NSOLO WA PFUNDZIRO 33
Tsandzayani na Pinthu Pinakwanisa Imwe Kucita Kuna Yahova
‘Mphyadidi kukomerwa na pinaona maso, kupiringana kusirira pinthu pyakuti nee unakwanisa kukhala napyo.’—KOEL. 6:9.
NYIMBO 111 Tiri na Mathangwi Toera Kutsandzaya
PINAFUNA IFE KUPFUNDZA *
1. Kodi abale na alongo azinji asawangisira toera kucitanji m’basa ya Yahova?
IFE tiri na basa izinji kakamwe toera kucita mu ndzidzi wakuti kumala kwa dziko ino kuli cifupi. (Mat. 24:14; Luka 10:2; 1 Ped. 5:2) Ife tonsene tisafuna kucita pizinji m’basa ya Yahova. Azinji a ife asathimizira utumiki wawo. Anango asafuna kutumikira ninga apainiya. Anangombo asafuna kutumikira ku Bheteli peno m’basa yakumanga Nyumba za Umambo, Nyumba za Misonkhano, Bheteli peno nyumba zakuthumburuzira mabukhu athu. Kusiyapo pyenepi, abale azinji asawangisira kakamwe toera akhale akuthema kutumikira ninga atumiki akutumikira peno akulu a mpingo. (1 Tim. 3:1, 8) Yahova asakomerwa kakamwe angaona kuwangisira kunacita atumiki ace.—Masal. 110:3; Iza. 6:8.
2. Tisapibva tani tingacimwana kukwanirisa pifuno pyathu pyauzimu?
2 Pangapita ndzidzi uzinji mbatikhonda kwanirisa pifuno pyathu pyauzimu, panango tinatsukwala. Kusiyapo pyenepi, panango ife tinatsukwala khala nee tisakwanisa kucita pinthu pinango mu gulu ya Yahova thangwi yakukalamba peno thangwi ya pinthu pinango. (Mis. 13:12) Pyenepi pyacitika na mulongo Melissa. * Iye akhafuna kakamwe kutumikira ku Bheteli peno kuenda kakurusari Xikola ya Amwazi Mphangwa a Umambo, mbwenye iye alonga: “Na thangwi ya thunga yanga nee pinakwanisika. Natenepa, midzidzi inango pyenepi pisandicitisa kukhala wakutsukwala.”
3. Kodi anango asafunika kucitanji toera akhale na miyai inango yakutumikira?
3 Aphale na atsikana anango akuti ali na ungumi wadidi, panango anafunika kukulisa makhaliro anango akuti anaaphedza toera kukhala na miyai inango yakutumikira. Mwacitsandzo, anango anakwanisa kukhala a maluso, kucita pisankhulo mwakucimbiza na kukhala dzololo toera kucita mabasa anapaswa iwo. Mbwenye panango iwo asafunika kupfundza kukhala akupirira, kucita mabasa awo mwadidi na kulemedza kakamwe anango. Imwe mungawangisira kukulisa makhaliro anafunika kuna imwe, abale anakwanisa kukupasani mabasa akuti panango nee mukhaadikhira. Onani pidacitika na Nick. Pikhali iye na pyaka 20, iye akhadaipirwa kakamwe thangwi nee akhakhazikiswa ninga ntumiki wakutumikira. Iye alonga: “Ndikhaona kuti pana cinthu cakuipa kuna ine.” Mbwenye Nick nee abwerera nduli. Iye apitiriza kucita pyonsene pikhakwanisa iye mu mpingo na m’basa yakumwaza mphangwa. Lero, iye asatumikira ninga m’bodzi wa Komiti ya Filiali.
4. Tinadinganji mu nsolo uno?
4 Kodi imwe muli wakutsukwala thangwi yakukhonda kukwanirisa pifuno pinango pyauzimu? Khala ndi tenepo, citani phembero kuna Yahova thangwi ya pyenepi. (Masal. 37:5-7) Kusiyapo pyenepi, phembani maonero a abale anango akukola mwauzimu toera akuphedzeni m’makhundu anafunika imwe kusasanyira, buluka penepo wangisirani toera kuphatisira maonero awo. Mungacita pyenepi, panango pinakuphedzani toera kukwanirisa pifuno pyanu pyauzimu. Mbwenye ninga Melissa adalongwa mu ndima yaciwiri, panango nee pinakwanisika kuna imwe toera kucita pinafuna imwe m’basa ya Yahova. Mphapo munakwanisa tani kupitiriza kukhala wakutsandzaya? Toera kutawira mbvundzo unoyu, mu nsolo uno tinadinga pinthu pitatu: (1) Ninji cinafuna kukuphedzani toera kukhala wakutsandzaya? (2) Munathimizira tani kutsandzaya kwanu? (3) Ndi pifuno pipi pyakuti munakwanisa kupikhazikisa mbamutsandzaya napyo?
