1. Kunyerezera umaso wakukhonda mala unafuna kutipasa Yahova kusatiphedza tani?

 YAHOVA apikira kuti ale anambvera anadzakhala na “umaso wakukhonda mala.” (Aroma 6:23) Tinganyerezera umaso unoyu unafuna kutipasa Yahova, ufuni wathu kuna iye usathimizirika kakamwe. Mwandimomwene Babathu wakudzulu asatifuna kakamwe, n a thangwi ineyi nee cinthu cibodzi cinakwanisa kuticitisa kusiya kuntumikira.

2. Pikiro ya Mulungu yakutipasa umaso wa kwenda na kwenda isatiphedza tani?

² Pikiro ya Mulungu yakutipasa umaso wakwenda na kwenda isatiphedza toera kupirira tingathimbana na nyatwa. Ngakhale anyamalwa athu atipange kuti anatipha, ife nee tinasiya kutumikira Yahova. Thangwi yanji? Thangwi ibodzi ndi yakuti tisadziwa kuti tingafa akukhulupirika kuna Yahova, iye anadzatilamusa muli akufa na cidikhiro cakukhala m’maso kwenda na kwenda. (Juwau 5:28, 29; 1 Akor. 15:55-58; Aheb. 2:15) Thangwi yanji tiri na cinyindiro cakuti ndi pyakukwanisika kukhala m’maso kwenda na kwenda? Onani mathangwi mangasi.

3. Thangwi yanji tiri na cinyindiro cakuti Yahova anakwanisa kutipasa umaso wakwenda na kwenda? (Masalmo 102:12, 24, 27)

³ Ife tisadziwa kuti Yahova anakwanisa kutipasa umaso wakukhonda mala thangwi iye ndi Mwanaciro umaso, pontho iye asakhala kwenda na kwenda. (Masal. 36:9) Onani malemba mangasi anapangiza kuti Yahova kutomera kale akhalipo, pontho anapitiriza kukhala kwenda na kwenda. Lemba ya Masalmo 90:2 isalonga kuti Yahova ndi ‘wakwenda na kwenda.’ Masalmo 102 asalongambo pibodzi pyene. (Lerini Masalmo 102:12, 24, 27.) Pontho mprofeta Habhakuki alemba tenepa  thangwi ya Babathu wakudzulu: ‘Imwe Yahova, kodi nee ndimwe wakwenda na kwenda? Mulungu wanga wakucena imwe nkhabe kufa.’​—Hab. 1:12.

4. Kodi ife tisafunika kudzudzumika tingakhonda kubvesesa kuti Yahova ndi wakwenda na kwenda? Fokotozani.

⁴ Kodi ndi pyakunentsa kuna imwe kubvesesa kuti Yahova ndi ‘wakwenda na kwenda’? (Iza. 40:28) Azinji asanentsekambo toera kubvesesa pyenepi. Eliyu alonga tenepa thangwi ya Mulungu: ‘Pyaka pyace ndi pyakukhonda kulengeseka.’ (Yobe 36:26) Mbwenye kukhala kwace na pyaka pyakukhonda kulengeseka nee pisabveka kuti iye nee alipo. Mwacitsandzo, maseze nee tisabvesesa kuti magetsi asaphata tani basa, pyenepi nee pisabveka kuti iwo nee alipo. Munjira ibodzi ene, ife nee tisakwanisa kubvesesa kuti pisakwanisika tani kuti Yahova akhale kwenda na kwenda. Mbwenye pyenepi nee pisabveka kuti Mulungu nee asakhala kwenda na kwenda. Undimomwene thangwi ya Nciti nee usanyindira pinthu pinabvesesa ife peno nkhabe. (Aroma 11:33-36) Pontho iye akhalipo kale mbadzati kucita pinthu pyonsene pinaona ife, ninga dzuwa na nyenyezi. Yahova asatipasa cinyindiro cakuti “iye ndiye adacita dziko yapantsi na mphambvu zace,” pontho iye akhalipo kale mbadzati ‘kucita kudzulu.’ (Yer. 51:15; Mabasa 17:24) Mphapo ndi thangwi ipi inango inaticitisa kukhala na cinyindiro cakuti ndi pyakukwanisika kukhala m’maso kwenda na kwenda?

