NSOLO WA PFUNDZIRO 4
Thangwi Yanji Tisagumanika pa Cikumbuso?
“Pitirizani kucita pyenepi toera mundikumbukire.”—LUKA 22:19.
NYIMBO 20 Mwapereka Mwananu Wapantima
PINAFUNA IFE KUPFUNDZA *
1-2. (a) Ndi ndzidzi upi wakuti anthu anango asanyerezera kakamwe acibale awo adafa? (b) Yezu acitanji namasiku mbadzati kufa?
NGAKHALE kuti acibale athu afa kale kakamwe, ife tisapitiriza kuanyerezera. Anango asaanyerezera kakamwe makamaka ingafika ntsiku idafa iwo.
2 Kabodzi pa caka, tisagumanyikana na anthu azinji pa dziko yonsene yapantsi toera kukumbuka kufa kwa Yezu Kristu, munthu wakuti tisanfuna kakamwe. (1 Ped. 1:8) Tisagumanyikana pabodzi toera kukumbuka munthu wakuti apereka umaso wace ninga Ciomboli toera kutipulumusa ku madawo na kufa. (Mat. 20:28) Mwandimomwene, Yezu akhafuna kuti atowereri ace akumbuke kufa kwace. Namasiku mbadzati kufa, iye akhazikisa cakudya cancidodo pontho alonga: “Pitirizani kucita pyenepi toera mundikumbukire.”—Luka 22:19.
3. Tinapfundzanji mu nsolo uno?
3 Ndi anthu akucepa anagumanika pa Cikumbuso cakufa kwa Kristu ali na cidikhiro ca kuenda kudzulu. Mbwenye anthu azinji kakamwe akuti ali na cidikhiro cakukhala pa dziko yapantsi asagumanikambo pa Cikumbuso. Mu nsolo uno, ife tinaona mathangwi anacitisa misoka ineyi miwiri kufuna kakamwe kugumanika pa Cikumbuso pa caka. Ife tinaonambo kuti tisaphedzeka tani thangwi ya kugumanika kwathu. Tendeni titome kuona mathangwi mangasi anacitisa anyakudzodzwa kugumanika pa Cikumbuso.
THANGWI YANJI ANYAKUDZODZWA ASAGUMANIKA PA CIKUMBUSO
4. Thangwi yanji anyakudzodzwa asamwa vinyu na kudya nkate pa Cikumbuso?
4 Kabodzi pa caka, anyakudzodzwa angagumanika pa Cikumbuso asadya nkate, pontho asamwa vinyu. Thangwi yanji iwo ndi akuthema kumwa vinyu na kudya nkate? Toera kutawira mbvundzo unoyu, tendeni tione pidacitika pa masiku akumalisa Yezu mbadzati kufa. Pakumala kudya Paskwa, Yezu akhazikisa Cakudya Cancidodo ca Mbuya. Iye akwata nkate na vinyu mbapasa apostolo ace akukhulupirika akukwana 11, pontho aapanga toera adye nkate na kumwa vinyu. Yezu aapanga thangwi ya pibverano piwiri, cibverano cipswa na cibverano ca Umambo. * (Luka 22:19, 20, 28-30) Pibverano pyenepi pyafungula njira toera apostolo na anthu anango akucepa akhale amambo na anyantsembe kudzulu. (Apok. 5:10; 14:1) Anafunika kudya nkate na kumwa vinyu pa Cikumbuso, basi ene ndi Akristu akudzodzwa akuti aciri pa dziko yapantsi, pontho asacita khundu mu pibverano pyenepi piwiri.
5. Anyakudzodzwa asadziwanji thangwi ya cidikhiro ciri na iwo?
5 Thangwi inango inacitisa anyakudzodzwa kugumanika pa Cikumbuso ndi yakuti: Kugumanika kwawo pa Cikumbuso kusaaphedza toera kunyerezera mwadidi cidikhiro cawo. Yahova aapasa cidikhiro cadidi kakamwe cakukhala na umaso wa kwenda na kwenda kudzulu toera atonge na Yezu Kristu pabodzi na anyakudzodzwa anango akuti asacita khundu ya 144.000. Kusiyapo pyenepi, iwo anakwanisa kuona Yahova Mulungu! (1 Akor. 15:51-53; 1 Juwau 3:2) Anyakudzodzwa asadziwa kuti apaswa mwai unoyu wa kuenda kudzulu. Mbwenye toera aende kudzulu, iwo asafunika kupitiriza kukhala akukhulupirika mpaka kufa. (2 Tim. 4:7, 8) Pyenepi pisacitisa anyakudzodzwa kunyerezera pya cidikhiro cawo mwakutsandzaya. (Tito 2:13) Ndiye tani “mabira anango”? (Juwau 10:16) Ndi api mathangwi mangasi anaacitisa kugumanika pa Cikumbuso?
