1, 2. Thangwi yanji ndi pyandzeru kubvera Yahova pakucita pisankhulo mu umaso wanu? (Onani pithundzithundzi pyakutoma.)

KHALA ndimwe m’phale peno ntsikana, panango anthu asalonga pizinji thangwi ya pinafunika imwe kucita mu umaso wanu. Panango apfundzisi, anyakupereka uphungu na anango anakukulumizani toera muende kapfundza ku universidhadhe peno toera muphate basa yakuti inakucitisani kuwina kobiri izinji. Mbwenye Yahova asakupasani uphungu wakusiyana. Yahova asafuna kuti muwangisire kuxikola toera mungamalisa mukwanise kuphedzeka. (Akolose 3:23) Iye asadziwambo kuti cisankhulo cinacita imwe mbamuciri m’phale peno ntsikana cinakhuya tsogolo yanu. Natenepa iye asapereka midida toera kukutsogolerani na kukuphedzani kuti mukwanise kunkomeresa mu ntsiku zino zakumalisa.—Mateu 24:14.

² Kumbukani kuti Yahova asadziwa pinthu pyonsene. Iye asadziwa pinafuna kucitika ntsogolo, pontho asadziwa kuti  makhaliro ano a dziko ali dhuzi kakamwe toera kumala. (Izaiya 46:10; Mateu 24:3, 36) Pontho Yahova asakudziwani. Iye asadziwa pinafuna kukutsandzayisani na pinafuna kukutsukwalisani. M’midzidzi inango uphungu wa anthu unaoneka ninga wadidi, mbwenye ungakhonda kubuluka m’Mafala a Mulungu ndi wakusowa basa.—Misangani 19:21.

3, 4. Ndi nyatwa zipi zidakhala na Adhamu na Eva pabodzi na anawo thangwi yakubvera uphungu wakuipa?

³ Uphungu wakuipa watoma kale kakamwe. Sathani ndi adatoma kupereka uphungu wakuipa kuna anthu. Iye apanga Eva na Adhamu kuti iwo mbadakhala akutsandzaya kakamwe mbadasankhula okha pikhafunika iwo kucita mu umaso. (Genesi 3:1-6) Mbwenye Sathani akhafuna pinthu pyace basi! Iye akhafuna kuti Adhamu na Eva pabodzi na ana akhafuna kudzabala iwo alambire iye, m’mbuto mwakulambira Yahova. Mbwenye nkhabe cidacita Sathani kuna anthu toera atheme kulambirwa. Pyonsene pikhali na Adhamu na Eva apipaswa na Yahova. Ndiye adaacita mbaapasa manungo aungwiro na munda wakubalika wa Edheni toera akhalemo kwenda na kwenda.

⁴ Mwakutsukwalisa, Adhamu na Eva nee abvera Mulungu. Kukhonda kubvera kwawo kwaacitisa kuluza uxamwali wawo na Mulungu, ule adaapasa umaso. Pyenepi pyabweresa nyatwa zizinji kakamwe. Ninga maluwa akugwandwa akuti mwapang’ono pang’ono asabunyala, Adhamu na Eva mwapang’ono pang’ono akalamba mbafa. Ife ninga anawo takhuyiwambo na madawo awo. (Aroma 5:12) Lero anthu azinji asapwazambo pinalonga Mulungu, mbacita pinafuna iwo ninga pidacita Adhamu na Eva. (Aefesi 2:1-3) Mbwenye Bhibhlya isalonga kuti “nkhabepo udziwisi” unango kupiringana wa Yahova.—Misangani 21:30.

