Ntsiku inango, mulongo wa ku Nova Zelândia aona vidhyu ya nsolo wakuti “Cuidem Uns dos Outros,” inalonga kuti Yahova ndi wantsisi, pontho asabvera anthu ntsisi. (Iza. 63:7-9) Nakuti iye akhafuna kuphatisira pidapfundza iye, asaka njira zakuphedza anango. Ntsiku ineyi pidaenda iye kagula pinthu pyace ku loja inango, agumana nkazi wakuti nee akhali na pakukhala, pontho iye ambvundza khala anatawira angan’gulira cakudya. Nkazi atawira. Pidabwera mulongo na cakudya, mwacigwagwa aphatisira tratadho ya nsolo wakuti Kodi Nyatwa Zinadzamala?, toera kum’mwazira mphangwa.

Nkazi atoma kulira. Iye alonga kuti akhali m’bodzi wa Mboni za Yahova, mbwenye asiya kale kakamwe undimomwene. Kutomera ndzidzi ungasi nduli, iye akhaphemba Yahova toera am’phedze kuti abwerere kuna Iye. Mulongo apasa nkazi unoyu Bhibhlya, mbacita masasanyiro toera kupfundza naye Bhibhlya. a

Ife tinakwanisambo kutowezera Yahova mbatibvera anthu ntsisi, kuphatanizambo acibale athu na abale na alongo athu mu mpingo. Pontho tinapangiza kuti tisabvera anthu ntsisi tingasaka miyai toera kuamwazira mphangwa zadidi.