1. Mamuna wakuti ndi Nkristu asafunika kucitanji toera pinthu pinfambire mwadidi?

 MAMBO Dhavidhi apanga Salomoni: “Usafunika kukhala wamphambvu na wacipapo.” (1 Ama. 2:1-3) Uphungu unoyu ndi wakufunika kakamwe kuna Akristu onsene lero. Toera kucita pyenepi iwo asafunika kupfundza kubvera mitemo ya Mulungu na kuphatisira midida ya m’Bhibhlya m’makhundu onsene a umaso wawo. (Luka 2:52) Thangwi yanji ndi pyakufunika kakamwe kuti aphale akhale Akristu akukola mwauzimu?

2-3. Thangwi yanji ndi pyakufunika kuti aphale akhale akukola mwauzimu?

² Abale ali na basa yakufunika kakamwe pabanja na mu mpingo. Aphale, mwakukhonda penula imwe mwanyerezera mabasa akuti munakwanisa kuacita ntsogolo. Panango imwe muli na cifuno cakupita m’basa ya ndzidzi onsene, kutumikira ninga ntumiki wakutumikira, pontho mukupita kwa ndzidzi kukhala nkulu wa mpingo. Panango imwe munafunambo kumanga banja mbamukhala na ana. (Aef. 6:4; 1 Tim. 3:1) Toera mukwanirise pifuno pyenepi, pontho pinthu pikufambireni mwadidi, musafunika kukhala Nkristu wakukola. b

³ Ninji cinafuna kukuphedzani toera kukhala Nkristu wakukola? Pali na pinthu pyakufunika kakamwe pyakuti musafunika kupipfundza. Mphapo ninji pinafunika imwe kucita cincino toera mukhunganyike kuti muphate mwadidi mabasa akuti panango munadzakhala nawo ntsogolo?

4. Munagumana kupi pitsandzo pyadidi toera kupitowezera? (Onanimbo foto.)

⁴ Towezerani anthu a makhaliro adidi. Bhibhlya iri na pitsandzo pizinji pyakuti aphale anakwanisa kupitowezera. Anthu anewa a mu ndzidzi wakale akhafuna Mulungu, pontho akhaphata  mabasa akusiyana-siyana toera kutsalakana atumiki ace. Imwe munakwanisambo kugumana pitsandzo pyadidi pakati pa Akristu akukola anagumanika m’banja mwanu na mu mpingo. (Aheb. 13:7) Pontho munakwanisambo kutowezera citsandzo cadidi kakamwe ca Yezu Kristu. (1 Ped. 2:21) Mu ndzidzi unapfundza imwe mwadidi pitsandzo pyawo, onesesani makhaliro awo akuti asakukomerani. (Aheb. 12:1, 2) Buluka penepo onani kuti munatowezera tani citsandzo ca amuna anewa.

5. Munakwanisa tani kukulisa luso yakunyerezera, pontho thangwi yanji ndi pyakufunika? (Masalmo 119:9)

⁵ Kulisani, pontho “tsidzikizani . . . luso yakunyerezera.” (Mis. 3:21) Munthu wakuti ali na luso yakunyerezera nkhabe kucita pinthu mwakucimbiza, mbwenye asanyerezera mwadidi mbadzati kucita cinthu. Toera munthu akhale na luso ineyi mbapitiriza nayo pisaphemba kuwangisira kakamwe. Thangwi yanji? Thangwi aphale mu dziko ino asacita pisankhulo mwakubverana na manyerezero awo peno mabvero awo. (Mis. 7:7; 29:11) Televizau, mafilimu, interneti na ma redes sociais pinakwanisa kutsogolera manyerezero anu na njira inacita imwe pinthu. Mphapo munakwanisa tani kukhala na luso yakunyerezera? Pakutoma, pfundzani Bhibhlya toera mudziwe manyerezero na mabvero a Yahova. Buluka penepo, onani kuti thangwi yanji mphyadidi kucita pinalonga iye. Mungamala phatisirani pinthu pidapfundza imwe toera kucita pisankhulo pyakuti pinakomeresa Yahova. (Lerini Masalmo 119:9.) Imwe mungakulisa n’khaliro unoyu wakufunika kakamwe pinadzakuphedzani toera mukhale Nkristu wakukola mwauzimu. (Mis. 2:11, 12; Aheb. 5:14) Onani njira ziwiri zakuti luso yakunyerezera inakwanisa kukuphedzani: (1) Njira yakutsalakana alongo na (2) njira yakubvala na maonekero anu.