5. Kodi Mulungu akhadziwanji thangwi ya anthu, pontho ninji pinapangiza kuti iye nee akhadaphonyeka?

⁵ Yahova akhadziwa kuti mbapadaoneka anthu azinji, kuphatanizambo aphale na atsikana akuti mbadafuna kundziwa na kuntumikira. (Masalmo 103:17, 18; 110:3) Aphale na atsikana anewa ndi akufunika kakamwe kuna Yahova! Khala ndimwe m’bodzi wa iwo mukutsandzaya kakamwe na ‘pinthu pizinji pyadidi’ pinakupasani Mulungu, pontho ipyo pisathimizira kutsandzaya kwanu. (Lerini Masalmo 103:5; Misangani 10:22) Mu nsolo uno, tinapfundza pinai mwa pinthu pyenepi: Cakudya cauzimu, axamwali adidi, kukhazikisa pifuno pyadidi na ufulu wandimomwene.

6. Thangwi yanji tisafunika kupfundza toera kudziwa ule Adaticita, pontho ninji pinatipasa Yahova toera kutiphedza?

⁶ Mwakusiyana na pinyama, ife tisadzindikira kuti tisafunika kudziwa ule Adaticita. (Mateu 4:4) Tingapfundza mbitibvera Mulungu, tinakhala andzeru, audziwisi na akutsandzaya. Yezu alonga: “Anyakutsandzaya ndi ale anadzindikira kuti asafunika kudziwa Mulungu.” (Mateu 5:3) Mulungu atipasa Bhibhlya, pontho asaphatisira “m’bandazi wakukhulupirika na wandzeru” toera kutipasa mabukhu akuti asatiphedza kuwangisa cikhulupiro cathu. (Mateu 24:45) Mabukhu anewa ife tisaacemera cakudya cauzimu, thangwi asawangisa cikhulupiro cathu na uxamwali wathu na Yahova. Ife tiri na ntundu wakusiyana-siyana wa cakudya cauzimu.—Izaiya 65:13, 14.

7. Cakudya cauzimu cinakupasani Mulungu cinakuphedzani tani?

 ⁷ Cakudya cauzimu cinakuphedzani kukhala na udziwisi na luso yakunyerezera, pontho pyenepi pinakutsidzikizani m’makhundu akusiya-siyana. (Lerini Misangani 2:10-14.) Mwacitsandzo, makhaliro anewa anakuphedzani toera kudzindikira mwakucimbiza anthu angalonga uthambi wakuti nkhabepo Nciti, peno toera mutsandzaye musafunika kukhala na kobiri izinji. Pontho makhaliro anewa anakuphedzani toera kucalira pifuno peno misambo yakuti inaikha pangozwi uxamwali wanu na Mulungu. Na thangwi ineyi, wangisirani toera kukhala na udziwisi na luso yakunyerezera mwadidi. Mungacita pyenepi, munaona kuti Yahova asakufunani kakamwe, pontho asafuna kuti mukhale akutsandzaya.—Masalmo 34:8; Izaiya 48:17, 18.

8. Thangwi yanji uno ndi ndzidzi wakuwangisa uxamwali wathu na Mulungu, pontho uxamwali unoyu unakuphedzani tani ntsogolo?

⁸ Thimize pano dziko yonsene ya Sathani inadzafudzwa. Basi ene Yahova ndi anafuna kutitsidzikiza na kutipasa pinthu pinafuna ife, pyakuti panango pinaphataniza cakudya cinafuna kudya ife ndzidzi unango. (Habakuki 3:2, 12-19) Ndi thangwi yace, uno ndi ndzidzi wakuwangisa uxamwali wathu na Mulungu na kuthimizira kun’nyindira kwathu. (2 Pedhru 2:9) Mungacita pyenepi, mwakukhonda tsalakana pinafuna kukucitikirani, imwe munapibva ninga Dhavidhi adalonga: ‘Kwenda na kwenda ndisaikha Yahova dhuzi na ine; nee ndinadzudzumika na cinthu, thangwi iye ali cifupi.’—Masalmo 16:8.

9. (a) Mwakubverana na Juwau 6:44, kodi Yahova asacitanji? (b) Ndi ipi nkhombo yakudziwa atumiki anango a Yahova?

