1. Tinakwanisa tani kucedza na Yahova?

 IFE tisakomerwa kakamwe kucedza na anthu anafuna ife. Anyakumanga banja akutsandzaya asakomerwa kakamwe kucedza pabodzi. Aphale na atsikana asakomerwa kakamwe kucedza na axamwali awo apantima. Pontho ife tonsene tisakomerwa kakamwe kucedza na abale na alongo athu. Mbwenye pyakufunika kakamwe ndi pyakuti ife tisakomerwa kakamwe kucedza na Mulungu wathu. Ife tinakwanisa kucedza naye mu ndzidzi unacita ife phembero kuna iye, unaleri ife Mafala ace na mu ndzidzi unanyerezera ife cifuniro cace na makhaliro ace adidi. Ndzidzi unacedza ife na Yahova ndi wakufunika kakamwe kuna ife!—Masal. 139:17.

2. Thangwi yanji midzidzi inango pisanentsa kucita phembero na kuleri Bhibhlya?

² Ngakhale ife tisakomerwa kakamwe kucita phembero na kuleri Bhibhlya, m’midzidzi inango pyenepi pisanentsa toera kupicita. Ife tiri na pinthu pizinji toera kucita mu umaso wathu, na thangwi ineyi ndi pyakunentsa kugumana ndzidzi toera kulambira Yahova. Basa yathu, kutsalakana banja yathu na pinthu pinango pyakufunika pisaphemba ndzidzi uzinji, na thangwi ineyi pisanentsa kuna ife kugumana ndzidzi toera kucita phembero, kupfundza Bhibhlya na kunyerezera mwadidi pinapfundza ife.

3. Ndi cinthu cipi cinango cakuti cinatikwatira ndzidzi wathu?

³ Pana cinthu cinango cakuti cinakwanisa kutikwatira ndzidzi wathu. Tingakhonda kucita mphole-mphole ife tinamala ndzidzi uzinji mbatikacita pinthu pyakuti nee ndi pyakuipa mbwenye pisatikwatira ndzidzi uzinji wakuti mbatidauphatisira toera kuwangisa uxamwali wathu na Yahova. Mwacitsandzo, ndi pyadidi kupambula ndzidzi toera kupuma na kucita ubalangazi.  Ubalangazi unasankhula ife panango nee ndi wakuipa. Mbwenye tingamala ndzidzi uzinji kakamwe na ubalangazi unoyu, nee tinakhala na ndzidzi wakukwana toera kulambira Yahova. Ife tisafunika kukumbuka kuti ubalangazi nee ndi cinthu cakufunika kakamwe mu umaso wathu.—Mis. 25:27; 1 Tim. 4:8.

4. Tinapfundzanji mu nsolo uno?

⁴ Mu nsolo uno, tinapfundza kuti thangwi yanji tisafunika kuikha pinthu pyakufunika pa mbuto yakutoma. Kusiyapo pyenepi, ife tinapfundzambo kuti tinaphatisira tani mwadidi kakamwe ndzidzi unacedza ife na Yahova, pontho ndi maphindu api anafuna kukhala na ife tingaphatisira mwadidi ndzidzi wathu.

5. Uphungu unagumanika pa Aefesi 5:15-17, unaphedza tani aphale na atsikana toera kucita cisankhulo cadidi mu umaso wawo?

⁵ Sankhulani pinthu pyadidi kakamwe mu umaso wanu. Kazinji kene aphale na atsikana asadzudzumika kuti anacitanji toera kukhala na umaso wadidi. Mbwenye apfundzisi na acibale awo akuti nee ndi Mboni za Yahova panango anaakulumiza toera aende ku universidhadhe kuti akwanise basa yadidi na kuwina kobiri izinji. Kuenda ku universidhadhe panango kunaakwatira ndzidzi uzinji kakamwe. Anyakubala na axamwali mu mpingo anakwanisa kuwangisa aphale na atsikana toera aphatisire umaso wawo m’basa ya Yahova. Ninji pinafuna kuphedza m’phale peno ntsikana anafuna Yahova toera acite cisankhulo cadidi? Kuleri Aefesi 5:15-17 na kunyerezera mwadidi pinaphedza kakamwe m’phale peno ntsikana. (Lerini.) Pakumala kuleri mavesi anewa, m’phale peno ntsikana asafunika kubvundzika: ‘Ninji “pinafuna Yahova”? Ndi cisankhulo cipi cakuti cinankomeresa? Ndi cisankhulo cipi cakuti cinandiphedza toera kuphatisira mwadidi ndzidzi wanga?’ Kumbukani kuti “ntsiku zino ndi zakuipa,” pontho dziko ino yakuti iri kutongwa na Sathani mwakukhonda dembuka inadzafudzwa. Ndi pyandzeru kuphatisira ndzidzi wathu toera kucita pinthu pinakomeresa Yahova.

