Pidalonga Yahova kuti ‘dzadzani dziko yapantsi mbamuitsalakana,’ iye akhafuna kupangiza kuti mukupita kwa ndzidzi, dziko yonsene yapantsi mbidakhala paraizu. (Gen. 1:28) Ale anafuna kudzakhala pa dziko yapantsi kwenda na kwenda anafunikambo kubvera ntemo unoyu. Pakutoma, dziko yapantsi nee inadzakhala paraizu, thangwi munda wa Edheni nee ulipobve. Nkhondo ya Armajedhoni ingamala, ife tinakhala na mabasa mazinji toera kucenesa mbuto zakuti cincino ziri kupswipiswa kakamwe. Ineyi inadzakhala basa ikulu kakamwe.

Pyenepi pisatikumbusa basa idakhala na Aizraeli pidabwerera iwo ku dziko yawo buluka ku Bhabhilonya. Dziko yawo ikhali madembe mu pyaka 70, mbwenye Izaiya alonga mwanyapantsi kuti na ciphedzo ca Yahova, iwo mbadaibalikisa pontho. Iye alonga: ‘Iye anadzacitisa thando yace kukhala ninga ya Edheni, pontho anadzacitisa thando yace kukhala ninga munda wa maluwa wa Yahova.’ (Iza. 51:⁠3) Yahova aphedza Aizraeli toera kucitisa dziko yawo kukhala yakubalika kakamwe. Munjira ibodzi ene, na  ciphedzo ca Yahova, ale anafuna kudzapaswa dziko yapantsi anakwanisa kuicitisa kukhala yakubalika kakamwe. Pontho cincino pali na pinthu pyakuti munakwanisa kupicita toera kupangiza kuti musafuna kudzacitambo basa ineyi.

Njira ibodzi ndi kucita pinakwanisa imwe toera kubalikisa nyumba yanu na kuicenesa. Imwe munakwanisa kucita pyenepi mwakukhonda tsalakana khala mavizinyu anu asacenesambo nyumba zawo peno nkhabe. Imwe munakwanisambo kuphedzera basa yakucenesa na kusasanyira Nyumba ya Umambo na Nyumba ya Misonkhano ya mucisa canu. Khala makhaliro anu asakutawirisani, munakwanisa preencher petisau toera kuphedzera basa yakuphedza abale na alongo adagwerwa na cidengwa. Pyenepi pinapangiza kuti musafuna kuphedza abale na alongo anu. Natenepa bvundzikani: ‘Kodi ine ndinakwanisa kuthimizira maluso anango toera kuaphatisira Yahova anganditawirisa kukhala pa dziko yapantsi kwenda na kwenda?’

Pidamala iye kwene kulamusa muli akufa mwana wa Jairo, Yezu alonga kuti mwana unoyu akhafunika kupaswa cakudya. ( Marko 5:42, 43) Panango nee ikhali basa ikulu toera kutsalakana mwana unoyu wa pyaka 12 pyakubalwa. Mbwenye nyerezerani basa inafuna kudzakhala na ife Yezu angakwanirisa pikiro yace yakuti “anthu onsene ali munthumbi zakukumbukirwa anadzabva fala yace, mbabuluka.” (Juwau 5:28, 29) Maseze Bhibhlya nee isalonga pinthu pizinji thangwi ya basa inafuna kudzacita ife, tinakwanisa kunyerezera kuti anthu anafuna kulamuswa muli akufa anadzafuna pyakudya, pakugona na pyakubvala. Kodi imwe munakwanisa kupangiza cincino kuti muli dzololo toera kuphedza? Onani pinthu pingasi pyakuti munakwanisa kupicita.

Pa mpingo panu pangacitwa cidziwiso cakuti munatambira muyang’aniri wa cisa, imwe munakwanisa kuperekeka toera kuncemera kuti adzadye pabodzi na imwe pa nyumba panu. Khala m’bale peno mulongo akhatumikira ku Bheteli basa yace yamala, peno muyang’aniri wa cisa asiya kutumikira ninga muyang’aniri wa cisa, pontho cincino ali mu mpingo mwanu, imwe munakwanisa kuphedza abale anewa toera agumane mbuto zakukhala. Khala mbuto inakhala imwe inacitwa nsonkhano wa gawo peno wakupambulika, imwe munakwanisa kuperekeka  toera kuphedzera mabasa nsonkhano mbudzati kucitwa, peno nsonkhano ungamala. Peno munakwanisa kutambira abale na alongo anabwera pa nsonkhano unoyu buluka madziko anango.

Mwakubverana na Mabasa 24:15, ife tisadikhira kuti anthu azinji kakamwe anadzalamuswa muli akufa. Azinji mwa anthu anewa anadzakhala ale akuti nee akhala na mwai wakudziwa Yahova. Mbwenye iwo anadzakhala na mwai unoyu angadzalamuswa muli akufa. a Atumiki a Yahova akukhulupirika na amaluso anadzacita basa ineyi yakupfundzisa. (Iza. 11:9) Charlotte, wakuti amwaza mphangwa ku Europa, América do Sul na ku África asadikhira mwakutsandzaya kuti ndzidzi unoyu ufike. Iye alonga: “Ine ndisadikhira ndzidzi wakuti ndinadzapfundzisa anthu anafuna kulamuswa muli akufa. Ndingaleri thangwi ya anthu akale, kazinji kene ndisanyerezera: ‘Munthu unoyu mbadadziwa Yahova, umaso wace mbudakhala wadidi kakamwe.’ Ine ndisadikhira kakamwe kupanga anthu anewa thangwi ya Yahova na kuapanga kuti umaso wawo unakhala tani iwo angatumikira Yahova.”

Ngakhale atumiki akukhulupirika a Yahova adafa Yezu mbadzati kubwera pa dziko yapantsi anafunikambo kupfundza pinthu pizinji. Unadzakhala mwai ukulu kakamwe kufokotozera Dhanyeli kukwanirisika kwa maprofesiya akuti iye aalemba mbwenye nee aabvesesa. (Dan. 12:8) Pontho pinakhala pyakutsandzayisa kakamwe kufokotozera Rute na Naomi kuti banja yawo yakhala tani dzindza idabalwa Mesiya. Kusiyapo pyenepi, pinadzakhala pyakutsandzayisa kakamwe kupfundzisa anthu pa dziko yonsene yapantsi, thangwi ife nee tinadzudzumiswa na pinthu pyakuipa pinacitika ntsiku zino!

Munapangiza tani kuti imwe musafunambo kudzacita basa ineyi? Njira ibodzi ndi kuwangisira toera kuthimizira maluso anu akupfundzisa na kumwaza mphangwa mwaphinga. (Mat. 24:14) Maseze nee musakwanisa kucita pizinji thangwi ya thunga yanu peno makhaliro anu, kuwangisira kwanu cincino m’basa yakumwaza mphangwa kunapangiza kuti musafuna kudzapfundzisa anthu anafuna kulamuswa muli akufa.

Natenepa, ndi pyakufunika kakamwe kunyerezera mibvundzo iyi: Kodi imwe musadikhira kupaswa dziko yapantsi? Kodi imwe muli wakutsandzaya thangwi ya cidikhiro cakubalikisa dziko, cakutsalakana anthu anafuna kudzalamuswa muli akufa na kuapfundzisa? Imwe munakwanisa kupangiza kuti musafuna kudzakhala m’maso kwenda na kwenda pa dziko yapantsi, mungasaka miyai toera kucita mabasa akulandana na ale anafuna kucitwa mu dziko ipswa.