1. Thangwi yanji tinakwanisa kulonga kuti cidikhiro cikhali na Abhrahamu nee cikhali capezi?

 YAHOVA apikira kuna xamwali wace Abrahamu kuti madzindza onsene pa dziko yapantsi anadzapaswa nkhombo kubulukira mwa iye. (Gen. 15:5; 22:18) Nakuti Abrahamu akhakhulupira kakamwe Mulungu, iye akhali na cinyindiro cakuti pikiro ineyi ya Mulungu mbidakwanirisika. Ngakhale tenepo, mu ndzidzi ukhali Abrahamu na pyaka 100 na nkazace pyaka 90, iwo nee akhali na mwana. (Gen. 21:1-7) Mbwenye Bhibhlya isalonga: ‘Thangwi ya cidikhiro, Abhrahamu akhulupira kuti mbadakhala baba wa madzindza mazinji mwakubverana na pidapangwa iye.’ (Aroma 4:18) Imwe musadziwa kuti pinthu pikhadikhira Abhrahamu pyadzacitika. Iye adzabala mwana wakuti akhan’dikhira mu ndzidzi uzinji. Dzina yace ikhali Izaki. Thangwi yanji Abhrahamu akhanyindira kuti Yahova mbadakwanirisa pikiro yace?

2. Thangwi yanji Abhrahamu akhali na cinyindiro cakuti pikiro ya Yahova mbidakwanirisika?

² Nakuti Abhrahamu akhadziwa mwadidi Mulungu, “iye akhanyindira na ntima onsene kuti Mulungu mbadacita pidapikira iye.” (Aroma 4:21) Yahova akomerwa na Abhrahamu mbamuona kuti ndi wakulungama thangwi yacikhulupiro cace. (Tiya. 2:23) Ninga pinalongwa pa Aroma 4:18, Abhrahamu akhali na cikhulupiro na cidikhiro. Cincino tendeni tione pidalonga mpostolo Paulu thangwi ya cidikhiro mwakubverana na pidalembwa pa Aroma kapitulu 5.

3. Paulu afokotozanji thangwi ya cidikhiro?

³ Paulu afokotoza kuti thangwi yanji tinakwanisa kukhala na cinyindiro cakuti “cidikhiro cathu nkhabe kutiphatisa mwala.” (Aroma 5:5) Pidafokotoza iye pinatiphedzambo toera kubvesesa kuti cidikhiro cathu ninga Akristu cinakwanisa kukhala cakuwanga. Mu ndzidzi unaona ife mafala a  Paulu anagumanika pa Aroma 5:1-5, nyerezerani kuti munawangisa tani cidikhiro canu thangwi ya ntsogolo. Kucita pyenepi kunakuphedzanimbo toera kuwangisa kakamwe cidikhiro canu. Cincino tendeni tilonge thangwi ya cidikhiro cadidi kakamwe cidalonga Paulu kuti nee cinatiphatisa mwala.

4. Lemba ya Aroma 5:1, 2 isalonganji?

⁴ Lerini Aroma 5:1, 2. Paulu alembera mafala anewa Akristu a ku Roma. Abale na alongo a kweneko akhadapfundza kale thangwi ya Yahova, Yezu Kristu, akhali na cikhulupiro, pontho akhadamala kale kukhala Akristu. Mulungu ‘aaona kuti ndi akulungama thangwi ya cikhulupiro,’ pontho aadzodza na nzimu wakucena. Natenepa iwo akhali na cidikhiro cadidi kakamwe.

5. Ndi cidikhiro cipi ciri na Akristu akudzodzwa?

⁵ Buluka penepo Paulu alembera Akristu akudzodzwa a ku Efeso thangwi ya cidikhiro cidaapasa Mulungu. Cidikhiro ceneci cisaphatanizambo ‘pinthu pinakoyera iye anthu akucena ninga unthaka wawo.’ (Aef. 1:18) Pidalembera iye Akristu a ku Kolose, Paulu afokotozambo mbuto ikhafuna iwo kutambira pinthu pikhadikhira iwo. Iye alonga kuti iwo akhali na ‘cidikhiro cidakoyerwa iwo kudzulu.’ (Akol. 1:4, 5) Natenepa Akristu akudzodzwa, ali na cidikhiro cakulamuswa muli akufa mbakhala na umaso wakukhonda mala kudzulu kunafuna kudzatonga iwo pabodzi na Kristu.—1 Ates. 4:13-17; Apok. 20:6.

