NSOLO WA PFUNDZIRO 34
NYIMBO 107 Mulungu Atipasa Citsandzo Toera Kupangiza Ufuni
Akulu a Mpingo Asapangiza Tani Ufuni na Ntsisi Kuna Anyakudawa?
“Mulungu ndi wadidi, pontho akuyesera kukuphedza toera utcunyuke.”—AROMA 2:4.
PINAFUNA IFE KUPFUNDZA
Tinaona kuti akulu a mpingo anacitanji toera kuphedza munthu adacita madawo makulu.
1. Ndi pinthu pipi pinacitika munthu angacita madawo makulu?
MU NSOLO udamala taona pitsogolero pidapereka mpostolo Paulu kuna mpingo wa ku Korinto thangwi ya mamuna m’bodzi akhacita madawo makulu. Nakuti mamuna unoyu nee atcunyuka iye abuluswa mu mpingo. Mbwenye ninga pinapangiza lemba ya Aroma 2:4, munthu adacita madawo makulu anakwanisa kuphedzwa toera kutcunyuka. Mphapo akulu a mpingo anakwanisa tani kuphedza munthu toera kutcunyuka?
2-3. Tisafunika kucitanji tingadziwa kuti m’bale peno mulongo acita madawo, pontho thangwi yanji?
2 Akulu a mpingo angakhonda kudziwa kuti munthu acita madawo, iwo nee anakwanisa kumphedza. Mphapo tingadziwa kuti m’bale peno mulongo acita madawo makulu akuti anancitisa kubuluswa mu mpingo, tisafunika kucitanji? Tisafunika kukulumiza munthu unoyu kuti alonge na akulu a mpingo toera aphedzwe.—Iza. 1:18; Mabasa 20:28; 1 Ped. 5:2.
3 Tisafunika kucitanji munthu adacita madawo angakhonda kulonga na akulu a mpingo? Tisafunika kudziwisa akulu a mpingo toera munthu unoyu aphedzwe. Pyenepi pisapangiza kuti tisafuna kakamwe m’bale wathu peno mulongo wathu, thangwi ife nee tisafuna kumuluza. Munthu unoyu angakhonda kucinja mbapitiriza kucita pinthu pyakuipa, iye anafudza uxamwali wace na Yahova, pontho pyenepi pinapswipisa mpingo. Natenepa, maseze pinentse, tisafunika kukhala na cipapo toera kudziwisa akulu a mpingo, thangwi ya ufuni wathu kuna Yahova na m’bale peno mulongo unoyu.—Mas. 27:14.
AKULU A MPINGO ANAPHEDZA TANI MUNTHU ADACITA MADAWO MAKULU?
4. Ndi cipi cifuniro ca akulu a mpingo angacedza na munthu adacita madawo?
4 M’bale peno mulongo angacita madawo, nsoka wa akulu a mpingo usasankhula akulu a mpingo atatu toera acedze na munthu unoyu, pontho asakhazikisa komiti ya akulu a mpingo. a Akulu a mpingo anewa asafunika kukhala akucepeseka. Iwo asawangisira toera kuphedza nyakudawa toera atcunyuke. Mbwenye iwo asadziwa kuti nee asafunika kukakamiza munthu toera atcunyuke. (Dheu. 30:19) Iwo asadziwambo kuti nee ndi anyakudawa onsene anatcunyuka ninga pidacita Dhavidhi. (2 Sam. 12:13) Anyakudawa anango asakhonda kubvera uphungu wa Yahova. (Gen. 4:6-8) Ngakhale tenepo, cifuniro ca akulu a mpingo, ndzidzi onsene ndi kuphedza nyakudawa toera atcunyuke. Mphapo akulu a mpingo asafunika kucitanji angacedza na munthu adacita madawo?
5. Akulu a mpingo asafunika kucitanji angacedza na munthu adacita madawo? (2 Timoti 2:24-26) (Onanimbo foto.)
5 Akulu a mpingo asaona nyakudawa ninga bira yakufunika ya Yahova yakuti yatayika. (Luka 15:4, 6) Natenepa, angacedza na nyakudawa, iwo nee asalonga naye mwaukali, pontho nee asantsalakana mwakuipa. Akulu a mpingo angacedza na munthu unoyu, nee asanyerezera kuti basi ene asafunika kucita mibvundzo na kudziwa pinthu pidacitika. M’mbuto mwace, iwo asawangisira toera kupangiza makhaliro analongwa pa 2 Timoti 2:24-26. (Lerini.) Akulu a mpingo asakhala akukhurudzika, akukoma ntima na acilemedzo toera kuphedza munthu adacita madawo.
