NSOLO WA PFUNDZIRO 51
NYIMBO 3 Yahova Asatipasa Mphambvu, Cidikhiro na Cinyindiro
Yahova Asabvesesa Kulira Kwanu
“Ikhani misozi yanga mʼbudu yanu ya nthembe. Kodi iyo nee yalembwa mʼbukhu mwanu?”—MAS. 56:8.
PINAFUNA IFE KUPFUNDZA
Nsolo uno unatikumbusa kuti Yahova asaona tingatsukwala, pontho asatipasa pinafuna ife toera tikhale akukhurudzika.
1-2. Ndi pinthu pipi pyakuti pinaticitisa kulira?
IFE tonsene tisalira. Midzidzi inango tisalira thangwi ya kutsandzaya. Panango imwe mwalira thangwi yakucitikirwa na cinthu cakufunika kakamwe. Mwacitsandzo, pidabalwa mwananu, pidakumbuka imwe pinthu pyadidi pidacitika kale peno pidaonana imwe na xamwali wakuti mukhadasiyana naye kale kakamwe.
2 Mbwenye kazinji kene, ife tisalira tingacitikirwa na pinthu pyakutsukwalisa kakamwe. Mwacitsandzo, munthu angatitsalakana mwakuipa, tingakhala na utenda peno tingaferwa. Midzidzi ineyi panango tinalira kakamwe mbitikhonda kumatama ninga pidacita Yeremiya mu ndzidzi udafudzwa Yerusalemu na Abhabhilonya. Iye alonga: “Mʼmaso mwanga musabuluka misozi ninga madzi a mu nkulo . . . Ine ndinapitiriza kulira ndzidzi onsene, nee kumatama.”—Ciliro 3:48, 49.
3. Yahova asapibva tani angaona atumiki ace mbakathabuka? (Izaiya 63:9)
3 Yahova asabva kulira kwathu thangwi ya nyatwa zinathimbana na ife. Bhibhlya isalonga kuti Yahova asadziwa ndzidzi unathabuka m’bodzi na m’bodzi wa ife na mu ndzidzi unalira ife, pontho iye asabva tingaphemba ciphedzo cace. (Mas. 34:15) Mbwenye Yahova asacita pizinji kupiringana basi ene kubva maphembero athu. Ninga nyakubala waufuni, iye asatsukwala kakamwe angaona mwanace mbakalira, pontho asafuna kakamwe kutiphedza.—Lerini Izaiya 63:9.
4. Ndi pitsandzo pipi pya m’Bhibhlya pinafuna ife kuona, pontho tinapfundzanji thangwi ya Yahova?
4 Yahova asatipanga kubulukira m’Mafala ace kuti asapibva tani angaona atumiki ace mbakathabuka, pontho asacitanji toera kuaphedza. Mwacitsandzo, ife tinakwanisa kupfundza na pinthu pidacitika kuna Yana, Dhavidhi na Mambo Ezekiya. Ife tinapfundza kuti thangwi yanji iwo alira, pontho tinaona kuti Yahova acitanji mu ndzidzi ukhaphemba iwo ciphedzo. Buluka penepo, tinaona kuti Yahova asatibalangaza tani tingatsukwala, tingasandukirwa peno tingaluza cidikhiro.
YAHOVA ASAONA KULIRA KWANU THANGWI YAKUFERWA
5. Yana akhapibva tani thangwi ya nyatwa zikhathimbana na iye?
5 Yana athimbana na nyatwa zakunentsa kakamwe zakuti zantsukwalisa, pontho zancitisa kulira kakamwe. Ibodzi mwa nyatwa zenezi ndi yakuti mamunace akhali na nkazi unango akhacemerwa Penina wakuti akhaida kakamwe Yana. Kusiyapo pyenepi, Yana nee akhali na mwana, mbwenye Penina akhali na ana azinji. (1 Sam. 1:1, 2) Penina akhasingirira Yana thangwi nee akhabala. Khala pyenepi pyacitikira imwe, mbamudapibva tani? Yana akhali wakutsukwala kakamwe, pontho “akhalira mbacimwana kudya.”—1 Sam. 1:6, 7, 10.