⁹ Mungagumanikana na munthu paulendo wakutoma wakuti nee asatumikira Yahova, kodi imwe musadziwanji thangwi ya iye? Panango nee musadziwa pizinji, kusiyapo dzinace na maonekero ace. Mbwenye pinthu ndi pyakusiyana kakamwe mungagumanikana na munthu paulendo wakutoma wakuti  asatumikira Yahova. Imwe musadziwa kuti iye asafuna Yahova, musadziwa kuti ciripo cinthu cadidi cidaona Yahova mwa iye, pontho musadziwa kuti Yahova ansankhula toera acite khundu mu ulambiri wace. (Lerini Juwau 6:44.) Mwakukhonda tsalakana dziko idabuluka iye peno mbuto idakuzwa iye, imwe musadziwa pizinji thangwi ya iye, pontho iye asadziwambo pizinji thangwi ya imwe!

10, 11. Ninji pinadziwa ife thangwi ya anthu anatumikira Yahova, pontho kudziwa pyenepi kusatikhuya tani?

¹⁰ Mungagumanikana na m’bale peno mulongo, imwe musadziwa kuti monsene musawangisira toera kucita pibodzi pyene. Imwe musadziwa kuti ngakhale musalonga pilongero pyakusiyana, mbwenye musalonga cilongero cibodzi cene ‘cakucena’ ca undimomwene. (Sofoniya 3:9) Pyenepi pisabveka kuti monsene musakhulupira Mulungu, musatowezera midida ibodzi ene ya makhaliro adidi, pontho muli na cidikhiro cibodzi cene thangwi ya ntsogolo. Pinthu pyenepi ndi pyakufunika toera tikwanise kunyindira munthu na kucita naye uxamwali wa kwenda na kwenda.

¹¹ Natenepa, tinakwanisa kulonga na cinyindiro consene kuti kutumikira Yahova kusatiphedza toera kukhala na axamwali adidi kakamwe. Maseze anango tidzati kuaona, mbwenye iwo alipo pa dziko yonsene yapantsi. Pyenepi pisakwanisika basi ene pakati pa mbumba ya Yahova.

12. Ndi pifuno pipi pyakuti munakwanisa kukhala napyo?

¹² Lerini Koelete 11:9–12:1. Ndi pipi pifuno pinawangisira imwe toera kupikwanirisa? Panango cifuno canu ndi cakuleri Bhibhlya ntsiku zonsene, kutawira mwadidi, peno kucita mwadidi makhundu anu pa misonkhano. Peno muli na cifuno cakuphatisira mwadidi Bhibhlya pakumwaza mphangwa. Kodi musapibva tani mungaona kuti mukukwanirisa pifuno pyanu, peno anango angakusimbani thangwi yakuthambaruka kwanu? Mwakukhonda penula musakhala wakutsandzaya kakamwe. Thangwi yanji? Thangwi mukucita pinafuna Yahova, ninga pidacita Yezu.—Masalmo 40:8; Misangani 27:11.

13. Thangwi yanji kutumikira Mulungu ndi kwakufunika kakamwe kupiringana kukhala na pifuno pya dziko?

¹³ Kucita pyonsene pinakwanisa ife toera kutumikira Yahova ndi kwakufunika kakamwe, thangwi kusaticitisa kukhala akutsandzaya, pontho kusacitisa umaso wathu kukhala na cifuniro. Paulu acenjeza: “Khalani dzololo, na akuwanga, ndzidzi onsene khalani na pizinji toera kucita m’basa ya Mbuya, mbamudziwa kuti basa inacita imwe mwaphinga kuna Mbuya si yapezi tayu.” (1 Akorinto 15:58) Mbwenye anthu anawangisira toera kukhala na pifuno pya dziko, ninga kukhala na kobiri izinji, peno kukhala akubvekera nkhabe khala akutsandzaya. Maseze akhale na pinthu pizinji, iwo nkhabe kugumana kutsandzaya kwandimomwene. (Luka 9:25) Ife tisadziwa pyenepi thangwi ya pidacitikira Mambo Salomoni.—Aroma 15:4.