THANGWI YANJI MABIRA ANANGO ASAGUMANIKA PA CIKUMBUSO
6. Thangwi yanji mabira anango asagumanika pa Cikumbuso?
6 Mabira anango asakhala akutsandzaya thangwi ya kugumanika pa Cikumbuso ngakhale kuti nee asadya nkate na kumwa vinyu. Ulendo wakutoma udacemerwa ale akuti ali na cidikhiro ca kukhala pa dziko yapantsi toera kugumanika pa Cikumbuso ndi caka ca 1938. Sentinela ya 1º ya Março ya 1938 yalonga: “Pinadzakhala mwadidi kakamwe kuna [mabira anango] kugumanika pa nsonkhano unoyu toera kuona pinafuna kucitika. . . . Pinadzakhala mwadidi, pontho pinadzakhala pyakutsandzayisa kuna iwo.” Ninga anthu anagumanika pa phwando ya kumanga banja asakhala akutsandzaya, mabira anango asakhalambo akutsandzaya angagumanika pa Cikumbuso.
7. Thangwi yanji mabira anango asakomerwa na nkhani inacitwa pa Cikumbuso?
7 Mabira anango asakomerwambo na cidikhiro cawo. Iwo asabvesera nkhani ya Cikumbuso, inalonga pinafuna kucita Kristu na anthu akukwana 144.000 kuna ale akuti ndi akukhulupirika mu Pyaka 1000 pya Utongi wa Umambo. Nkati mwa utongi wa Mambo Yezu Kristu, ale anafuna kutonga pabodzi na Yezu anadzaphedza kuti dziko yapantsi ikhale paraizu, pontho anadzaphedza anthu toera akhale aungwiro. Mphyakutsandzayisa kakamwe kuna anthu azinji anagumanika pa Cikumbuso, kunyerezera kukwanirisika kwa maprofesiya a Bhibhlya, ninga analongwa pa Izaiya 35:5, 6; 65:21-23; na Apokalipse 21:3, 4. Thangwi yakunyerezera kwawo mbali mu dziko ipswa pabodzi na anyakufunika awo, cidikhiro cawo cisawanga, pontho asakhala dzololo toera kupitiriza kutumikira Yahova.—Mat. 24:13; Agal. 6:9.
8. Ndi ipi thangwi inango inacitisa mabira anango kugumanika pa Cikumbuso?
8 Onani thangwi inango inacitisa mabira anango kugumanika pa Cikumbuso. Iwo asafuna kupangiza kuna anyakudzodzwa kuti asaafuna, pontho asaaphedzera. Mafala a Mulungu alonga kale kuti ale ali na cidikhiro cakukhala pa dziko yapantsi na anyakudzodzwa mbadakhala akuphatana. Munjira ipi? Tendeni tione pitsandzo pingasi.
9. Profesiya inagumanika pa Zakariya 8:23 isapangiza tani mabvero anakhala na mabira anango kuna anyakudzodzwa?
9 Lerini Zakariya 8:23. Profesiya ineyi isapangiza mabvero anakhala na mabira anango kuna abale na alongo akudzodzwa. Mafala akuti ‘Muyuda’ na ‘imwe’ asalonga pya nsoka ubodzi ene, anyakudzodzwa akuti aciri pa dziko yapantsi. (Aroma 2:28, 29) Amuna ‘khumi a pilongero pya madzindza onsene’ asaimirira mabira anango. Iwo ‘asaphata basa mwakuwanga’ peno asacita khundu mu ulambiri wakucena pabodzi na anyakudzodzwa. Natenepa, namasiku pa ntsiku ya Cikumbuso mabira anango asapangiza kuti ndi akuphatana na anyakudzodzwa thangwi yakugumanika kwawo pa Cikumbuso.
10. Ninji pidacita Yahova toera kukwanirisa profesiya inagumanika pa Ezekyele 37:15-19, 24, 25?
10 Lerini Ezekyele 37:15-19, 24, 25. Yahova akwanirisa profesiya ineyi thangwi yakucitisa kuti anyakudzodzwa na mabira anango aphate basa pabodzi mwakuphatana. Profesiya ineyi isalonga pya pimiti piwiri. Ale akuti ali na cidikhiro ca kukhala kudzulu ndi ninga cimuti ‘kuna Ayuda’ (dzindza idasankhulwa amambo a Izraeli), pontho ale ali na cidikhiro ca kukhala pa dziko yapantsi ndi ninga cimuti ‘ca Efraimu’. * Yahova mbadaphataniza misoka miwiri ene mbidzakhala ‘cimuti cibodzi.’ Pyenepi pisabveka kuti iwo mbadatumikira pabodzi mwakuphatana mbatsogolerwa na Mambo wawo Kristu Yezu. Pa caka, anyakudzodzwa na mabira anango asagumanika pa Cikumbuso, tayu ninga misoka miwiri yakusiyana mbwenye ninga ‘nkumbi ubodzi’ na ‘nkumbizi m’bodzi.’—Juwau 10:16.