6. Yana acitanji toera kugumana cibalangazo?
6 Yana acitanji toera kugumana cibalangazo? Cinthu cibodzi cidamphedza ndi cakuti iye akhaenda kalambira Yahova ku tabhernakulo. Pikhali iye cifupi na nsuwo wa tabhernakulo, “atoma kuphembera kuna Yahova mbalira kakamwe.” Iye adembetera kuna Yahova: “Onani kuthabuka kunacita ine.” ‘Ndikumbukireni ine ntumiki wanu.’ (1 Sam. 1:10b, 11) Yana apanga Yahova mabvero ace. Pidaona Yahova Yana mbakalira, iye atsukwalambo. Yana akhali wakufunika kakamwe kuna Yahova, pontho iye akhafuna kumbalangaza.
7. Yana apibva tani pidamala iye kupanga Yahova nyatwa zace?
7 Pidamala Yana kulonga mabvero ace kuna Yahova m’phembero, Nyantsembe Wankulu Eli ampasa cinyindiro cakuti Yahova mbadatawira maphembero ace. Kodi Yana apibva tani? Bhibhlya isalonga: “Buluka penepo iye aenda, adya, pontho nee akhalibve wakutsukwala.” (1 Sam. 1:17, 18) Ngakhale tenepo, pinthu pikhantsukwalisa nee pyacinja, mbwenye iye akhala wakukhurudzika. Iye akhanyindira kuti Yahova akhabvesesa mabvero ace na nyatwa zace, pontho mbadamphedza. Ndi pyenepi pidacita Yahova; iye abvesesa mabvero ace, abvesera phembero yace, pontho mukupita kwa ndzidzi amphedza toera kukhala na ana.—1 Sam. 1:19, 20; 2:21.
8-9. Mwakubverana na Ahebheri 10:24, 25, thangwi yanji tisafunika kugumanika pa misonkhano Yacikristu? (Onanimbo foto.)
8 Tisapfundzanji? Kodi imwe muli kuthimbana na nyatwa zakuti zisakutsukwalisani kakamwe? Panango m’bodzi wa acibale anu peno xamwali wanu alowa. Pyenepi pingacitika, panango imwe munafuna kukhala panu mwekha. Ninga Yana wakuti agumana cibalangazo na ciwangiso pidaenda iye ku Tabhernakulo, imwe munakwanisambo kuwangiswa mungaenda ku misonkhano, ngakhale nee muli kupibva mwadidi. (Lerini Ahebheri 10:24, 25.) Pa misonkhano, ife tisabvesera mavesi a m’Bhibhlya akuti asatiwangisa. Ineyi ndi njira ibodzi inaphatisira Yahova toera kutiphedza kuti tisiye kunyerezera pinthu pinatitsukwalisa. Pyenepi pisatiphedza toera kukhala na mabvero adidi maseze pinthu pinatitsukwalisa nee pyamala.
9 Pa misonkhano yathu, abale na alongo asatibalangaza, asapangiza kuti asatifuna, pontho ife tisapibva mwadidi tingakhala pabodzi na iwo. (1 Ates. 5:11, 14) Onani pidacitikira m’bale m’bodzi wakuti ndi mpainiya wakupambulika. Iye alonga: “Midzidzi inango ndisafuna kukhala ndekhene thangwi ndatsuwa kakamwe nkazanga, pontho ndisalira nee kumatama. Mbwenye ndingaenda ku misonkhano ndisakhala wakubalangazika kakamwe. Mafala adidi analonga abale na alongo pa misonkhano na mitawiro yawo, pisandibalangaza kakamwe. Mwakukhonda tsalakana nyatwa na kutsukwala kwanga, ndingafika pa misonkhano ndisapibva mwadidi.” Tingakhala pa misonkhano, Yahova anakwanisa kuphatisira m’bale peno mulongo toera kutiphedza.
