NSOLO WA PFUNDZIRO 31
NYIMBO 12 Yahova Ndi Mulungu Wankulu
Yahova Ali Kucitanji Toera Kutipulumusa ku Madawo na Kufa?
“Mulungu afuna kakamwe dziko yapantsi mbapereka Mwanace m’bodzi ekha.”—JUW. 3:16.
PINAFUNA IFE KUPFUNDZA
Pakutoma tinaona kuti ndzidzi onsene Yahova asacitanji toera kutiphedza kukunda madawo. Pontho tinaona kuti iye asatiphedza tani toera kukhala na cidikhiro cakukhala m’maso kwenda na kwenda na akusowa madawo.
1-2. (a) Madawo ninji, pontho tinaakunda tani? (Onanimbo “Mabvekero a Mafala Anango.”) (b) Tinapfundzanji mu nsolo uno na misolo inatowera ya revista ino? (Onanimbo nsolo wakuti “Cidzindikiro Kuna Anyakuleri“ mu nsolo uno)
KODI musafuna kudziwa kuti Yahova asakufunani mpaka papi? Njira ibodzi toera kudziwa pyenepi ndi kupfundza pinthu pidacita Yahova na pinacita iye toera kukupulumusani ku madawo na kufa. Madawo a ndi nyamalwa wankulu kakamwe, pontho nyamalwa unoyu ife nee tinakwanisa kunkunda tekhene. Ife tisadawa ntsiku zonsene, pontho tisafa thangwi ya madawo. (Aroma 5:12) Mbwenye na ciphedzo ca Yahova, ife tinakwanisa kukunda nyamalwa unoyu. Mwandimomwene, Yahova apikira kutipulumusa ku madawo na kufa.
2 Mu pyaka pyakupiringana 6.000, Yahova asaphedza anthu toera antumikire. Thangwi yanji iye asacita pyenepi? Thangwi iye asatifuna. Kutomera pa ndzidzi udaticita iye, Yahova asapangiza kuti asatifuna, pontho iye asacita pinthu pizinji toera kutiphedza kukunda madawo kuti tikhale axamwali ace. Yahova asadziwa kuti madawo asabweresa kufa, pontho iye nee asafuna kuti tife. Yahova asafuna kuti tikhale kwenda na kwenda. (Aroma 6:23) Iye asafuna kuti imwe mukhalembo kwenda na kwenda. Mu nsolo uno tinatawira mibvundzo mitatu: (1) Ndi cidikhiro cipi cidatipasa Yahova? (2) Anthu anango a mu ndzidzi wakale acitanji toera kukomeresa Yahova? (3) Yezu acitanji toera kupulumusa anthu ku madawo na kufa?
NDI CIDIKHIRO CIPI CIDATIPASA YAHOVA?
3. Ninji pidacitisa banja yakutoma kudawa?
3 Pidacita Yahova mamuna wakutoma na nkazi wakutoma, iye akhafuna kuti iwo akhale akutsandzaya. Yahova aapasa mbuto yakubalika toera akhale na basa yakutsandzayisa kakamwe. Iwo akhali na mwai wakudzadza dziko yapantsi na ana akhafuna kubala iwo, mbacitisa dziko kukhala paraizu yakulandana na munda wa Edheni. Mbwenye Yahova akhadapasa Adhamu na Eva ntemo ubodzi, pontho ntemo unoyu ukhali wakukhonda nentsa toera kuubvera. Kusiyapo pyenepi, Yahova aapanga pinthu pikhafuna kucitika mbadakhonda kubvera ntemo unoyu. Kukhonda bvera kweneku mbakudakhala madawo, pontho madawo anewa mbadaabweresera kufa. Ife tisadziwa pinthu pidacitika. Anju m’bodzi wakuipa wakuti nee akhafuna Mulungu na anthu anyengerera Adhamu na Eva toera akhonde kubvera Mulungu. Banja ineyi yakutoma yabvera pidalonga anju unoyu wakuipa. M’mbuto mwakunyindira Babawo waufuni, iwo adawa. Pontho ife tisadziwa pidacitika thangwi ya madawo anewa. Kutomera ntsiku ineyi, Adhamu na Eva athabuka kakamwe mu umaso wawo: Iwo akalamba mpaka kufa. Natenepa ninga pikhadaapanga Yahova, iwo abwerera ku pfumbi.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Thangwi yanji Yahova asaida madawo, pontho asatiphedza tani toera kuntumikira? (Aroma 8:20, 21)
4 Yahova acitisa kuti pinthu pyenepi pilembwe m’Bhibhlya toera tibvesese cinthu cakufunika kakamwe. Pyenepi pisatiphedza toera kuona kuti Yahova asaida kakamwe madawo. Madawo asaticitisa kukhala kutali na Babathu, pontho asabweresa kufa. (Iza. 59:2) Sathani asaida Yahova na anthu. Ndi thangwi yace iye anyengerera Adhamu na Eva toera kudawa, pontho asapitiriza kunyengerera anthu mpaka lero. Pidadawa Adhamu na Eva, panango Sathani anyerezera kuti akwanisa kufudza cifuniro ca Yahova kuna anthu. Mbwenye iye nee akhadziwa kuti Yahova ndi waufuni kakamwe. Yahova nee anacinja cifuniro cace kuna ana a Adhamu na Eva. Thangwi iye asafuna anthu. Ndi thangwi yace pidamala kwene kudawa Adhamu na Eva, Yahova apereka cidikhiro kuna anawo onsene. (Lerini Aroma 8:20, 21.) Yahova akhadziwa kuti anango mwa ana a Adhamu na Eva mbadasankhula kunfuna na kumbvera. Na thangwi ineyi, Yahova acita pinthu toera kuapulumusa ku madawo na kuapasa mwai toera akhale na uxamwali wakuwanga na iye. Yahova acitanji toera pyenepi pikwanisike?