NINJI CINAFUNA KUKUPHEDZANI TOERA KUKHALA WAKUTSANDZAYA?
5. Tisafunika kucitanji toera tikhale akutsandzaya? (Koelete 6:9)
5 Lemba ya Koelete 6:9, isalonga cinthu cinafuna kutiphedza toera tikhale akutsandzaya. (Lerini.) Munthu anakomerwa na ‘pinaona maso’ asatsandzaya na piri na iye. Mbwenye Munthu anapitiriza kusirira pinthu pyakuti nee anakwanisa kukhala napyo nee anatsandzaya. Kodi pyenepi pisatipfundzisanji? Toera tikhale akutsandzaya, ife tisafunika kuikha manyerezero athu ku pinthu piri na ife tayu ku pinthu pyakuti nee tinakwanisa kukhala napyo.
6. Ndi nsangani upi unafuna ife kudinga, pontho tinapfundzanji na nsangani unoyu?
6 Kodi ndi pyakukwanisikadi kuna munthu kukhala wakutsandzaya na pinthu piri na iye? Anthu azinji asanyerezera kuti nee ndi pyakukwanisika thangwi tisapitiriza kukomerwa na kucita pinthu pipswa, mbwenye ndi pyakukwanisika kutsandzaya na pinthu piri na ife. Mphapo tinakwanisa tani kutsandzaya na pinthu piri na ife? Toera kudziwa pyenepi, tendeni tidinge nsangani wa matalento udalonga Yezu unagumanika pa Mateu 25:14-30. Pontho tinaona kuti tinakhala tani akutsandzaya kakamwe na pinthu piri na ife.
MUNATHIMIZIRA TANI KUTSANDZAYA KWANU
7. Fokotozani nsangani wa Yezu unalonga pya matalento.
7 Mamuna adalongwa mu nsangani wa Yezu akhafuna kucita ulendo. Mbwenye mbadzati kucita ulendo unoyu, iye acemera anyabasa ace mbaapasa matalento toera kucita malonda. * Nakuti mamuna unoyu akhadziwa maluso a anyabasa ace, wakutoma ampasa matalento maxanu, waciwiri ampasa matalento mawiri, pontho wakumalisa ampasa talento ibodzi. Anyabasa awiri acita malonda mwaphinga kakamwe toera kuthimizira kobiri idaapasa mbuyawo. Mbwenye nyabasa wacitatu nee acita malonda na kobiri idapaswa iye, natenepa mbuyace am’bulusa basa.
8. Thangwi yanji nyabasa wakutoma analongwa mu nsangani wa Yezu atsandzaya kakamwe?
8 Nyabasa wakutoma atsandzaya kakamwe thangwi yakupaswa matalento maxanu na mbuyace. Matalento adapaswa nyabasa unoyu akhali kobiri izinji kakamwe, pontho pyenepi pisapangiza kuti nyabasa unoyu akhanyindirwa kakamwe na mbuyace. Mphapo ndiye tani nyabasa waciwiri? Panango iye mbadatsukwala thangwi yakukhonda kupaswa matalento mazinji ninga adapaswa nyabasa wakutoma. Mbwenye iye acitanji?
Tisapfundzanji na nyabasa waciwiri analongwa mu nsangani wa Yezu? (1) Iye apaswa matalento mawiri na mbuyace. (2) Iye aphata basa mwakuwanga toera kuwina matalento anango. (3) Iye awina matalento anango mawiri (Onani ndima 9-11)
9. Ndi pinthu pipi pyakuti Yezu nee apilonga thangwi ya nyabasa waciwiri? (Mateu 25:22, 23)
9 Lerini Mateu 25:22, 23. Yezu nee alonga kuti nyabasa waciwiri atsukwala kakamwe thangwi yakutambira basi ene matalento mawiri. Yezu nee alonga kuti nyabasa unoyu adungunya mbalonga: ‘Thangwi yanji mbuyanga andipasa matalento akucepa? Ine ndaphata basa mwakuwanga kakamwe ninga pidacita nyabasa adapaswa matalento maxanu. Khala mbuyanga asanyerezera kuti nee ndine nyabasa wadidi, mphyadidi ndifikire pyanga matalento mawiri adandipasa iye mbindicita mabasa anga.’