Abale na alongo athu anakwanisa kutibalangaza (Onani ndima 8-9)
10. Tinatowezera tani citsandzo ca Yana mu ndzidzi unakhala ife akutsukwala?
10 Yana abalangazwambo thangwi ya kulonga mabvero ace kuna Yahova m’phembero. Imwe munakwanisambo ‘kulonga kuna Yahova pinthu pyonsene pinakudzudzumisani’ mbamukhala na cinyindiro cakuti iye anakubveserani. (1 Ped. 5:7) Mulongo m’bodzi wakuti mamunace aphiwa na mambava, alonga: “Ine ndikhali wakutsukwala kakamwe, natenepa ndanyerezera kuti nee ndinakhala pontho wakutsandzaya. Mbwenye ndingacita phembero kuna Pai wanga wakudzulu Yahova wakuti asandifuna kakamwe, ine ndisakhala wakukhurudzika. Midzidzi inango nee ndisadziwa kuti ndinafokotoza tani mabvero anga, mbwenye iye asabvesesa. Ine ndingakhala wakutsukwala kakamwe peno ndingakhala wakudzudzumika, ndisamphemba toera andipase ntendere, buluka penepo ndisakhala wakukhurudzika muntima, pontho ndisakwanisa kucita pinafuna ine pa ntsiku ineyi. Imwe mungalira kuna Yahova thangwi ya nyatwa zanu, iye asatsukwalambo, pontho asabvesesa mabvero anu. Maseze nyatwa zanu zikhonde kumala, Yahova anakubalangazani, pontho anakuphedzani toera mukhale wakukhurudzika. Iye asaona kuwangisira kwanu toera mukhale wakukhulupirika. (Mas. 94:19; Afil. 4:6, 7) Pontho iye anakupasani nkhombo thangwi ya kupirira kwanu.—Aheb. 11:6.
YAHOVA ASAONA KULIRA KWANU MUNTHU UNANGO ANGAKUSANDUKIRANI
11. Dhavidhi apibva tani mu ndzidzi ukhatsalakanwa iye mwakuipa na anango?
11 Dhavidhi athimbana na nyatwa zakunentsa kakamwe zakuti zancitisa kulira. Iye akhaidiwa na anthu azinji, anango a iwo akhali axamwali ace na acibale ace, pontho akhayesera kum’phekesa. (1 Sam. 19:10, 11; 2 Sam. 15:10-14, 30) Pa ulendo unango Dhavidhi alemba: “Ndaneta kakamwe na nyatwa ziri na ine; ndisaphuphudza mbandikatotesa talimba yanga na misozi. Talimba yanga isadzala na misozi.” Thangwi yanji Dhavidhi akhapibva tenepo? Iye athimiza: “Thangwi ya onsene ale anandithabusa.” (Mas. 6:6, 7) Mu ndzidzi ukhatsalakanwa iye mwakuipa, Dhavidhi atsukwala kakamwe, mbalira.
12. Mwakubverana na Masalmo 56:8, Dhavidhi akhapibva tani thangwi ya Yahova?
12 Maseze akhathimbana na nyatwa zakusiyana-siyana, Dhavidhi akhali na cinyindiro cakuti Yahova akhanfuna. Iye alemba: “Yahova anadzabva fala yakulira kwanga.” (Mas. 6:8) Mu ndzidzi unango, Dhavidhi alonga mafala adidi kakamwe anagumanika pa Masalmo 56:8. (Lerini.) Tingaleri mafala anewa, ife tisabvesesa kuti Yahova asatifuna kakamwe, pontho asabvesesa mabvero athu. Dhavidhi alonga kuti pikhali ninga Yahova ali kukwata misozi yace mbaiikha m’budu ya nthembe peno kuilemba m’bukhu yace. Dhavidhi akhali na cinyindiro cakuti Yahova akhaona, pontho akhakumbuka nyatwa zace. Dhavidhi akhali na cinyindiro cakuti Babace wakudzulu akhadziwa nyatwa zace, pontho akhabvesesa mabvero ace.