5. Ndi ndzidzi upi udapereka Yahova cidikhiro kuna anthu? (Genesi 3:15)
5 Lerini Genesi 3:15. Mwakukhonda dembuka, Yahova alonga kuti mbadafudza Sathani na kupasa cidikhiro anthu onsene. Yahova alongambo kuti mbapadaoneka “dzindza,” pontho dzindza ineyi mbidaphatisirwa toera kupulumusa anthu. Dzindza ineyi inadzanyedza Sathani na kumalisa nyatwa zonsene zidatoma m’munda wa Edheni. (1 Juw. 3:8) Mbwenye toera kucita pyenepi, dzindza ineyi mbidathabuka. Sathani mbadaphekesa dzindza ineyi. Pontho pyenepi mbapidacitisa Yahova kutsukwala kakamwe. Mbwenye Yezu akhali dzololo toera kuthabuka, thangwi kubulukira mwa iye, anthu azinji kakamwe mbadapulumuswa ku madawo na kufa!
ANTHU AKUSOWA UNGWIRO MU NDZIDZI WAKALE ACITANJI TOERA KUKOMERESA YAHOVA?
6. Kodi Abheli, Nowa na amuna anango akukhulupirika acitanji toera akhale axamwali a Yahova?
6 Pakupita pyaka pizinji, mwapang’ono na pang’ono Yahova asapangiza pinthu pyakuti anthu asafunika kupicita toera akhale na uxamwali na iye. Mwacitsandzo, Abheli mwana waciwiri wa Adhamu na Eva ndiye adatoma kupangiza cikhulupiro kuna Yahova pidamala kudawa Adhamu na Eva mu Edheni. Abheli akhafuna Yahova, pontho akhafuna kunkomeresa na kukhala xamwali wace. Ndi thangwi yace iye apereka ntsembe kuna Yahova. Abheli akhali nkumbizi wa mabira, natenepa iye akwata ibodzi mwa mabira ace mbapereka ntsembe kuna Yahova. Yahova aona tani pidacita Abheli? Iye “akomerwa na Abheli mbatawira ntsembe yace.” (Gen. 4:4) Yahova akomerwambo na ntsembe za anthu anango akuti akhanfuna na kun’nyindira ninga Nowa. (Gen. 8:20, 21) Thangwi yakutawira ntsembe zenezi, Yahova apangiza kuti anthu akusowa ungwiro anakwanisa kunkomeresa na kukhala axamwali ace. b
7. Tisapfundzanji na phembo idacita Yahova kuna Abhrahamu?
7 Abhrahamu akhali na cikhulupiro cakuwanga kuna Yahova. Yahova am’phemba toera acite cinthu cakunentsa kakamwe. Iye apanga Abhrahamu toera apereke mwanace, Izaki ninga ntsembe. Mwandimomwene phembo ineyi ikhali yakunentsa kakamwe kuna Abhrahamu. Panango Abhrahamu nee akhadatambira kale phembo yakunentsa ninga ineyi ikhadacita Yahova. Ngakhale tenepo, Abhrahamu abvera Yahova. Pikhali Abhrahamu cifupi toera kupha Izaki, Yahova an’khondesa. Phembo ineyi idacita Yahova isatipfundzisa cinthu cakufunika kakamwe. Yahova akhali dzololo toera kupereka Mwanace wakufunika kakamwe ninga ntsembe. Pyenepi pisapangiza kuti Yahova asafuna kakamwe anthu.—Gen. 22:1-18.
