1. Thangwi yanji nkate ukhali wakufunika kakamwe kuna anthu?

 NKATE ukhali cakudya cakufunika kakamwe mu ndzidzi wakale. (Gen. 14:18; Luka 4:4) Nakuti nkate ukhali wakufunika kakamwe, midzidzi inango Bhibhlya isaphatisira fala yakuti nkate toera kulonga cakudya. (Mat. 6:11; Mabasa 20:7) Yezu aphatisira nkate mu pirengo piwiri pyakudziwika kakamwe pidacita iye. (Mat. 16:9, 10) Cibodzi mwa pirengo pyenepi cisagumanika m’bukhu ya Juwau kapitulu 6. Mu ndzidzi unapfundza ife pinthu pyenepi, tinaonambo kuti tinapiphatisira tani mu ntsiku zino.

2. Ndi mu ndzidzi upi wakuti anthu azinji akhafuna cakudya?

² Pidamala apostolo a Yezu kumwaza mphangwa, iye aakwata mbaenda nawo ku ntunda unango wa Galileya toera kupuma. (Marko 6:7, 30-32; Luka 9:10) Iwo afika ku Bhetisaidha toera akhale paokha. Mwakukhonda dikhira, mwinji wa anthu wafika pana iwo mbuazungulira. Mbwenye Yezu nee aathamangisa. Iye aabvera ntsisi mbatoma kuapfundzisa thangwi ya Umambo wa Mulungu, pontho awangisa atenda. Mu ndzidzi ukhadoka dzuwa, anyakupfundzace akhadzudzumika kuti anthu anewa mbadadyanji. Anango akhali na cakudya, mbwenye azinji a iwo akhafunika kuenda m’mamidzi toera kagula cakudya. (Mat. 14:15; Juw. 6:4, 5) Kodi Yezu acitanji?

YEZU ACITA CIRENGO CA KUNJIPISA MIKATE

3. Kodi Yezu apanga apostolo ace toera acitenji? (Onanimbo foto iri pa tsamba yakutoma.)

³ Yezu apanga apostolo ace: “Iwo nee asafunika kuenda; apaseni imwe cakudya.” (Mat. 14:16) Pikhaoneka ninga pyenepi nee mbapidakwanisika, thangwi penepo pakhali na amuna cifupi  na 5.000. Pontho tingabvungaza akazi na anapiana, panango pakhali anthu akukwana 15.000 toera kuadyesa. (Mat. 14:21) Andreya alonga: “Pano pana mʼphale mʼbodzi ali na mikate mixanu ya sevadha na ntsomba ziwiri zingʼono. Mbwenye pyenepi pinakwananji kuna anthu onsene awa?” (Juw. 6:9) Kazinji kene mikate ya sevadha ikhadyiwa na anthu azinji, pontho nyama zingʼono panango zikhali zakuuma zakuti zikhadaikhwa munyu. Pikhaoneka kuti pinthu pyenepi pikhali na m’phale nee mbapidakwana toera kudyesa anthu anewa onsene.

4. Tisapfundzanji na Juwau 6:11-13? (Onanimbo mafoto.)

⁴ Yezu akhafuna kucitira pinthu pyadidi anthu anewa, natenepa iye aapanga toera akhale pantsi m’misoka. (Marko 6:39, 40; lerini Juwau 6:11-13.) Buluka penepo apereka takhuta kuna Pai wace thangwi ya nkate na ntsomba. Thangwi ya kucita pyenepi, iye apangiza kuti ndi Mulungu anapasa cakudya anthu, pontho iye apereka takhuta thangwi ya cakudya ceneci. Citsandzo ca Yezu cisatipfundzisa kuti ndzidzi onsene tisafunika kucita phembero mbatidzati kudya, mwakukhonda tsalakana khala tiri tekhene peno pa mwinji. Yezu apanga anyakupfundzace toera agawe cakudya, pontho anthu onsene adya mbakhuta. Penepo pakhali na cakudya cizinji, pontho anthu nee akwanisa kucimalisa. Yezu nee atawirisa kuti cakudya cidasala citayiwe. Iye apanga anyakupfundzace toera agumanye cakudya cidasala toera cidyiwe pontho ndzidzi unango. Yezu aphatisira mwandzeru pinthu pikhali na iye, ceneci ndi citsandzo cadidi kakamwe kuna ife. Khala ndimwe nyakubala, munakwanisa kuphatisira citsandzo ceneci toera kupfundzisa ananu kuti aone kufunika kwa kucita phembero mbadzati kudya, kucitira  udidi anango, kukhala akukoma ntima na kupasa mwakudzala manja ninga pidacita Yezu.