Ninga nkumbizi, akulu a mpingo asacita pyonsene pinakwanisa iwo toera kuphedza bira yakutayika (Onani ndima 5)
6. Akulu a mpingo asakhunganya tani mitima yawo mbadzati kucedza na nyakudawa? (Aroma 2:4)
6 Akulu a mpingo asakhunganya mitima yawo. Iwo asawangisira toera kutowezera njira inatsalakana Yahova munthu adacita madawo, pontho asakumbuka mafala adalemba mpostolo Paulu kuti: “Mulungu ndi wadidi, pontho akuyesera kukuphedza toera utcunyuke.” (Lerini Aroma 2:4.) Akulu a mpingo asafunika kukumbuka kuti iwo ndi akumbizi anatsogolerwa na Yezu Kristu. (Iza. 11:3, 4; Mat. 18:18-20) Mbadzati kucedza na nyakudawa, komiti ya akulu a mpingo inacita phembero toera kunyerezera mwadidi cifuniro cawo cakuphedza nyakudawa toera atcunyuke. Iwo anafufudza m’Bhibhlya na m’mabukhu athu, pontho anaphemba Yahova toera aapase udziwisi. Akulu a mpingo ananyerezerambo pinthu pidacitika mu umaso wa munthu unoyu pyakuti iwo asafunika kupidziwa. Panango pinthu pidacitika mu umaso wace pyancitisa kunyerezera na kucita pinthu pyakuipa.—Mis. 20:5.
7-8. Akulu a mpingo anatowezera tani kupirira kwa Yahova angacedza na munthu adacita madawo?
7 Akulu a mpingo asatowezera kupirira kwa Yahova. Iwo asakumbuka njira idatsalakana Yahova anthu adacita madawo nduli. Mwacitsandzo, Yahova apirira Kaini, acedza naye mbampanga pinthu pikhafuna kucitika thangwi ya madawo ace, pontho ampanga kuti mbadampasa nkhombo angabvera. (Gen. 4:6, 7) Yahova apasambo uphungu Dhavidhi mukuphatisira mprofeta Natani wakuti alonga nsangani toera kuphedza Dhavidhi. (2 Sam. 12:1-7) Pontho kuna dzindza ya Izraeli yakuti kazinji kene nee ikhambvera, Yahova akhatuma aprofeta ‘ntsiku zonsene mwakubwereza-bwereza.’ (Yer. 7:24, 25) Yahova nee adikhira kuti anthu atome kutcunyuka toera kuaphedza. M’mbuto mwace, ndiye adatoma kuaphedza. Pontho maseze anthu akhapitiriza kudawa, Yahova akhaakulumiza toera atcunyuke.
8 Akulu a mpingo asatowezera citsandzo ca Yahova pakuwangisira toera kuphedza munthu adacita madawo. Ninga pinalonga 2 Timoti 4:2, iwo asacedza na munthu “mwakukhurudzika kakamwe.” Nkulu wa mpingo ndzidzi onsene asafunika kulonga mwakukhurudzika na mwakupirira toera kuphedza nyakudawa. Nkulu wa mpingo angakhala wakuipirwa, panango munthu nee anabvera uphungu, pontho nee anatcunyuka.
9-10. Akulu a mpingo anaphedza tani nyakudawa toera anyerezere pidacita iye?
9 Akulu a mpingo asawangisira toera kubvesesa pinthu pidacitisa munthu kudawa. Mwacitsandzo, kodi uxamwali wa munthu unoyu na Yahova wafewa kakamwe? Kodi iye asiya mwapang’ono-pang’ono kupfundza Bhibhlya peno kumwaza mphangwa? Kodi iye akhalonga pinthu pibodzi pyene m’maphembero ace, peno nee akhacitabve phembero kazinji kene? Kodi iye asiya kuwangisira toera kuthimbana na pifuno pyakuipa? Ndi api axamwali ace, pontho ndi ntundu upi wa ubalangazi unasankhula iye? Kodi pisankhulo pyenepi pyancitisa kukhala na manyerezero na pifuno pyakuipa? Kodi iye asadzindikira kuti pisankhulo na pinthu pinango pidacita iye pisatsukwalisa Yahova?
10 Akulu a mpingo anakwanisa kucita mibvundzo toera kuphedza munthu kunyerezera pinthu pidafewesa uxamwali wace na Yahova mbadawa. Ndimomwene kuti iwo anacita pyenepi mwakukoma ntima, pontho nee anabvundza pinthu pyakuti iwo nee asafunika kupidziwa. (Mis. 20:5) Kusiyapo pyenepi, iwo anakwanisa kuphatisira misangani ninga pidacita Natani kuna Dhavidhi toera kuphedza munthu kunyerezera na kuona kuti pidacita iye mwandimomwene ndi pyakuipa. Angacita pyenepi, panango paulendo wakutoma unafuna iwo kugumanyikana, munthu anatoma kubvesesa kuti pidacita iye ndi pyakuipa mbatoma kunyerezera mwadidi. Panango iye anatcunyuka.
