1. Ndi mwai upi uli na ife?

NDI mwai ukulu kakamwe kwa ife kucita khundu mu mpingo wa Yahova. Ife tisakomerwa kakamwe kulambira Yahova pabodzi na abale na alongo athu mu mpingo. Mphapo ndi basa ipi inacita imwe mu mpingo?

2. Ndi citsandzo cipi cidaphatisira mpostolo Paulu m’matsamba anango adalemba iye?

² Ife tinakwanisa kupfundza pizinji kakamwe thangwi ya basa iri na ife mu mpingo kubulukira mu citsandzo cidaphatisira mpostolo Paulu m’matsamba anango adalemba iye. M’matsamba anewa, Paulu alandanisa mpingo na manungo a munthu. Iye alandanisambo m’bodzi na m’bodzi mu mpingo na makhundu a manungo.—Aroma 12:4-8; 1 Akor. 12:12-27; Aef. 4:16.

3. Ndi pinthu pipi pitatu pinafuna kupfundza ife mu nsolo uno?

³ M’bodzi na m’bodzi wa ife ndi wakufunika mu mpingo wa Yahova. Pontho tonsene tinakwanisa kuwangisa mpingo. Mwakukhonda tsalakana khanda yathu, dzindza yathu, khala tapfuma peno khala nee tapfundza kakamwe, tonsene ndife akufunika mu mpingo. Mu nsolo uno, ife tinapfundza pinthu pitatu pyakufunika kubulukira mu citsandzo cidaphatisira mpostolo Paulu. Cakutoma, ife tinapfundza kuti thangwi yanji m’bodzi na m’bodzi wa ife ndi wakufunika * mu mpingo wa Yahova. Caciwiri, ife tinapfundza  kuti tisafunika kucitanji tingaona ninga nee tiri na basa mu mpingo. Cacitatu, tinapfundza kuti thangwi yanji tisafunika kukhala akuphatika na basa mu mpingo wa Mulungu.

4. Kodi lemba ya Aroma 12:4, 5 isatipfundzisanji?

⁴ Cinthu cakutoma cinafuna kupfundza ife kubulukira mu citsandzo cidaphatisira mpostolo Paulu ndi cakuti m’bodzi na m’bodzi wa ife ali na basa yakufunika mu gulu ya Yahova. Mpostolo Paulu alonga kuti: “Ninga manungo athu ali na makhundu mazinji, mbwenye iwo nee asaphata basa ibodzi ene, pyenepi ndi sawasawa na ife, maseze ndife azinji, ndife manungo mabodzi ene mwakuphatana na Kristu, thangwi m’bodzi na m’bodzi asacita khundu ya ndzace.” (Aroma 12:4, 5) Kodi Paulu akhafuna kulonganji? Maseze m’bodzi na m’bodzi wa ife ali na basa yakusiyana mu mpingo, mbwenye tonsene ndife akufunika kakamwe.

5. Ndi “miyoni” ipi inapereka Yahova mu mpingo wace?

⁵ Tingalonga pya ale ali na basa mu mpingo, panango munanyerezera ale anatsogolera mpingo. (1 Ates. 5:12; Aheb. 13:17) Mwandimomwene kubulukira mwa Kristu, Yahova apereka “amuna ninga miyoni” mu mpingo Wace. (Aef. 4:8) Amuna anewa asaphataniza Mathubo Akutonga, abale anaphedzera Mathubo Akutonga, abale a Komiti ya Filiali, ayang’aniri a cisa, abale anapfundzisa maxikola a Bhibhlya, akulu a mpingo na atumiki akutumikira. Abale anewa onsene asakhazikiswa na nzimu wakucena toera kutsalakana mabira a Yahova na kuwangisa mpingo.—1 Ped. 5:2, 3. 

6. Mwakubverana na 1 Atesalonika 2:6-8, abale anakhazikiswa na nzimu wakucena asawangisira kucitanji?

⁶ Abale asakhazikiswa na nzimu wakucena toera kutsalakana mabasa akusiyana-siyana. Ninga munaphata basa manja na miyendo toera kuphindulisa manungo onsene, abale anakhazikiswa na nzimu wakucena asaphata basa mwaphinga toera kuphindulisa mpingo onsene. Iwo nee asacita pyenepi toera kupaswa mbiri na anango. Mbwenye iwo asawangisira toera kuphedza na kuwangisa abale na alongo awo. (Lerini 1 Atesalonika 2:6-8.) Ife tisapereka takhuta kuna Yahova thangwi ya abale anewa akukola mwauzimu akuti asaikha pifuno pya anango pa mbuto yakutoma.

