Kodi imwe mwaleri mwacidikhodikho misolo iyi ya Ncenjezi? Khala mwaileri, onani khala munakwanisa kutawira mibvundzo inatowera:

Tisafunika kutsalakana tani Akristu akudzodzwa?

Ife tisalemedza cikhulupiro cawo, mbwenye tisafunika kucalira kuatsalakana mwakupambulika. (Yuda 16) Ife tisafunika kucalira kuacita mibvundzo thangwi ya cidikhiro cawo cakuenda kudzulu.—Ncenjezi 01/20 tsa. 29.

Thangwi yanji tiri na cinyindiro cakuti Yahova asatifuna kakamwe?

Bhibhlya isalonga kuti Yahova akuonani mbamudzati kubalwa. Pontho iye asabvesera maphembero anu. Iye asadziwa piri muntima mwanu na pinanyerezera imwe, pontho macitiro anu asakhuya mabvero ace. (1 Pya dziko. 28:9; Mis. 27:11) Yahova akucemerani toera kuenda kuna iye.—Ncenjezi 02/20 tsa. 12.

Ndi pinthu pipi pinapangiza kuti ulipo ndzidzi wakulonga na ndzidzi wakumatama?

Ife tisakomerwa kulonga thangwi ya Yahova. Ife tisalonga tingaona kuti munthu akucita pinthu pyakuti pinancitisa kugwa m’madawo makulu. Akulu a mpingo asalonga toera kupereka uphungu khala ndi pyakufunika. Ife nee tisafunika kulonga tingabvundziswa kuti basa yathu yakumwaza mphangwa ikufamba tani m’madziko akuti basa ineyi isakhondeswa. Pontho nee tisafunika kulonga mphangwa zacibisobiso ca mpingo.—Ncenjezi 03/20 tsa. 20-21.

Anyadzombe analongwa m’bukhu ya Yoele kapitulu 2 asiyana tani na analongwa m’bukhu ya Apokalipse kapitulu 9?

Lemba ya Yoele 2:20-29 isalonga kuti Mulungu mbadathamangisa anyadzombe mbabweresa pontho pinthu pyonsene pidaluzika thangwi ya anyadzombe. Buluka penepo Mulungu mbadaikha nzimu wace. Profesiya ineyi yakwanirisika pidafudzwa nzinda wa Yerusalemu na Abhabhilonya. Anyadzombe analongwa pa lemba ya Apokalipse 9:1-11 asaimirira Akristu akudzodzwa akuti asamwaza mphangwa zakutonga kwa Mulungu dziko ino yakuipa, pontho pyenepi pisakukhuya kakamwe ale anacita khundu ya dziko ino.—Ncenjezi 04/20 tsa. 3-6.

Mbani ‘mambo wakunkwiriro’ lero?

Ndi Rusiya na madziko anango anam’phedzera. Iwo asakhondesa atumiki a Mulungu kumwaza mphangwa, pontho asatcinga abale na alongo azinji kakamwe. Iye asathimbana na mambo wakunterero.—Ncenjezi 05/20 tsa. 13.

Kodi “misapo ya nzimu wakucena” inalongwa pa Agalata 5:22, 23, ndi ineyi basi?

Nkhabe. Nzimu wa Mulungu unakwanisa kutiphedza toera kukulisa makhaliro anango, ninga ulungami. (Aef. 5:8, 9)—Ncenjezi 06/20 tsa. 17.

Thangwi yanji ndi pyakugoswa kuikha mafoto athu mu interneti peno mphangwa zinango?

Pinthu pinaikha ife mu interneti pinakwanisa kupangiza kuna anango kuti ndife akudzikuza, tayu akucepeseka.—Ncenjezi 07/20 tsa. 6-7.

Amwazi mphangwa anapfundzanji na anyakusodza nyama za m’madzi aluso?

Anyakusodza nyama za m’madzi asaphata basa ndzidzi wadidi, pontho pa mbuto zinagumana iwo nyama. Asapfundziswa toera kuphatisira pinthu pyakuthema m’basa yawo. Asapitiriza kuphata basa mwacipapo makhaliro akudambo angacinja. Ife tinakwanisambo kucita pibodzi pyene mu utumiki wathu.—Ncenjezi 09/20 tsa. 5.

Tinaphedza tani anyakupfundza a Bhibhlya toera afune kakamwe Yahova?

Ife tinakwanisa kuapanga toera aleri Bhibhlya ntsiku zonsene na kunyerezera mwacidikhodikho pinaleri iwo. Pontho tinakwanisa kuaphedza toera acite phembero.—Ncenjezi 11/20 tsa. 4.

Mbani anaphatanizwa m’mafala akuti “kubulukira mwa Kristu anthu onsene anadzakhala na umaso”?—1 Akor. 15:22.

Mpostolo Paulu nee akhalonga kuti anthu onsene analamuswa muli akufa. Iye akhalonga pya Akristu akudzodzwa akuti ‘aceneswa mwa Kristu Yezu.’ (1 Akor. 1:2; 15:18)—Ncenjezi 12/20 tsa. 5-6.

Ndi basa ipi inafuna kucita Akristu akudzodzwa angacinjwa “ninga kuphoira kwa diso” mu ndzidzi wakulira kwa tuluka yakumalisa?—1 Akor. 15:51-53.

Iwo pabodzi na Yezu anadzatonga anthu na ndodo ya utale. (Apok. 2:26, 27)—Ncenjezi 12/20 tsa. 12-13.