11. Yezu atsalakana tani anyakudawa?
11 Akulu a mpingo asawangisira toera kutowezera Yezu. Pakulonga na Saulo wa ku Tarsu, Yezu acita mbvundzo wadidi toera Saulo alonge pikhanyerezera iye: “Saulo, Saulo, thangwi yanji usanditcinga?” Natenepa Yezu aphedza Saulo toera kuona kuti pinthu pikhacita iye pikhali pyakuipa. (Mabasa 9:3-6) Pontho kuna “nkazi ule wakuti ndi ninga Yezabheli,” Yezu alonga: “Ine ndampasa ndzidzi toera atcunyuke.”—Apok. 2:20, 21.
12-13. Akulu a mpingo anapasa tani munthu ndzidzi toera atcunyuke? (Onanimbo foto.)
12 Akulu a mpingo asatowezera citsandzo ca Yezu, pontho nee asacimbiza kunyerezera kuti nyakudawa nee anatcunyuka. Panango anango anatcunyuka paulendo wakutoma unacedza iwo na akulu a mpingo, mbwenye anango anakwata ndzidzi toera kutcunyuka. Na thangwi ineyi, akulu a mpingo nee anacedza na nyakudawa basi ene kabodzi. Panango paulendo wakutoma unacedza iwo nyakudawa anatoma kudzindikira kuti pidacita iye ndi pyakuipa, pontho buluka penepo anacita phembero mwakucepeseka kuna Yahova. (Mas. 32:5; 38:18) Natenepa, paulendo unango unagumanyikana iwo, panango iye anacinja manyerezero ace mbakhala dzololo toera kutcunyuka.
13 Toera kuphedza nyakudawa kuti atcunyuke, ndzidzi onsene akulu a mpingo asafunika kukhala akukoma ntima na kupangiza citsalakano kuna nyakudawa. Iwo asacita phembero toera Yahova apase nkhombo kuwangisira kunacita munthu unoyu, pontho asadikhira kuti iye anadzindikira pyakuipa pinacita iye mbatcunyuka.—2 Tim. 2:25, 26.
Akulu a mpingo nee anacedza basi ene kabodzi na nyakudawa toera kumphedza kutcunyuka (Onani ndima 12)
14. Mbani anaphedza nyakudawa toera atcunyuke, pontho thangwi yanji tisalonga tenepo?
14 Nyakudawa angatcunyuka, tonsene tisatsandzaya. (Luka 15:7, 10) Maseze akulu a mpingo asawangisira toera kuphedza munthu, mbani mwandimomwene anaphedza nyakudawa toera kutcunyuka? Kumbukani pidalonga Paulu thangwi ya anyakudawa: “Panango Mulungu anaatawirisa kuti atcunyuke.” (2 Tim. 2:25) Natenepa, ndi Yahova, tayu munthu anaphedza Nkristu toera kucinja manyerezero ace na macitiro ace. Paulu alonga pinthu pyadidi pinacitika munthu angatcunyuka. Iye anadziwa mwadidi undimomwene, anadzindikira pyakuipa pidacita iye, pontho anacalira misampha ya Sathani.—2 Tim. 2:26.”
15. Akulu a mpingo anapitiriza tani kuphedza nyakudawa adatcunyuka?
15 Nyakudawa angatcunyuka, komiti ya akulu a mpingo inacita masasanyiro akucedzera munthu unoyu toera apitirize kutambira ciphedzo kuti apirire mayesero a Sathani mbapitiriza kucita pinthu pyadidi. (Aheb. 12:12, 13) Ndimomwene kuti akulu a mpingo nee anapanga munthu pinthu pidacita nyakudawa. Mphapo pana pinthu pyakuti mpingo usafunika kupidziwa?
“ASANDIKE PAMASO PA ANTHU ONSENE”
16. Mbani “anthu onsene” adalonga Paulu pa 1 Timoti 5:20?
16 Lerini 1 Timoti 5:20. Paulu alemba mafala anewa kuna xamwali wace Timoti, wakuti akhalimbo nkulu wa mpingo mu ndzidzi ukhafokotoza iye njira inafunika kutsalakanwa “ale anacita madawo.” Kodi Paulu akhafuna kulonga kuti nyakudawa asafunika kusandikwa pamaso pa abale na alongo onsene? Nkhabe. M’mbuto mwace, iye akhalonga ale akuti panango adziwa madawo anewa. Panango anthu anewa aona pinthu pyakuipa pidacita nyakudawa peno ndi m’bodzi mwa anthu adabva nyakudawa mbalonga kuti acita madawo. Akulu a mpingo anadziwisa anthu anewa pakhundu kuti nkandzo wa munthu unoyu watsalakanwa, pontho iye asandikwa.