6. Luso yakunyerezera inaphedza tani abale akuti ndi aphale toera kupangiza cilemedzo kuna alongo?

⁶ Luso yakunyerezera inakuphedzani toera kulemedza akazi. Mwacitsandzo, panango m’phale anafuna kudziwa mwadidi mulongo. Pyenepi nee ndi pyakuipa. Mbwenye m’phale wakuti ali na luso yakunyerezera nee analonga, kulemba peno kucita cinthu cakuti cinacitisa mulongo kunyerezera kuti asanfuna, khala nee asafuna kunsemba. (1 Tim. 5:1, 2) Khala ali kubanyirana na mulongo, anacalira kukhala okhene toera mulongo akhonde kulongwa mwakuipa.—1 Akor. 6:18.

7. Luso yakunyerezera inaphedza tani abale akuti ndi aphale toera kusankhula nguwo zakubvala na njira yakucinga tsisi?

 ⁷ Njira inango yakuti aphale anakwanisa kupangiza kuti ali na luso yakunyerezera ndi kusankhula mwadidi nguwo zakubvala na njira yakucinga tsisi. Anthu azinji anacita nguwo na ale anapangiza mabvaliro nee asalemedza Yahova, pontho iwo panango ali na umaso waulukwali. Natenepa nguwo zinacita iwo zinakwanisa kukhala zakutimba kakamwe peno kucitisa kuti mamuna aoneke ninga nkazi. Pyenepi pisapangiza kuti iwo ali na manyerezero aulukwali. Pakusankhula nguwo toera kubvala, m’phale wakuti ali kuthambaruka toera kukhala Nkristu wakukola mwauzimu anatsogolerwa na midida ya Bhibhlya na pitsandzo pyadidi pya abale na alongo mu mpingo. Iye anabvundzika: ‘Kodi pisankhulo pyanga pisapangiza kuti ndiri na manyerezero adidi, pontho ndisalemedza anango? Kodi njira inabvala ine isaphedza anthu toera kukhulupira kuti ndisatumikira Mulungu?’ (1 Akor. 10:31-33; Tito 2:6) M’phale wakuti ali na luso yakunyerezera anakwanisa kulemedzwa na abale na alongo, pontho na Yahova.

8. Abale akuti ndi aphale anapfundza tani kukhala akunyindirika?

⁸ Kukhala wakunyindirika. M’phale wakuti ndi wakunyindirika asaphata mwadidi mabasa ace onsene. (Luka 16:10) Onani citsandzo cadidi kakamwe ca Yezu. Iye akhaphata mwadidi kakamwe mabasace. Iye akhaphata mwadidi mabasa adapaswa iye na Yahova ngakhale mu ndzidzi wakuti pikhali pyakunentsa kuphata mabasa anewa. Iye afuna anthu, makamaka anyakupfundza ace, pontho apereka umaso wace thangwi ya iwo. (Juw. 13:1) Wangisirani toera kuphata mabasa onsene anapaswa imwe toera kupangiza kuti musatowezera Yezu. Khala nee musadziwa kuti munaphata tani basa yanu, khalani wakucepeseka, pontho phembani ciphedzo kuna abale akukola. Lekani kunyerezera kuti kuphata basa pang’ono basi pyakwana. (Aroma 12:11) Mbwenye khala ‘mukuphatira Yahova, tayu anthu’ munawangisira toera kuphata mwadidi basa yanu mbamumalisa basa yonsene inapaswa imwe. (Akol. 3:23) Dziwani kuti nee ndimwe munthu wakulungama, natenepa khalani wakucepeseka, pontho tawirani madodo anacita imwe.—Mis. 11:2.

9. Thangwi yanji aphale asafunika kukhala na maluso akucita pinthu?

⁹ Toera mukhale Nkristu wakukola, musafunika kupfundza pinthu pyakuti pinakuphedzani. Pyenepi pinakuphedzani toera kutawira mabasa mu mpingo, kugumana basa yakuti inakuphedzani toera kutsalakana banjanu na kucita uxamwali wadidi na anango. Onani pingasi mwa pinthu pyenepi pyakufunika.

10-11. Ndi munjira ipi m’phale angapfundza kulemba na kuleri mwadidi asaphedzeka, pontho asaphedza mpingo? (Masalmo 1:1-3) (Onanimbo foto.)

¹⁰ Pfundzani kuleri na kulemba mwadidi. Bhibhlya isalonga kuti munthu wakutsandzaya na munthu wakuti pinthu pisanfambira mwadidi,  asaleri Mafala a Mulungu ntsiku zonsene mbanyerezera mwadidi pinalonga iwo. (Lerini Masalmo 1:1-3.) Thangwi yakuleri Bhibhlya ntsiku zonsene iye asadziwa manyerezero a Yahova akuti anam’phedza toera kunyerezera mwadidi na kuphatisira pinalonga Bhibhlya. (Mis. 1:3, 4) Amuna anewa asafunika mu mpingo. Thangwi yanji?