11. “Mabira” analongwa pa Mateu 25:31-36, 40, asaphedzera tani abale a Kristu?
11 Lerini Mateu 25:31-36, 40. “Mabira” adalonga Yezu asaimirira anthu akulungama mu ntsiku zakumalisa akuti ali na cidikhiro cakukhala pa dziko yapantsi. Anthu anewa asacemerwambo mabira anango. Mwakukhulupirika, iwo asaphedzera anyakudzodzwa akuti asapitiriza pa dziko yapantsi m’basa ikulu kakamwe, yakumwaza mphangwa na kucita anyakupfundza pa dziko yonsene yapantsi.—Mat. 24:14; 28:19, 20.
12-13. Ndi njira zipi zinango zakuti mabira anango asaphedzera abale a Kristu?
12 Pyaka pyonsene, masumana mangasi Cikumbuso mbicidzati kufika, mabira anango asapangiza kuti asaphedzera abale a Kristu thangwi ya kucita khundu ya kampanya ya dziko yonsene toera kucemera anthu kuti agumanike pa Cikumbuso. (Onani bokosi “ Mukukhunganyika Toera Kugumanika pa Cikumbuso?”) Pontho iwo asacita masasanyiro toera kukhala na pidzindikiro pyonsene pya Cikumbuso, ngakhale kuti mu mpingo mwawo nee muli na m’bale peno mulongo wakudzodzwa. Mabira anango asakhala akutsandzaya kakamwe thangwi yakuphedzera abale a Kristu munjira zenezi. Mabira anewa asadziwa kuti Yezu asaona pinacitira iwo abale ace ninga akucitira iye.—Mat. 25:37-40.
13 Mwakukhonda tsalakana cidikhiro cathu, ndi mathangwi api anango anaticitisa kugumanika pa Cikumbuso?
THANGWI YANJI IFE TONSENE TISAGUMANIKA PA CIKUMBUSO
14. Yahova na Yezu apangiza tani kuti asatifuna kakamwe?
14 Ife tisapereka takhuta thangwi ya ufuni udapangiza Yahova na Yezu kuna ife. Yahova apangiza kuti asatifuna munjira zizinji kakamwe mbwenye pana njira ibodzi yakupambulika idapangiza iye kuti asatifuna. Mulungu acita pyenepi pidatumiza iye Mwanace wakufunika mbathabuka, pontho mbafa thangwi ya ife. (Juwau 3:16) Tisatawira kuti Yezu asatifuna kakamwe thangwi yakuperekeka kwace toera kutifera. (Juwau 15:13) Ife nee tinakwanisa kubwezera Yahova na Yezu thangwi yaufuni udapangiza iwo kuna ife. Mbwenye tinakwanisa kupangiza kuti tisapereka takhuta munjira inacita ife pinthu mu umaso wathu ntsiku na ntsiku. (Akol. 3:15) Pontho tisagumanika pa Cikumbuso thangwi tisafuna kukumbuka ufuni udapangiza iwo kuna ife na kupangiza ufuni wathu kuna iwo.
15. Thangwi yanji anyakudzodzwa na mabira anango asapereka takhuta kakamwe thangwi ya ciomboli?
15 Ife tisapereka takhuta kakamwe thangwi ya ciomboli. (Mat. 20:28) Ciomboli ndi cakufunika kakamwe kuna anyakudzodzwa. Thangwi ya ciomboli cidikhiro cawo cinadzakwanirisika. Thangwi ya kukhulupira kwawo ciomboli, Yahova asaaona ninga anyakulungama, pontho ninga anace. (Aroma 5:1; 8:15-17, 23) Mabira anango asaperekambo takhuta thangwi ya ciomboli. Thangwi yakukhulupira ciomboli ca Yezu, Mulungu asaaona ninga akucena, natenepa iwo asakwanisa kuntumikira mbakhala na cidikhiro cakubuluka “mu nyatwa ikulu.” (Apok. 7:13-15) Njira ibodzi yakuti anyakudzodzwa na mabira anango asapangiza kuti asapereka takhuta thangwi ya ciomboli ndi kugumanika pa Cikumbuso pyaka pyonsene.
16. Ndi ipi thangwi inango inaticitisa kugumanika pa Cikumbuso?
16 Thangwi inango inaticitisa kugumanika pa Cikumbuso ndi yakuti tisafuna kubvera Yezu. Mwakukhonda tsalakana cidikhiro cathu, tonsene tisafuna kubvera ntemo uyu udapereka Yezu pa ntsiku idakhazikisa iye Cikumbuso: “Pitirizani kucita pyenepi toera mundikumbukire.”—1 Akor. 11:23, 24.