8. Ntsembe zikhaphembwa na Mwambo wa Mose zikhapangizanji? (Levitiko 4:27-29; 17:11)
8 Mukupita kwa ndzidzi, Yahova apereka Mwambo kuna dzindza ya Izraeli, pontho Mwambo unoyu ukhalonga kuti iwo akhafunika kupereka ntsembe za pinyama toera kulekererwa madawo awo. (Lerini Levitiko 4:27-29; 17:11.) Ntsembe zenezi zikhali cipangizo ca ntsembe yakufunika kakamwe. Ntsembe yakuti mbidasudzula anthu ku madawo kwenda na kwenda. Yahova atsogolera aprofeta akusiyana-siyana toera kulonga thangwi ya dzindza yakupikirwa. Iwo afokotoza kuti dzindza ineyi mbidakhala Mwana wakufunika kakamwe wa Mulungu wakuti mbadathabuka na kufa. Iye mbadaphiwa ninga bira inaperekwa ninga ntsembe. (Iza. 53:1-12) Natenepa Yahova apikira kuti mbadacita masasanyiro toera kupereka Mwanace wakufunika ninga ntsembe toera kupulumusa anthu ku madawo na kufa. Ceneci ndi cinthu cadidi kakamwe cidacita Yahova kuna anthu onsene kuphatanizambo imwe.
YEZU ACITANJI TOERA KUPULUMUSA ANTHU?
9. Juwau m’Batizi alonganji thangwi ya Yezu? (Ahebheri 9:22; 10:1-4, 12)
9 Mu caka 29 Pakumala Kubalwa Kwa Kristu, Juwau m’Batizi aona Yezu wa ku Nazareti mbalonga: “Onani, uyu ndi Mwanabira wa Mulungu anabulusa madawo pa dziko!” (Juw. 1:29) Mafala anewa apangiza pakweca kuti Yezu akhali dzindza idapikira Yahova. Yezu mbadapereka umaso wace ninga ntsembe toera kupulumusa anthu. Pa ndzidzi unoyu, cidikhiro cidapereka Yahova cakupulumusa anthu ku madawo kwenda na kwenda capangizika pakweca.—Lerini Ahebheri 9:22; 10:1-4, 12.
10. Yezu apangiza tani kuti ‘adzera’ anyakudawa?
10 Nakuti Yezu akhabvera ntsisi anthu onsene, makamaka ale akhathabuka thangwi ya madawo, iye akhaacemera toera akhale atowereri ace. Yezu akhadziwa kuti thangwi ikulu kakamwe inacitisa anthu kuthabuka ndi madawo. Na thangwi ineyi, iye akhacita pyonsene pikhakwanisa iye toera kuphedza amuna na akazi akhathabuka thangwi ya madawo adacita iwo. Paulendo unango, iye afokotoza pyenepi mukuphatisira nsangani. Iye alonga: “Anthu a ungumi wadidi nkhabe funa dotoro, mbwenye atenda ndiwo anafuna dotoro.” Buluka penepo iye athimiza: “Ine nee ndadzera anyakulungama, mbwenye ndadzera anyakudawa.” (Mat. 9:12, 13) Mwandimomwene ndi pyenepi pidacita Yezu. Iye abvera ntsisi, pontho alekerera madawo a nkazi adatsuka miyendo yace na misozi yace. (Luka 7:37-50) Yezu apfundzisa pinthu pyakufunika kakamwe nkazi wa ku Samariya, maseze akhadziwa kuti mamuna akakhala na iye nee akhali wace. (Juw. 4:7, 17-19, 25, 26) Anthu asafa thangwi ya madawo. Mbwenye Mulungu apasa mphambvu Yezu toera kulamusa muli akufa amuna, akazi na anapiana.—Mat. 11:5.
11. Thangwi yanji anthu akhacita pinthu pyakuipa akhafuna kukhala dhuzi na Yezu?
11 Ife tinakwanisa kubvesesa kuti thangwi yanji anthu akhacita pinthu pyakuipa akhafuna kukhala pabodzi na Yezu. Yezu akhabvera ntsisi anthu anewa, pontho akhabvesesa mabvero awo. Na thangwi ineyi, iwo nee akhagopa kucedza naye. (Luka 15:1, 2) Yezu akhasimba na kupasa nkhombo anthu akhapangiza cikhulupiro kuna iye. (Luka 19:1-10) Thangwi yakucita pyenepi, Yezu apangiza anthu kuti Yahova ndi Mulungu wantsisi. (Juw. 14:9) Pontho pinthu pidalonga Yezu na pidacita iye pikhapangiza kuti Babace asafuna anthu, pontho asafuna kuphedza m’bodzi na m’bodzi wa ife toera kukunda madawo. Kusiyapo pyenepi, Yezu aphedza anyakudawa toera akhale na cifuno cakucita macinjo mbakhala atowereri ace.—Luka 5:27, 28.