5. Kodi anthu akhafuna kucitanji kuna Yezu, pontho iye acitanji?

⁵ Anthu akhadzumatirwa kakamwe na Yezu, thangwi iye akhacita pirengo, pontho akhapfundzisa mwadidi. Nakuti iwo akhadziwa kuti Mose apikira kuti Mulungu mbadabweresa mprofeta wakupambulika, panango iwo akhabvundzika: ‘Kodi Yezu unoyu ndiye adalongwa kuti mbadabwera?’ (Deut. 18:15-18) Khala ndi tenepo, pisaoneka pakweca kuti Yezu mbadakhala ntongi wankulu kakamwe wakuti mbadapasa cakudya anthu onsene mu Izraeli. Natenepa ‘mwinji wa anthu ukhafuna kuphata Yezu toera amuikhe ninga mambo wawo.’ (Juw. 6:14, 15) Yezu nee atawirisa kuti pyenepi picitike, thangwi mbadatawira kukhala mambo mbadacita khundu ya ndale ya Ayuda akuti akhatongwa na utongi Waciroma. Kodi iye acitanji? Bhibhlya isalonga kuti ‘iye abuluka mbaenda kakhala kuphiri ekhene.’ Maseze anthu akhankakamiza, iye nee atawira kucita khundu ya ndale. Tisapfundzanji?

6. Tinatowezera tani citsandzo ca Yezu? (Onanimbo foto.)

⁶ Ndimomwene kuti anthu nee anatiphemba toera tinjipise cakudya mwacirengo, kuwangisa atenda peno kuyesera kutikhazikisa ninga mambo, mbwenye panango iwo anatikulumiza toera tivotari munthu anaona iwo kuti anakwanisa kumalisa nyatwa. Mwakukhonda penula, Yezu ndi citsandzo cadidi. Iye akhonda kucita khundu ya ndale, pontho iye alonga: “Umambo  wanga nkhabe kucita khundu ya dziko.” (Juw. 17:14; 18:36) Ninga Yezu, ife tisaphedzera Umambo wa Mulungu, tisapanga anango pya Umambo unoyu, pontho tisacita phembero thangwi ya iwo. (Mat. 6:10) Tendeni tilonge pontho thangwi ya cirengo cidacita Yezu ca kunjipisa mikate mbationa kuti tinapfundzanji na pyenepi.

“MABVEKERO A MIKATE”