TISAPHEDZEKA TANI TINGAGUMANIKA PA CIKUMBUSO
17. Cikumbuso cisatiphedza tani toera kukhala na uxamwali wakuwanga na Yahova?
17 Tisakhala na uxamwali wakuwanga na Yahova. (Tiya. 4:8) Ninga pidapfundza ife, Cikumbuso cisatipasa mwai toera kunyerezera thangwi ya cidikhiro cidatipasa Yahova na kunyerezera mwadidi thangwi ya ufuni ukulu udapangiza iye kuna ife. (Yer. 29:11; 1 Juwau 4:8-10) Tinganyerezera mwadidi thangwi ya cidikhiro cathu na ufuni wakukhonda mala wa Mulungu kuna ife, kufuna kwathu Yahova kusathimizirika, pontho uxamwali wathu na iye usakhala wakuwanga.—Aroma 8:38, 39.
18. Kunyerezera mwadidi citsandzo ca Yezu kusatiphedza tani?
18 Tisawangiswa kutowezera citsandzo ca Yezu. (1 Ped. 2:21) Ntsiku zingasi Cikumbuso mbicidzati kufika, ife tisaleri m’Bhibhlya thangwi ya sumana yakumalisa ya Yezu pa dziko yapantsi, kufa kwace, na kulamuswa kwace muli akufa. Pontho ntsiku ya Cikumbuso namasiku, nkhani isatikumbusa ufuni wa Yezu kuna ife. (Aef. 5:2; 1 Juwau 3:16) Tingaleri pya citsandzo cidapangiza Yezu na kunyerezera mwadidi pyenepi, tisakhala na cifuno toera “kupitiriza kufamba ninga mudafambira iye.”—1 Juwau 2:6.
19. Tinapitiriza tani kukhala axamwali a Mulungu?
19 Ife tisakhala dzololo toera kupitiriza kukhala axamwali a Yahova. (Yuda 20, 21) Ife tisapitiriza kukhala axamwali a Yahova tingacita pyonsene toera kumbvera, kucenesa dzina yace na kutsandzayisa ntima wace. (Mis. 27:11; Mat. 6:9; 1 Juwau 5:3) Kugumanika pa Cikumbuso kusatiphedza toera kucita pinthu ntsiku zonsene pinapangiza kuti ‘tisafuna kupitiriza kukhala axamwali a Yahova kwenda na kwenda!’
20. Ndi mathangwi api adidi anaticitisa kugumanika pa Cikumbuso?
20 Mwakukhonda tsalakana khala cidikhiro cathu ndi cakukhala na umaso kudzulu peno pa dziko yapantsi, tonsene tiri na mathangwi adidi toera kugumanika pa Cikumbuso. Pyaka pyonsene tingagumanyikana pabodzi pa ntsiku ineyi, ife tisakumbuka kufa kwa Yezu Kristu, wakuti tisanfuna kakamwe. Kusiyapo pyonsene, ife tisakumbuka kuti Yahova asatifuna kakamwe thangwi ya kutuma Mwanace toera kutiombola. Caka cino, Cikumbuso cinacitwa pakumala kubira kwa dzuwa, Ncixanu, ntsiku 15 ya Abril ya 2022. Ife tisafuna Yahova na Mwanace. Natenepa ntsiku yakufa kwa Yezu ingafika, nkhabepo cinthu cakufunika kakamwe kupiringana kugumanika pa Cikumbuso.
NYIMBO 16 Tinasimba Yahova Thangwi ya Mwanace Wakudzodzwa
^ ndima 5 Mwakukhonda tsalakana khala cidikhiro cathu ndi ca kuenda kudzulu peno kukhala m’paraizu pa dziko yapantsi, tonsene tisakomerwa kugumanika pa Cikumbuso pyaka pyonsene. Mu nsolo uno tinaona mathangwi anagumanika m’Bhibhlya anaticitisa kugumanika pa Cikumbuso, pontho tinaona kuti tinaphedzeka tani tingagumanika pa Cikumbuso.
^ ndima 4 Toera kudziwa pizinji thangwi ya cibverano cipswa na cibverano ca Umambo, onani nsolo wakuti “Munadzakhala ‘Umambo Wa Anyantsembe’” mu revista Ncenjezi ya 15 ya Outubro ya 2014, tsa. 15-17.
^ ndima 10 Toera kudziwa pizinji thangwi ya pimiti piwiri pinalongwa pa Ezekyele kapitulu 37, onani bukhu A Adoração Pura de Jeová É Restaurada!, tsa. 130-135, ndima 3-17.