10. Kodi nyabasa waciwiri acitanji na matalento adapaswa iye na mbuyace?
10 Ninga pidacita nyabasa wakutoma, nyabasa waciwiri awangisirambo kakamwe toera kucita mwadidi basa idapaswa iye na mbuyace. Natenepa iye awina matalento anango mawiri. Na thangwi ineyi mbuyace ampasa nkhombo thangwi yakuphata basa mwaphinga. Kusiyapo pyenepi, mbuyace ansimba mbampasa mabasa anango mazinji.
11. Tinakwanisa tani kukhala akutsandzaya kakamwe?
11 Munjira ibodzi ene, ife tinakhala akutsandzaya kakamwe tingacita na ntima onsene mabasa onsene anapaswa ife mu gulu ya Yahova. Phatisirani “ndzidzi” uzinji m’basa yakumwaza mphangwa, pontho citani mabasa onsene anapaswa imwe mu mpingo. (Mabasa 18:5; Aheb. 10:24, 25) Khunganyikani mwadidi misonkhano toera mukwanise kupereka matawiro akuwangisa. Pontho khunganyikani mwadidi makhundu onsene anapaswa imwe pa misonkhano ya pakati pa sumana. Mungaphembwa toera kucita mabasa anango mu mpingo, aciteni nakweru, pontho khalani wakunyindirika. Onani mabasa onsene anapaswa imwe mu mpingo kukhala akufunika kakamwe, pontho lekani nyerezera kuti mungacita mabasa anewa mukubvunga ndzidzi wanu papezi. Wangisirani kakamwe kucita mabasa onsene anapaswa imwe toera kuthimizira maluso anu. (Mis. 22:29) Mungawangisira toera kucita mabasa a Yahova, munakhala na uxamwali wakuwanga na iye, pontho munakhala wakutsandzaya kakamwe. (Agal. 6:4) Kusiyapo pyenepi, imwe munadzakhala wakutsandzaya anango angapaswa miyai yakutumikira mu mpingo yakuti imwe mukhaifunambo.—Aroma 12:15; Agal. 5:26.
12. Ninji pidaphedza Melissa na Nick toera kuthimizira kutsandzaya kwawo?
12 Kodi musakumbuka mulongo Melissa adalongwa mu ndima 2 wakuti akhafuna kakamwe kutumikira ku Bheteli peno kukurusari Xikola ya Amwazi Mphangwa a Umambo? Maseze iye nee akwanisa kucita pyenepi, iye alonga: “Ine ndacita pyonsene pikhakwanisa ine toera kutumikira ninga mpainiya, pontho ndaphatisira njira zakusiyana-siyana toera kumwaza mphangwa. Pyenepi pyanditsandzayisa kakamwe.” Kodi Nick akwanisa tani kupirira mu ndzidzi ukhafuna iye kakamwe kukhazikiswa ninga ntumiki wakutumikira? Iye alonga: “Ine ndikhaikha manyerezero anga m’mabasa onsene akhapaswa ine, kuphatanizambo kumwaza mphangwa na kupereka matawiro pa misonkhano. Kusiyapo pyenepi, ine ndaprenxeri petisau toera kuenda katumikira ku Bheteli, pontho ndacemerwa toera kuenda katumikira kweneku mu caka cidatowera.”
13. Ndi nkhombo zipi zinafuna kukhala na imwe mungacita mwadidi mabasa anapaswa imwe cincino? (Koelete 2:24)
13 Khala imwe musacita mwadidi mabasa anapaswa imwe cincino, kodi pyenepi pisabveka kuti imwe munapaswa mabasa akuthimizirika ntsogolo? Panango munapaswa, ninga pidacitika na Nick. Mbwenye mungakhonda kupaswa ninga pidacitika kuna Melissa, imwe munakhala wakutsandzaya kakamwe thangwi ya pinthu pinakwanisa imwe kucita m’basa ya Yahova. (Lerini Koelete 2:24.) Kusiyapo pyenepi, imwe munakhala wakutsandzaya kakamwe thangwi yakudziwa kuti kuwangisira kwanu kusakomeresa Mbuyathu, Yezu Kristu.
PIFUNO PYAKUTI PISATHIMIZIRA KUTSANDZAYA KWATHU
14. Ndi pinthu pipi pyakuti tisafunika kupikumbuka mu ndzidzi unafuna ife kucita pizinji m’basa ya Yahova?
14 Kodi kuikha manyerezero athu m’basa inacita ife cincino pisabveka kuti nee tisafunikabve kusaka miyai inango toera kuthimizira utumiki wathu? Nkhabe. Ife tisafunika kukhazikisa pifuno pyakuti pinatiphedza toera kukhala amwazi mphangwa na apfundzisi adidi, pontho toera kuphedza kakamwe abale na alongo athu. Ife tinakwanirisa pifuno pyenepi khala tisapifuna toera kuphedza anango, tayu toera kuphindulisa ife.—Mis. 11:2; Mabasa 20:35.