6. M’bale Franz alonganji thangwi ya cidikhiro cace?

⁶ Akristu akudzodzwa asakomerwa na cidikhiro cawo. M’bodzi wawo akhali M’bale Frederick Franz, pontho iye alonga tenepa thangwi ya cidikhiro ceneci: “Cidikhiro cathu ndi candimomwene, pontho cinakwanirisika kuna Akristu onsene akudzodzwa akukwana 144.000 munjira yakuti nee tikhaidikhira.” Pakumala kutumikira Mulungu mwakukhulupirika mu pyaka pizinji, mu caka ca 1991, M’bale Franz alonga: “[Ife] tisapitiriza kukomerwa kakamwe na cidikhiro ceneci. . . . Mu ndzidzi unapitiriza ife kudikhira, ife  tisapereka takhuta kakamwe thangwi ya cidikhiro ceneci. Ife tinapitiriza kudikhira mwakukhonda tsalakana ndzidzi unafunika ife kudikhira. Cincino ndisapereka takhuta kakamwe thangwi ya cidikhiro cathu kupiringana kale.”

7-8. Ndi cidikhiro cipi ciri na atumiki a Yahova azinji? (Aroma 8:20, 21)

⁷ Atumiki azinji a Yahova lero ali na cidikhiro cakusiyana. Iwo ali na cidikhiro ninga cikhali na Abhrahamu cakukhala na umaso wakukhonda mala pa dziko yapantsi mbatongwa na Umambo wa Mulungu. (Aheb. 11:8-10, 13) Paulu alemba thangwi ya pinthu pyadidi kakamwe pyakuti anthu ali na cidikhiro ceneci anadzapitambira. (Lerini Aroma 8:20, 21.) Pidapfundza imwe pakutoma mapikiro a Bhibhlya, ndi pikiro ipi idakutsandzayisani kakamwe? Kodi ndi pikiro yakuti ntsogolo imwe munadzakhala waungwiro? Peno ndi pikiro yakuti anyakufunika anu adafa anadzakhala pontho m’maso mparaizu pa dziko yapantsi? Thangwi ya cidikhiro cidatipasa Mulungu, imwe musadikhira pinthu “pyadidi kakamwe.”

⁸ Mwakukhonda tsalakana khala tiri na cidikhiro cakuenda kudzulu peno kukhala pa dziko yapantsi, ife tiri na cidikhiro cadidi kakamwe cakuti cisatitsandzayisa. Pontho tinakwanisa kunyindira kakamwe cidikhiro ceneci. Pidalemba mpostolo Paulu pisapangiza kuti tinacita tani pyenepi. Tendeni tione pidalemba iye thangwi ya cidikhiro cathu. Pinthu pidalemba iye pinatiphedza toera kukhala na cinyindiro cakuti pinthu pinadikhira ife pinadzakwanirisika.

9-10. Mwakubverana na pidalonga Paulu, Akristu asadikhiranji? (Aroma 5:3) (Onanimbo foto.)

⁹ Lerini Aroma 5:3. Lemba ineyi isapangiza kuti tingathimbana na nyatwa, cidikhiro cathu cisakhala cakuwanga. Panango pyenepi pinakudzumatirisani. Mbwenye undimomwene ndi wakuti atowereri onsene a Kristu asadziwa kuti anathimbana na nyatwa. Onani citsandzo  ca Paulu. Iye apanga Akristu a ku Tesalonika kuti: ‘Pikhali ife pabodzi na imwe, ife tikhakupangani mwanyapantsi kuti mbatidathimbana na nyatwa, pontho ndi pyenepi pinacitika kuna ife.’ (1 Ates. 3:4) Pontho kuna Akorinto iye alemba: ‘Abale, ife nee tisafuna kuti imwe mukhale anthu akukhonda dziwa pya nyatwa idaona ife . . . Ife nee tikhadikhira kuti mbatidapulumuka.’—2 Akor. 1:8; 11:23-27.

¹⁰ Lero, Akristu asathimbanambo na nyatwa zibodzi zene. (2 Tim. 3:12) Kodi imwe musatcingwambo thangwi yakukhulupira Yezu na kuntowezera? Axamwali na acibale panango asakusingirirani. Iwo panango asakutsalakanani mwakuipa. Panango patrau wanu peno ndzanu wakubasa asakutcingani thangwi yakukhala kwanu wakukhulupirika. (Aheb. 13:18) Kodi imwe mwatcingwa na mautongi thangwi yakulonga pya cidikhiro canu kuna anango? Mwakukhonda tsalakana nyatwa zinathimbana na ife, Paulu alonga kuti tisafunika kutsandzaya. Thangwi yanji?