¹¹ Abale na alongo athu asafuna ciphedzo ca amuna akuti anakwanisa kuapfundzisa na kuapasa uphungu wa m’Bhibhlya. (Tito 1:9) Khala imwe musakwanisa kuleri na kulemba mwadidi, munakwanisa kukhunganyika nkhani na mitawiro yakuti inakwanisa kuwangisa cikhulupiro ca abale na alongo. Imwe munakwanisambo kulemba mphangwa zakufunika mu ndzidzi unapfundza imwe na pakubvesera nkhani pa misonkhano ya pa mpingo, ya cisa na ya gawo. Mphangwa zinalemba imwe zinakuphedzani toera kuwangisa cikhulupiro canu na ca anango.

12. Ninji cinafuna kukuphedzani toera kucedza mwadidi na anango?

¹² Kulisani luso yakucedza mwadidi na anango. Nkristu asafunika kupfundza kucedza mwadidi na anango. Munthu wakuti ali na luso yadidi yakucedza, iye asabvesera, pontho asabvesesa pinanyerezera anango na mabvero awo. (Mis. 20:5) Iye anakwanisa kupfundza pinanyerezera munthu kubulukira ku fala yace, nkhope yace na pinacita iye pakulonga. Imwe nee munakwanisa kupfundza kucita pyenepi mungakhonda kucedza na anthu. Mungaphatisira kazinji kene interneti toera kucedza na anthu, ninga e-mail peno kutumiza mphangwa, pyenepi pinapungula luso yanu yakucedza na anthu nkhope na nkhope. Na thangwi ineyi, sakani miyai toera kucedza na anango nkhope na nkhope.—2 Juw. 12.

13. Aphale anakwanisa kupfundzanji pontho? (1 Timoti 5:8) (Onanimbo foto.)

¹³ Pfundzani kuti munawina tani kobiri toera kugula pinthu pinafuna imwe. Nkristu wakukola mwauzimu asafunika kutsalakanika na kutsalakana anthu a panyumba pace. (Lerini 1 Timoti 5:8.) M’madziko anango, aphale asapfundziswa mabasa na anyakubalawo peno acibale anango. M’madziko anangombo, aphale asapfundza kucita malonda peno mabasa anango mu ndzidzi unapfundza iwo kuxikola. Mwakukhonda tsalakana kunakhala imwe, mphyadidi kupfundza pinthu pyakuti pinakuphedzani toera kugumana basa. (Mabasa 18:2, 3; 20:34; Aef. 4:28) Phatani basa mwaphinga, pontho citani pyonsene pinakwanisa imwe toera mumalise basa idatoma imwe. Anango anadzaona pyenepi, pontho anadzakomerwa kakamwe na basa yanu. Mungacita pyenepi, pinadzakhala pyakukhonda nentsa kugumana basa mbamupitiriza nayo. Makhaliro na maluso adalonga ife, ndi akufunikambo kuna mamuna wakuti ndi Nkristu toera adzaphate  mwadidi mabasace ntsogolo. Tendeni tione mabasa anewa mangasi.

14. Aphale anakhunganyika tani toera apite m’basa ya ndzidzi onsene?

¹⁴ Kutumikira m’basa ya ndzidzi onsene. Abale azinji akuti ndi akukola mwauzimu atoma kutumikira m’basa ya ndzidzi onsene pikhali iwo aphale. Basa ya upainiya isaphedza aphale kupfundza kuphata basa mwadidi na anthu akusiyana-siyana. Isaaphedzambo toera kuona kuti anaphatisira tani mwandzeru kobiri inawina iwo. (Afil. 4:11-13) Njira yadidi toera kutoma kupita m’basa ya ndzidzi onsene ndi kutumikira ninga mpainiya wakuphedza. Azinji asatumikira ninga apainiya akuphedza m’miyezi inango. Pyenepi pisaakhunganya toera adzatumikire ninga apainiya a ndzidzi onsene. Munthu angatoma kutumikira ninga mpainiya, panango anacemerwa toera aphate mabasa anango a ndzidzi onsene, ninga basa yakumanga peno kutumikira ku Bheteli.

15-16. Aphale anakhala tani akuthema toera akhale atumiki akutumikira peno akulu a mpingo?

¹⁵ Kukhala ntumiki wakutumikira peno nkulu wa mpingo. Abale onsene asafunika kuwangisira kuti atumikire ninga akulu a mpingo toera aphedze abale na alongo mu mpingo. Bhibhlya isalonga kuti munthu anawangisira toera kuphata mabasa anewa “asafuna basa yadidi.” (1 Tim. 3:1) Mbadzati kutumikira ninga nkulu wa mpingo, m’bale asafunika kukhala wakuthema toera kutumikira ninga ntumiki wakutumikira. Atumiki akutumikira asaphedza akulu a mpingo munjira zizinji. Akulu a mpingo pabodzi na atumiki akutumikira, mwakucepeseka asatumikira abale na alongo, pontho asamwaza mphangwa mwaphinga. Aphale anakwanisa kukhala akuthema toera atumikire ninga atumiki akutumikira, maseze akhonde kukhala athunga kakamwe. Pontho ntumiki wakutumikira wakuthema anakwanisa kukhazikiswa ninga nkulu wa mpingo kutomera mu pyaka 20.