7. Yezu acitanji, pontho ninji pidacita apostolo? (Juwau 6:16-20)

⁷ Pidamala Yezu kudyesa mbumba, iye na anyakupfundzace abuluka mbabwerera ku Kafarnau na bote, pontho iye aenda kuphiri toera anthu akhonde kunkhazikisa ninga mambo. (Lerini Juwau 6:16-20.) Mu ndzidzi ukhacapa anyakupfundzace paoneka condzi cikulu mbicitomesa mabimbi makulu. Yezu aenda kuna anyakupfundzace na kufamba padzulu pa madzi. Iye acemera mpostolo Pedhru toera acitembo pibodzi pyene. (Mat. 14:22-31) Pidakwira Yezu m’bote, mphepo yathowa. Anyakupfundzace adzumatirwa kakamwe mbalonga: “Mwandimomwene, imwe ndimwe Mwana wa Mulungu.” a (Mat. 14:33) Ndi pyakudzumatirisa kudziwa kuti anyakupfundza alonga pyenepi pidamala Yezu kufamba padzulu pa madzi, tayu pidamala iye kucita cirengo ca kunjipisa mikate. Onani pinthu pinango pyakudzumatirisa pidalonga Marko: “[Apostolo] agopa kakamwe, thangwi iwo nee akhadabvesesa mabvekero a mikate, mitima yawo ikhapitiriza nee kubvesesa.” (Marko 6:50-52) Anyakupfundza akhadzati kubvesesa mphambvu ya Yahova idapasa iye Yezu toera kucita pirengo. Pyenepi mbapidzati kucitika, Yezu alonga pontho thangwi ya cirengo ca mikate, pontho pidalonga iye pisatipfundzisa cinthu cakufunika kakamwe.

8-9. Thangwi yanji mwinji wa anthu waenda ku Kafarnau kasaka Yezu? (Juwau 6:26, 27)

⁸ Mangwana mwace, mwinji wa anthu waenda pontho pa mbuto idadyeswa iwo na Yezu. Mbwenye Yezu na anyakupfundzace nee akhali penepo. Natenepa, anthu akwira m’mabote akhabuluka ku Tibheriyadhe toera kuenda ku Kafarnau kasaka Yezu. (Juw. 6:22-24) Kodi iwo acita pyenepi thangwi akhafuna kupfundza pizinji thangwi ya Umambo? Nkhabe. Mwandimomwene iwo akhafuna kuti Yezu aapase pontho mikate. Tisadziwa tani pyenepi?

⁹ Onani kuti ninji pidacitika mu ndzidzi udafika anthu anewa pana Yezu. Iye alonga kuti iwo akhabwera kuna iye thangwi akhafuna pontho kudya mikate. Iye alonga kuti “iwo adya mikate mbakhuta.” Yezu alandanisa mikate ineyi ‘na cakudya cakuti cisamala.’ Buluka penepo, iye aakulumiza toera aphate basa “thangwi ya cakudya cakukhonda mala cinatsogolera ku umaso wakukhonda mala.” (Lerini Juwau 6:26, 27.) Yezu alonga kuti cakudya ceneci mbacidabuluka kuna Pai wace. Nyerezerani kuti anyakupfundzace apibva tani thangwi ya kukhala na mwai wa kudya cakudya cakuti mbacidaacitisa kukhala na umaso wakukhonda mala! Cakudya ceneci ndi cipi, pontho iwo mbadakwanisa tani kucigumana?

10. Anthu anewa akhafunika kucitanji toera akhale na “umaso wakukhonda mala”?

¹⁰ Pisaoneka kuti Ayuda anewa akhadziwa kuti toera kutambira cakudya ceneci akhafunika kucita pinthu. Panango iwo akhanyerezera thangwi ya ‘mabasa’ akhaphembwa na Mwambo wa Mose. Mbwenye Yezu aapanga: “Basa ya Mulungu inafunika imwe kucita ndi iyi: Musafunika kukhulupira ule adatuma iye.” (Juw. 6:28, 29) Ndi pyakufunika kukhulupira ule adatumwa na Mulungu “toera kugumana umaso wakukhonda mala.” Mwandimomwene, Yezu akhadalonga kale pyenepi. (Juw. 3:16-18,  36) Mukupita kwa ndzidzi, Yezu alonga pontho pinafunika ife kucita toera tigumane umaso wakukhonda mala.—Juw. 17:3.

