Nkhabe. Mbwenye mafala adalemba iye akhali andimomwene.

Onani pidalemba iye pa vesi ineyi na m’mavesi anango akulandana: ‘Ndinadzaimba nyimbo toera kusimba dzina yanu kwenda na kwenda. Mu ndzidzi unakwanirisa ine mapikiro anga ntsiku na ntsiku.’ ‘Yahova Mulungu wanga, ine ndinadzakusimbani na ntima wanga onsene, pontho ndinadzapasa mbiri dzina yanu kwenda na kwenda.’ ‘Ine ndinadzasimba dzina yanu kwenda na kwenda.’​—Masal. 61:8; 86:12; 145:1, 2.

Pidalemba Dhavidhi mafala anewa, iye nee akhanyerezera kuti cipo mbadafa. Iye akhadziwa kuti Yahova akhadalonga kale kuti anthu mbadafa thangwi ya madawo awo, pontho Dhavidhi akhadziwa kuti iye akhalimbo nyakudawa. (Gen. 3:3, 17-19; Masal. 51:4, 5) Iye akhadziwambo kuti ngakhale anthu akukhulupirika ninga Abhrahamu, Izaki na Yakobe afa. Kusiyapo pyenepi, Dhavidhi akhadziwa kuti mukupita kwa ndzidzi mbadafambo. (Masal. 37:25; 39:4) Mbwenye mafala anagumanika pa Masalmo 61:8 asapangiza kuti Dhavidhi akhali na cifuno ca kusimba Yahova kwenda na kwenda peno mu umaso wace onsene.​—2 Sam. 7:12.

Midzidzi inango Dhavidhi alemba pinthu pidancitikira mu umaso wace ninga pinaona ife mu kapitulu 18, 51 na 52 ya bukhu ya Masalmo. Mu kapitulu 23 ya Masalmo, Dhavidhi alandanisa Yahova na nkumbizi wakuti asatsogolera, asabalangaza na kutsidzikiza. Dhavidhi akhali nkumbizi wakuti akhacita pyenepi, pontho iye akhafuna kutumikira Mulungu ‘mu umaso wace onsene.’​—Masal. 23:6.

Kumbukani kuti ndi Yahova adatsogolera Dhavidhi toera kulemba pinthu pyonsene pidalemba iye. Pinthu pinango pidalemba iye pikhaphataniza pinthu pikhafuna kucitika ntsogolo. Mwacitsandzo, pa Masalmo 110, Dhavidhi alemba pinthu pyakuti pikhafuna kucitika pa ndzidzi wakuti mbuya wace ‘mbadakhala ku nkono wa madyo wa Mulungu’ kudzulu mbapaswa mphambvu zikulu. Toera kucitanji? Toera kukunda anyamalwa a Mulungu na ‘kutonga madzindza’ pa dziko yapantsi. Dhavidhi akhali m’bodzi wa anthu a dzindza ya Mesiya wakuti mbadatonga kubulukira kudzulu mbakhala ‘nyantsembe wakwenda na kwenda.’ (Masal. 110:1-6) Yezu alonga kuti profesiya inagumanika pa Masalmo 110 ikhalonga pya iye, pontho kuti iyo mbidakwanirisika ntsogolo.​—Mat. 22:41-45.

Yahova atsogolera Dhavidhi toera kulemba pinthu pikhafuna kucitika mu ndzidzi wace na pinthu pyakuti mbapidacitika angadzalamuswa muli akufa mbasimba Yahova kwenda na kwenda. Pyenepi pisatiphedza toera kuona kuti Masalmo 37:10, 11, 29 anakwanisa kuphatisirwa toera kulonga pinthu pidacitika kuna Izraeli na pinafuna kudzacitika ntsogolo pa dziko yonsene yapantsi Mulungu angadzakwanirisa mapikiro ace.​—Onani ndima 8 ya nsolo wakuti “Unadzakhala na Ine m’Paraizu” unagumanika mu revista ino.

Natenepa, lemba ya Masalmo 61:8 na mavesi anango asapangiza kuti Dhavidhi akhafuna kusimba Yahova mu umaso wace onsene. Pontho mavesi anewa asapangiza pinthu pinafuna kudzacita Dhavidhi ntsogolo angadzalamuswa muli akufa.