KODI imwe musaoneka ninga munthu wakupereka takhuta? Unoyu ndi mbvundzo kwa ife tonsene. Bhibhlya yalonga mwanyapantsi kuti mu ntsiku zino anthu mbadakhala “akukhonda kupereka takhuta.” (2 Tim. 3:2) Panango imwe musadziwa anthu akuti asafuna kakamwe kucitirwa pinthu peno kupaswa pinthu na anango. Iwo asaona kuti nee asafunika kupereka takhuta thangwi ya pinthu pinapaswa iwo. Kodi musaona kuti ndi pyakutsandzayisa kukhala dhuzi na anthu anewa?

Mwakusiyana, atumiki a Yahova asapangwa toera ‘kupereka takhuta.’ Natenepa ife tisapereka “takhuta thangwi ya pinthu pyonsene.” (Akol. 3:15; 1 Ates. 5:18) Mwandimomwene, pana mathangwi mazinji anaticitisa kupereka takhuta.

Thangwi ibodzi inatikulumiza toera kupereka takhuta ndzidzi onsene ndi yakuti kusatiphedza toera kukhala na maonero adidi. Panango munthu anapereka takhuta kuna imwe asapibva mwadidi, pontho imwe musakomerwambo. Thangwi yanji kupereka takhuta kusatsandzayisa ife kuphatanizambo munthu anaperekera ife takhuta? Mwacitsandzo, munthu angaperekeka toera kukuphedzani, pyenepi pisapangiza kuti imwe mwathema kucitirwa pyenepi. Iye asakutsalakanani. Mungaona citsalakano ceneci, musaona kuti ndimwe wakufunika. Ife tinakwanisa kulonga kuti Rute akhalambo na mabvero anewa. Bhoazi apangiza kukoma ntima kuna Rute. Mwakukhonda penula, Rute atsandzaya kakamwe pidaona iye citsalakano ceneci.—Rute 2:10-13.

Cakufunika kakamwe kwa ife ndi kupereka takhuta kuna Mulungu. Mwandimomwene, midzidzi inango imwe musanyerezera pinthu pizinji pyauzimu na pyakumanungo pinakupasani Mulungu. (Deut. 8:17, 18; Mabasa 14:17) M’mbuto mwakunyerezera kukoma ntima kwa Mulungu mwakucimbiza, ndiye tani kukhala na ndzidzi wakunyerezera mwadidi pinapereka Mulungu kuna imwe na kuna anyakufunika anu? Kunyerezera mwadidi kukoma ntima kwa Nciti wanu kunathimizira kupereka kwanu takhuta kuna iye, pontho munakhala na cinyindiro cakuwanga cakuti iye asakufunani na asakutsalakanani.—1 Juw. 4:9.

Tisafunika kunyerezera mwadidi pinthu pinatipasa Yahova, pontho tisafunika kupereka takhuta kuna iye. (Masal. 100:4, 5) Nyakulemba unango alonga: “Kupereka takhuta kuna anango kusacitisa anthu kukhala akutsandzaya.”

Thangwi inango inaticitisa kupereka takhuta ndi yakuti kusawangisa uxamwali wathu. Ife tonsene tisafuna citsalakano cadidi. Mungapereka takhuta na ntima onsene kuna munthu unango thangwi ya pinthu pyadidi pidacita iye kuna imwe, uxamwali wanu usakhala wakuwanga. (Aroma 16:3, 4) Kusiyapo pyenepi, kazinji kene anthu akupereka takhuta asakhala dzololo toera kuphedza anango. Iwo asaona anthu anango angacita pinthu pyadidi kuna iwo, pontho pyenepi pisaakulumiza toera kuacitirambo pyadidi. Mwandimomwene, kuphedza anango kusatsandzayisa. Pyenepi pisabverana na pidalonga Yezu: “Kupasa kusatsandzayisa kakamwe kupiringana kutambira.”—Mabasa 20:35.

Robert Emmons, ntsogoleri wa mabasa akupfundza pya kupereka takhuta ku Universidade ya Califórnia, alonga: “Toera kukhala akupereka takhuta, tisafunika kubvesesa kuti tisanyindirana unango na ndzace. Thangwi midzidzi inango tisapasa, pontho midzidzi inango tisatambira.” Toera kupitiriza kukhala maso, pontho toera kukhala akutsandzaya, tisafuna ciphedzo ca anango munjira zizinji. Mwacitsandzo, panango iwo anatipasa cakudya peno mitombwe. (1 Akor. 12:21) Munthu  wakupereka takhuta, asalemedza pinacitirwa iye na anango. Khala ndi tenepo bvundzikani, kodi ine ndisapereka takhuta anango angacita pinthu pyadidi kuna ine?

