandzo ca Yezu?

15-16. Tinaphatisira tani uphungu unagumanika pa 1 Akorinto 4:6?

 ¹⁵ Ife tinakwanisa kutowezera citsandzo ca Yezu tingaphatisira uphungu wa m’Bhibhlya unagumanika pa 1 Akorinto 4:6. Iyo isalonga: “Lekani kucita cinthu cinango kupiringana pire pidalembwa.” Natenepa, anthu anango angatiphemba uphungu ife nee tisafunika kuakakamiza toera acite pinthu mwakubverana na maonero athu. Peno kulonga pinthu mbatidzati kunyerezera mwadidi. Mbwenye tisafunika kulonga pinthu mwakubverana na pinalonga Bhibhlya na pinalonga mabukhu athu. Munjira ineyi, ife tinapangiza kuti nee tisadziwa pinthu pyonsene. Tingacita pyenepi tisapangiza kuti ndife akucepeseka thangwi tisadziwa kuti ndzidzi onsene uphungu wa Yahova ndi wadidi kupiringana wathu.—Apok. 15:3, 4.

¹⁶ Tingakhala akucepeseka tinapasa mbiri Yahova. Mbwenye pana mathangwi anango adidi anaticitisa toera tikhale akucepeseka. Cincino tinaona kuti kucepeseka kusatiphedza tani toera kukhala akutsandzaya na kukhala na uxamwali na anango.

17. Thangwi yanji anthu akucepeseka asakhala akutsandzaya?

¹⁷ Tingakhala akucepeseka, tisakhala akutsandzaya kakamwe. Thangwi yanji? Thangwi tingadzindikira pinthu pinacimwana ife kucita tinakhala akutsandzaya, pontho tinapereka takhuta thangwi ya ciphedzo cinatambira ife kuna anango. Mwacitsandzo, nyerezerani ndzidzi udawangisa Yezu anyamatanya khumi. Basi ene ndi m’bodzi adabwerera kuna Yezu toera kupereka takhuta thangwi ya kuwangiswa utenda wace, thangwi iye akhadziwa kuti nee mbadakwanisa kuwangisika ekhene. Kucepeseka kwa phedza mamuna unoyu toera kupereka takhuta na kupasa mbiri Mulungu.—Luka 17:11-19.

18. Kucepeseka kusatiphedza tani toera kubverana mwadidi na anango? (Aroma 12:10)

 ¹⁸ Anthu akucepeseka asabverana mwadidi na anango, pontho pisakhala pyakukhonda nentsa toera kucita uxamwali. Thangwi yanji? Thangwi iwo asadzindikira kuti anthu anango ali na makhaliro adidi, pontho asaanyindira. Anthu akucepeseka asatsandzaya angaona anango akucita mwadidi mabasa awo, pontho asaasimba na ntima onsene.—Lerini Aroma 12:10.

19. Thangwi yanji nee tisafunika kukhala akudzikuza?

¹⁹ Anthu akudzikuza nee asafuna kusimba anango, mbwenye iwo asafuna kakamwe kusimbwa. Iwo asalandanisa kakamwe umaso wawo na wa anango, pontho asayesera kukhala wakufunika kakamwe kupiringana anango. M’mbuto mwakupfundzisa anango na kuapasa mabasa, kazinji kene iwo asalonga: “Khala usafuna kucita cinthu cadidi cita wekha.” Munthu wakudzikuza kazinji kene asafuna kakamwe kukhala wakufunika kupiringana anango, pontho asakhala na bibvu anango angacita pinthu kupiringana pidacita iye. (Agal. 5:26) Anthu anewa kazinji kene nee asakhala na uxamwali wa kuwanga na anango. Tingadzindikira kuti ndife akudzikuza, tisafunika kuphemba Yahova toera ‘acinje manyerezero athu.’ Natenepa nee tinadzakhala akudzikuza.—Aroma 12:2.

20. Thangwi yanji tisafunika kukhala akucepeseka?

²⁰ Ife tisapereka takhuta kakamwe thangwi yakudziwa kuti Yahova ndi wakucepeseka. Ife taona kucepeseka kwace munjira inatsalakana iye atumiki ace, pontho tisafuna kutowezera citsandzo cace. Kusiyapo pyenepi, ife tisafuna kutowezera citsandzo ca ale adatumikira Yahova mwakucepeseka. Tingacita pyenepi, ife tinapasa mbiri Yahova wakuti ndi wakuthema toera kutambira mbiri. (Apok. 4:11) Kusiyapo pyenepi pyonsene, ife tinakhala axamwali a Yahova thangwi iye asafuna anthu akucepeseka.