6. Ndi cisankhulo cipi cidacita Mariya, pontho thangwi yanji cikhali cisankhulo cadidi?

⁶ Ikhani pa mbuto yakutoma pinthu pyakufunika. Toera tiphatisire mwadidi ndzidzi wathu, panango tinafunika kusankhula cibodzi mwa pinthu piwiri pyakuti nee ndi pyakuipa. Ife tisakwanisa kuona pyenepi kubulukira mu pinthu pidacitikira Mariya na Marta mu ndzidzi udaenda Yezu panyumba pawo. Marta akomerwa kakamwe na kutambira Yezu, na thangwi ineyi aphika cakudya cadidi kakamwe. Mbwenye Mariya akhala pantsi mbabvesera Yezu mu ndzidzi ukhalonga iye. Pidacita Marta nee pikhali pyakuipa, mbwenye Mariya “asankhula cinthu cadidi kakamwe.” (Luka 10:38-42) Mukupita kwa ndzidzi, Mariya panango aduwala cakudya cidaphikwa ntsiku ineyi, mbwenye ife tinakwanisa kukhala na cinyindiro cakuti iye cipo aduwala pinthu pidapfundziswa iye na Yezu. Ninga pidacita Mariya wakuti aphatisira mwadidi ndzidzi ukhacedza iye na Yezu, ife tisafunika kuphatisirambo mwadidi ndzidzi unalambira ife Yahova. Mphapo tinaphatisira tani mwadidi ndzidzi unalambira ife Yahova?

7. Thangwi yanji kucita phembero, kupfundza Bhibhlya na kunyerezera mwadidi pinapfundza ife ndi pyakufunika kakamwe?

⁷ Dziwani kuti phembero, kupfundza Bhibhlya na kunyerezera mwadidi pinapfundza ife kusacita khundu ya ulambiri wathu. Tingacita phembero ife tiri kulonga na Babathu wakudzulu, wakuti asatifuna kakamwe. (Masal. 5:7) Tingapfundza Bhibhlya, ife tiri kupfundza  kubulukira kwa Mulungu, wakuti ndi waudziwisi kakamwe kupiringana anthu onsene. (Mis. 2:1-5) Tinganyerezera mwadidi pinapfundza ife thangwi ya Yahova, ife tisanyerezera thangwi ya makhaliro ace adidi kakamwe, pontho tisakumbuka pinthu pyadidi pinafuna kuticitira iye. Ineyi ndi njira yadidi kakamwe yakuphatisira ndzidzi wathu. Mphapo ninji cinafuna kutiphedza toera kucita pyenepi?

8. Njira idaphatisira Yezu ndzidzi wace n’thando isatipfundzisanji?

⁸ Pingakwanisika, sankhulani mbuto yakusowa dzumbi. Onani pidacita Yezu. Mbadzati kutoma utumiki wace pa dziko yapantsi, Yezu amala ntsiku 40 n’thando. (Luka 4:1, 2) Pa mbuto ineyi yakusowa dzumbi, Yezu mbadakwanisa kucita phembero kuna Yahova na kunyerezera mwadidi cifuniro ca Babace kuna iye. Mwakukhonda penula, pyenepi pyaphedza Yezu toera kuthimbana na mayesero akhafuna kugumanikana na iye ntsogolo. Tinatowezera tani citsandzo ca Yezu? Khala panyumba panu pali na anthu azinji, panango pinakhala pyakunentsa toera kugumana mbuto yakusowa dzumbi n’nyumba. Khala ndi tenepo, panango munakwanisa kusaka mbuto yakusowa dzumbi kunja kwa nyumba. Ndi pyenepi pinacita Julie mu ndzidzi unafuna iye kulonga na Yahova m’mphembero. Iye na mamunace asakhala n’nyumba ing’ono ku Fransa, pontho ndi pyakunentsa kuna iye kukhala ekhene mbakhonda kudzudzumiswa. Julie alonga: “Na thangwi ineyi ndisabuluka mbandienda ku parki [mbuto yakusowa dzumbi] ntsiku zonsene. Kweneko ine ndisakwanisa kukhala ndekhene, mbandilonga na Yahova mwakukhonda dzudzumiswa.”