17. Ndi cidziwiso cipi cinafunika kucitwa mu mpingo khala madawo adziwika peno anadziwika, pontho thangwi yanji?
17 Midzidzi inango, panango abale na alongo azinji mu mpingo adziwa madawo anewa peno anaadziwa. Pyenepi pingacitika, “anthu onsene” adalonga Paulu anakhala mpingo onsene. Na thangwi ineyi, nkulu wa mpingo m’bodzi anadziwisa mpingo kuti m’bale peno mulongo unoyu asandikwa. Thangwi yanji? Paulu alonga: “Toera pikhale cenjezo kuna anango” kuti akhonde kucitambo madawo.
18. Akulu a mpingo asatsalakana tani nkandzo wa nyakudawa wakuti adzati kukhala na pyaka 18 pyakubalwa? (Onanimbo foto.)
18 Ninji pinacitika mwana wakuti adzati khala na pyaka 18 pyakubalwa angacita madawo makulu? Nsoka wa akulu a mpingo unatuma akulu awiri toera acedze na mwana unoyu pabodzi na anyakubalace akuti ndi Mboni za Yahova. b Akulu a mpingo anabvundza anyakubala pinthu pidacita iwo toera kuphedza mwana unoyu kutcunyuka. Khala mwana unoyu abvera uphungu wa anyakubalace na kucita macinjo, akulu a mpingo anewa anasankhula kusiya kuti anyakubalace apitirize kum’phedza, pontho komiti ya akulu a mpingo nee inafunikabve kucedza na mwana unoyu pabodzi na anyakubalace. Yahova apasa anyakubala basa yakusandika anawo mwaufuni. (Dheu. 6:6, 7; Mis. 6:20; 22:6; Aef. 6:2-4) Midzidzi inango, akulu a mpingo anasaka kudziwa khala anyakubala akuphedza mwanawo. Mphapo ndiye tani mwana wakuti adzati khala na pyaka 18 pyakubalwa angapitiriza kucita pinthu pyakuipa mbakhonda kucinja? Komiti ya akulu a mpingo inacedza na mwana unoyu pabodzi na anyakubalace akuti ndi Mboni za Yahova.
Khala adacita madawo ndi mwana, akulu a mpingo awiri anacedza pabodzi na anyakubalace peno na munthu unango wankulu anantsalakana wakuti ndi Mboni wa Yahova (Onani ndima 18)
“YAHOVA NDI WAKUKOMA NTIMA KAKAMWE NA WANTSISI”
19. Akulu a mpingo asawangisira tani kutowezera Yahova pakutsalakana nyakudawa?
19 Akulu a mpingo angakhala pa komiti, iwo apaswa basa na Yahova yakucitisa kuti mpingo ukhale wakucena. (1 Akor. 5:7) Mbwenye iwo asafunambo kuti nyakudawa atcunyuke, pingakwanisika. Na thangwi ineyi, iwo asakhala na maonero adidi, pontho asapitiriza kudikhira kuti munthu anacinja. Thangwi yanji? Thangwi iwo asafuna kutowezera Yahova wakuti ndi “wakukoma ntima kakamwe na wantsisi.” (Tiya. 5:11) Onani kuti mpostolo Juwau wakuti akhali nkhalamba apangiza tani ufuni kuna abale na alongo. Iye alemba: “Ananga akufunika, ine ndiri kukulemberani pinthu ipi toera mukhonde kucita madawo. Mbwenye munthu angacita madawo, ife tiri na mʼphedzi, Yezu Kristu munthu wakulungama wakuti ali pabodzi na Baba.”—1 Juw. 2:1.
20. Tinapfundzanji mu nsolo unatowera?
20 Mwakutsukwalisa, midzidzi inango munthu adacita madawo asakhonda kutcunyuka. Pyenepi pingacitika, munthu unoyu asafunika kubuluswa mu mpingo. Mphapo akulu a mpingo asacitanji? Tinapfundza pyenepi mu nsolo unatowera.
NYIMBO 103 Akulu a Mpingo Ndi Miyoni Mwa Anthu
a Kale, nsoka unoyu wa akulu a mpingo ukhacemerwa komiti yakutonga miseru. Mbwenye nakuti basa iri na akulu a mpingo anewa nee ndi yakutonga basi, ife nee tinaphatisirabve mafala anewa. M’mbuto mwace, nsoka wa akulu a mpingo anewa ife tinaucemera komiti ya akulu a mpingo.
b Pinalongwa thangwi ya anyakubala pisaphatambo basa kuna anthu anatsalakana mwana wangʼono peno acibale a mwana unoyu akuti ndi Mboni za Yahova.