7. Ndi nkhombo zipi zinakhala na abale na alongo ali m’basa ya ndzidzi onsene?

⁷ Anango mu mpingo asakhazikiswa toera kutumikira ninga amisionaryo, apainiya akupambulika peno apainiya a ndzidzi onsene. Mwandimomwene, abale na alongo pa dziko yonsene yapantsi asasankhula kupita m’basa ya ndzidzi onsene yakuti isaphataniza kumwaza mphangwa na kucita anyakupfundza. Munjira ineyi, iwo asaphedza anthu azinji toera kukhala anyakupfundza a Kristu Yezu. Maseze amwazi mphangwa anewa a ndzidzi onsene nee ali na kobiri izinji, Yahova asaapasa nkhombo zizinji. (Marko 10:29, 30) Ife tisafuna kakamwe abale na alongo anewa, pontho tisapereka takhuta kakamwe kuna iwo thangwi ya kucita khundu ya mpingo.

8. Thangwi yanji abale na alongo anamwaza mphangwa zadidi ndi akufunika kakamwe kuna Yahova?

⁸ Kodi abale akufunika kakamwe ndi ale basi ene anatsogolera mpingo na ale anatumikira m’basa ya ndzidzi onsene? Nkhabe. Abale na alongo anamwaza mphangwa zadidi ndi akufunika kakamwe kuna Mulungu na mu mpingo. (Aroma 10:15; 1 Akor. 3:6-9) Mwandimomwene, cifuno cikulu kakamwe ca mpingo ndi kucita anyakupfundza a Mbuyathu Yezu Kristu. (Mat. 28:19, 20; 1 Tim. 2:4) Amwazi mphangwa onsene, akubatizwa na akukhonda batizwa asawangisira kakamwe toera kucita basa ineyi.—Mat. 24:14.

9. Thangwi yanji alongo athu ndi akufunika kakamwe?

⁹ Yahova asapangiza kuti asalemedza alongo  mukuapasa basa yakufunika kakamwe mu mpingo. Iye asalemedza alongo akumanga banja, alongo akuti ali na ana, azice na alongo akukhonda manga banja akuti asantumikira mwakukhulupirika. Bhibhlya isalonga pitsandzo pizinji pya akazi adakomeresa Mulungu. Iwo asakumbukirwa thangwi ya udziwisi wawo, cikhulupiro cawo, phinga yawo, cipapo cawo, kukoma ntima kwawo na mabasa awo adidi. (Luka 8:2, 3; Mabasa 16:14, 15; Aroma 16:3, 6; Afil. 4:3; Aheb. 11:11, 31, 35) Ife tisapereka takhuta kakamwe kuna Yahova thangwi ya kukhala na alongo anewa m’mipingo yathu, akuti asapangiza makhaliro adidi kakamwe.

10. Thangwi yanji abale na alongo akugwesera ndi akufunika kakamwe kuna ife?

¹⁰ Ife tiri akutsandzayambo kakamwe thangwi ya kukhala na abale na alongo azinji akugwesera m’mipingo yathu. Anango mwa abale na alongo anewa akugwesera asatumikira Yahova kutomera mu uphale wawo. Mbwenye anango atoma cincino kutumikira Yahova. Azinji mwa abale na alongo anewa akugwesera, panango asathimbana na nyatwa zizinji za ungumi thangwi ya thunga yawo. Nyatwa zenezi za ungumi panango zinaacimwanisa kucita pizinji mu mpingo na m’basa ya kumwaza mphangwa. Ngakhale tenepo, abale anewa akugwesera asacita pyonsene pinakwanisa iwo m’basa yakumwaza mphangwa, pontho asaphatisira mphambvu zawo toera kuwangisa anango na kuapfundzisa. Ife tinakwanisambo kuphindula na pinthu pidapfundza iwo. Mwandimomwene abale na alongo anewa ndi akufunika kakamwe kuna Yahova na kuna ife.—Mis. 16:31.

11-12. Kodi aphale na atsikana mu mpingo wanu asakuwangisani tani?

¹¹ Nyerezeranimbo pya aphale na atsikana athu. Iwo asathimbana na nyatwa zizinji mu ndzidzi unakula iwo mu dziko ino inatsogolerwa na Sathani Dyabo. (1 Juwau 5:19) Mwandimomwene, tisawangiswa kakamwe tingaona aphale na atsikana akutawira pa misonkhano, akumwaza mphangwa, pontho akutsidzikiza cikhulupiro cawo mwacipapo. Mwakukhonda penula, imwe aphale na atsikana ndimwe akufunika kakamwe mu mpingo wa Yahova.—Masal. 8:2.

 ¹² Mbwenye abale na alongo anango, asanyerezera kuti nee ndi akufunika kakamwe mu mpingo. Ninji pinafuna kuphedza m’bodzi na m’bodzi wa ife toera kuona kuti ndife akufunika mu mpingo?