11. Ninji pinapangiza kuti Ayuda akhadzudzumika kakamwe na pinthu pyakumanungo? (Masalmo 78:24, 25)

¹¹ Kodi anthu anewa akhafunika kucitanji toera kugumana umaso wakukhonda mala? Ayuda anewa nee akhatawira kuti akhafunika kukhulupira Yezu. Na thangwi ineyi, iwo abvundzisa Yezu: “Ndi cirengo cipi cinafuna imwe kucita toera ife ticione mbatikukhulupirani?” (Juw. 6:30) Buluka penepo, iwo alonga kuti mu ntsiku za Mose, Aizraeli akhapaswa mana mwacirengo akuti akhali cakudya cakufunika kakamwe kuna iwo. (Nee. 9:15; lerini Masalmo 78:24, 25.) Pisaoneka pakweca kuti iwo akhanyerezera cakudya candimomwene. Mbwenye pidalonga Yezu kuna iwo thangwi ya “nkate wandimomwene wakudzulu” wakuti mbudaapasa umaso wakukhonda mala, iwo nee abvundzisa kuti pyenepi pisabvekanji. (Juw. 6:32) Iwo akhadzudzumika kakamwe na pinthu pikhafuna iwo, mbacimwana kubvesesa undimomwene wakufunika kakamwe ukhaapfundzisa Yezu. Tisapfundzanji na pyenepi?

NDI PINTHU PIPI PYAKUFUNIKA KAKAMWE KUNA IFE?

12. Mwakubverana na pidapfundzisa Yezu, ndi cinthu cipi cakufunika kakamwe kuna ife?

¹² Cinthu cakufunika kakamwe cinapfundza ife pa Juwau kapitulu 6 ndi cakuti pinthu pyauzimu pisafunika kukhala pa mbuto yakutoma mu umaso wathu. Yezu apangiza pyenepi mu ndzidzi udayeserwa iye na Sathani. Mu ndzidzi unoyu, iye apangiza kuti kubvera Yahova kukhali kwakufunika kakamwe kupiringana cakudya. (Mat. 4:3, 4) Kusiyapo pyenepi, mu Nkhani yace ya Paphiri, Yezu apfundzisa kufunika kwa kutsalakana pyakufuna pyathu pyauzimu. (Mat. 5:3) Na thangwi ineyi tisafunika kubvundzika: ‘Kodi makhaliro anga asapangiza kuti kutumikira Yahova ndi kwakufunika kakamwe kupiringana kucita pinafuna ine’?

13. (a) Thangwi yanji nee ndi pyakuipa kukomerwa na cakudya? (b) Ndi cenjezo ipi idapereka Paulu? (1 Akorinto 10:6, 7, 11)

¹³ Nee ndi pyakuipa kucita phembero thangwi ya pinthu pinafuna ife ntsiku na ntsiku peno kuphatisira pinthu pyadidi piri na ife. (Luka 11:3) Bhibhlya isalonga kuti ndi pyadidi kuti munthu ‘adye, amwe mbatsandzaya thangwi ya basa yace yakuwanga.’ Pontho iyo isalonga kuti pyenepi pyabuluka kuna Mulungu wandimomwene. (Ekle. 2:24; 8:15; Tiya. 1:17) Mbwenye tisafunika kucita mphole-mphole toera tikhonde kuona pinthu pyenepi ninga pyakufunika kakamwe mu umaso wathu. Tinakwanisa kupfundza na pidalemba mpostolo Paulu kuna Akristu a ku Korinto. Iye alonga pinthu pinango pidacitika kuna mbumba ya Izraeli kuphatanizambo pidacitika pa Phiri ya Sinai. Buluka penepo, iye aacenjeza toera ‘akhonde kusirira pinthu pyakuipa ninga pidacita Aizraeli.’ (Lerini 1 Akorinto 10:6, 7, 11.) Yahova akhadacita cirengo toera kupasa cakudya Aizraeli, mbwenye kufuna kwawo cakudya kwadzakhala kwakufunika kakamwe kuna iwo, pontho kwaabweresera nyatwa. (Num. 11:4-6, 31-34) Kusiyapo pyenepi, pidalambira iwo dzimunthu ya ouro apangiza kuti akhafuna kakamwe kudya, kumwa na kucita masendzekero kupiringana kubvera Yahova. (Eks. 32:4-6) Paulu aphatisira citsandzo ca Aizraeli toera kucenjeza Akristu akhali mu ndzidzi wakuti nzinda wa Yerusalemu ukhafuna kufudzwa. Ifembo lero tiri kukhala kunkhomo kwa dziko ino. Ndi thangwi yace tisafunika kubvera uphungu wa Paulu toera ticalire kucita madodo mabodzi ene ninga adacita Aizraeli.