5. Ndi cidikhiro cipi cikhali na Adhamu na Eva?

⁵ Pinthu pyonsene pidacita Yahova pa dziko yapantsi mbapidafa, mbwenye anthu nee mbadafa. Thangwi iye aacita na cidikhiro cakukhala kwenda na kwenda. Ndi thangwi yace Yahova acenjeza Adhamu kuti: ‘Leka kudya nsapo wa muti unacitisa kudziwa cadidi na cakuipa, thangwi ntsiku inaudya iwe, mwandimomwene unadzafa.’ (Gen. 2:17) Natenepa Adhamu na Eva mbadabvera Yahova, iwo nee mbadafa. Pyenepi pisaticitisa kukhulupira kuti Yahova mbadaatawirisa kudya ‘muti wakupasa umaso.’ Pyenepi mbapidaapasa cinyindiro cakuti iwo mbadakhala m’maso ‘kwenda na kwenda.’ b​—Gen. 3:22.

6-7. (a) Ndi cinthu cipi cinango cinapangiza kuti anthu acitwa toera kukhala m’maso kwenda na kwenda? (b) Ndi pinthu pipi pinadikhira imwe kucita mu ndzidzi unafuna ife kukhala m’maso kwenda na kwenda? (Onani mafoto.)

⁶ Anyakufufudza anango aona kuti ongo wathu unakwanisa kukoya mphangwa zizinji  kupiringana zinakwanisa ife kukoya cincino mu umaso wathu onsene. Pyenepi ndi pyakudzumatirisa kakamwe. Nsolo unango wa revista ya ku Amerika inalonga pya ongo ya mu caka ca 2010 walonga kuti ongo wathu unakwanisa kukoya mphangwa zizinji kakamwe zakuti zinakwanisa kupangizwa mu vidhyu mu pyaka 300 mwakukhonda limira. Pontho pisaoneka kuti ongo wathu unakwanisa kukoya mphangwa zizinji kakamwe kupiringana zenezi. Pyenepi pisapangiza kuti Yahova acita ongo wathu munjira yakuti unakwanisa kukoya mphangwa zizinji kakamwe kupiringana mphangwa zinakoya ife mu pyaka 70 peno 80.​—Masal. 90:10.

⁷ Yahova aticitambo na cifuno cakukhala m’maso kwenda na kwenda. Bhibhlya isalonga kuti Mulungu ‘aikha muntima mwa anthu cifuno cakukhala kwenda na kwenda.’ (Koel. 3:11) Ineyi ndi thangwi ibodzi inaticitisa kuona kufa ninga nyamalwa wathu. (1 Akor. 15:26) Na thangwi ineyi tingabva kupha, ife nee tisakhala kwene mbatidikhira kufa. Kazinji kene tisaenda kunyumba ya ungumi, pontho midzidzi inango tisamwa mitombwe inapaswa ife kweneko toera tiwange. Ife tisacita pyonsene pinakwanisa ife toera tikhonde kufa. Kusiyapo pyenepi, munthu anafuna ife angafa, mwakukhonda tsalakana khala ndi mwana peno nkulu, pyenepi pisatitsukwalisa kakamwe. (Juwau 11:32, 33) Mwandimomwene, Nciti wathu nee mbadatipasa cifuno cakukhala m’maso kwenda na kwenda khala iye nee akhafuna kuti anthu akhale m’maso kwenda na kwenda. Mbwenye ife tiri na mathangwi anango anaticitisa kukhulupira kuti tinakwanisa kukhala m’maso kwenda na kwenda. Cincino tinaona pinthu pidacita Yahova nduli na pinthu pinacita iye cincino pinapangiza kuti iye nee acinja cifuniro cace cakutoma.

8. Lemba ya Izaiya 55:11 isatipfundzisanji thangwi ya cifuniro ca Yahova kuna ife?

⁸ Maseze Adhamu na Eva adawa mbabweresa kufa kuna ife tonsene, Yahova nee acinja cifuniro cace. (Lerini Izaiya 55:11.) Iye nee acinja cifuniro cace cakupasa umaso wakwenda na kwenda anthu akukhulupirika. Ife tisadziwa pyenepi thangwi ya pinthu pidalonga Yahova na pidacita iye toera kukwanirisa cifuniro cace.

