Mpostolo Paulu alembera Timoti wakuti akhalimbo nkulu wa mpingo: “Ine ndisakupanga mwakubveka pamaso pa Mulungu na Kristu Yezu pabodzi na aanju adasankhulwa, toera utowezere pitsogolero pyenepi mwakusowa tsankhulo peno kuyang’ana nkhope.”—1 Tim. 5:21.

Pakutoma, tisafunika kudziwa kuti aanju anewa nee ndi a nsoka wa 144.000. Pidalemba Paulu mafala anewa kuna Timoti, kulamuswa kwa Akristu akudzodzwa kukhadzati kutoma. Apostolo na anyakudzodzwa anango akhadzati kukhala na manungo auzimu, natenepa iwo nee akhali “aanju adasankhulwa.”—1 Akor. 15:50-54; 1 Ates. 4:13-17; 1 Juw. 3:2.

Kusiyapo pyenepi, “aanju adasankhulwa” nee ndi aanju adasandukira Mulungu mu ndzidzi wa Madzi Makulu. Thangwi aanju anewa asankhula kukhala kukhundu ya Sathani mbakhala madimonyo, pontho iwo ndi anyamalwa a Yezu. (Gen. 6:2; Luka 8:30, 31; 2 Ped. 2:4) Ntsogolo, iwo anadzamangwa mbaponywa n’djenje yakuzika kakamwe mu pyaka 1.000, buluka penepo anadzafudzwa pabodzi na Sathani.—Yuda 6; Apok. 20:1-3, 10.

Natenepa, “aanju adasankhulwa” adalonga Paulu pa vesi ineyi panango ndi aanju anaphata basa na “Mulungu na Kristu Yezu” kudzulu.

Pali na aanju azinji kakamwe akukhulupirika. (Aheb. 12:22, 23) Pisaoneka kuti Yahova nee asapasa basa ibodzi ene aanju onsene. (Apok. 14:17, 18) Mwacitsandzo, pa ulendo unango, Yahova asankhula anju m’bodzi basi toera kupha anyankhondo 185.000 a Asiriya. (2 Ama. 19:35) Aanju anango, panango apaswa basa yakubulusa “mu Umambo [wa Yezu] anthu onsene anacitisa andzawo kugwa m’madawo na ale anacita pinthu pyakuipa.” (Mat. 13:39-41) Anango panango apaswa basa yakugumanya “anthu adasankhulwa” toera kuenda kudzulu. (Mat. 24:31) Anangombo asapaswa basa ‘yakutitsidzikiza m’mbuto zonsene zinafamba ife.’—Mas. 91:11; Mat. 18:10; onanimbo Mateu 4:11; Luka 22:43.

“Aanju adasankhulwa,” analongwa pa 1 Timoti 5:21 panango akhali aanju adapaswa basa yakutsalakana mipingo. M’mavesi a nduli, Paulu apereka uphungu wakuti akulu a mpingo akhafunika kutsalakana tani mabasa awo, pontho kuti anthu mu mpingo akhafunika kupangiza cilemedzo kuna akulu a mpingo. Kusiyapo pyenepi, akulu a mpingo akhafunika kutsalakana abale na alongo mu mpingo “mwakusowa tsankhulo peno kuyang’ana nkhope,” pontho nee akhafunika kucita pisankhulo mbadzati kunyerezera mwadidi. Natenepa, pa vesi ineyi Paulu apasa uphungu akulu a mpingo kuti mbadatsalakana tani mpingo. Iye alonga kuti akulu a mpingo akhatumikira abale awo “pamaso pa Mulungu na Kristu Yezu pabodzi na aanju adasankhulwa.” Pyenepi pisapangiza pakweca kuti aanju anango asapaswa basa yakutsalakana mipingo. Kusiyapo pyenepi, iwo asatsidzikiza atumiki a Mulungu, asaaphedza m’basa yakumwaza mphangwa, buluka penepo asapanga Yahova pinaona iwo.—Mat. 18:10; Apok. 14:6.