13. Tisafunika kukumbukanji anthu anango angatitsukwalisa peno kutisandukira? (Onanimbo foto.)
13 Tisapfundzanji? Kodi imwe mwatsukwala kale thangwi ya kusandukirwa na munthu unango wakuti mukhan’nyindira kakamwe? Panango imwe muli wakutsukwala thangwi munthu akhabanyirana na imwe peno ndzanu wa m’banja akukhondani peno munthu anafuna imwe kakamwe asiya kutumikira Yahova. M’bale unango wakuti nkazace acita upombo mbansiya, alonga: “Ine nee ndikhadikhira kuti iye mbadacita pyenepi. Ndikhapibva ninga wakusowa basa, wakutsukwala, pontho ndikhadaipirwa kakamwe.” Khala munthu unango akusandukirani peno akutsukwalisani ndi pyakubalangaza kakamwe kudziwa kuti Yahova cipo anakusiyani. M’bale unoyu athimiza: “Ine ndadzindikira kuti panango munthu anasiya kukhala wakukhulupirika kuna ife, mbwenye ndzidzi onsene ife tinakwanisa kunyindira Yahova. Mwakukhonda tsalakana pinafuna kucitika, ndzidzi onsene iye anatiphedza. Iye nkhabe kudzasiya anthu ace akukhulupirika.” (Mas. 37:28) Ndzidzi onsene kumbukani kuti Yahova asatifuna kakamwe. Mungasiyiwa na munthu wakuti musanfuna pisapha kakamwe. Mbwenye Yahova nee asacinja mabvero ace kuna imwe. Imwe ndimwe wakufunika kakamwe kuna iye. (Aroma 8:38, 39) Kumbukani kuti mwakukhonda tsalakana njira inakutsalakanani munthu, Babanu wakudzulu Yahova asakufunani kakamwe.
Bukhu ya Masalmo isapangiza kuti Yahova ali dhuzi na ale anatamba nyatwa (Onani ndima 13)
14. Lemba ya Masalmo 34:18 isatipasa cinyindiro cipi?
14 Khala imwe mwasiyiwa na munthu wakuti mukhanfuna, munakwanisa kubalangazwa na mafala a Dhavidhi anagumanika pa Masalmo 34:18. (Lerini.) Bukhu inango yalonga kuti ‘anthu akutsukwala’ panango anapibva ninga ndi akusowa cidikhiro. Mphapo Yahova asaphedza tani anthu anapibva munjira ineyi? Ninga nyakubala wakuti asakhumbatira mwanace mbam’balangaza, Yahova ‘ali dhuzi na ife.’ Iye ndi wakukoma ntima, pontho ali dzololo toera kutiphedza tingatsukwaliswa peno tingaferwa na munthu anafuna ife. Iye asafuna kakamwe kutiwangisa tingatsukwala peno tingapibva ninga akusowa basa. Pontho iye asatipasa pizinji toera kutiphedza kuti tipirire nyatwa zinatamba ife.—Iza. 65:17.
KULIRA THANGWI YAKUSOWA CIDIKHIRO
15. Thangwi yanji Ezekiya atsukwala mbalira?
15 Pikhali iye na pyaka 39, Mambo Ezekiya wa ku Yuda adzindikira kuti akhali na utenda wakukhonda wanga. Mprofeta Izaiya alonga mphangwa zidapangwa iye na Yahova zakuti Ezekiya mbadafa thangwi ya utenda wace. (2 Ama. 20:1) Ezekiya pidabva iye mphangwa zenezi atsukwala, pontho alira kakamwe. Iye acita phembero kuna Yahova toera amphedze.—2 Ama. 20:2, 3.
16. Yahova acitanji kuna Ezekiya?
16 Pidabva Yahova phembero ya Ezekiya na kuona misozi yace, iye ambvera ntsisi mbampanga: “Ndabva phembero yako, pontho ndaona misozi yako. Na thangwi ineyi, ine ndinakuwangisa.” Kubulukira kuna mprofeta Izaiya, Yahova apikira kuti anathimizira ntsiku za umaso wace, pontho mbadapulumusa Yerusalemu m’manja mwa Asirya.—2 Ama. 20:4-6.