¹⁶ Munakhala tani wakuthema toera kukhala ntumiki wakutumikira peno nkulu wa mpingo? Bhibhlya isalonga makhaliro anafunika imwe kupangiza. Mbwenye kumbukani kuti makhaliro anewa onsene abuluswa m’Bhibhlya. Mungakhala nawo, munapangiza kuti musafuna Yahova, banja yanu na mpingo. (1 Tim. 3:1-13; Tito 1:6-9; 1 Ped. 5:2, 3) Wangisirani toera kubvesesa n’khaliro ubodzi na ubodzi. Citani phembero kuna Yahova toera akuphedzeni kuti mupangize makhaliro anewa. c

17. M’phale anakwanisa tani kukhunganyika toera akhale mamuna na nsolo wa banja? (Onanimbo foto.)

¹⁷ Mamuna na nsolo wa banja. Mwakubverana  na pidalonga Yezu, Akristu anango akukola asapitiriza pyawo kukhala okhene mbakhonda kusemba. (Mat. 19:12) Mbwenye mungasankhula kusemba, imwe munakhala na mabasa anango akuthimizirika, akukhala mamuna na nsolo wa banja. (1 Akor. 11:3) Yahova asafuna kuti mamuna afune nkazace, atsalakane pifuno pyace, akhale xamwali wadidi kuna iye mbamphedza toera akhale na uxamwali wakuwanga na Yahova. (Aef. 5:28, 29) Makhaliro na maluso adalonga ife pakutoma kwa nsolo uno, ninga kukulisa luso yakunyerezera, kulemedza akazi na kukhala akunyindirika pinakuphedzani toera kukhala mamuna wadidi. Imwe munakhala wakukhunganyika mwadidi toera kuphata mabasa anu ninga mamuna na nsolo wa banja.

18. M’phale anakhunganyika tani toera akhale baba?

¹⁸ Baba. Mungasemba, panango munakhala baba. Munapfundzanji na citsandzo ca Yahova toera mukhale baba wadidi? Pali na pinthu pizinji pyakuti munakwanisa kupipfundza. (Aef. 6:4) Yahova apanga mwanace Yezu kuti asanfuna, pontho asakomerwa naye. (Mat. 3:17) Mungakhala na ana, citani pyonsene pinakwanisa imwe toera ndzidzi onsene mupangize kuti musaafuna. Pontho asimbeni na ntima onsene thangwi ya pinthu pyadidi pinacita iwo. Anyakubala akuti asatowezera citsandzo ca Yahova asaphedza anawo toera akhale amuna na akazi akukola mwauzimu. Imwe munakhunganyika toera kukhala baba wadidi mungapangiza ufuni kuna anthu a pabanja panu na a mu mpingo mbamuatsalakana mwadidi. Kusiyapo pyenepi, munakwanisa kuapanga kuti musaafuna, pontho ndi akufunika kuna imwe. (Juw. 15:9) Pyenepi pinakuphedzani toera muphate mwadidi mabasa anu a ntsogolo akukhala mamuna na baba. Mungacita pyenepi, imwe munakhala wakufunika kakamwe kuna Yahova, kuna banja yanu na kuna mpingo.

19-20. Ninji cinafuna kuphedza aphale toera akhale Akristu akukola mwauzimu? (Onani foto iri patsamba yakutoma.)

¹⁹ Aphale, imwe musafunika kuwangisira toera mukhale Akristu akukola mwauzimu. Musafunika kusankhula anthu a pitsandzo pyadidi toera kuatowezera, kukulisa luso yakunyerezera, kukhala akunyindirika, kukhala na maluso akucita pinthu na kukhunganyika toera kuphata mabasa a ntsogolo.

²⁰ Munganyerezera pyonsene pinafunika imwe kucita ntsogolo, panango munadzudzumika mbamufewa manungo. Imwe munakwanisa kupicita. Kumbukani kuti Yahova asafuna kakamwe kukuphedzani. (Iza. 41:10, 13) Pontho abale na alongo mu mpingo anakuphedzani. Mungakhala Nkristu wakukola mwauzimu, umaso wanu unakhala wakutsandzayisa na wakudzala na nkhombo. Imwe aphale Acikristu, ife tisakufunani kakamwe! Yahova mbakupaseni nkhombo kakamwe mu ndzidzi unawangisira imwe toera kukhala Nkristu wakukola mwauzimu.—Mis. 22:4.