11. Thangwi yanji tisafunika kukhala dzololo toera kupirira pinentso?

¹¹ Ife tinakwanisa kutsandzaya maseze tithimbane na nyatwa thangwi tisadziwa kuti pyenepi pinatiphedza toera kukulisa n’khaliro wakufunika kakamwe. Mwakubverana na Aroma 5:3, “nyatwa isabala kupirira.” Akristu onsene anathimbana na nyatwa. Natenepa ife tonsene tisafunika kukhala dzololo toera kupirira. Ife tinatambira nkhombo zinadikhira ife, basi ene tingapirira mbatipitiriza kutumikira Yahova. Ife nee tisafuna kukhala ninga anthu akuti Yezu aalandanisa na mbeu zidagwa pa miyala. Pakutoma iwo atawira mafala mwakutsandzaya, mbwenye ‘pidathimbana iwo na pinentso peno kutcingwa’ iwo abwerera nduli. (Mat. 13:5, 6, 20, 21) Ndimomwene kuti kutcingwa ndi kwakutsukwalisa, mbwenye ife tisaphedzeka tingapirira kutcingwa kweneku mbatipitiriza kutumikira Yahova. Munjira ipi?

12. Tisaphedzeka tani tingapirira pinentso?

¹² Tiyago alonga pinthu pyadidi pinacitika thangwi yakupirira nyatwa. Iye alemba: “Tawirisani kuti kupirira kumalise basa yace, toera mukhale akukwana na adidi mu pinthu pyonsene, mbamukhonda kusowa cinthu.” (Tiya. 1:2-4) Natenepa, Tiyago alonga kuti kupirira kuli na basa peno cifuniro. Kunatiphedza toera kupirira kakamwe, kukhala na cikhulupiro na kunyindira kakamwe Mulungu. Mbwenye tingakhala akupirira, ife tisaphedzekambo munjira inango.

13-14. Kupirira kusabweresanji, pontho pyenepi pisabverana tani na cidikhiro? (Aroma 5:4)

¹³ Lerini Aroma 5:4. Paulu alonga kuti kupirira kusatiphedza toera “kukhala akutawirika kuna Mulungu.” Natenepa, mungapirira imwe musakhala wakutawirika kuna Yahova. Pyenepi nee pisabveka kuti Yahova asakomerwa mungathimbana na nyatwa. Mbwenye asatsandzaya thangwi yakukhulupirika kwanu. Ndi pyakutsandzayisa kakamwe kudziwa kuti tingapirira tisatsandzayisa Yahova!—Mas. 5:12.

¹⁴ Kumbukani kuti Abrahamu apirira nyatwa, pontho akhala wakutawirika kuna Mulungu. Yahova amuona ninga xamwali wace, pontho amuona ninga wakulungama. (Gen. 15:6; Aroma 4:13, 22) Pyenepi pinakwanisambo kucitika kuna ife. Yahova nee asakomerwa na ife thangwi yakukhala na miyai yakuntumikira peno mbuto inantumikira ife. Iye asationa ninga akutawirika thangwi yakupirira kwathu mwakukhulupirika. Pontho mwakukhonda tsalakana thunga yathu, pinthu pinaticitikira, peno maluso athu, ife tonsene  tinakwanisa kupirira. Kodi imwe muli kupirira nyatwa cincino mbamupitiriza kukhala wakukhulupirika kuna Yahova? Khala ndi tenepo, kumbukani kuti muli kutsandzayisa Yahova. Kumbukani kuti kukhala akutawirika kuna Mulungu kunakwanisa kutiphedza kakamwe. Kucita pyenepi kunawangisa cidikhiro cathu.

15. Ninji pidalonga Paulu pa Aroma 5:4, 5, pontho ndi mbvundzo upi wakuti panango anthu anaucita?

¹⁵ Yahova asakomerwa tingapitiriza kukhala akukhulupirika kuna iye mbatipirira pinentso. Paulu apitiriza kulonga: “Kutawirika kusatipasa cidikhiro, pontho cidikhiro nkhabe kutiphatisa mwala.” (Aroma 5:4, 5) Pa Aroma 5:2, Paulu akhadalonga kale kuti Akristu anewa a ku Roma akhali na cidikhiro cakuti ndi cidikhiro ca “mbiri ya Mulungu.” Natenepa, panango munthu anabvundza: ‘Thangwi yanji Paulu alonga pya cidikhiro kuna Akristu anewa akuti akhali kale na cidikhiro?’