12. Yezu apfundzisanji thangwi ya kufa kwace?
12 Yezu akhadziwa kuti mbadapereka umaso wace. Na thangwi ineyi, kazinji kene iye akhapanga atowereri ace kuti mbadasandukirwa na kukhomerwa pamuti. (Mat. 17:22; 20:18, 19) Yezu akhadziwambo kuti ntsembe ineyi mbidabulusa madawo pa dziko ninga pikhadalonga Juwau m’Batizi na aprofeta anango. Pontho Yezu alonga kuti angamala kuphiwa, ‘mbadabweresa kuna iye anthu a mitundu yonsene.’ (Juw. 12:32) Pyenepi pisabveka kuti munthu angapangiza cikhulupiro kuna Yezu na kukhala ntowereri wace mbadakomeresa Yahova, pontho ‘mbadasudzulwa ku madawo.’ (Aroma 6:14, 18, 22; Juw. 8:32) Ndi thangwi yace Yezu akhali wacipapo, pontho akhali dzololo toera kufa munjira yakunentsa kakamwe.—Juw. 10:17, 18.
13. Yezu afa tani, pontho kufa kwace kusatipfundzisanji thangwi ya Yahova Mulungu? (Onanimbo foto.)
13 Yezu asandukirwa na m’bodzi wa axamwali ace apantima. Buluka penepo anyamalwa ace am’manga, antikana, pontho ampambizira pinthu pyakuti iye nee apicita. Iye atongwa kuphiwa, pontho athabuswa kakamwe. Buluka penepo, anyankhondo ankhomera pamuti. Mwandimomwene Yezu abva kupha kakamwe thangwi yakufa munjira ineyi. Mbwenye Yahova Mulungu ndiye adabva kupha kakamwe. Ngakhale tenepo, iye nee aphatisira mphambvu zace zakukhonda mala toera kumalisa nyatwa za Mwanace. Thangwi yanji Yahova atawirisa kuti Mwanace athabuke mpaka kufa? Ndi thangwi iye asatifuna. Yezu alonga: “Mulungu afuna kakamwe dziko yapantsi mbapereka Mwanace m’bodzi ekha, toera munthu anan’khulupira akhonde kufudzwa, mbwenye agumane umaso wakukhonda mala.”—Juw. 3:16.
Yahova abva kupha kakamwe pidatawirisa iye Mwanace kuphiwa toera kutipulumusa ku madawo na kufa (Onani ndima 13)
14. Ntsembe ya Yezu isapangizanji kuna imwe?
14 Ntsembe ya Yezu ndi cipangizo cikulu ca ufuni wa Yahova kuna ana a Adhamu na Eva. Ntsembe ineyi isapangiza kuti Yahova asakufunani kakamwe. Yahova apereka Mwanace wakufunika, pontho apirira kakamwe kuthabuswa kwa Mwanace toera kukupulumusani ku madawo na kufa. (1 Juw. 4:9, 10) Mwandimomwene, Yahova asafuna kuphedza m’bodzi na m’bodzi wa ife toera kukunda madawo.
15. Tisafunika kucitanji toera tilekererwe madawo athu?
15 Thangwi ya muoni unoyu wa Mulungu, wakuti ndi ntsembe ya Mwanace wakufunika, ife tisakwanisa kulekererwa madawo athu. Mbwenye toera kulekererwa madawo athu na Mulungu, tisafunika kucita cinthu. Juwau m’Batizi na Yezu alonga pinafunika ife kucita: “Tcunyukani, thangwi Umambo wakudzulu uli cifupi.” (Mat. 3:1, 2; 4:17) Natenepa, toera kukunda madawo mbatikhala na uxamwali na Babathu waufuni tisafunika kutcunyuka. Mphapo kutcunyuka kusabvekanji, pontho kunatiphedza tani toera kukunda madawo? Nsolo unatowera unadzatawira mbvundzo unoyu.
NYIMBO 18 Tisapereka Takhuta Thangwi ya Ciomboli
a MABVEKERO A MAFALA ANANGO: M’Bhibhlya, fala yakuti “madawo” midzidzi inango isabveka kucita pinthu pyakuipa peno kukhala m’maso mwakukhonda bverana na pinalonga Yahova thangwi ya pinthu pyadidi na pyakuipa. Mbwenye fala yakuti “madawo” isabvekambo kusowa ungwiro kuli na ife thangwi ya kudawa kwa Adhamu. Ife tisafa thangwi ya madawo anewa.
b Yahova akhatawira ntsembe zikhapereka anthu akukhulupirika, thangwi iye akhadziwa kuti ntsogolo Yezu Kristu mbadapereka umaso wace ninga ntsembe toera kupulumusa anthu ku madawo na kufa.—Aroma 3:25.