13-14. Thangwi yanji anango asanyerezera kuti nee ndi akufunika mu mpingo?

¹³ Onani cinthu caciwiri cinafuna kupfundza ife kubulukira mu citsandzo cidaphatisira Paulu. Iye alonga thangwi ya nkandzo unathimbana na anthu azinji lero; thangwi iwo asanyerezera kuti nee ndi akufunika mu mpingo. Paulu alemba: “Mwendo mbudalonga kuti: ‘Nakuti nee ndine manja, nee ndine khundu ya manungo’ kodi pyenepi pisabveka kuti iwo mbudasiya kukhala khundu ya manungo? Pontho, khutu mbidalonga kuti: ‘Nakuti nee ndine diso, nee ndine khundu ya manungo,’ kodi pyenepi pisabveka kuti iyo mbidasiya kukhala khundu ya manungo?” (1 Akor. 12:15, 16) Kodi Paulu akhafuna kulonganji mu citsandzo ceneci?

¹⁴ Mungalandanisika na anango mu mpingo, panango munatoma kunyerezera kuti nee ndimwe wakufunika. Anango mu mpingo mwanu, panango ali na maluso akupfundzisa, asatsalakana mwadidi mabasa awo, peno asabalangaza na kuwangisa anango. Panango imwe munanyerezera kuti nee munakwanisa kucita pinthu ninga pinacita abale anewa. Pyenepi pisapangiza kuti imwe ndimwe wakucepeseka. (Afil. 2:3) Mbwenye citani mphole-mphole. Ndzidzi onsene mungalandanisika na ale akuti ali na maluso mazinji, munatsukwala. Ninga pidalonga Paulu, panango munanyerezera kuti nee ndimwe wakufunika mu mpingo. Ninji pinafuna kukuphedzani toera kucinja manyerezero anewa?

15. Mwakubverana na 1 Akorinto 12:4-11, tisafunika kukumbukanji thangwi ya maluso ali na ife?

¹⁵ Nyerezerani basi: Yahova apereka nzimu wace wakucena kuna Akristu a mu ndzidzi wa apostolo toera kucita pirengo pyakusiyana-siyana. (Lerini 1 Akorinto 12:4-11.) Yahova aapasa maluso akusiyana-siyana, mbwenye akristu onsene akhali akufunika. Lero, Yahova nee asatipasa nzimu wace wakucena toera kucita pirengo. Pontho iye nee asatipasa maluso  mabodzi ene, mbwenye tonsene ndife akufunika kuna iye.

16. Ndi uphungu upi wa mpostolo Paulu wakuti tisafunika kuuphatisira?

¹⁶ M’mbuto mwakulandanisika na Akristu anango, ife tisafunika kuphatisira uphungu wa mpostolo Paulu unalonga kuti: “M’bodzi na m’bodzi asafunika kudinga mabasace, natenepa iye anadzakhala na thangwi toera kutsandzaya na pinacita iye, tayu mukulandanisa na pinacita munthu unango.”—Agal. 6:4.

17. Ndi maphindu api anafuna kukhala na ife tingaphatisira uphungu wa mpostolo Paulu?

¹⁷ Ife tingaphatisira uphungu wa mpostolo Paulu mbatidinga pinthu pinacita ife, tinaona kuti tiri na maluso akuti anango nee ali nawo. Mwacitsandzo, panango nkulu wa mpingo nee asacita mwadidi nkhani, mbwenye ali na maluso adidi akucita anyakupfundza. Panango iye nee asatsalakana mwadidi mabasa ace ninga pinacita akulu a mpingo anango, mbwenye iye asadziwika ninga nkulu wa mpingo waufuni wakuti amwazi mphangwa asakhala akusudzuka toera kuphemba uphungu wa m’Bhibhlya kuna iye. Panango iye asadziwika ninga m’bale wakutambira alendo. (Aheb. 13:2, 16) Tingadzindikira mwapakweca maluso athu tinakhala na mathangwi toera kukomerwa. Munjira ineyi, tinakwanisa kudziwa pinthu pinafunika ife kucita toera kuphedza mpingo. Pontho nee tinakhala na bibvu na abale athu akuti ali na maluso akusiyana na athu.

18. Tinakwanisa tani kukhala apfundzisi adidi?

¹⁸ Mwakukhonda tsalakana basa iri na ife mu mpingo, tonsene tisafunika kukulisa maluso athu. Toera kukulisa maluso athu, Yahova asatipfundzisa mukuphatisira gulu yace. Mwacitsandzo, misonkhano yathu ya pakati pa sumana isatipfundzisa kuti tinamwaza tani mphangwa munjira yadidi. Kodi imwe muli kuwangisira toera kuphatisira pinapfundza imwe pa misonkhano ineyi?