17. Yahova asatiphedza tani tingathimbana na nyatwa za ungumi? (Masalmo 41:3) (Onanimbo foto.)
17 Tisapfundzanji? Musafunika kucitanji mungadzindikira kuti muli na utenda wakuti nee unawanga? Citani phembero kuna Yahova toera kumpanga mabvero anu. Iye anakubveserani maseze mucite phembero mbamukalira. Bhibhlya isalonga kuti “Baba wantsisi zikulu, Mulungu wacibalangazo consene” anadzatibalangaza mu nyatwa zathu zonsene. (2 Akor. 1:3, 4) Mu ntsiku zino, ife nee tisadikhira kuti Yahova amalise nyatwa zathu zonsene, mbwenye tiri na cinyindiro cakuti ndzidzi onsene iye anatiphedza. (Lerini Masalmo 41:3.) Mukuphatisira nzimu wace wakucena, Yahova asatipasa mphambvu, udziwisi na ntendere wa m’manyerezero toera tikwanise kupirira. (Mis. 18:14; Afil. 4:13) Pontho kubulukira m’Bhibhlya, iye asatipasa cidikhiro cakuti ntsogolo nee munthu m’bodzi anadzaduwala.—Iza. 33:24.
Yahova anatawira maphembero athu, mbatipasa mphambvu, udziwisi na ntendere wa m’manyerezero (Onani ndima 17)
18. Ndi malemba api akuti anakwanisa kukubalangazani mu ndzidzi unathimbana imwe na nyatwa? (Onani bokosi yakuti “ Malemba Akuti Asatibalangaza Tingalira.”)
18 Ezekiya awangiswa kakamwe na mafala adalonga Yahova. Munjira ibodzi ene, ife tinakwanisambo kuwangiswa tingaleri mafala adalonga Yahova kubulukira m’Bhibhlya. Tingakhala akutsukwala, Bhibhlya inakwanisa kutibalangaza, pontho inatiphedza toera tikhale akukhurudzika. (Aroma 15:4) Mulongo unango wa ku Afrika pidadzindikira iye kuti ali na utenda wa kankro, alira kakamwe. Iye alonga: “Lemba ibodzi idandibalangaza ndi Izaiya 26:3. Maseze ife nee tinakwanisa kumalisa nyatwa zathu, vesi ineyi isapangiza kuti Yahova anatiphedza toera tikhale akukhurudzika na kupirira nyatwa zathu.” Kodi pali na lemba idakubalangazani mu ndzidzi ukhathimbana imwe na pinentso, peno pikhapibva imwe kuti nee muli na cidikhiro?
19. Ninji pinadikhira ife ntsogolo?
19 Nakuti tiri kukhala kunkhomo kwa ntsiku zakumalisa, tisadikhira kuti tinathimbana na nyatwa zizinji kakamwe zakuti zinaticitisa kulira. Ninga taona citsandzo ca Yana, Dhavidhi na Mambo Ezekiya, Yahova akhaona kulira kwawo, pontho akhatsukwalambo na pyenepi. Yahova asatifuna thangwi ya kukhulupirika kwathu kuna iye, mwakukhonda tsalakana nyatwa zinathimbana na ife, pontho iye asakumbuka kulira kwathu. Natenepa, tingathimbana na nyatwa, tisafunika kupanga Yahova pinthu pyonsene pinatidzudzumisa. Tisafunika kupitiriza kukhala akuphatana na abale na alongo athu mu mpingo. Pontho tingaleri Bhibhlya, ife tisakwanisa kugumana cibalangazo ca Yahova. Tinakwanisa kukhala na cinyindiro cakuti tingapirira mwakukhulupirika, Yahova anatipasa nkhombo. Pyenepi pisaphataniza pikiro yakuti iye anadzapukuta misozi yonsene m’maso mwathu, inabuluka thangwi yakutsukwala, kusandukirwa peno kuluza cidikhiro. (Apok. 21:4) Buluka penepo, ife tinadzalira basi ene thangwi yakutsandzaya.
NYIMBO 4 “Yahova Ndi Nkumbizi Wanga”