14. Bhibhlya isalonganji thangwi ya pyakudya pinafuna kukhala na ife mu dziko ipswa?

¹⁴ Pidatipfundzisa Yezu toera kucita phembero thangwi ya ‘cakudya ca ntsiku ya lero,’  iye alongambo kuti tisafunika kuphembera toera cifuno ca Mulungu cicitike “pantsi pano ninga kudzulu.” (Mat. 6:9-11) Musanyerezera kuti dziko inadzakhala tani pyenepi pingacitika? Bhibhlya isalonga kuti cifuno ca Mulungu pa dziko yapantsi cisaphataniza kukhala na cakudya cizinji. Bukhu ya Izaiya 25:6-8 isapangiza kuti anthu anadzakhala na “phwando ya pyakudya pyadidi.” Masalmo 72:16 isapikira: “Panadzakhala cakudya cakunjipa pa dziko yapantsi; pontho padzulu pa mapiri panadzabuluka cakudya cizinji kakamwe.” Kodi imwe musadzumatirwa munganyerezera pyakudya pyakusiyana-siyana, kuphika cakudya cinakomerwa na imwe peno cakudya cipswa? Pontho lekani kuduwala kuti ‘munadzabzwala minda ya mauva, mbamudya misapo yace.’ (Iza. 65:21, 22) Kusiyapo pyenepi, anthu onsene anadzatsandzaya thangwi ya pinthu pyenepi pyadidi.

15. Anthu anafuna kudzalamuswa muli akufa anapfundzanji? (Juwau 6:35)

¹⁵ Lerini Juwau 6:35. Nyerezerani pontho pya anthu ale adadya mikate na ntsomba zidanjipisa Yezu mwacirengo. Mu ndzidzi unoyu, iwo nee akhakhulupira Yezu. Ngakhale tenepo, panango iwo anadzalamuswa muli akufa, pontho panango munadzaonana na anango a iwo. (Juw. 5:28, 29) Anthu anewa anadzabvesesa mabvekero a pinthu pidaapanga Yezu kuti: “Ine ndine nkate wa umaso. Munthu anabwera kuna ine cipo anadzakhala pontho na njala.” Mbwenye iwo anadzafunika kukhulupira kuti Yezu apereka umaso wace toera kuombola anthu. Mu ndzidzi unoyu panadzakhala basa yakupfundzisa ale anafuna kudzalamuswa muli akufa na ale anafuna kudzabalwa mu dziko ipswa. Pinadzakhala pyakutsandzayisa kakamwe kuphedza anthu anewa toera apfundze pinthu pyakudzumatirisa thangwi ya Yahova. Kucita pyenepi kunadzakhala kwakutsandzayisa kakamwe kupiringana cakudya. Mwakukhonda penula, kutumikira Mulungu kunadzakhala cinthu cakufunika kakamwe kuna ife.

16. Tinapfundzanji mu nsolo unatowera?

¹⁶ Mu nsolo uno, tapfundza pinthu pingasi pinagumanika m’bukhu ya Juwau kapitulu 6. Mbwenye Yezu akhali na pinthu pinango toera kupfundzisa thangwi ya “umaso wakukhonda mala.” Yezu apanga Ayuda kuti iwo akhafunika kubvesesa mwadidi kakamwe pinthu pyenepi, pontho ife tisafunikambo kupibvesesa. Na thangwi ineyi, mu nsolo unatowera, tinapitiriza kupfundza pinthu pingasi pinagumanika m’bukhu ya Juwau kapitulu 6.