9. Ngakhale kuti Yezu akhali na pinthu pizinji toera kucita, iye apangiza tani kuti akhalemedza uxamwali wace na Yahova?

⁹ Yezu akhali na pinthu pizinji toera kucita mu umaso wace. Iye akhatowererwa na anthu m’mbuto zonsene zikhaenda iye, pontho anthu onsene akhafuna kukhala pabodzi na iye. Ntsiku inango, “anthu onsene a mu nzinda agumanyikana pansuwo wa nyumba ikhali Yezu,” toera kumuona. Ngakhale tenepo, Yezu acita pyonsene pidakwanisa iye toera akhale na ndzidzi wakucita phembero kuna Yahova. Dzuwa mbidzati kudoka, iye agumana “mbuto ya paekha” yakuti mbadakwanisa kucita phembero kuna Babace.—Marko 1:32-35.

10-11. Mwakubverana na Mateu 26:40, 41, ndi uphungu upi udapereka Yezu kuna atowereri ace m’munda wa Getsemani, mbwenye ninji pidacitika?

¹⁰ Namasiku akumalisa a umaso wace pa dziko yapantsi na kunkhomo kwa utumiki wace, Yezu asaka pontho mbuto yakusowa dzumbi toera kunyerezera mwadidi na kucita phembero. Iye agumana mbuto ineyi m’munda wa Getsemani. (Mat. 26:36) Pa ndzidzi unoyu, Yezu apanga atowereri ace cinthu cakufunika kakamwe thangwi ya phembero.

 ¹¹ Onani pidacitika. Iwo afika m’munda wa Getsemani namasiku kakamwe. Yezu aphemba apostolo toera ‘apitirize kukhala m’maso,’ mbaenda kacita phembero. (Mat. 26:37-39) Pidabwerera iye agumana atowereri ace mbakagona. Pidaagumana iye mbakagona, Yezu aapanga kuti: “Pitirizani kukhala m’maso, pontho ndzidzi onsene citani phembero.” (Lerini Mateu 26:40, 41.) Yezu aona kuti iwo akhadaneta kakamwe. Yezu aabvera ntsisi mbadzindikira kuti “manungo mbakufewa.” Ngakhale tenepo, Yezu aenda pontho kaciwiri kacita phembero, pontho pidabwerera iye agumana atowereri ace mbakagona m’mbuto mwakucita phembero.—Mat. 26:42-45.

12. Tinacitanji khala midzidzi inango tisapibva kuti tiri akuneta kakamwe toera kucita phembero?

¹² Sankhulani ndzidzi wakuthema. Midzidzi inango, tinacimwana kucita phembero thangwi yakudzudzumika kakamwe peno kuneta. Khala pyenepi pisacitika kuna imwe, dziwani kuti pisacitikambo kuna anango. Mphapo munacitanji? Anango akuti kazinji kene akhacita phembero pakumala kwa ntsiku aona kuti ndi pyadidi kakamwe kucita phembero mu ndzidzi wakuti iwo nee ali akuneta namaulo. Anangombo asaona kuti kukhala mwadidi pakucita phembero kusaphedza toera akhonde kudzudzumika. Mphapo munacitanji mungaona kuti mukucimwana kucita phembero thangwi yakudzudzumika kakamwe peno kuneta? Pangani Yahova mabvero anu. Khalani na cinyindiro cakuti Babathu wantsisi anabvesesa mabvero anu.—Masal. 139:4.