14. Tapfundzanji thangwi ya pidacitikira Salomoni?

¹⁴ Salomoni akhali wamphambvu na wakupfuma kakamwe kupiringana anthu a mu ndzidzi wace. Iye alonga: ‘Ndinayesera pinthu pyakutsandzayisa toera ndione kuti ndinawinanji napyo.’ (Koelete 2:1-10) Buluka penepo Salomoni amanga nyumba zakubalika kakamwe, acita minda ya maluwa yakubalika na acita pyonsene pikhafuna iye. Kodi iye akhala wakutsandzaya? Nkhabe. Mafala adalonga  iye pakumala kucita pyonsene asapangiza pyenepi. Iye alonga: “Pyonsene mphyapezi.” Buluka penepo iye athimiza: ‘Pyonsene pikhali pyakusowa basa.’ (Koelete 2:11) Tapfundzanji thangwi ya pidacitikira Salomoni?

15. Thangwi yanji musafunika kukhala na cikhulupiro, pontho ico cinakuphedzani tani mwakubverana na Masalmo 32:8?

¹⁵ Anthu anango asadikhira kuti athabuke toera apfundze kucita pinthu pyadidi. Mbwenye Yahova nkhabe funa kuti pyenepi pikucitikireni. Iye asafuna kuti muphatisire pinapfundza imwe na kumbvera. Toera kucita pyenepi musafunika kukhala na cikhulupiro, thangwi mungacita pinthu na cikhulupiro cipo munadzatsumbikika. Pontho cipo Yahova anadzaduwala “ufuni udapangiza imwe kuna dzina yace.” (Ahebheri 6:10) Natenepa, citani pyonsene pinakwanisa imwe toera kuwangisa cikhulupiro canu. Kucita pyenepi kunakuphedzani kuona kuti Babanu wakudzulu asafuna kakamwe toera mukhale na umaso wadidi.—Lerini Masalmo 32:8.

16. Thangwi yanji tisafunika kuphatisira mwandzeru ufulu wathu?

¹⁶ Paulu alemba: “Panagumanika nzimu wakucena wa Yahova pali na ufulu.” (2 Akorinto 3:17) Aphale na atsikana, Yahova asafuna ufulu ndi thangwi yace iye asafuna kuti mukhalembo aufulu. Mbwenye iye asafuna kuti muphatisire ufulu wanu mwandzeru toera ukutsidzikizeni. Panango andzanu asaona ucipezipezi, asacita ulukwali, asacita masendzekero akuti asaikha umaso wawo pangozwi, peno kuphatisira mitombwe yakuledzeresa peno kumwa mwakupiringana midida. M’midzidzi inango pinthu pyenepi pinaoneka ninga ndi pyadidi, mbwenye ndi pyakugopswa. Munthu anacita pyenepi anakwanisa kuthaphula utenda, ngakhale kufa. (Agalata 6:7, 8) Aphale na atsikana anango asanyerezera kuti ali na ufulu wakucita pyenepi, mbwenye unoyu si undimomwene tayu.—Tito 3:3.

17, 18. (a) Kubvera Mulungu kusaticitisa tani toera kukhala na ufulu wandimomwene? (b) Ndi munjira ipi Adhamu na Eva akhali na ufulu wakupiringana uli na anthu lero?

¹⁷ Mbwenye kubvera Yahova kusatiphedza kakamwe. Kubvera kusatiphedza toera kukhala na ungumi wadidi na kusaticitisa kukhala na ufulu wandimomwene. (Masalmo 19:7-11) Pontho mungaphatisira ufulu wanu mwandzeru, pyenepi pisabveka kusankhula kubvera miyambo na midida yakulungama ya Mulungu, munapangiza Mulungu na anyakubalanu kuti ndimwe andzeru. Pyenepi pinacitisa anyakubalanu kukunyindirani kakamwe mbakupasani ufulu. Kusiyapo pyenepi, Yahova apikira kuti thimize pano anadzapasa atumiki ace onsene akukhulupirika ufulu wandimomwene, wakuti usalongwa m’Bhibhlya kuti ndi “ufulu wa mbiri ya ana a Mulungu.”—Aroma 8:21.