15. Ndi pifuno pipi pyakuti pinakuphedzani toera kukhala wakutsandzaya kakamwe?
15 Ndi pifuno pipi pyakuti imwe munakwanisa kupikhazikisa? Phembani Yahova toera akuphedzeni kudziwa pifuno pyakuti imwe munakwanisa kupikhazikisa na kupikwanirisa. (Mis. 16:3; Tiya. 1:5) Kodi imwe musayesera kukhazikisa cifuno cakutumikira ninga mpainiya wakuphedza peno mpainiya wa ndzidzi onsene, kutumikira ku Bheteli, peno kuphedzera mabasa akumanga Nyumba za Umambo, Nyumba za Misonkhano na nyumba zakuthumburuzira mabukhu athu? Panango imwe munakwanisa kukhazikisa cifuno cakupfundza cilongero cinango toera mukwanise kumwaza mphangwa kuna anthu a m’mbuto zinango. Imwe munakwanisa kuleri bukhu Organizados Para Fazer a Vontade de Jeová kapitulu 10, pontho munakwanisa kucedza na akulu a mpingo toera kudziwa pizinji thangwi ya pifuno pyenepi. * Mungawangisira toera kukwanirisa pifuno pyenepi, imwe munapangiza pakweca kuthambaruka kwanu, pontho munakhala wakutsandzaya kakamwe.
16. Musafunika kucitanji khala nee musakwanisa kukwanirisa pifuno pyauzimu pidalongwa mu ndima zidamala?
16 Kodi musafunika kucitanji khala nee musakwanisa kukwanirisa pifuno pyauzimu pidalongwa mu ndima zidamala? Yeserani kukhazikisa cifuno cakuti munakwanisa kucikwanirisa. Cincino tendeni tione pifuno pinango pyakuti munakwanisa kupikhazikisa.
Ndi pifuno pipi pyakuti imwe munakwanisa kupikwanirisa? (Onani ndima 17) *
17. Mwakubverana na 1 Timoti 4:13, 15, m’bale asafunika kucitanji toera akhale mpfundzisi wadidi?
17 Lerini 1 Timoti 4:13, 15. Khala imwe ndimwe m’bale wakubatizwa, munakwanisa kuwangisira toera kuthimizira maluso anu akulonga na akupfundzisa. Thangwi yanji? Thangwi mungawangisira toera kuleri mwadidi, kulonga mwadidi na kupfundzisa mwadidi imwe munakwanisa kuphedza ale anakubveserani. Yeserani kupfundza na kuphatisira pitsogolero pinagumanika m’bhruxura yakuti Wangisirani Toera Kuleri Mwadidi na Kupfundzisa. Pfundzani nsolo ubodzi na ubodzi, pontho wangisirani toera kuphatisira pinthu pidapfundza imwe mu ndzidzi unacita imwe nkhani yanu. Phembani maonero a nyakupereka uphungu peno akulu a mpingo akuti ‘asaphata basa mwakuwanga pakulonga na pakupfundzisa.’ * (1 Tim. 5:17) Lekani kuikha manyerezero anu basi ene ku pinthu pinapfundza imwe m’bhruxura ineyi, mbwenye wangisirani toera kuwangisa cikhulupiro ca anyakubvesera anu kuti aphatisire pinapfundza iwo. Mungacita pyenepi, imwe pabodzi na iwo munakhala akutsandzaya kakamwe.
Ndi pifuno pipi pyakuti imwe munakwanisa kupikwanirisa? (Onani ndima 18) *
18. Ninji pinafuna kutiphedza toera kukwanirisa pifuno m’basa yathu yakumwaza mphangwa?
18 Ife tonsene tiri na basa yakumwaza mphangwa na kucita anyakupfundza. (Mat. 28:19, 20; Aroma 10:14) Kodi imwe musafuna kuthimizira maluso anu m’basa ineyi yakufunika kakamwe? Pfundzani bhruxura yakuti Wangisirani Toera Kuleri Mwadidi na Kupfundzisa, pontho khazikisani pifuno pyakuti pinakuphedzani toera kuphatisira pinapfundza imwe. Imwe munakwanisa kugumana mphangwa zinango mu Umaso Wathu Wacikristu na Utumiki—Programu ya Misonkhano na mavidhyu a maperekero aumboni anapangizwa pa misonkhano ya pakati pa sumana. Yeserani kuphatisira maonero akusiyana-siyana toera kuona kuti ndi api anaphata basa mwadidi. Mungaphatisira pitsogolero pyenepi, imwe munakhala m’mwazi mphangwa wakutsandzaya na wa maluso kakamwe.—2 Tim. 4:5.