13. Kodi mitokodzi na mathabhuleti pinatidzudzumisa tani mu ndzidzi unalambira ife Yahova?

¹³ Lekani kudzudzumika na pinthu pinango mu ndzidzi unapfundza imwe. Nee ndi phembero basi yakuti inatiphedza toera kuwangisa uxamwali wathu na Yahova. Kupfundza Mafala a Mulungu na kugumanika pa misonkhano ya mpingo pinatiphedzambo toera kuwangisa uxamwali wathu na Mulungu. Tinacitanji toera kuphatisira mwadidi ndzidzi unapfundza ife Bhibhlya na ndzidzi unagumanika ife pa misonkhano? Bvundzikani: ‘Ninji pinandidzudzumisa pa ndzidzi unagumanika ine pa misonkhano na mu ndzidzi unapfundza ine Bhibhlya?’ Kodi musadzudzumika munthu angakumenyerani ntokodzi, angakutumizirani e-mail peno mphangwa mu ntokodzi peno n’thabhuleti? Lero, anthu azinji ali na mitokodzi peno mathabhuleti. Anyakufufudza alonga kuti mu ndzidzi unapfundza ife tingayesera kubvesesa pinthu cifupi na ntokodzi pisatidzudzumisa. Nyakudziwisa  unango alonga: “Imwe nee munakwanisa kucita mwadidi pinthu pinafuna imwe kucita, thangwi mukunyerezera pinthu pinango.” Mbidzati kutoma misonkhano ya cisa na ya gawo, kazinji kene tisakumbuswa toera kubweza volume ya mitokodzi yathu peno mathabhuleti athu toera tikhonde kudzudzumisa anango. Ife tisafunika kucitambo pibodzi pyene toera ntokodzi wathu peno thabhuleti yathu pikhonde kutidzudzumisa mu ndzidzi unapfundza ife Bhibhlya peno mu ndzidzi unacita ife phembero.

14. Mwakubverana na Afilipi 4:6, 7, Yahova anatiphedza tani toera tikhonde kudzudzumika?

¹⁴ Phembani Yahova toera akuphedzeni kuti mukhonde kudzudzumika. Mungaona kuti mukutoma kunyerezera pinthu pinango mu ndzidzi unapfundza imwe Bhibhlya peno mu ndzidzi wa misonkhano ya mpingo, phembani ciphedzo ca Yahova. Khala muli wakudzudzumika panango pinakhala pyakunentsa kuna imwe toera kusiya kunyerezera pinthu pinakudzudzumisani, mbamuikha manyerezero anu m’Mafala a Mulungu, mbwenye ndi pyakufunika kakamwe kucita pyenepi. Phembani Yahova toera akupaseni ntendere wakuti unatsidzikiza ntima wanu na “manyerezero anu.”—Lerini Afilipi 4:6, 7.

15. Kuphatisira ndzidzi wathu toera kucedza na Yahova kunatiphedza tani?

¹⁵ Kusaka ndzidzi toera kulonga na Yahova, kumbvesera na kunyerezera mwadidi thangwi ya iye pinatiphedza kakamwe. Thangwi yanji? Cakutoma, imwe munacita pisankhulo pyadidi kakamwe. Bhibhlya isatipanga kuti ‘ule anafamba na anthu audziwisi, anadzakhalambo waudziwisi.’ (Mis. 13:20) Natenepa mungaphatisira ndzidzi wanu toera kucedza na Yahova, wakuti ndi waudziwisi kakamwe, imwe munakhalambo waudziwisi. Imwe munadziwa mwadidi kuti munacitanji toera kunkomeresa, pontho munacitanji toera mukhonde kuntsukwalisa.

16. Kuphatisira ndzidzi wathu toera kucedza na Yahova kunatiphedza tani kuti tipfundzise anango mwadidi?

¹⁶ Caciwiri, imwe munakhala mpfundzisi wadidi kakamwe. Tingapfundzisa munthu Bhibhlya, cinthu cakufunika kuna ife ndi kumphedza toera awangise uxamwali wace na Yahova. Tingacita phembero kazinji kene kuna Yahova, pontho tingapfundza thangwi ya iye, ufuni wathu kuna iye unathimizirika, pontho tinakhala na maluso mazinji akupfundzisa nyakupfundza wathu toera afunembo Yahova. Ndi pyenepi pidacita Yezu. Iye alonga thangwi ya Yahova munjira yadidi na yaufuni toera anyakupfundzace afunembo Yahova.—Juwau 17:25, 26.