16. Cidikhiro ca munthu cisatoma tani kukula? (Onanimbo foto.)

¹⁶ Ife tinakwanisa kubvesesa pikhafuna kulonga Paulu tingakumbuka kuti cidikhiro ndi cinthu cakuti cisathimizirika. Mwacitsandzo, kodi imwe musakumbuka ulendo wakutoma udabva imwe pya cidikhiro cakutsandzayisa cinagumanika m’Bhibhlya? Panango mwanyerezera kuti kukhala m’maso kwenda na kwenda mparaizu pa dziko yapantsi ndi kwakutsandzayisa kakamwe, mbwenye nee mukhali na cinyindiro cakuti pyenepi mbapidacitikadi. Mbwenye pidatoma imwe kupfundza pizinji thangwi ya Yahova na mapikiro ace anagumanika m’Bhibhlya, imwe mwakhala na cinyindiro cakuti pyenepi pinadzacitikadi.

17. Cidikhiro canu cisapitiriza tani kukula pakumala kuperekeka na kubatizwa?

¹⁷ Maseze pakumala kuperekeka na kubatizwa, cidikhiro canu capitiriza kuthimizirika mu ndzidzi ukhapfundza imwe pinthu pinango pizinji, pontho mwakhala wakuwanga mwauzimu. (Aheb. 5:13–6:1) Panango imwe mwacitikirwa na pinthu pinalongwa pa  Aroma 5:2-4. Imwe mwathimbana na nyatwa zizinji, mbwenye mwapirira, pontho Yahova akupangizani kuti imwe ndimwe wakutawirika kuna iye. Nakuti musadziwa kuti Yahova asakufunani, pontho asakomerwa na imwe, cincino muli na mathangwi mazinji toera kudikhira kutambira pinthu pidapikira iye. Cidikhiro canu cakhala cakuwanga kakamwe kupiringana cikhali na imwe pakutoma. Cincino imwe muna cinyindiro cakuti pinadikhira imwe pinadzacitikadi. Pontho musapereka takhuta kakamwe thangwi ya cidikhiro canu. Natenepa pyenepi pisakhuya njira inatsalakana imwe banja yanu, pakucita pisankhulo na njira inaphatisira imwe ndzidzi wanu.

18. Ndi cinyindiro cipi cinatipasa Yahova?

¹⁸ Mpostolo Paulu alonga cinthu cakufunika kakamwe thangwi ya cidikhiro cinakhala na imwe mungakhala wakutawirika kuna Mulungu. Iye akupasani cinyindiro cakuti pinthu pinadikhira imwe pinadzacitika. Thangwi yanji imwe munakwanisa kukhala na cinyindiro ceneci? Paulu apasa Akristu cinyindiro ici: “Cidikhiro nkhabe kutiphatisa mwala; thangwi ufuni wa Mulungu wadzadzwa mʼmitima yathu kubulukira mu nzimu wakucena udapaswa ife.” (Aroma 5:5) Imwe muna mathangwi onsene toera munyindire cidikhiro cidakupasani Yahova.

19. Ndi cinyindiro cipi cakuti munakwanisa kukhala naco thangwi ya cidikhiro canu?

¹⁹ Nyerezerani pikiro idalonga Yahova kuna Abrahamu, pontho nyerezerani kuti iye akhala tani wakutawirika kuna Yahova mbaoniwa ninga xamwali wace. Pinthu pikhadikhira Abhrahamu pyacitikadi. Bhibhlya isalonga: “Abhrahamu atambira pikiro ineyi pidamala iye kudikhira mwakupirira.” (Aheb. 6:15; 11:9, 18; Aroma 4:20-22) Mwakukhonda penula, Abhrahamu nee aphatiswa mwala. Imwe munakwanisambo kukhala na cinyindiro cakuti mungapitiriza kukhala wakukhulupirika kuna Yahova, munatambira pinadikhira imwe. Imwe muli na mathangwi mazinji toera kukhala wakutsandzaya thangwi musadziwa kuti pinadikhira imwe pinadzacitikadi; imwe nee munadzaphatiswa mwala! (Aroma 12:12) Paulu alemba: “Mulungu wakuti asapasa anthu cidikhiro akudzadzeni na kutsandzaya pabodzi na ntendere thangwi ya kunʼnyindira kwanu, toera mudzale na cidikhiro kubulukira mu mphambvu ya nzimu wakucena.”—Aroma 15:13.