Kodi imwe mwaleri mwacidikhodikho misolo iyi ya Ncenjezi? Khala mwaileri, onani khala munakwanisa kutawira mibvundzo inatowera:

‘Kucinja manyerezero’ kusaphatanizanji? (Aroma 12:2)

Kucinja manyerezero nee ndi basi ene kucita mabasa adidi mu umaso. Mbwenye kusaphataniza kudinga uunthu wathu wankati na kucita macinjo toera ticite pinthu mwakubverana na midida ya Mulungu.—Ncenjezi 01.23, tsa. 8-9.

Tinapangiza tani kuti ndife akulinganira mu ndzidzi unaona ife pinthu pinacitika n’dziko?

Ife tisafuna kuona kuti pinacitika pisakwanirisa tani maprofesiya. Mbwenye m’mbuto mwakuyesera kulotera pinthu pinafuna kucitika, pyakuti pinacitisa anthu kukhala akugawana, ife tisafunika kulonga pinthu mwakubverana na pinalonga gulu ya Yahova. (1 Akor. 1:10)—Ncenjezi 02.23, tsa. 16.

Ubatizo wa Yezu wasiyana tani na ubatizo wa atowereri ace?

Yezu abalwa mu dzindza yakuti ikhadaperekeka kuna Mulungu, natenepa iye nee akhafunika kuperekeka kuna Yahova ninga pinacita ife. Yezu akhali waungwiro na wakusowa madawo. Natenepa, iye nee akhafunika kutcunyuka madawo ace.—Ncenjezi 03.23, tsa. 5.

Tinaphedza tani anango toera atawire pa misonkhano?

Ife tinakwanisa kupereka mitawiro mwacigwagwa, mbatisiya ndzidzi toera anango atawirembo. Ife tisafunikambo kucalira kulonga ntsonga zizinji. Tingacita pyenepi, anango anakhalambo na pinthu toera kutawira.—Ncenjezi 04.23, tsa. 23.

Ndi ipi “Njira Yakucena” inalongwa pa Izaiya 35:8?

Njira ineyi yakuphiphirisa, pakutoma ikhalonga pya njira ikhaphatisira Ayuda toera kubuluka ku Bhabhilonya mbabwerera ku dziko yawo. Mphapo ndiye tanimbo ntsiku zino? Pyaka pingasi mbacidzati kufika caka ca 1919, mabasa mazinji acitwa, ninga kuthumburuza na kudhinda Mabhibhlya na mabasa anango. Atumiki a Mulungu asacita ulendo mu “Njira Yakucena” toera kuenda mu paraizu yauzimu, yakuti inatiphedza toera kutambira nkhombo za Umambo.—Ncenjezi 05.23, tsa. 15-19.

Ndi akazi api awiri akuphipirisa analongwa m’bukhu ya Misangani kapitulu 9?

Bukhu ya Misangani isalonga pya “nkazi wakusowa ndzeru” wakuti ncemerero wace usatsogolera ku “Nthumbi” na “nkazi waudziwisi,” wakuti ncemerero wace usatsogolera ku ‘njira yakubvesesa pinthu’ na ya umaso. (Mis. 9:1, 6, 13, 18)—Ncenjezi 06.23, tsa. 22-24.

Mulungu apangiza tani kuti ndi wakucepeseka na njira idatsalakana iye Loti?

Yahova apanga Loti toera abuluke ku Sodhoma toera athawire ku cisa ca ku mapiri. Loti adembetera toera athawire ku Zoari m’mbuto mwa kuthawira ku cisa ca ku mapiri; Mulungu antawirisa toera kucita pyenepi.—Ncenjezi 07.23, tsa. 21.

Nkazi anacitanji khala mamunace asaona ucipezipezi?

Nkazi asafunika kukumbuka kuti iye nee ali na mulando. Iye asafunika kuwangisa uxamwali wace na Mulungu na kunyerezera mphangwa za m’Bhibhlya zinalonga pya akazi akuti akhathimbana na nyatwa mbwenye abalangazwa na Mulungu. Iye anakwanisa kuphedza mamunace toera acalire kucita pinthu pyakuti pinancitisa kuona ucipezipezi.—Ncenjezi 08.23, tsa. 14-17.

Kunyerezera kunatiphedza tani toera tikhale akukhurudzika tingacitwa mibvundzo thangwi ya pinthu pinakhulupira ife?

Ife tinakwanisa kuona mbvundzo unacita munthu ninga njira yakudziwa pinthu pinanyerezera munthu. Natenepa ife tinakwanisa kuntawira mwakukhurudzika.—Ncenjezi 09.23, tsa. 17.

Tinapfundzanji na Mariya thangwi yakukhala na mphambvu?

Pidadziwa iye kuti anakhala mai wa Mesiya, Mariya awangiswa na anango. Gabhriyeli na Elizabheti aphatisira Malemba toera kuwangisa Mariya. Ife tinakwanisambo kuwangiswa na abale na alongo athu.—Ncenjezi 10.23, tsa. 15.

Yahova anatawira tani maphembero athu?

Iye apikira kuti anabvesera maphembero athu, pontho anaona kuti iwo asabverana tani na cifuno cace. (Yer. 29:12) Panango iye anatawira maphembero mabodzi ene munjira zakusiyana, mbwenye ndzidzi onsene iye anatiphedza.—Ncenjezi 11.23, tsa. 21-22.

Lemba ya Aroma 5:2 isalonga pya “cidikhiro,” mphapo thangwi yanji cidikhiro cisalongwa pontho pa vesi 4?

Munthu angabva mphangwa zadidi panango anakhala na cidikhiro cakukhala na umaso mparaizu pa dziko yapantsi. Mbwenye mu ndzidzi unathimbana iye na nyatwa, angapirira mbaona kuti ndi wakutawirika kuna Mulungu, cidikhiro cace cisathimizirika mbacikhala candimomwene kuna iye.—Ncenjezi 12.23, tsa. 12-13.