17. Thangwi yanji phembero na pfundziro ya munthu paekha pisawangisa cikhulupiro cathu?

¹⁷ Cacitatu, munawangisa cikhulupiro canu. Onani pinacitika mungaphemba citsogolero, cibalangazo peno ciphedzo ca Mulungu.  Ndzidzi onsene unatawira Yahova maphembero athu, cikhulupiro cathu cisakhala cakuwanga. (1 Juwau 5:15) Ndi cinthu cipi cinango cinafuna kutiphedza toera kuwangisa cikhulupiro cathu? Pfundziro ya munthu paekha. Kumbukani kuti, “munthu asakhala na cikhulupiro thangwi ya pidabva iye.” (Aroma 10:17) Ngakhale tenepo, toera tikhale na cikhulupiro cakuwanga, ife tisafunika kucita pizinji kupiringana basi ene kupfundza Bhibhlya. Ninji pontho cinafunika ife kucita?

18. Fokotozani kuti thangwi yanji tisafunika kunyerezera mwadidi pinapfundza ife.

¹⁸ Ife tisafunika kunyerezera mwadidi pinthu pinapfundza ife. Onani pidacitikira nyakulemba wa Masalmo 77. Iye atsukwala thangwi akhapibva kuti iye na Aizraeli andzace akhondiwa na Yahova. Namasiku iye nee akhakwanisa kugona thangwi akhadzudzumika kakamwe na pinthu pyenepi. (Mavesi 2-8) Kodi iye acitanji? Iye apanga Yahova: ‘Ndinanyerezera mwadidi mabasa anu onsene na pyonsene pinacita imwe.’ (Vesi 12) Ndimomwene kuti, nyamasalmo unoyu akhakumbuka pinthu pidacitira Yahova atumiki ace nduli, ngakhale tenepo iye adzudzumika mbabvundza: ‘Kodi Mulungu aduwala kutibvera ntsisi, peno ntsisi zace zamala thangwi ya kuipirwa kwace?’ (Vesi 9) Nyamasalmo anyerezera mwadidi pinthu pidacita Yahova mbakumbuka kuti Mulungu abvera ntsisi atumiki ace nduli. (Vesi 11) Pyenepi pyamphedza tani? Nyamasalmo unoyu akhala na cinyindiro cakuti Yahova cipo anadzasiya atumiki ace. (Vesi 15) Munjira ibodzi ene, cikhulupiro canu cinakhala cakuwanga munganyerezera mwadidi pinthu pidacita Yahova kuna atumiki ace na pinthu pidakucitirani iye.

19. Ninji pontho cinafuna kucitika tingaphatisira ndzidzi wathu toera kucedza na Yahova?

¹⁹ Cacinai, pontho cakufunika kakamwe, tinafuna kakamwe Yahova. Mwakupiringana makhaliro anango onsene, ufuni unakuphedzani toera kubvera Yahova, kuwangisira toera kunkomeresa na kupirira mayesero. (Mat. 22:37-39; 1 Akor. 13:4, 7; 1 Juwau 5:3) Kufuna kwathu Yahova na kukhala na uxamwali wakuwanga na iye, ndi pyakufunika kakamwe kuna ife kupiringana pinthu pinango pyonsene!—Masal. 63:1-8.

20. Musanyerezera kucitanji toera mukhale na ndzidzi wakulambira Yahova?

²⁰ Kumbukani kuti kucita phembero, kupfundza Bhibhlya na kunyerezera mwadidi pinapfundza imwe pisacita khundu ya kulambira kwathu. Ninga Yezu, sakani mbuto yakusowa dzumbi toera kucedza na Yahova. Calirani pinthu pyakuti pisakudzudzumisani. Phembani Yahova kuti akuphedzeni toera mukhonde kudzudzumika mu ndzidzi unagumanika imwe pa misonkhano, unacita imwe phembero peno unapfundza imwe Bhibhlya. Mungawangisira toera kuphatisira mwadidi kakamwe ndzidzi wanu cincino, Yahova anakupasani nkhombo, pontho munadzakhala na umaso wakukhonda mala mu dziko ipswa ya Mulungu.—Marko 4:24.