Ndi pifuno pipi pyakuti imwe munakwanisa kupikwanirisa? (Onani ndima 19) *
19. Munakwanisa tani kukulisa makhaliro Acikristu?
19 Mu ndzidzi unakhazikiswa imwe pifuno pyauzimu, lekani kuduwala cinthu cakufunika kakamwe cakuti ndi kukulisa makhaliro Acikristu. (Agal. 5:22, 23; Akol. 3:12; 2 Ped. 1:5-8) Mphapo musafunika kucitanji toera mukwanise kukulisa makhaliro anewa? Mwacitsandzo, panango imwe musafuna kukhala na cikhulupiro cakuwanga kakamwe. Imwe musafunika kuleri misolo ya mabukhu athu yakuti isapereka maonero akuwangisa cikhulupiro. Kusiyapo pyenepi, imwe musafunikambo kuona mavidhyu a JW Broadcasting® anapangiza abale na alongo akuti apangiza cikhulupiro cakuwanga mu ndzidzi ukhathimbana iwo na mayesero. Buluka penepo onani kuti munatowezera tani cikhulupiro cawo.
20. Tisafunika kucitanji toera tikhale akutsandzaya kakamwe?
20 Mwakukhonda penula, ife tonsene tisafuna kucita pizinji m’basa ya Yahova kupiringana pire pinakwanisa ife kucita cincino. Mu dziko ipswa, ife tinadzatumikira Mulungu mwakukwana. Ndzidzi unoyu mbudzati kufika, tendeni ticite pyonsene pinakwanisa ife toera kukhazikisa pifuno pyakuti tinakwanisa kupikwanirisa, pyenepi pinatiphedza toera tikhale akutsandzaya kakamwe. Kusiyapo pyenepi, ife tinapasa mbiri Yahova, ‘Mulungu wathu wakutsandzaya.’ (1 Tim. 1:11) Natenepa, tendeni tipitirize kukhala akutsandzaya na pinthu pinakwanisa ife kucita kuna Yahova.
NYIMBO 82 ‘Ceza Canu Cioneke Kuna Anthu’
^ ndima 5 Ife tisafuna kakamwe Yahova, pontho tisafuna kucita pyonsene pinakwanisa ife m’basa yace. Na thangwi ineyi, azinji a ife asafuna kucita pizinji kakamwe m’basa yakumwaza mphangwa peno mu mpingo. Mphapo ndiye tani khala tisawangisira toera kucita pyenepi, mbwenye nee tisakwanirisa cifuno cathu. Ninji pinafuna kutiphedza toera tipitirize kucita pizinji m’basa ya Yahova mbatikhala akutsandzaya? Ife tinakwanisa kugumana matawiro a mibvundzo ineyi mu nsangani wa matalento udalonga Yezu.
^ ndima 2 Madzina anango acinjwa.
^ ndima 7 MABVEKERO A MAFALA ANANGO: Talento ibodzi ikhali sawasawa na kobiri ikhatambira munthu wakuti aphata basa mu pyaka 20.
^ ndima 15 Abale akubatizwa asakulumizwa toera awangisire kakamwe kuti akhale akuthema kutumikira ninga atumiki akutumikira na akulu a mpingo. Toera kudziwa kuti munthu asafunika kucitanji toera akhale wakuthema, onani kapitulu 5 na 6 ya bukhu Organizados Para Fazer a Vontade de Jeová.
^ ndima 17 MABVEKERO A MAFALA ANANGO: Nyakupereka uphungu ndi nkulu wa mpingo wakuti asasankhulwa toera kupereka uphungu kuna akulu a mpingo na atumiki akutumikira thangwi ya makhundu anacita iwo mu mpingo.
^ ndima 64 FOTO TSAMBA: M’bale akupfundza mabukhu athu toera akwanise kukhala mpfundzisi wadidi.
^ ndima 66 FOTO TSAMBA: Pakumala kukhazikisa cifuno cakupereka umboni wantsusukano, mulongo akupereka ncemerero toera kupita mu jw.org kuna nyabasa wa mu restauranti.
^ ndima 68 FOTO TSAMBA: Toera kupangiza makhaliro adidi, mulongo ali kupereka muoni kuna mulongo unango.
