Yahova apanga Aizraeli toera akhale akucena. Toera kuaphedza kuti akhale akucena, iye aapanga: ‘Leka kuenda mbumwaza mapsweda toera kuipisa makhaliro a anango pakati pa mbumba yako. Leka kucita cinthu cakuti cinaikha pangozwi umaso wa ndzako. Ine ndine Yahova.’—Lev. 19:2, 16.

Mafala akuti ‘kucita cinthu cakuti cinaikha pangozwi’ athumburuzwa mwadidi Mucihebheri. Mphapo mafala anewa asabvekanji? Bukhu Yaciyuda inalonga pya Levitiko yalonga: “Khundu ineyi ya vesi ndi yakunentsa kubvesesa thangwi ndi pyakunentsa kudziwa kuti fala Yacihebheri isabvekanji yakuti ingathumburuzwa fala na fala isabveka ‘leka kulimira, leka kulimira dhuzi.’”

Anyakupfundza anango asalonga kuti fala ineyi isabverana na vesi 15 yakuti isalonga: ‘Lekani kutonga mwakusowa ulungami. Lekani kubvera ntsisi munthu wakutcerenga basi ene thangwi ndi nyakutcerenga, peno kubvera ntsisi munthu wakupfuma. Usafunika kutonga ndzako mwakulungama.’ (Lev. 19:15) Natenepa ntemo unagumanika pa vesi 16 unalonga kuti leka kucita cinthu cakuipa cakuti cinaikha pangozwi umaso wa munthu unango usabveka kuti Aizraeli nee akhafunika kucita pinthu mwakusowa ulungami pakutonga, pakucita malonda, peno m’banja. Pontho Muizraeli nee akhafunika kucita cinthu mwakusowa ulungami toera kuphindulisa iye ene. Ndimomwene kuti ife nee tisafunika kucita pinthu pyenepi, mbwenye pana njira inango yadidi kakamwe yakubvesesa mafala anagumanika pa vesi 16.

Onani khundu yakutoma ya vesi ineyi. Mulungu apanga atumiki ace toera akhonde kuenda mbamwaza mapsweda. Mwandimomwene munthu analonga ndzace mapsweda asadzesa nyatwa. (Mis. 10:19; Koel. 10:12-14; 1 Tim. 5:11-15; Tiya. 3:6) Mapsweda kazinji kene asalongwa m’mafala, pontho munthu anaalonga asakhala na cifuno ca kupswipisa makhaliro a munthu unango. Nyakulonga mapsweda asalonga pinthu pyakuti nee ndi pyandimomwene thangwi ya munthu unango, maseze pinthu pyenepi piikhe pangozwi umaso wa munthu analonga iye. Kumbukani kuti amuna anango apereka umboni wauthambi thangwi ya Nabhoti, pontho pyenepi pyacitisa Nabhoti kumenywa na miyala mwakusowa mulando. (1 Ama. 21:8-13) Natenepa, nyakulonga mapsweda anakwanisa kucita cinthu cakuti cinaikha pangozwi umaso wa munthu unango, ninga pinalongwa pa Levitiko 19:16.

Pontho, munthu panango analonga mapsweda munthu unango thangwi iye asaida munthu unoyu. Lemba ya 1 Juwau 3:15 isalonga: “Munthu anaida m’baleace ndi nyakupha munthu, pontho imwe musadziwa kuti ule anapha munthu nkhabe kudzatambira umaso wakukhonda mala.” Kusiyapo pyenepi, pidamala Mulungu kulonga kuti: ‘Leka kucita cinthu cakuti cinaikha pangozwi umaso wa ndzako,’ iye athimiza: ‘Leka kuida m’bale wako muntima mwako.’—Lev. 19:17.

Natenepa, ntemo unagumanika pa Levitiko 19:16 usapereka uphungu wamphambvu kuna Akristu lero. Ife tisafunika kucalira manyerezero akuipa na kulonga anango mapsweda. Tingalonga mapsweda munthu thangwi nee tisakomerwa naye peno thangwi tisamuida, ife tiri ‘kucita cinthu cakuti cinaikha pangozwi’ umaso wa munthu unoyu. Akristu asafunika kucalira pyenepi.—Mat. 12:36, 37.