9. Mulungu apikiranji? (Danyele 12:2, 13)

⁹ Yahova apikira kuti iye analamusa anthu adafa mbaapasa mwai wakukhala m’maso kwenda na kwenda. (Mabasa 24:15; Tito 1:1, 2) Yobe akhali na cinyindiro cakuti Yahova asafuna kakamwe kulamusa muli akufa anthu adafa. (Yobe 14:14, 15) Mprofeta Dhanyeli akhali na cinyindiro cakuti anthu mbadalamuswa muli akufa mbapaswa mwai wakukhala m’maso kwenda na kwenda. (Masal. 37:29; lerini Danyele 12:2, 13.) Ayuda a mu ntsiku za Yezu, akhadziwambo kuti Yahova mbadapasa atumiki ace akukhulupirika “umaso wakukhonda mala.” (Luka 10:25; 18:18) Kazinji kene Yezu alonga pya pikiro ineyi yakulamuswa muli akufa, pontho iye alamuswa muli akufa na Babace.​—Mat. 19:29; 22:31, 32; Luka 18:30; Juwau 11:25.

10. Kulamuswa kwa anthu muli akufa nduli kusapangizanji? (Onani foto.)

¹⁰ Yahova ndi Nyakupasa Umaso, pontho iye ali na mphambvu yakulamusa anthu muli akufa. Iye apasa mphambvu Eliya toera kulamusa muli akufa mwana wa nzice wa ku Sarefati. (1 Ama. 17:21-23) Mukupita kwa ndzidzi, Mulungu aphedza Elizeu toera kulamusa muli akufa mwana wa nkazi wa ku Sunemu. (2 Ama. 4:18-20, 34-37) Kulamuswa muli akufa kwa anthu anewa kusapangiza kuti Yahova ali na mphambvu yakulamusa anthu muli akufa. Pikhali iye pa dziko yapantsi, Yezu apangiza kuti Babace ampasa mphambvu yakulamusa anthu muli akufa. (Juwau 11:23-25, 43, 44) Cincino Yezu ali kudzulu, pontho apaswa “mphambvu zonsene kudzulu na pa dziko yapantsi.” Natenepa iye anakwanisa kukwanirisa pikiro yakulamusa muli akufa anthu “onsene ali munthumbi zakukumbukirwa” mbaapasa mwai wakukhala m’maso kwenda na kwenda.​—Mat. 28:18; Juwau 5:25-29.

11. Ciomboli cisatipasa tani cidikhiro cakukhala m’maso kwenda na kwenda?

¹¹ Thangwi yanji Yahova atawirisa kuti Mwanace wakufunika afe? Ife tinakwanisa kugumana ntawiro wa mbvundzo unoyu m’mafala a Yezu adalonga iye kuti: “Mulungu afuna kakamwe dziko yapantsi mbapereka Mwanace m’bodzi ekha, toera munthu anan’khulupira akhonde kufudzwa, mbwenye agumane umaso wakukhonda mala.” (Juwau 3:16) Thangwi yakupereka Mwanace ninga ntsembe toera kuphimbira madawo athu, Mulungu acitisa toera tikhale na cidikhiro cakukhala na umaso wakukhonda kumala. (Mat. 20:28) Mpostolo Paulu afokotoza cinthu ceneci cidacita Mulungu toera kukwanirisa cifuniro cace mu ndzidzi udalemba iye kuti: “Ninga kufa kwabwereswa na munthu m’bodzi, kulamuka muli akufa kwabwereswambo na munthu m’bodzi. Thangwi ninga kubulukira mwa Adhamu anthu onsene asafa, tenepambo kubulukira mwa Kristu anthu onsene anadzakhala na umaso.”​—1 Akor. 15:21, 22.

12. Umambo unadzakwanirisa tani cifuniro ca Yahova?

¹² Yezu apfundzisa atowereri ace toera aphembe kuti Umambo wa Mulungu ubwere, pontho ucite cifuniro ca Mulungu pa dziko yapantsi. (Mat. 6:9, 10) Cibodzi mwa pinthu  pinafuna Mulungu ndi cakuti anthu akhale m’maso kwenda na kwenda pa dziko yapantsi. Toera kucita pyenepi, Yahova akhazikisa Mwanace ninga Mambo wa Umambo Waumesiya. Pontho iye asankhula anthu akukwana 144.000 toera adzaphate basa pabodzi na Yezu kuti akwanirise cifuniro ca Mulungu.​—Apok. 5:9, 10.