19. Ninji cinafuna kukuphedzani toera kuenda Kuxikola ya Amwazi Mphangwa a Umambo?

¹⁹ Njira inango inaphatisira Yahova toera kutipfundzisa ndi Xikola ya Amwazi Mphangwa a Umambo. Abale asaenda kuxikola ineyi ndi ale ali m’basa ya ndzidzi onsene, pontho ali nkati mwa pyaka 23 mpaka 65. Panango imwe musaona kuti nee munakwanisa kuenda kuxikola ineyi. M’mbuto mwakunyerezera pinthu pinakucimwanisani kuenda kuxikola ineyi, nyerezerani pinthu pinakucitisani kufuna kuenda kuxikola ineyi. Buluka penepo citani masasanyiro akuti anakuphedzani toera kukhala na makhaliro adidi toera mukwanise kuenda kuxikola ineyi. Na ciphedzo ca Yahova, pontho na kuwangisira kwanu munakwanisa kucita pinthu pinaona imwe ninga ndi pyakucimwanika.

20. Tisapfundzanji na mafala anagumanika pa Aroma 12:6-8?

²⁰ Cinthu cacitatu cinafuna ife kupfundza kubulukira mu citsandzo cidaphatisira Paulu cisagumanika pa Aroma 12:6-8. (Lerini.) Pa lemba ineyi mpostolo Paulu alonga pontho kuti anthu onsene mu mpingo ali na maluso akusiyana. Pontho iye agomezera kuti tisafunika kuphatisira maluso ali na ife toera kuwangisa mpingo.

21-22. Tisapfundzanji na pinthu pidacitikira Robert na Felice?

²¹ Onani pinthu pidacitikira m’bale Robert. Pidamala iye kutumikira mu dziko inango, iye aphembwa toera kutumikira ku Bheteli ya mu dziko yace. Maseze abale ampanga kuti macinjo anewa nee ndi thangwi iye acita pinthu pyakuipa, iye alonga: “Ine ndamala miyezi mizinji ndiri wakutsukwala, thangwi ndikhanyerezera kuti ndacita cinthu cakuipa. Midzidzi inango ndanyerezera kusiya kutumikira pa Bheteli.” Kodi iye akwanisa tani kukhala pontho wakutsandzaya? Nkulu wa mpingo unango apanga Robert  kuti basa yonsene idatipasa Yahova nduli ikhatikhunganya toera kucita basa inacita ife lero. Robert adzindikira kuti akhafunika kusiya kunyerezera pinthu pikhacita iye nduli mbanyerezera basi ene pinthu pinacita iye cincino.

²² M’bale Felice Episcopo athimbanambo na cinentso cibodzi cene. Iye na nkazace akurusari xikola ya Jileadhi mu caka 1956 pontho atumikira ninga muyang’aniri wa cisa ku Bolivia. Mbwenye mu caka 1964 iwo abala mwana. Felice alonga: “Pikhali pyakunentsa kakamwe kwa ife toera kusiya basa yakufunika kakamwe ikhacita ife. Mwandimomwene ndamala caka camumphu ndiri wakutsukwala. Mbwenye na ciphedzo ca Yahova, ine ndacinja manyerezero anga mbandinyerezera basi ene basa ipswa ikhali na ine ninga nyakubala.” Kodi imwe mwathimbanambo na cinentso cibodzi cene ninga cidathimbana na Robert peno Felice? Kodi imwe muli wakutsukwala thangwi basa inacita imwe cincino ndi yakusiyana na ikhacita imwe kale? Khala ndi tenepo, imwe munakhala wakutsandzaya basi ene mungaikha manyerezero anu ku pinthu pinakwanisa imwe kucita cincino toera kutumikira Yahova na abale anu. Khalani akuphatika m’basa ya Yahova mukuphatisira maluso anu toera kuphedza anango, natenepa munakwanisa kukhala akutsandzaya mbamuwangisa mpingo.

23. Ndi pinthu pipi pinafunika ife kunyerezera mwadidi, pontho ndi mibvundzo ipi inafuna ife kutawira mu nsolo unatowera?

²³ Tonsene ndife akufunika kakamwe kuna Yahova. Iye asafuna kuti ticite khundu mu gulu yace. Tinganyerezera mwadidi pinthu pinakwanisa ife kucita toera kuwangisa abale na alongo athu mbatiwangisira toera kupicita, tinacalira mabvero akuti nee ndife akufunika mu mpingo wa Mulungu. Mphapo tisaona tani anango mu mpingo? Tinapangiza tani kuti tisaafuna na kualemedza? Mu nsolo unatowera, tinadzatawira mibvundzo ineyi yakufunika kakamwe.