Thangwi inango inaticitisa kupereka takhuta ndi yakuti pyenepi pisatiphedza toera kukhala na maonero adidi, tayu akuipa. Munjira inango, manyerezero athu asaphata basa ninga filtro. Iyo isatiphedza toera kunyerezera pinthu pyadidi mbaticalira pinthu pyakuipa. Munthu wakupereka takhuta asaikha manyerezero ace ku pinthu pyadidi, m’mbuto mwakunyerezera nyatwa zinathimbana na iye. Munthu anapereka takhuta kazinji kene asaona pinthu pyadidi, pontho asapitiriza kupereka takhuta. Kunyerezera pinthu pyadidi kunakuphedzani toera kubvera uphungu wa mpostolo Paulu: “Ndzidzi onsene komerwani mwa Mbuya.”—Afil. 4:4.

Kupereka takhuta kunakuphedzani toera kukunda manyerezero akuipa. Munthu angakhala na bibvu, kutsukwala peno kukoya pinthu muntima, pisanentsa kakamwe toera kupereka takhuta. Anthu akupereka takhuta asakhalambo na maonero akulinganira thangwi ya pinthu pya mpfuma. Iwo asakomerwa na piri na iwo, pontho iwo asacalira kusaka pinthu pizinji.—Afil. 4:12.

Ninga Nkristu, musadziwa kuti Sathani asafuna kuti mukhale wakuneta na wakufewa manungo thangwi ya nyatwa zinathimbana na imwe mu ntsiku zino zakumalisa. Iye asakomerwa mungakhala na maonero akuipa, pontho mungadungunya thangwi ya pinthu pyonsene. Khala imwe muli na makhaliro anewa, pinakhala pyakunentsa kakamwe toera anthu akubvesereni mungamwaza mphangwa zadidi. Kupereka takhuta kusabverana kakamwe na misapo ya nzimu wa Mulungu. Mwacitsandzo, ife tisakhala akutsandzaya thangwi ya pinthu pyadidi pinatipasa Mulungu, pontho tisakhulupira pidapikira iye ntsogolo.—Agal. 5:22, 23.

Thangwi yakukhala m’bodzi wa atumiki wa Yahova, panango musatawira undimomwene udalongwa mu nsolo uno thangwi yakupereka takhuta. Ngakhale tenepo, ndi pyakunentsa kakamwe kupereka takhuta na kukhala na maonero adidi. Lekani kusiya kuti pyenepi pikufeweseni. Imwe munakwanisa kupitiriza kukhala munthu wakupereka takhuta. Munjira ipi? Ntsiku zonsene khalani na ndzidzi wakunyerezera pinthu pinango pinacitika kuna imwe pyakuti munakwanisa kupereka takhuta thangwi ya pinthu pyenepi. Mungacita pyenepi kazinji kene, pinakhala pyakukhonda nentsa kukhala wakupereka takhuta. Pyenepi pinakucitisani kukhala wakutsandzaya kupiringana ale ananyerezera basi ene nyatwa zawo. Nyerezerani pinthu pyadidi pinacita Mulungu na anthu anango pyakuti pisakuwangisani na kukutsandzayisani. Panango munakwanisa kulemba pinthu pyenepi. Mu pinthu pidalemba imwe, dingani pinthu piwiri peno pitatu pyakuti pyakucitisani kupereka takhuta ntsiku ineyi.

Anthu adapfundza thangwi yakupereka takhuta alonga kuti kukhala na nsambo wakupereka takhuta kunakwanisa kucinja manyerezero athu mbatikhala na maonero adidi. Munthu wakupereka takhuta asatsandzaya kakamwe. Natenepa nyerezerani pinthu pyonsene pyadidi pinatambira imwe, komerwani na pinthu pyadidi pinacitika kuna imwe, pontho perekani takhuta ndzidzi onsene. M’mbuto mwakuona kuti mwathema kutambira pinthu pyadidi, ‘perekani takhuta kuna Yahova, thangwi iye ndi wadidi.’ Inde, “perekani takhuta thangwi ya pinthu pyonsene.”—1 Pya dziko. 16:34; 1 Ates. 5:18.