13. Yahova ali kucitanji lero, pontho imwe musafunika kucitanji?

¹³ Lero Yahova ali kugumanya “mwinji ukulu” wa anthu, pontho ali kuapfundzisa toera atongwe na Umambo wace. (Apok. 7:9, 10; Tiya. 2:8) Maseze lero dziko iri yakugawika thangwi ya kuidana na nkhondo, ale anacita khundu ya “mwinji ukulu” asawangisira toera pakati pawo pakhonde kuoneka kuidana. Iwo asapangiza na pinthu pinacita iwo kuti afula masupada awo mbakhala pyakulima napyo. (Mik. 4:3) M’mbuto mwakucita khundu mu nkhondo, iwo asaphedza anthu toera agumane “umaso wandimomwene” mukuapfundzisa thangwi ya Mulungu wandimomwene na cifuniro cace. (1 Tim. 6:19) Panango anthu a pabanja pawo anaatcinga peno iwo anasowa kobiri thangwi yakuphedzera Umambo wa Mulungu, mbwenye Yahova anaaphedza toera akhale na pinthu pinafuna iwo. (Mat. 6:25, 30-33; Luka 18:29, 30) Pyenepi pisatipasa cinyindiro cakuti Umambo wa Mulungu ndi wandimomwene, pontho unapitiriza kukwanirisa cifuniro ca Yahova.

14-15. Pikiro ya Yahova yakumalisa kufa kwenda na kwenda inakwanirisika tani?

¹⁴ Cincino Yezu ndi Mambo wa Umambo wa Mulungu kudzulu, pontho iye anakwanirisa mapikiro onsene adacita Yahova. (2 Akor. 1:20) Kutomera mu caka ca 1914, Yezu ali kukunda anyamalwa ace. (Masal. 110:1, 2) Iye na ale adasankhulwa toera kutonga pabodzi na iye, mwakukhonda dembuka anadzamalisa uipi.​—Apok. 6:2.

¹⁵ Mu Utongi wa Pyaka Cikwi wa Yezu, anthu anadzalamuswa muli akufa, pontho anthu akubvera anadzakhala aungwiro. Pakumala kwa mayesero akumalisa, ale anafuna kuoniwa ninga akulungama na Yahova ‘anadzapaswa dziko yapantsi, mbakhala mwenemu kwenda na kwenda.’ (Masal. 37:10, 11, 29) Mwakutsandzayisa, “nyamalwa anafuna kudzamalisira kufudzwa ndi kufa.”​—1 Akor. 15:26.

16. Ndi thangwi ipi yakufunika kakamwe inaticitisa kutumikira Yahova?

¹⁶ Ninga pidaona ife, cidikhiro cathu cakukhala m’maso kwenda na kwenda ndi candimomwene thangwi cisagumanika m’Bhibhlya. Cidikhiro ceneci cisatiphedza toera tipitirize kukhala akukhulupirika ntsiku zino zakumalisa. Mbwenye nee tisafunika kukomeresa Yahova basi ene thangwi ya cifuno cakukhala m’maso kwenda na kwenda. Ife tisafunika kukhala akukhulupirika kuna Yahova na Yezu thangwi ya kuafuna kakamwe. (2 Akor. 5:14, 15) Ufuni unoyu usatikulumiza toera kuatowezera na kumwaza mphangwa kuna anango. (Aroma 10:13-15) Tingawangisira toera kukhonda kunyerezera basi ene pinafuna ife mbatikhala akupasa mwakudzala manja, tinadzakhala axamwali a Yahova kwenda na kwenda.​—Aheb. 13:16.

17. M’bodzi na m’bodzi wa ife asafunika kucitanji? (Mateu 7:13, 14)

¹⁷ Kodi ife tinadzakhala m’bodzi wa ale anafuna kukhala m’maso kwenda na kwenda? Yahova atipasa mwai unoyu. Natenepa ife tisafunika kucita pinthu pinapangiza kuti tisafuna kukhala na umaso unoyu. (Lerini Mateu 7:13, 14.) Mphapo umaso unakhala tani tingadzakhala kwenda na kwenda? Tinatawira mbvundzo unoyu mu nsolo unatowera.