¹⁸ Adhamu na Eva akhali na ntundu unoyu wa ufulu. M’munda wa Edheni, iwo akhondeswa cinthu cibodzi basi na Mulungu. Iwo nee akhafunika kudya nsapo wa muti ubodzi. (Genesi 2:9, 17) Kodi imwe musanyerezera kuti ntemo unoyu udaapasa Mulungu ukhali  wakunentsa toera kuubvera? Mwandimomwene nkhabe! Nyerezerani miyambo mizinji inakhazikiswa na anthu, buluka penepo mbakakamiza andzawo toera aibvere. Mbwenye Yahova apasa Adhamu na Eva mwambo ubodzi basi.

19. Kodi Yahova na Yezu asacitanji toera kutiphedza kuti tikhale na ufulu?

¹⁹ Yahova asatitsalakana mwadidi kakamwe. M’mbuto mwakutipasa miyambo mizinji, iye asatipfundzisa mwakupirira toera tibvere mwambo wa ufuni. Iye asatipfundzisa toera tikhale maso mwakubverana na midida yace na kuida pinthu pyakuipa. (Aroma 12:9) Pa nkhani ya Paphiri, Yezu alonga kuti thangwi yanji anthu asacita pinthu pyakuipa. (Mateu 5:27, 28) Mu dziko ipswa, ninga Ntongi wa Umambo wa Mulungu, Yezu anapitiriza kutipfundzisa toera tidziwe pyadidi na pyakuipa ninga pinacita iye. (Ahebheri 1:9) Yezu anadzacitisambo kuti manungo na manyerezero athu akhale aungwiro. Nyerezerani pya ndzidzi wakuti nee tinanyerezerabve toera kucita pinthu pyakuipa, nee kuthabuka thangwi yakukhala anthu akusowa ungwiro. Pakumalisira, tinadzakhala na “ufulu wa mbiri” peno wandimomwene unapikira Yahova.

20. (a) Kodi Yahova asaphatisira tani ufulu wace? (b) Imwembo munantowezera tani?

²⁰ Mbwenye mu dziko ipswa, ufulu wathu unapitiriza basi kukhala na madire. Munjira ipi? Munjira yakuti pyonsene pinafuna ife kudzacita pinatsogolerwa na kufuna kwathu Mulungu na andzathu. Tingatsogolerwa na ufuni, tikutowezera Yahova. Maseze Yahova ali na ufulu wakusowa madire, mbwenye pyonsene pinacita iye pisatsogolerwa na ufuni, kuphatanizambo njira inatitsalakanira iye. (1 Juwau 4:7, 8) Pyenepi pisapangiza kuti basi ene tinakhala na ufulu wandimomwene tingatowezera Mulungu.

21. (a) Dhavidhi akhali na mabvero api thangwi ya Yahova? (b) Tinapfundzanji mu nsolo unafuna kudza?

²¹ Aphale na atsikana, kodi musapereka takhuta thangwi ya pinthu pyonsene pyadidi pinakupasani Yahova? Iye asakupasani cakudya cauzimu, axamwali adidi, pifuno pyadidi, cidikhiro cakukhala na ufulu wandimomwene ntsogolo na miyoni inango mizinji yadidi. (Masalmo 103:5) Panango imwe musapibva ninga Dhavidhi adalonga mafala anagumanika pa Masalmo 16:11: ‘Imwe musandipangiza njira ya ku umaso, anthu asakomerwa kakamwe pamaso panu, kutsandzaya kwakukhaliratu kuna imwe.’ Mu nsolo unafuna kudza, tinapfundza ntsonga zinango zakufunika kakamwe za kapitulu 16 ya Masalmo. Ntsonga zenezi zinakuphedzani toera kuona kuti munakhala tani na umaso wadidi kakamwe mu dziko ino!